Марк 14

Иса йикӀбан ниятар

1Кьюд йигълан Пасха ва ЛичӀван лавшарин машкврар улукьурайи. Аьхю маллйирина къанунчйири Иса дидисну йикӀуз чарйир агурайи. 2«Хъа анжагъ машквар йигъан ваъ, – кӀуйи дурари, – даршиш халкьдин арайиъ гъалабулугъ абхъди». 3Думу Вифания гъулаъ хамран аьзар кади гъахьи Шимондин хулаъ гештнаъ айиган, душваъ, лизи ругдин бетисибдиъди, нард гьарин багьа марцци ягъ хьади, сар дишагьли учӀвру, ва дугъу дидиъ айи ицци ниъ хъайи ягъ Исайин кӀулʼин улубзуру. 4Душваъ айи хяларикан сакьюдари наразиди чиб-чпикди гьамци кӀуйи:

5– Гьамкьан ицци ниъ хъайи ягъ мугъу гьаз чӀур гъапӀу? Гьаму ччим шубудварж динар пулихъ масу тувну, хъа гьадму пул касибариз пай апӀуз шуйи, аьхир!

Дурари дишагьлийиз люкьнар апӀуз хъюгъю, 6хъа Исайи кӀуру:

– Думу сикинди гъитай! Фу кӀури учву дугъак кудукьначва? Узуз дугъу ужуб ляхин гъапӀну! 7Касибар гьарган учвухъди хьиди, ва учвхьан дурариз кюмекар апӀуз хьибдичвухьан, хъа Узу учвухъди гьарган хьидарза. 8Дугъу чахьан шлуб гъапӀну: улихьмиди дугъу Йиз жан, ччим кадатну, накьвдиъ ивуз гьязур гъапӀну. 9Гьякь кӀуразачвуз: дюнʼяйиъ му Ужувлан хабар наан рабгъури гъабшишра, думу кӀваин апӀиди ва дугъу гъапӀубдикан ктибтиди.

Ягьудайи Иса масу тувуб

10Гьадмуган ЙицӀикьюрикан сар, Искариот лакӀам хьайи Ягьуда, аьхюну маллйирихьна, Иса масу тувбан бадали, гъягъюру. 11Ягьудайихъ хъпехъдар шад шулу ва, дици гъабшиш, пул тувуз гаф тувру. Гьаддихъан думу Иса масу тувуз гъулай вахт абгури шулу. 12ЛичӀван лавшарин машквран садпи йигъан, пасхайин ччил гъурбан апӀруган, ученикари Исайихьан гьерхру:

– Увуз пасхайин хураг учу наан гьязур дапӀну ккундувуз? Йип, гьязур апӀуз гъягъюча.

13Гьадмуган Дугъу, гьамци дупну, кьюр ученик гьаъру:

– Шагьриз гъарахай. Учвуз шид айи гажин гъабхурайи сар кас гьахъдичвуз, гьадгъан кьяляхъди гъарахай, 14ва думу учӀву хулан эйсийиз: «Мялимди гьерхра: „Узу ученикарихъди пасхайин хураг ипӀру хал набши?“» йипай. 15Дугъу учвуз ккабалгнайи, машквраз вари гьязурди айи, заан аьхю хал улупиди. Гьадушваъ ухьуз вари гьязур апӀинай. 16Ученикар гъягъюру. Шагьриз гъафидариз Исайи гъапибси вари шулу ва пасхайин хураг гьязур апӀуру. 17Хябяхъ гъабхьибси, йицӀикьюридра хъади, Иса гъюру. 18Дурари, суфрайихъ деъну, уьл ипӀурайиган, Исайи кӀуру:

– Гьякь кӀуразачвуз: учвкан сари, Узухъди ипӀурайири, Узу масу тувди.

19Дурар пашман шулу, ва гьарури гьерхуз хъюгъру:

– Думу узу дарза аьхир?

20Хъа дугъу дурариз жаваб тувру:

– Думу йицӀикьюрикан сар, Узухъди саб гъабрак уьл кубсрайир ву! 21Гьамци Инсаниятдин Бай, Гирами китабариъ улупнайиганси, масу тувди, амма шли Инсаниятдин Бай масу тувраш, дугъаз бала хьибди – думу касдиз, учв бабкан гъахьундайиш, ужу шуйи!

Агъайин хябяхъ

22Дурари хураг ипӀурайи вахтна, Исайи уьл гъадабгъну, ужуб сяаьт ибшри дупну, думу гьудубтӀуру ва, ученикарихьна туври, кӀуру:

– Ма гъадабгъай, му Йиз беден вуйиз.

23Зах гъадабгъну, чухсагъулин ккарагуб дапӀну, дурарихьна тувру. Хъа варидари дидʼан убхъуру. 24Дугъу дурариз кӀуру:

– Му цӀийи йикьрар йитӀурайи ва гизафдарихъанди удубзурайи Йиз ифи вуйиз. 25Гьякь кӀуразачвуз: Узу сарун тӀумтӀарин му чяхир убхъидарза. Узу цӀийи чяхир Аллагьдин Паччагьлугъдиъ убхъидиза.

26Хъасин Аллагьдин тярифназ мяъли дапӀну, дурар Елион дагъдиз удучӀвуру.

Ученикари Учв нигь апӀрубдикан Исайи улихьмиди пуб

27Исайи дурариз кӀуру:

– Учву варидари Узлан хъугъвал алдабгъидичва, Гирами китабариъ дупнайиси:

«Марччлихъан йикӀидиза,

ва марччар даргъиди».

28Хъа Узу чӀиви гъашиган, Узу Галилейиз гъягъидиза ва душваъ учвуз ккилигури хьидиза.

29– Варидари хъугъвал алдабгъишра, узу алдабгъидарза! – кӀуру Петри.

30– Гьякь кӀуразавуз, – кӀуру дугъаз Исайи, – гъи, гьаму йишван, даттли кьюб ражари уьъйир апӀайиз, шубуб ражари Узу аьгъюр дарзуз, пидива.

31Хъа Петри айибтӀан артухъ гьисс кади текрар апӀуру:

– Узуз Увухъди йикӀуб алабхъурушра, Уву «аьгъюр дарзуз» пидарза!

Имбударира гьамцдар гафар гъапнийи.

Исайин ккарагуб

32Мидхъан дурар Гефсимания кӀуру йишваз гъюру, ва Исайи ученикариз кӀуру:

– Узу ккарагури имиди гьамшвахь деай.

33Дугъу Чахъди Петрна, Якьубна Югьан гъадагъуру. Дугъан кӀваъ дердна гъалабулугъ абхъру. 34Исайи дурариз кӀуру:

– Йиз юкӀв яман хажалатнаъ абхънайиз, гьамшвахь гъузай, гъафил махьанай!

35Думу сацӀиб тина гьудучӀвуру, жилиина кьамкьарихъди ис духьну, му аьзаб, эгер шулуш, Чахьан гьадапӀбан бадали, ккарагуз хъюгъру. 36Дугъу кӀуйи:

– Авва! Адаш! Увхьан вари шулвухьан! Гьаму аьзабнаккан Узу ккадаъ! Аммаки Узуз ккунибси дарибшри, хъа – Увуз.

37Хъасин ученикарихьна гъафиган, лигуруш, дурар нивкӀуз душнади рякъюру. Дугъу Петриз кӀуру:

– Симон, уву даахнана? Саб сяаьтдикьан нивкӀ дарди гъузуз гъабхьундарнухьан? 38Гъафил махьанай. Учву тямягьвалариъ адрахъбан бадали ккарагай. Рюгь кӀубан ву, хъа беден – зяиф!

39Иса хъана гьудучӀвуру ва гьацдар гафариинди хъана ккарагуру. 40Кьяляхъ гъафириз, дурар хъана даахну рякъюру. Дурарин улар гъагъи духьнайи. Дурарихьан Дугъаз саб жавабра тувуз шуладайи.

41Шубубпи ражарира Иса кьяляхъ гъюру, Дугъу кӀуру:

– Гьамусра даахну имичва, рягьятвал гъадабгъуранчва? ИкибаштӀан! Вахт хътубкьну: магьа Инсаниятдин Бай гунагькрарин хилиз тувра. 42Гъудужвай, гъачай гъягъюрхьа! Лигай, масу туврайир багахь хьа.

Иса дисуб

43Дугъу гьамци кӀайизра, ЙицӀикьюрикан сар Ягьуда кказагуру, ва дугъахъди аьхю маллйирина, къанунчйирина, аьхюдари ханжларна маргъар хьади гьаънайи адмийирин гъварчра хъайи. 44Иса масу тувуз дуфнайи Ягьудайи дурариз гьамци дупнайи: «Салам тувруган, узу шлиз мак гъапӀиш, гьадму Иса ву, ари Гьадму дисай, ва дишла, дидисну, мюгькам гъаравликкди гъайихай».

45Ягьуда диш дапӀну Исайихьинди гъюру.

– Мялим! – кӀуру дугъу, ва Исайиз мак апӀуру.

46Гьадму сяаьт Иса дисуру ва гъаравлиъ уьрхюру. 47Хъа багахь дугъужвнайи сар ученикди ханжал уьчӀюбгъну, аьхю маллайин гъаравшин иб ктабтӀуру. 48Гьадмуган Исайи кӀуру:

– Учву Узʼин ханжларна маргъар хьади алжагъуз Узу гъачагъ вуйин? 49Гьар йигъан Узу учвухъди, аьгъювалар улупури, Аллагьдин хулаъ айза, ва учву Узу гъидисундайчва. Хъа гъит Гирами китабариъ дупнайиси ибшри!

50Гьадмуган Думу сарди гъитну, ученикар вари гьергну гъягъюру.

51Исайин терефкрарихъди хъади гъахьи сар жигьил, гъяцӀли жандиин ирин чарч илипну, Иса дидисну гъахурайидарин кьяляхъди гъягъюру. Думу дурари дисуру, 52амма думу, чарч дурарин хилиъ гъибтну, гъютӀурччвну, гъяцӀалди гьергну гъягъюру.

Иса аьхюдарин улихь дерккуб

53Иса аьхю маллйирихьна гъахуру. Душвахьна аьхю маллйирна, агъсакъларна къанунчйир уч духьнайи. 54Хъа Петр ярхла-ярхлади дурарин кьяляхъди гъюру, аьхюну маллайин гьяятдизди учӀвну, гъаравшарихъди учвра цӀихъ мани апӀуз деъру.

55Аьхю маллйирина вари дурарин мажлисди Исайиз аьжал адабтӀбан бадали Дугъаз къаршу шагьидвалар агурайи. 56Гьеле кучӀлин шагьидар гизаф удучӀвнийишра, дурарин улупбар дюзди алахьурадайи.

57Гьадмуган гьамцдар кучӀлин шагьидвалар улупру касар дихъуру:

58– Ич ибариинди гъеебхьунчуз, Мугъу: «Хилариинди гъапӀу гьаму Аллагьдин хал дабгъурза ва шубуд йигъандин арайиъ, хилариинди дарди, жараб дивурза», – кӀура.

59Гьеле гьаму улупбаркьана дурарин дюзди алахьдайи.

60Гьадмуган аьхюну маллайи, кьялазси дуфну, Исайихьан гьерхру:

– Увуз къаршуди кӀурайидариз гьаз жаваб туврадарва?

61Амма Исайи, ккебехъну, жаваб туврадайи.

Аьхюну маллайи хъана Дугъхьан гьерхру:

– Уву Месигь вуна, ВаритӀанзаанурин Бай?

62– Ав, вуза, – жаваб тувру Исайи. – Ва учвуз, вари Удукьрурин арччул хилихъинди деъну, аьршарин дифариинди Инсаниятдин Бай гъюри рякъидичвуз.

63Аьхюну маллайи, хъял кубчӀвбаан чан ккурттар дячӀяргъну, кӀуру:

– Ихь сарун шагьидар гьаз ву? 64Аллагьдикан рихшанд апӀури учвузра гъеебхьунчвуз! Ичв къарар фициб хьибди?

– Тахсиркар ву, ва аьжал адабтӀну ккунду, – кӀуйи варидари.

65Дурарикан бязидари Дугъак тутйир катӀуйи, Дугъан маш илибкну, кӀуллан йивуйи, хъа кӀуйи:

– Эй, Пайгъамбар! Увуз шли гъивнуш, йип гьеле!

Петри Иса аьгъюр дарзуз пуб

66Хъа гьадму вахтна Петр тинаси хьайи гьяятдиъ айи. Дина аьхюну маллайин гъараваш дишагьлийирикан сар гъюру. 67Дугъаз цӀихъ чаз мани апӀурайи Петр рякъюру ва, дугъахьинди дикъатниинди дилигну, кӀуру:

– Хъа увура хъайва гьаму Назаретжви Исайихъди.

68Амма Петри кӀулʼин бисдар:

– Узуз аьгъюб фукӀара адарзуз, узу гъаври адарза, уву фтикан кӀураш. – Думу чӀатинди улихь гьяятдизди удучӀву. Гьадмуган даттли уьуь гъапӀу.

69Гъараваш дишагьлийиз думу душваъ дяркъну, душваъ айи адмийириз хъана кӀуру:

– Гьаму гьадрарикан сар ву.

70Петри хъана кӀулʼин бисдар. СацӀиб хъугъужвну, гьяятдиъ дугъужвнайидари Петриз кӀуру:

– Хъа уву дугъриданра гьадрарикан вува. Уву Галилейиан вува, аьхир.

71Хъа Дугъу хуйир апӀуйи:

– Учву кӀурайи Кас узуз аьгъюр дарзуз!

72Гьадмуган кьюбпи ражнура даттли уьъйир апӀуру. Петрин, Исайи гъапи гьаму гафар, кӀваин шулу: «Даттли кьюб ражари уьъйир апӀайиз, шубуб ражари Узу аьгъюр дарзуз пидива». Ва ишуру.

Currently Selected:

Марк 14: ТабГК

Highlight

Copy