Марк 12
12
Абайи чан бай гьаъра
1Иса дурариз тахалус ктибтуз хъюгъру:
– Сар касди тӀумтӀин багъ ибтру, арчил илтӀибкӀуру, ичӀ ебккну, тӀумтӀар кчӀюкьрушв ва паж апӀуру. Хъасин багъ арендайиз тӀумутӀчйирихьна тувну, учв удучӀвну жара йишвариз гъягъюру. 2Вахт гъабхьиган, дугъу тӀумутӀчйирихьна чан пай тӀумтӀар хуз лукӀ гьаъру. 3Хъа дурари думу дисуру, урччвуру ва, фукӀара тутрувди, утӀуккуру. 4ТӀумтӀин багъдин эйсийи сарсана лукӀ гьаъру, аммаки мугъан кӀул уьбгъюру ва, аьйиб алапӀну, утӀуккуру. 5Сарсана гьаъру – му йивну, йикӀуру. Хъана гизаф жарадарра гьаъру – садар урччвуйи, тмундар йивну гъядауйи. 6Эйсийиз хъайина-хътру сар бай ади шулу. Ва аьхиримжи ражари дурарихьна «Йиз балхьан нач апӀурда» пну, гьадму гьаъру. 7Хъа тӀумутӀчйири чиб-чпин арайиъ гьамци кӀуру: «Му эйсийин ирсчи ву. Гъачай, думу йивну йикӀухьа, ва ирс ухьуз гъубзди!» 8Дурари думу дисуру, йикӀуру ва тӀумтӀин багъдиан гатӀахьуру. 9ТӀумтӀин багъдин эйсийи гьапӀди? Думу хъадакну гъиди ва тӀумутӀчйир йихиди, хъа багъ жарадарихьна тувди.
Мурччван гъван
10Мегер учву Гирами китабариъ гъурхунданчва:
«Устйири гатӀабхьу гъван мурччвануб гъабхьну.
11Му ухьуз гъябкъю аьламат Агъайи гъапӀуб ву».
12Жугьдарин аьхюдариз му тахалус чпиз къаршуди дупнайиваликан аьгъю шулу ва Иса дисуз ккун шулу, аммаки халкьдихьан гучӀуйи. Гьаддиз дурар, Думу гъитну, гъягъюру.
Исайи фукӀа дюз даруб кӀайиз ккеуб
13Хъасин Исайихьна, Дугъу фукӀа дюз даруб кӀайиз ккеъбан бадали, сакьюдар фарисйирна Гьироддин терефкрар гьаъру. 14Дурари дуфну кӀуру:
– Мялим, учуз аьгъячуз Уву гьякь кӀурайиб, гьич сарихьанра гучӀдарвуз, гьич саризра гучӀар ккаурдарва, хъа дишди ва ачухъди Аллагьди кӀурайиси яшамиш хьуз аьгъювалар улупурава. Йип гьеле, Рим паччагьдиз налук туврувал дюз вуйин, дарш дарин? Учу налук туврин, дарш тувурдарин?
15Дурарин чӀуру ниятарин гъаври айи Исайи кӀуру:
– Гьаз Узу ахтармиш апӀурачва? Аьбкъинай Узухьна манат, лигуза дидиз.
16Дурари хуру. Исайи дурарихьан гьерхру:
– Мидик шлин шикилна ччвур ка?
– Римдин паччагьдин, – жаваб тувру дурари.
17Исайи кӀуру:
– Паччагьдинуб паччагьдиз, хъа Аллагьдинуб Аллагьдиз тувай.
Дурар Дугъан жавабниин гъах гъаши.
Саддукйир ва Иса
18Гьадму вахтна гъачӀидар чӀиви шлуб дар кӀурайи саддукйири дуфну гьерхру.
19– Мялим! Мусайи учуз, эгер хпир айи чве веледар даршиди гъачӀиш, гьадгъан хпир тмуну чвуччву гъадагъну, чан чвуччвун тум арайиз дубхну ккунду, кӀури дибикӀна. 20Ургур чве гъахьну. Сарпи чвуччву шив хуру, амма, веледар дархьиди, йикӀуру. 21Кьюрпи чвуччву дугъан хпир чаз дитру, ва мура, веледар дархьиди, йикӀуру, шубурпирра – гьаци. 22Ургрид чвйирикан гьич саризра веледар гъахьундар. Вардарилан кьяляхъ гьадму дишагьлира йикӀуру. 23Гъиямат йигъан вари чӀиви шлуган, думу шлин хпир хьиди? Ургрид чвйиризра думу швуваз гъушнийи аьхир!
24Исайи дурариз гьамциб жаваб апӀуру:
– Учву, я Гирами китабар, ясана Аллагьдин кьудрат аьгъдарди, улдугурачва. 25Гъийихдар чӀиви гъахьиган, дурари я швушвар хурдар, я швуваз гъягъюрдар. Дурар аьршариъ айи малайикарси хьиди. 26Хъа гъийихдар чӀиви хьуваликан кӀури гъабшиш, учву Мусайин китабдиъ, Аллагьди фици убгурайи рукнаан дугъаз «Узу Ибрагьимдин Аллагь, Исакьдин Аллагь ва Якьубдин Аллагь вуза» кӀури дибикӀнайиб гъурхунданчва, дарш? 27Аллагь дийихнайидарин ваъ, хъа чӀивидарин Аллагь ву. Учву гизаф улдугурачва.
ВаритӀан заан табшуругъ
28Гьюжат апӀурайишвахь сар къанунчира хьайи. Исайи дурариз фукьан уччвуди жавабар тувраш, дугъаз гъеебхьнийи, ва думу, Дугъахьна дуфну, гьерхру:
– Фуну табшуругъ варитӀан заануб ву?
29– ВаритӀан заан вуйи табшуругъ, – кӀуру Исайи. – «Хъебехъай, эй жугьдар! Ихь Агъа Аллагь – сар АгъатӀан дар. 30Яв Агъа Аллагь, вари юкӀв хъипну, вари рюгьнаан, вари фагьмиан ва вари жвуван кьувватнаан ккун апӀин». 31Хъа магьа кьюбпиб: «Багахь хьайир увуз жвуваз жвувси ккун апӀин». МурартӀан аьхю табшуругъар сарун адар.
32– Ужуди дупна, Мялим, – кӀуру къанунчийи. – «Думу сар ву ва, Дугълан гъайри, сану гьич фужкӀара адар», – кӀури, гьякь гъапунва. 33«Думу вари юкӀв хъипну, вари фагьмиинди ва вари жвуван кьувватниинди» гьацира «багахь хьайир жвуваз жвувси ккун апӀин» кӀуру гафар, вари урккру ва ургру гъурбнартӀан зиина ву.
34Дугъу фагьумлуди жаваб тувувал дябкъну, Исайи дугъаз кӀуру:
– Уву Аллагьдин Паччагьлугъдихьан ярхла дарва.
Гьамдихъан сарун сарира Исайихьан гьич сабдиканра гьерхуз кӀубанвал гъапӀундар.
35Аллагьдин хулаъ халкьдиз аьгъювалар улупурайиган, Исайи кӀуру:
– Къанунчйирихьан, Месигь Давудгъярин Бай ву, пуз, фици удубкьуру? 36Гирами Рюгьну ацӀнайи чав Давудри гъапну, аьхир:
«Агъайи йиз Агъайиз гъапну:
„Узу Яв душмнар, духну,
Яв ликарикк дахьайизкьан
Йиз арччул гъвалахъ деъ“».
37– Чав Давудри Дугъаз, Думу чан Агъа вуйиз, кӀура. Гьаци вуйиган, Думу дугъан Бай фици хьидихъа?
Гизаф халкь Дугъахъ аьхю иштагьниинди хъпехъурайи.
38Дугъу халкьдиз Чан улупбариъ кӀуйи:
– Ярхи палтар алди лицру къанунчйирихьан ихтият йихьай. Дурариз, чпин тяриф апӀури, халкьар уч шлушвариъ чпи тебрик апӀури ккунду, 39дурар мистариъ ва ипӀру-убхърушвариъ варитӀан гьюрматлу йишвариин деуз ккунидар ву. 40Гьадрар ву дурар, ачӀни хпарин мутму хътипӀурайидар, хъа халкьдин уларихьан ярхи гъудгнар апӀрудар. Гъиямат йигъан дурариз варитӀан пис жаза ккилибгура!
Касиб ачӀни хпирин садакьа
41Иса, садакьади пул ипру ишкӀин багахь деъну, фици пул ипраш, лигурайи. Аьхю пай девлетлуйири гизаф пул ипуйи. 42Хъа сар касиб ачӀни хпир дуфну, душваъ кьюб кепек ирчру. 43Гьадмуган Исайи, ученикариз Чахьна дих дапӀну, кӀуру:
– Гьякь кӀуразачвуз: гьаму касиб ачӀни хпири варидаритӀан артухъ пул ипну. 44Пул ипдари варидари чпиз артухъди вуйиб ипну, хъа мугъу, гьамцир касибри, чаз ипӀрубдихъ тувру айи-адруб вари ипну.
Currently Selected:
Марк 12: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
