Марк 9
9
1Хъа Исайи кӀуру
– Гьякьди кӀуразачвуз: мушвʼин дийигънайидарикан сакьюдариз чпин аьжал хъубкьайиз Аллагьдин Паччагьлугъ гьубкӀну чан кьувватнаъ ади рябкъиди.
Исайин Мусайихъдина Илʼясдихъди сюгьбат
2Йирхьуд йигълан Иса, Чахъди Петрна, Якьубна, Югьан гъадагъну, ягъли дагъдиина хъади гъягъюру. Душвʼин жара кас алдайи. Хъа Иса дурарин улихь дигиш шулу. 3Дугъан палтар, улин нур гъабхури, кьадар адрубкьан лизи шулу – гъурччну пну, гьич сарихьан дици лизи апӀуз даршлийи. 4Дурарин улихьна Исайихъди гафар апӀурайи Илʼясна Муса ачмиш шулу. 5Хъа Петри Исайихьинди илтӀикӀну кӀуру:
– Мялим! Учуз мушвахь ужуди вучуз! Гъач, шубуб паж апӀуча: саб Увуз, саб Мусайиз ва саб Илʼясдиз.
6Петри мици, фу кӀуруш ва гьапӀруш аьгъдрури, гъапиб вуйи, фицики ученикариз яман гучӀ дубхьнайи. 7Гьадмуган диф арайиз гъюру ва диди дурар чан сирникк ккаъру, хъа дифрагъян сес шулу: «Му Йиз масан Бай вуйиз. Гьамгъахъ хъебехъай!»
8Гьадму сяаьт дурар вари терефаризди лигуру, амма дурариз чпин багахь Исайилан гъайри фужкӀа гъяркъюндайи.
9Дурар дагъдилан гъюруган, Исайи Чан ученикарикан чпиз гъябкъюбдикан, Инсаниятдин Бай дукӀну чӀиви хьайиз, саризра даркӀуб, ккун апӀуру.
10Дурари му гьядиса чпин арайиъ гъибтру, аммаки дурар чиб-чпигъ: «ЧӀиви дархьикьан гагьди», – фу кӀуру гафар вуйкӀан, кӀури, улхурайи. 11Дурари Исайихьан гьерхру:
– Къанунчйири сифте Илʼяс дуфну ккунду гьаз кӀура?
12Исайи дурариз жаваб тувру:
– Ав, дугъридан, Илʼясди, улихьмиди дуфну, вари ккабалгну ккунду. Хъа Гирами китабариъ Инсаниятдин Балкан Дугъʼин гизаф аьзабар улуркьиди ва Думу ужуз апӀиди кӀури, гьаз дибикӀна? 13Хъа Узу учвуз кӀуразачвуз: Илʼяс гъафну, ва дугъкан чпиз ккуниб гъапӀну. Гьаци дибикӀна Гирами китабариъра.
Исайи иццурайи бай сагъ апӀуб
14Дурариз, имбу ученикарихьна гъафиган, дурарилан халкь илтӀишну, гьюжатар апӀурайи къанунчйир рякъюру. 15Гьадму сяаьт Иса гъяркъю халкь аьжайиб шулу ва, Думу тебрик апӀури, Дугъахьна жаргъуру.
16Исайи ученикарихьан гьерхру:
– Фтин кӀуллан мурарихъди гьюжатар апӀурачва?
17Халкьдигъян сар касди жаваб тувру:
– Мялим! Увухьна йиз бай духназа. Дугъаъ чиркин рюгь а. Диди дугъахьди гафар апӀуз гъитрадар. 18Жин алабхъруган, думу жилиина гатӀахьури шулу, кӀвантӀаригъна каф гъядапӀуру ва, сппар илчӀигури, жан дичӀибгну дебккру. Узу яв ученикарихьан думу жин утӀубккуб ккун гъапӀунза, хъа дурарихьан гъабхьундар.
19– Эй хътругъру инсанар! – кӀуру гьадмуган Исайи. – Узу учвухъди филадизкьан гъузди кӀурачва?! Узу учву филадиз аьгь апӀуза?! Думу Узухьна аькъинай!
20Бай Дугъахьна хуру. Жинди, Иса гъяркъюбси, бай жилиина гатӀархьуз гъитру ва кӀвантӀаригъна каф гъютӀубччвну, мина-тина диргъуз гъитру.
21– Мици дубхьну мугъан гизаф вахт вуйин? – гьерхру Исайи дугъан адашдихьан.
– БицӀидихъанмина, – жаваб тувру дугъура.
22– Гизаф ражари жиндиз думу пуч апӀуз ккун гъабхьну: саспиган цӀигъна гатӀархьури, саспиган – штуз. Хъа эгер Увхьан фукӀа-мукӀа апӀуз шулуш, ич язухъ зиг, кюмек апӀин!
23– Фу кӀуру гаф ву «Эгер шулуш?!» – кӀуру дугъаз Исайи. – Хъугъвал айирихьан вари шулу.
24Балин адашди ишури кӀуру:
– Хъугъурза! Хъа узхьан хъугъуз шулдарш, кюмек апӀин!
25Халкь Чахьна гъюри дябкъну, Исайи чиркин рюгьназ буйругъ тувру:
– Ебхьуз гъидритру ва чӀал бисру жин, Узу увуз буйругъ тувраза: удубчӀв дугъʼан ва сану муубчӀван!
26Жин, балин жан яманди дутӀубччвну, чӀигъар апӀури, удубчӀвуру. Думу дукӀнайирси дитнайи, ва гизафдари думу гъакӀну кӀуйи. 27Хъа Исайи думу, хилхъан дидисну, заъру, ва бай гъудужвуру.
28Иса хулаз гъафиган, Дугъахъди гъузу ученикари гьерхру:
– Хъа учхьан думу утӀубккуз гьаз гъабхьундайи?
29– Мицдар жинар ккарагбииндитӀан утӀурккуз шлудар дар, – гъапи Исайи.
Исайи Чан аьжаликан пуб
30Душвʼан удучӀвдар Галилей уьлкейиантина гъягъюру. Исайиз мидкан жарадариз аьгъю дубхьну ккундайи, 31гьаз гъапиш Дугъаз Чан ученикариз аьгъювалар улупуз ккундийи. Дугъу дурариз гъапнийи:
– Инсаниятдин Бай багарихьди инсанарин хилиз тувди ва йикӀиди. Думу йикӀиди, амма шубуд йигълан чӀиви хьиди. 32Дурар Исайи гъапибдин гъаври шуладайи, хъа Дугъхьан гьерхуз гучӀуйи.
Исайи аьхюрикан пуб
33Дурар Кафернагьумдиз гъюру. Хулаъ айиган, Исайи ученикарихьан гьерхру:
– Мина гъюрайиган, гьюжатар гьапӀрудар вуйичв?
34Дурар ккебехъну гъузу, гьаз гъапиш рякъюъ айиган дурари, чпикан гъуллугъниинди фуж аьхюр вуш, гьюжат гъитӀибккнайи. 35Иса деъру, Чахьна ЙицӀикьюриддизра дих дапӀну кӀуру:
– Шлиз учв сарпирди духьну ккундуш, гъит думу варитӀан аьхиримжир ишри ва варидарин лукӀ ишри.
36Дугъу бицӀир гъадагъну, дурарин кьялаъ дерккру ва, хабаъ тӀаъну, ученикарихьинди кӀуру:
37– Шли Узу бадали гьамцдар бицӀидарикан саркьан кьабул гъапӀиш, дугъу Узу кьабул апӀура. Хъа шли Узу кьабул гъапӀиш, неинки Узу кьабул апӀура, хъа гьацира – Узу Гьаурра.
Ухьуз къаршу дарур ухьхъанди ву
38– Мялим, – кӀуру Дугъаз Югьанди, – учуз Яв ччвурниинди жинар утӀурккурайи сар кас гъяркъюнчуз, ва учу дугъаз, ухьухъди хътруган, гъадагъа гъапӀунча.
39Исайи жаваб туву:
– Машат мапӀанай дугъаз. Шли Йиз ччвур дибисну, аьламат улупиш, думу Узкан чӀуруди улхидар. 40Фуж ухьуз къаршу дарш, думу ухьхъанди ву! 41Шли учвуз, Месигьдин ученикар вуди хьпаз лигну, саб кӀиф шид тувиш, хъугъай Узухъ, дугъаз чан пешкеш хьибди. 42Хъа шли саркьан гьамцдар аьдатидарикан ва зяифдарикан хъугъувалихъан хътаиш, дугъаз чан гардандиъ рягънин ахал ипну, гьюлизди гатӀархьнийиш, ужу шуйи. 43Эгер яв хили уву тямягьнахьна гъахураш, хъадабтӀ думу! Увуз саб хил хъади женнетдиъ учӀвуб ужу ву, кьюб хил хъади зат ктӀрубшвру цӀа айи жегьеннемдиъ ахъайиз. [44]#9:44, 46 Грекарин саспи БикӀбариъ гьамци кӀура: «Душваъ зат дийийигъди мялхъвяри итӀури шулу ва ктӀрубшвру цӀигъ ургури шулу». 45Эгер яв ликри уву тямягьнахьна гъахураш, ккадабтӀ думу! Увуз саб лик ккади женнетдиъ учӀвуб ужу ву, кьюб лик ккади жегьеннемдиъ ахъайиз. [46] 47Эгер яв ули уву тямягьнахьна гъахураш, адабгъ думу! Увуз саб ул ади Аллагьдин Паччагьлугъдиъ учӀвуб ужу ву, кьюбиб уларра амиди жегьеннемдиъ ахъайиз. 48Душваъ зат дийийигъди мялхъвяри итӀури шулу ва ктӀрубшвру цӀигъ ургури шулу. 49Гван кьилахьди тартиб апӀруганси, гьарсар цӀихьди марцц апӀиди. 50Кьил ужуб мутму ву. Хъа эгер кьилан кьилзишин гъудубгиш, фти думу кьилзи апӀидичва. Учвук кьил кади йибхьай! Ва сар-сарихьди мясляаьтнаъ йихьай.
Currently Selected:
Марк 9: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
