Марк 11
11
Иса Ерусалимдиз гъюб
1Дурар Ерусалимдиз багахь шулайиган, Вифагия ва Вифания гъуларихьан ярхла дарди, Элион кӀуру дагъдин багахь хьимиди, Исайи гьамци дупну, кьюр ученик гьаъру:
2– Гьатму ихь гъаншариъ айи гъулаз гъарахай. Гъулаъ учӀвайиз ярхла дарди, дибтӀнайи жигьил дажи рябкъидичвуз. Дидʼин мегьел фужкӀара элеундар. Тудубчну, думу гьамина аьбкъинай. 3Хъа эгер учвхьан шли: «ГьапӀрачва?» кӀури гьерхиш, «Думу Агъайиз лазимди ву, Дугъу думу дишла кьяляхъ апӀиди», йипай.
4Дурар гъягъюру, ва кючейиъ урарин багахь дибтӀнайи жигьил дажи рябкъюру. Думу тудубчуз хъюгъру. 5Душвахь дийигънайи адмийири: «ГьапӀрачва? Гъудугъ гьаз тудубчурачва?» – гъапи. 6Хъа дурари чпиз Исайи гъаписи кӀуру, ва дурариз ихтияр тувру. 7Дурари дажи Исайихьна хуру. Дурари чпин палтар дидʼин иличуру, ва зиълан Иса элеуру. 8Гизафдари чпин палтар, хъа имбудари хутӀлиъ гьарарикан ктатӀу кюлер Думу гъягъру рякъюкк ккирчуйи. 9Улихьдира ва кьяляхъдира гъябгъюрайи халкьди гьарйир апӀурайи:
– Аллагьдиз тяриф!
Агъайин ччвурнахъ Гъюрайириз
ужʼвал ибшри!
10Ихь аба Давудрин улубкьурайи Паччагьлугъдиз
ужʼвал ибшри!
Аьршариз тяриф!
11Иса Ерусалимдиъ учӀвру ва Аллагьдин хулаз гъягъюру. Варишварилан ул илбицну, хябяхъган кьанди, Думу, йицӀикьюрид вакиларра хъади, Вифанияйиз хътакуру.
12Хъайигъан, дурар Вифанияйиан удучӀвган, Исайиз гаш хьувал гьибгъру. 13Ярхлаъ инжирин гьар гъябкъю Думу, дидигъ йимишар гъяш лигуз кӀури, багахьна гъягъюру, амма Дугъаз, гьаригъ фукӀара гъибихъундайи, фицики инжирар хъуркьру вахт улубкьнадайи. 14Гьадмуган Дугъу гьариз кӀуру:
– Сану гьич сарира сабанра яв йимишар диритӀри!
Мици кӀури ученикаризра гъеебхьнийи.
Иса Аллагьдин хулаз гъюб
15Дурар Ерусалимдиз гъюру. Иса Аллагьдин хулан гьяятдиз гъафи, ва душваъ ариш-вериш апӀурайидар утӀуккуз хъюгъру. Дугъу пул дигиш апӀурайидарин устлар, луфар масу туврайидарин кусрийир ккитӀикӀуру, 16ва гьич сарира чан шейʼар Аллагьдин хулʼантина гъахуз гъитдар. 17Хъасин Исайи дурариз аьгъювалар улупуз хъюгъю. Дугъу кӀуру:
– Гирами китабариъ дибикӀнадаринхъа: «Йиз хулаз вари миллетар ккарагру хал пиди». Хъа учву дидкан тӀарашчйирин мугъара дапӀначва!
18Аьхюдаризна къанунчйириз гьамци кӀури гъеебхьиган, Думу йикӀуз, дурар саб чара абгуз хъюгъю. Дугъхьан дурариз гучӀуйи, гьаз гъапиш вари халкь Дугъан аьгъюваларихъ аьхю иштагьниинди хъпехъуйи.
19Хябяхъ гъабшиган, Иса ученикарра хъади, шагьриан удучӀвну гъягъюру.
Хъугъвалин кьувватнакан
20ГвачӀинган инжирин гьарин багхьантина гъягъюрайидариз думу ччиварианзина тап кӀакӀаризкьан вари деебццну рябкъюру. 21Петри, накь гъапиб кӀваин дубхьну, Исайиз кӀуру:
– Мялим, лиг, Уву накь чаз люкьян гъапӀу инжирин гьар гъеебццну!
22Исайи дурариз жаваб туву:
– Аллагьдихъ хъугъай! 23Гьякь кӀуразачвуз: эгер шли гьаму дагъдиз «Яв йишвʼлан улдубчӀвну, гьюлиъ убс!» гъапиш ва, кӀваъ шаклу даршиди, хъугъиш, гьадмура тамам хьибди. 24Гьаддиз Узу кӀуразачвуз: учву ккарагури фу ккун гъапӀиш, вари учвухьна рубкьрувалихъ хъугъай, рубкьидичвухьна ва думу ичв хьибди. 25Аьршарин ичв Адашдихьан ичв гунгьарилан хил алдабгъуз шлуси, ккарагруган, шлик ичв хъял каш, гьадгъулан хил алдабгъай. [26]#11:26 Грекарин саспи БикӀбариъ гьамци кӀура: «Хъа жарадарилан хил алдадабгъиш, Аьршариъ айи ичв Адашдира ичв гунгьарилан хил алдабгъидар».
Исайин гьюкум наънан ву?
27Дурар хъана Ерусалимдиз гъюру. Иса Аллагьдин хулан гьяятдиъ лицурайиган, Дугъахьна аьхю маллйирна, къанунчйирна, аьхюдар гъюру.
28Дурари гьерхру:
– Уву му ляхнар фициб гьюкмиинди апӀурава? Шли Увуз гьациб гьюкум тувну?
29Исайи дурариз кӀуру:
– Узу учвуз саб суал тувдиза. Жаваб тувай – Узура, мурар фициб гьюкмиинди апӀураш, пидизачвуз. 30Ягьʼяйин штуан апӀувал Аллагьдихьан вуйин, даршиш инсанарихьан? Гьан, жаваб тувай!
31Дурар, фикрарикк ккахъну, чиб-чпикди гьамци пуз хъюгъру: «Эгер ухьу „аьршариан“ гъапиш, Дугъу: „Хъа учву дугъахъ гьаз хъугъундайчва?“ пну, гьерхди. 32Хъа адмийирихьан гъапиш…»
Дурариз халкьдихьан гучӀуйи, гьаз гъапиш варидари Ягьʼя дугъриданра пайгъамбар ву кӀурайи. 33Гьаддиз дурари гьамциб жаваб тувру:
– Аьгъдарчуз.
– Дици вуш, Узура учвуз, фициб гьюкмиинди гьамцдар апӀураш, пидарзачвуз, – жаваб тувру Исайи.
Currently Selected:
Марк 11: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
