Лука 4
4
Иблисдин Иса рякъʼан адауз чалишмишʼвал
1Гирами Рюгьну ацӀу Иса Ярдан нирхъан кьяляхъ хътакуру, ва Рюгьну Думу ичӀи чюлиз гъахуру. 2Душваъ иблис ягъчӀвур йигъан Иса рякъʼан адауз чалишмиш шулу. Исайи му йигъари фукӀа дирипӀди гъахьну, хъа гьадму йигъар улдучӀвиган, аьхирки, Дугъаз яманди гаш шулу.
3Хъа иблисди Исайиз гъапи:
– Эгер Уву Аллагьдин Бай вуш, гьаму гъвандикан уьл хьуз гъит.
4Исайи жаваб вуди гъапи:
– Гирами китабариъ дибикӀнаки: «Инсан ялгъуз уьлʼинди яшамиш шуладар».
5Иса ягъал йишвʼина адаъну, иблисди Дугъаз саб геренди вари дюнʼяйин паччагьлугъар улупуру, 6ва кӀуру:
– Вари гьаму паччагьлугъар ва дурарин гьяйбат Увуз тувдиза, фицики дурар йиз ихтиярназ тувна ва узхьан дурар узуз ккунириз тувуз шулзухьан. 7Эгер Уву узуз икрам гъапӀиш, гьадрар вари Явдар хьиди.
8Исайи дугъаз жаваб туву:
– Гирами китабариъ дибикӀна: «Яв Агъа Аллагьдиз икрам апӀин ва сар ДугъазтӀан гъуллугъ мапӀан».
9Иблисди хъана Иса, Ерусалимдиз духну, Аллагьдин хулан вартӀан ягълишвʼин дерккру ва кӀуру:
– Эгер Уву Аллагьдин Бай вуш, ари гьамлин исина урс, 10фицики дибикӀна: «Аллагьди Чан малайикариз, гъайгъушнаъ духьну Уву уьрх кӀури, амур апӀиди. 11Ва Яв ликкьан гъвандихъ йивуз гъидритруганси, Уву чпин хилариина гъадагъиди».
12Исайи дугъаз жаваб вуди гъапи:
– Гьамцира дупна: «Яв Агъа Аллагь ахтармиш мапӀан».
13Иса рякъʼан адаъру вари чарйир хътӀарцциган, жара саб ужуб вахт ккабхъайиз, иблис Дугъхьан гьудучӀвну гъушу.
«Гьич сар пайгъамбарра чан ватандиъ лайикьлуди кьабул апӀури шулдар»
14Иса Аллагьдин Рюгьнан тясирнаккди Галилей уьлкейиз хътакуру ва Дугъан гьякьнаан бютюн уьлке вуйибси аваза рабгъуру. 15Исайи мистариъ аьгъювалар улупуйи, ва вардари Думу адлу апӀуйи.
16Хъа Иса, Учв тербияламиш гъаши Назаретдиз дуфну, Чан аьдат вуйиси, султ йигъан мистаъ учӀвру ва Гирами китаб урхуз гъудужвуру. 17Гьадмуган Исайихьна Ишая пайгъамбрин китаб тувру. Дугъура китаб абццру ва гьамци дибикӀнайишвʼин алахъуру:
18– Агъайин Рюгь Узʼин ал. Узуз Аллагьди касибариз Ужувлан хабар рабгъуз гьюкум тувнайиз ва Узу йисирариз азадвал хьади, курариз акв хьади ва гьацира зулум-зиллетнакк ккайидар азад апӀуз ва 19Аллагьдин рягьимнан вахт улубкьну, кӀуру, хабар тувуз гьаъну.
20Хъасин китаб ккибкну, мистан гъулугънаъ айирихьна тувну, Иса деъру. Хъа мистаъ айи вардарин улар Гьадгъуин алди гъахьну. 21Исайи дурариз кӀуру:
– Учвуз гъеерхьу Гирами китабдиъ дидикӀнайи гьаму гафар, магьа, гъи ичв улихь кӀулиз удучӀвна.
22Исайин улихь варидари гьаци вуйивал улупу ва, Дугъан мелзналан гъюрайи кабалгру гафариин мюгьтал шули, дурари гьерхри гъахьну:
– Му ихь Юсуфдин бай даринхъа?
23Исайира дурариз гъапи:
– Гьелбетки, учву Узуз, абйирин мисалик дупнайиганси, пидичва: «Эй духтир! Сифте Жвуву Жвув сагъ апӀин!» «Уву Кафернагьумдиъ гъапӀу аьламатнан ляхнарикан учуз деебхьначуз, гьамус гьадму ляхнар мушваъ, Яв абайин ватандиъра, апӀин» пидичва. 24Гьякьди кӀуразачвуз, гьич сар пайгъамбарра чан абайин ватандиъ лайикьлуди кьабул апӀури шулдар. 25Дюзди кӀуразачвуз: Израилиъ Илʼясдин девриъ, шубуд йисанна йирхьуб вазлин арайиъ мархь адарди гъабхьи вахтна, гизаф ачӀни дишагьлийир гъахьнийи, фицики вари жилиин аьхю гаш алабхънийи. 26Хъа дурарикан гьич сарихьнакьан Илʼяс пайгъамбар гьаундайи. Думу ялгъуз Сайдайин багахь хьайи Сарепта кӀуру шагьриз сар ачӀни дишагьлийихьнатӀан гьаундайи.
27Гьацира Елисей пайгъамбрин девриъ хамран аьзар кабхьнайидарра гизаф айи, хъа Сирияйиан вуйи Найман кӀуру сар касдикантӀан ктарди, сариканра хам марцц гъабхьундайи.
28Му гафар гъеерхьиган, мистаъ айидарик хъял кубчӀвру 29ва, гъудужвну, дурари Иса, гъарзарилан итбан бадали, утӀурккну, шагьур али дагъдиина гъахуз хъюгъру. 30Хъа Иса, рякъюъди дурарин кьялгъян гъюдучӀвну, гъушнийи.
Исайи жинар кайи кас сагъ апӀуб
31Хъа Галилейиъ айи Кафернагьум кӀуру шагьриз дуфну, Исайи халкьдиз султ йигъари аьгъювалар улупури гъахьну. 32Исайин улупбариин халкь мюгьтал шуйи, фицики Дугъан гафар гьюкум айидар вуйи.
33Мистаъ жин кубчӀвнайи сар кас айи, ва дугъʼан диди зарбди чӀигъ апӀуру:
34– Учухъ фу хъаяв, Назаретдиан вуйи Иса? Уву учу пуч апӀуз дуфнана? Уву фуж вуш, аьгъязуз, Аллагьдин Гирамир!
35Исайи, дидиз улхуз гъадагъа дапӀну, гъапи:
– ХъючӀюбкь ва удубчӀв дугъʼан!
Жин, думу кас мистан кьялʼин алдакну, дугъаз саб зарарра тутрувди, дугъʼан удубчӀвуру.
36Му гъябкъю вардари, русвагь духьну, чиб-чпиз гьамци кӀури гъахьну:
– Мурар фу аьламатнан гафар ву: Дугъу, Чан гьюкмиинди ва кьувватниинди амур апӀури, жинар ктаурада!
37Юкьуб аьтраф вари йишвариъ Исайин аваза рабгъуру.
Симондин сижарбаб
38Мистʼан удучӀвну, Думу Симондин хулаз гъушу. Симондин сижарбабак пис убцрушнан уьзур кайи ва Исайикан думу сагъ апӀувал тӀалаб гъапӀнийи. 39Дугъан зиина ял духьну, Исайи убцрушназ гъадагъа апӀуру ва думу ктубчӀвуру. Симондин сижарбаб, дишла ликриина гъудужвну, хяларин гъайгъушнаъ учӀву.
40Ригъ алабхъурайи вахтна, Исайин багахьна жюрбежюр иццрушнар кайидар хури гъахьну. Исайира, гьаруриин Чан хилар иливури, дурар сагъ апӀури гъахьну. 41Гизафдариан жинарра удучӀвури гъахьну. Жинари: «Уву Аллагьдин Бай вува!» – кӀури, чӀигъар апӀуйи. Хъа Дугъу Учв Месигь вуйибдикан жарадариз пуб дурариз гъадагъа апӀури гъахьну, фицики дурариз, Думу Месигь вуйиб, аьгъяйи.
Ягьудияйиъ аьгъювалар улупуб
42Хъайигъан гвачӀин улубкьиган, хулʼан удучӀвну, Иса халват йишваз гъягъюру, хъа халкьди Думу агури шулу. Хъасин Исайихьна дуфну, учхьан мягъян кӀури, Дугъахъ ккарагури хъюгъру.
43Амма Исайи дурариз гъапи:
– Жара шагьраризра Аллагьдин Паччагьлувал гъюрайиваликан Ужувлан хабар рабгъуб лазим ву, гьаз гъапиш Узу гьаддин бадали Гьаънайир вуза.
44Исайи Ягьудия уьлкейин мистариъ аьгъювалар улупувал давам апӀури гъахьну.
Currently Selected:
Лука 4: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
