Марк 10
10
Нюкягь чӀюбгъбакан
1Му йишвʼан Иса Ягьудия юрдназ ва Ярдан нирин тмуну жилариина гъягъюру. Дугъахьна хъана халкьар гъюйи, Дугъу, гьарганси, дурариз аьгъювалар улупуйи.
2Иса ахтармиш апӀуз ккунди, фарисйир гъюру ва Дугъаз суал тувру:
– Къанундиинди жилириз хпир адауз ихтияр айин?
3– Хъа Мусайи фици табшурмиш гъапӀунчвуз? – кӀуру Исайи.
4– Мусайи, жара хьпан кагъазра дибикӀну, хпир адауз ихтияр тувну, – жаваб тувру дурари.
5– Мусайи, ичв гъициркъу юкӀвариз дилигну, гьаци гъапунчвуз, – кӀуру Исайи. 6Хъа дюнʼя ккебгъхъанмина Аллагьди жилирна хпир халкь дапӀна. 7Гьаддиз жилир, чан адашна дада гъитну, чан хпирик карсди, 8ва дурар кьюрид саб беден хьиди. Гьаци вуйиган, дурар сарун кьюб ваъ, хъа саб беден ву. 9Гьамци Аллагьди китӀдар инсанди жара дапӀну ккундар
10Хъасинси дурар хулаз гъафиган, ученикари Исайихьан хъана нюкгьикан гьерхру.
11Дугъу жаваб туву:
– Шли, чан хпир гьадаъну, жарар гъахиш, дугъу кьяппавал апӀура. 12Хъа эгер дишагьли, чан жилирихьан гьудучӀвну, жарариз гъушиш, гьадму дишагьлийира кьяппавал апӀура.
Исайи бицӀидариз ужʼвал ккун апӀуб
13Исайихьна, Дугъу кӀуллан карк алдатбан бадали, бицӀидар хуру, хъа ученикари хуз гъитри гъахьундар. 14Гьамци гъябкъю Исайик хъял кубчӀвру ва Дугъу дурариз кӀуру:
– БицӀидар узухьна гъюз гъитай, гъадагъа мапӀанай. Аллагьдин Паччагьлугъ гьацдаринуб ву. 15Гьякь кӀуразачвуз: шли Аллагьдин Паччагьлугъ бицӀириси кьабул дарапӀиш, думу душваъ учӀвидар.
16Хъа Исайи бицӀидар хабаъ тӀаъну, дурариин хилар иливури, ужʼвал ибшричвуз, кӀуру.
Девлетлуйин суал
17Иса рякъюъ учӀврайиган, сар касди, Дугъахьна жаргъури дуфну, икрам апӀури, кьамкьариина дусну, гьерхру:
– Я гъяни Мялим, узу женнетдиъ ахъбан бадали гьапӀну ккунду?
18– Гьаз Узуз гъянир кӀурава? – кӀуру Исайи. – Сар Аллагьдилан гъайри саркьан гъянир дар. 19Увуз Дугъан табшуругъар аьгъявуз: адми миликӀан, кьяппавал мапӀан, мигьитӀибкӀан, кучӀлин шагьидвал мапӀан, алдатмиш мапӀан, адашдизна дадайиз гьюрмат апӀин.
20– Мялим, узу дурар вари бицӀидихъанмина тамам апӀураза, – жаваб гъабхьи Исайиз.
21Иса дугъахьинди лигуру ва дишла Дугъаз думу ккун шулу. Исайи кӀуру:
– Сабсана увуз гьубкӀрадар: гъарах, увуз айиб вари масу тув ва пул касибариз пай апӀин, гьадмуган аьршариъ яв девлет хьибдивуз. Хъасин Узухъди гъач.
22Хъа думу му гафарикан пашман шулу ва гьудучӀвну гъягъюру, гьаз гъапиш думу гизаф девлетлу вуйи.
23Исайи, ул илбицну, ученикариз кӀуру:
– Девлетлуйириз фукьан читин дарин Аллагьдин Паччагьлугъдиъ учӀвуз!
24Дугъан гафариин ученикар аьжайиб духьнайи, хъа Исайи дурариз хъана гъапи:
– Йиз веледар, фукьан читин дарин Аллагьдин Паччагьлугъдиъ учӀвуз! 25Девлетлуйиз Аьршарин Паччагьлугъдиъ учӀвубтӀан девейиз рубдин гъюнʼан удубчӀвуз рягьят ву.
26Дурар хъана артухъ аьжайиб гъаши ва сари-сариз гъапи:
– Дици вуйиган, шилхьан учв уьрхюз хьиди?
27Дурарихьинди дилигну, Исайи кӀуру:
– Инсанарихьан му удукьруб дар, хъа Аллагьдихьан удудукьруб адар.
28Гьадмуган Петри пуз хъюгъру:
– Хъа магьа, учу, вари гъибтну, Увухъди хъача.
29– Гьякь кӀуразачвуз, – кӀуру Исайи, – Шли Узу ва Ужувлан хабар бадали чан хал, чвйир, чйир, дада, веледар, хутӀлар гъитнуш, дугъаз му дюнʼяйиин 30варж ражари артухъ хулар, чвйир, чйир, дадйир, веледар, хутӀлар, хъа гьацира жвувахъ хъчӀирккувалар хьиди, хъа гъюз ккимбу уьмриъ – гьаргандин уьмур. 31Аммаки, гьаму ражари гизаф сарпидар думуган аьхиримжидар хьиди, хъа аьхиримжидар – сарпидар.
Исайи хъана чан аьжаликан пуб
32Гьамус дурари Ерусалимдиз рякъ дибиснайи. Улихьди Иса гъягъюрайи. Исайихъди гъягъюрайи ученикарик гъалабулугъ кабхънийи, хъа дурарихъди хъайи имбудар гучӀбу ккагънайи. Исайи, ЙицӀикьюридра гъирагъдиз гьадаъну, Чаз фу шулуш, пуз хъюгъю:
33– Магьа ухьу Ерусалимдиз гъягъюрахьа. Инсаниятдин Бай аьхю маллйиринна къанунчйирин хилиз тувди. Думу, карсну йикӀуз жаза адабтӀну, жугьуд дарударин хилиз тувди. 34Хъа дурар Дугъак кялхъди, рихшанд апӀиди, тутйир катӀди, гъирмажарихьди урччвиди ва йикӀиди. Аммаки шубуд йигълан Думу чӀиви хьиди.
Югьандинна Якьубдин тӀалаб
35Зеведейин баяр Якьубна Югьан Исайиз багахь улучӀвуру ва кӀуру:
– Мялим! Учу кӀурайи тӀалаб тамам апӀина.
36– Узу учвуз гьапӀну ккундучвуз? – гьерхру Дугъу.
37Дурари жаваб тувру:
– Яв аднаъ Уву учӀвган, учу Яв гъвалахъ деърубси апӀин – сар арччул, тмунур гагул терефнаъ.
38– Учву фу тӀалаб апӀураш, учвуз аьгъдарчвуз, – кӀуру Исайи. – Узʼина гъюз ккайи аьзабар учвхьан аьх апӀуз хьибдин? Ясана, Узу марцц шлуганси, учвхьан шулин?
39Дурари: «Ав, шулчухьан», – гъапнийи.
Хъа Исайи дурариз гъапи:
– Дугъриданна, Узу кьабул апӀуз ккайи аьзабар учвура аьх апӀарчва, 40хъа Йиз арччулну ва гагулну терефарихъинди дитувал Узлан асиллу дар: думу йишвар, Йиз Адашди шлиз улупнаш, гьадрариндар ву.
41Якьубдинна Югьандин гафар гъеерхьиган, имбу йицӀбидарик хъял кубчӀвру. 42Хъа Исайи дурариз Чахьна дих дапӀну кӀуру:
– Халкьарин гьякимарди гьисаб апӀурайидари халкьарин зиин агъавал апӀурайивал ва аьхюдари дурарин зиин чпин гьюкум улупурайивал учвуз аьгъячвуз. 43Хъа ичв арайиъ дици дарибшри: шлиз ичв арайиъ кӀулинур хьуз ккундуш, гъит думу ичв гъайгъушнаъ ишри, 44ва шлиз ичв арайиъ сарпир хьуз ккундуш, дицирикан варидарин лукӀ ишри. 45Инсаниятдин Байра Чаз жарадари гъуллугъ апӀбан бадали ваъ, хъа Чав гъуллугъ апӀбан бадали ва, гизафдарин гунгьарилан хил алдабгъуз кӀури, Чан уьмур тувбан бадали Дуфнайир ву.
Исайи кур сагъ апӀура
46Хъасин дурар Ерихон шагьриз гъюру. Иса Чан ученикар ва гизаф халкь хъади Ерихондиан удучӀвурайиган, рякъюхъ, тувру садакьайиз ккилигури, кур вуйи касиб, Тимейин бай Вартимей деънайи. 47Дугъу, душвхьантина Назарет шагьриан вуйи Иса гъягъюра кӀури деебхьну, чӀигъ апӀуру:
– Давудгъярин Бай Иса, йиз язухъ апӀина!
48Гизафдари дугъаз ккебехъ кӀуйи, хъа кур вуйири айибтӀан артухъ чӀигъар апӀуз хъюгъю:
– Давудгъярин Бай, йиз язухъ апӀина!
49Иса хъугъужвуру ва Дугъу кӀуру:
– Мина гъач йипай дугъаз.
Куриз дих апӀуру:
– Чкиди гъудужв, Исайи увуз Чахьна гъач кӀура!
50Вартимей, чуха хъидипну, гъедергуру ва Исайихьна жаргъуру.
51– Узкан фу ккундувуз? – гьерхру Исайи.
– Мялим, узуз рябкъюз ккундузуз! – жаваб тувру кури.
52– Гъарах, яв хъугъвали уву гъюрхюнву, – кӀуру Исайи.
Дугъаз дишла рябкъюри шулу, ва думу Исайихъди гъягъюру.
Currently Selected:
Марк 10: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
