Марк 8
8
Юкьуд агъзур кас тухъ апӀуб
1Гьадму йигъари хъана бегьем халкь уч шулу, хъа дурарихь ипӀруб хьадайи. Исайи, ученикариз дих дапӀну, кӀуру:
2– Узуз адмийирин язухъди вузуз. Магьа, дурарин Узухъди хъади шубуд йигъ ву, хъа дурариз ипӀруб адар. 3Эгер Узу дурар хулариз гашди гьаиш, рякъюъ зяиф хьиди, хъа гьацӀар ярхлариан дуфнайидар даринхъа.
4– Гьаму ичӀи йишваъ варидариз гьубкӀрубси уьл наънан апӀуру? – жаваб апӀуру ученикари.
5Исайи дурарихьан гьерхру:
– Учвухь швнуб уьл хьачвухь?
– Ургуб уьл, – кӀуру дурари.
6Гьаци вуйиган, Дугъу халкьдикан жилиин деуб ккун апӀуру. Ургуб уьл гъадагъну, Аллагьдиз чухсагъул кӀури ккарагну, Дугъу уьл гьудубтӀуру ва халкьдиз пай апӀуз ученикарихьна тувру. Хъа дурарира пай апӀуру. 7Дурарихь сакьюдар балугъарра хьайи. Исайи дурариин чухсагъулин ккарагуб дапӀну, гьадрарра пай апӀуз тувру. 8Адмийири гъипӀу, дурар арцӀу. Дидихьна хъиригъу кьацӀари ургуб таврара ацӀнийи. 9Хъа дурар вари юкьуд агъзурихьнакьан вуйи. Исайи дурар чпин хулариз деетуру. 10Хъа Учв, ученикарра хъади, дишла люткейиъ эъру ва Далманут юрднан жилариина сирнав апӀуру.
Аьламатнан лишан тӀалаб апӀуб
11Фарисйир гъюру ва Исайихъди гьюжатнаъ учӀвру. Дурари Думу ахтармиш апӀури, Дугъкан аьршариан лишан улупуб тӀалаб апӀуру. 12Исайи, гъагъиди ил хъадабгъну, дурариз кӀуру:
– Гьаз му наслин адмийири лишан ккун апӀура? Дюзди кӀуразачвуз: му касариз лишан хьибдар.
13Хъасин, дурар гъитну, Думу хъана люткейиъ эъру ва гьатмуну гъирагъдихъинди сирнав апӀуру.
«Фарисйирин ва Гьироддин дунихьан ихтият йихьай»
14Ученикариз чпихьди люткейиз уьл гъадабгъуз кӀваълан гьархнийи. Дурарихь саб уьлтӀан хьтайи. 15Дурарихъди сюгьбатнаъ айи Исайи ихтият хьуб ккун апӀру:
– Лигай-гьа, фарисйирин ва Гьироддин дунихьан ихтият йихьай.
16Хъа дурари чиб-чпин арайиъ гъапи: «Мугъу мици, ухьухь уьл хьадруган, кӀурайиб ву».
17Дурар фтикан улхураш аьгъяди, Исайи кӀуру:
– Учву уьл хьтарчухь кӀури, гьаз гъалабулугънаъ ахъначва? Мегер учву гьамусра гъаври ахънаданчва? Ва учвуъ фукӀара убчӀвнадарин? Ичв юкӀвар гьамусра курди имийин? 18Мегер учвуз, улар ади рябкъюраданчвуз, ибар кади ебхьураданчвуз? Мегер гъаври аданчва? 19Узу хьуб уьл хьуд агъзуригъна пай гъапӀиган, хъиригъу уьлерин швнуб тавра ацӀунчва?
– ЙицӀикьюб, – жаваб тувру дурари.
20– Хъа ургуб юкьуд агъзуригъна пай гъапӀиган, швнуб тавра хъиригъу уьлерихьди ацӀунчва?
– Ургуб, – жаваб тувру дурари.
21– Мегер учву гьамускьан гъаври ахъунданчву? – кӀуру дурариз гьадмуган Исайи.
Вифсайда гъулаъ Исайи кур сагъ апӀуб
22Дурар Вифсайда гъулаз гъюру. Исайихьна кур хуру ва дугъак куркӀуб ккун апӀуру. 23Исайи курин хилхъан дибисну, гъулʼан адауру, ва дугъан улар Чан шурушнахьди кьяши дапӀну, хилар кӀулʼин иливну, гьерхру:
– ФукӀа рябкъюрануз?
24Дугъу дилигну кӀуру:
– Рякъюразуз адмийир, рякъюразуз гьарарси гъягъюрайидар.
25Гьадмуган хъана Исайи хилар дугъан уларихь гьивру, ва думу сагъ шулу, уччвуди рябкъюри шулу. 26Хъа Исайи думу:
– Лиг-гьа, му гъулазди удручӀвди, ичв хулаз гъарах, – пну, гьаъру.
Иса Месигь ву, – кӀуру Петри
27Иса мушвʼан, Чан ученикарра хъади, Филип паччагьдин Кесария юрднан гъулариз гъягъюру. Рякъюъ Дугъу ученикарихьан гьерхру:
– Адмийири Узу фуж ву кӀури, гьисаб апӀура?
28– Садари Уву штуан апӀру Ягьʼя ву, кӀура, тмундари – Илʼяс, хъа шубудпидари – пайгъамбрарикан сар, – пну, жаваб тувру дурари.
29– Хъа учву Узу фуж ву кӀури, гьисаб апӀурачва? – гьерхру Дугъу дурарихьан.
– Уву Месигь вува, – жаваб тувру Петри. 30Исайи дурариз Чакан гьич саризра дарпуб ккун апӀуру.
«Шлиз Узухъди гъягъюз ккундуш…»
31Хъа Дугъу дурариз, Инсаниятдин Балʼин гизаф аьзабар улукьиди, аьхюдари, маллйири ва къанунчйири Думу нигь апӀиди ва йикӀиди, хъа шубуд йигълан накьвдиан, чӀиви духьну, удучӀвиди, кӀури, аьгъювалар улупуйи. 32Дугъу мидкан дурариз ачухъди кӀуйи. Хъа Петри Иса гъирагъдиз гьадаъну, Дугъан гафар гьадатӀуз хъюгъру. 33Хъа Дугъу, илдицну, ученикарихьинди лигури, Петрин гафар кьатӀ апӀуру.
– ГьудубчӀв Узхьан, иблис! Яв фикрар адмийирин фикрар вуяв, хъа Аллагьдин – ваъ!
34Чахьна халкьдизна ученикариз дих дапӀну, Исайи гъапи:
– Шлиз Узухъди гъягъюз ккундуш, думу, чан тямягьяр дирчну, чан хач гъадабгъну, Узухъди гъюри. 35Шлиз чан уьмур уьбхюз ккундуш, дугъан думу дубгди. Хъа шли Узу ва Ужувлан хабар бадали чан уьмур пуч гъапӀиш, дугъу думу уьбхиди. 36Фу мянфяаьт а адмийиз, уьмрихьан гъахьиган, вари дюнʼя туври гъабшишра? 37Чан уьмур кьяляхъ апӀбан бадали, дугъу фициб кьимат тувди? 38Гьаму гунагькар ва Аллагь аьгъдру халкьдин улихь шли Узхьан ва Йиз гафарихьан нач гъапӀиш, дугъхьан Инсаниятдин Балира, Чан Адашдин аднаъди гирами малайикарихъди му жилиина гъафиган, нач апӀиди.
Currently Selected:
Марк 8: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
