Марк 13
13
Исайи Аллагьдин хал дабгъруваликан пуб
1Иса Аллагьдин хулʼан удучӀвурайиган, ученикарикан сари Дугъаз кӀуру:
– Мялим, лиг, фицдар гъванар, фукьан уччву дараматар дарин!
2– Уву гьаму зурба дараматдиин гьяйран духьнана? – кӀуру Исайи. – Мидин гъван-гъвандиин гъубзидар, вари дабгъиди.
3Хъасинси, Думу Элион дагъдиин Аллагьдин хулаз гъаншарди деънайиган, ялгъузди гъузнайи Петрина, Якьубдина, Югьандина Андрейи Дугъхьан гьерхру:
4– Йип учуз, дици фила хьибди? Думу дабгърубдикан учуз фици аьгъю хьибди? Фициб лишниинди аьгъю хьибди?
5Исайи кӀуру:
– Лигайгьа, шликӀа учву алдатмиш дарапӀбан бадали, ихтият йихьай. 6Фицики гизафдар: «Гьадму узу вуза» кӀури, Йиз ччвурнаккди гъиди ва гизаф халкьар алдатмиш апӀиди. 7Учвуз багахь ва ярхла дявйирикан гъеебхьиш, гучӀ мапӀанай: гьаци дубхьну ккунди айиб ву, хъа гьаци хьувал сабан аьхир вуди хьибдар. 8Халкь халкьдиин ва паччагьлугъ паччагьлугъдиин алархьиди, варишвариъ жилар тӀурччвури хьиди, гаш абхъди. Мурар бедбахтваларин, бицӀир апӀругандин аьзабарси, сифте кӀулар ву. 9Ихтиятди гъузай, гьаз гъапиш мажлисариъ жазйир гьадатӀидичвуз, мистариъ урччвидичву; Узкан шагьидвал апӀбан бадали, Узлантина паччгьарин ва гьякимдрарин улихьна гъахидичву. 10Хъа сабан аьхир гъяйиз вари миллетариз Ужувлан хабар деебхьну ккунду. 11Учву суддиз гъухиган, фу кӀуруш, дидин гъайгъушнаъ махьанай: гьадму сяаьт учвуз кӀуруб, фу тувнади гъабшиш, гьадму йипай – учву кӀури хьидичва, хъа Гирами Рюгьну ичв мелзниинди пиди. 12Чвуччву чве йикӀуз масу тувди, хъа адашди – бай. Веледари, абйир-бабариз къаршу удучӀвну, дурар йихиди. 13Йиз ученикар хьпаз лигну, учву варидариз даккун хьиди. Хъа шли аьхиризкьан аьгь гъапӀиш, думу дюрхну хьиди. 14Учвуз, Аллагь гьясбикк ккадру алчагъвал лайикь дарушваъ шули гъябкъиган (урхурайир, мидин мяна фу вуш, гъаври ахъну ккунду), Ягьудия уьлкейиъ айидар дагълариз гьергри. 15Хъа фуж гъваин алди гъабшиш, улдудучӀври ва чан хулаз фукӀа гъадабгъуз дурушри. 16Фуж хутӀлиъ ади гъашиш, чан палтариз хулаз дурушри. 17Гъагъдиъ айидаринна нанайихъ бицӀидар хъайидарин гьадму йигъари гьял пис хьибди! 18Мици кьюрдну дарибшри пну, ккарагай. 19Гьадму йигъари гьациб бедбахтвал хьибдики, дициб Аллагьди дюнʼя арайиз гъабхихъанмина гьамусдиз гъабхьундар, ва гьамдихъантинара хьибдар! 20Ва эгер гьадму йигъар Агъайи кам гъапӀундайиш, гьич фужкӀара ккадархьидайи. Хъа Чан кадагънайидар бадали Дугъу гьадму йигъар кам гъапӀну. 21Эгер учвуз думуган «Лиг, Месигь гьамшвахь хьа», вая «Лиг, гьатушвахь хьа» гъапиш, мухъугъанай. 22Гьаз гъапиш кучӀлин месигьар ва кучӀлин пайгъамбрар ачмиш хьиди. Эгер удукьуруш, гьеле кадагънайидарра чпихъинди илтӀикӀуз дурари аьламатнан лишнар ва аьжайиб ляхнар улупиди. 23Гьаци вуйиган, ихтиятди гъузай. Узу учвуз вари улубкьруб улихь имиди гъапунзачвуз. 24Хъа гьадму йигъари пис бедбахтваларин кьяляхъ «Ригъ ктӀубшвиди, вазли акв тувидар, завариан 25хядар ахьди ва завар ккадаршвиди». 26Гьадмуган дифариинди зурба кьувват ва гьяйбат хъади Инсаниятдин Бай гъюри рякъиди. 27Гьадмуган Дугъу, дюнʼяйин юкьбиб терефарихъан жилин саб кӀулхъан тап гьатмунуб кӀулихъна кадагънайидар уч апӀуз малайикар гьаъди. 28Инжирин гьархъан мисал гъадабгъай: дидин кюлери кьюкьяр апӀруган ва кӀажар адашвруган, хьад багахь шулайивал аьгъю шулучвуз. 29Гьаци учвузра, гьамрар гъяркъган, гьадму вахт, ичв раккнихъ хъайиси, багахь дубхьнайивал аьгъю апӀинай. 30Гьякь кӀуразачвуз: му вари улубкьайиз гьамусдин насил гъубзди. 31Заварна жилар ккадахьиди, хъа Йиз гафар дургидар! 32Я аьршарин малайикариз, я Бализ – саризра йигъ ва сяаьт аьгъдар, хъа сар Адашдиз аьгъя. 33Гьаци вуйиган, лигай, ккилигури ва гьязурди гъузай. Думу вахт фила улубкьуруш, учвуз аьгъдарчвуз. 34Думу вахт, чан хал ва гьардиз рубкьру ляхин лукӀариин гъибтну, хъа гъаравлиз «ул иливну маахан» дупну, гъушу хулан эйсийихь тевуз шулу. 35Учвура ул иливну мааханай! Учвуз аьгъдарчвуз, аьхир, хулан эйси фила гъюруш: хябяхъган, гьацӀишваринган, сяаьт сабди, даттари уьъйир апӀруган, даршиш гьиринган. 36Хабарсузди Думу хъадакну гъафиган, учву даахнади Дугъаз дярякъри-гьа! 37Узу учвуз кӀурайиб варидариз кӀураза: ул иливну мааханай.
Currently Selected:
Марк 13: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
