Марк 7
7
Инсанари деркку аьдатартӀан Аллагьдин законар заан ву
1Ерусалимдиан Исайихьна саб кьадар фарисйирна къанунчйир гъюру. 2Дурариз ученикарикан сари дижрикӀу хиларихьди ипӀури гъябкънийи. 3Хъа фарисйиринра, вари жугьдаринси, чпин абйириланмина гъубзнайи хъуршлихънакьан хилар дижрикӀди уьлихъ дедреъру аьдат айи. 4Базариан гъафидари сабан хилар дижрикӀкьан гагьди уьл ипӀдар. Гьамцдар хъана гизаф аьдатар дурари уьрхюйи, мисалназ, захар, гажнар ва йифрин гъаб-гъажагъ жикӀбан аьдатар.
5Фарисйирина къанунчйири Исайихьан гьерхру:
– Яв ученикари абйирин аьдатар гьаз хъаърадар? Хилар дижрикӀди уьл ипӀура.
6Хъа Дугъу дурариз жаваб тувру:
– Гирами китабариъ Ишая пайгъамбри учвкан, кьюб маш гъяйидарикан, ужуди гъапну:
«Гьаму адмийири Узуз гьюрмат ушвниинди апӀура,
хъа дурарин юкӀвар Узхьан ярхла ву.
7Давди дурари Узуз икрам апӀура,
фицики дурари инсанарин аьдатар уьрхюз улупура».
8Учву адмийири ктагъу къайдйирихъан хъичӀихначва, хъа Аллагьдин табшуругъар тина апӀурачва. 9Учву гьисаб апӀурашалчва: ичв къайдйир тамам апӀбан бадали Аллагьдин табшуругъар батӀул апӀуб фагьумлу ляхин вуйич, кӀури! – давам апӀуру Исайи.
10– Магьа мисал. Мусайи гъапну: «Адашдизна дадайиз гьюрмат апӀинай» ва «адашдизна дадайиз люкьнар апӀрур аьжализ лайикь ву». 11Хъа учву фу кӀури шулчва? Эгер сари чан дадайиз вая адашдиз «Узу увуз буржлу вуйиб Аллагьдиз гъурбан гъапӀунза», гъапиш, 12дугъхьан сарун чан адашдизна дадайиз кюмек дарапӀрира гъузуз шулу, кӀурачва. 13Гьамци учву Аллагьдин гаф ичв аьдатназ илтӀибкӀунчва ва наслариз гьаци ктибтурачва. Гьаму мисалназ ухшар гизаф чӀуру ляхнар апӀури шулучва.
14Исайи, хъана Чахьна халкьдиз дих дапӀну, кӀуру:
– Вари узухъ хъебехъай ва гъаври йихьай. 15Инсандиъ чӀатан убчӀвру гьич сабдихьанра думу чиркин апӀуз даршул. Инсандиан удубчӀвруб – магьа думу чиркин апӀруб. [16]#7:16 Грекарин саспи БикӀбариъ гьамци кӀура: «Ибар кайириз гъит ебхьри».
17Думу, халкь гъитну, хулаз гъафиган, ученикари Дугъхьан гьадму гафарин мяна ачухъ апӀуб ккун апӀуру. 18Дугъу дурариз ктибтуру:
– Учву гьамдин гъавриъ ахъраданчва? Инсандиъ чӀатан убчӀвру гьич сабдира думу чиркин дарапӀрайивал рябкъюраданчвуз? 19Фицики думу адмийин кӀваз гъябгъюрадар, хъа – фуниз, ва хъасин удубчӀвуру (Гьамдиинди Дугъу ипӀруб вари марцциб вуйивал улупура). 20Инсандиан удучӀврудари, – кӀуру Исайи, – думу чиркин апӀуру. 21-22«Самбал алдапӀувалар», яна хилʼан адахъувалар, тӀафалвалар, йивну йикӀувалар, кьяппавалар, тямягькарвалар, угърашʼвалар, инсафсузвалар, машнаъ ягь адрувалар, гъанихвал ва хъял, футна, фурс, ахмакьвалар – гьамрарихъна хру пис фикрар инсандин кӀваан удучӀвуру. 23Гьаму вари писвалар инсандин айтӀан удучӀвуру ва дурари инсан чиркин апӀуру.
Исайи жугьуд даруриз кюмек апӀура
24Гьадму йишвар дирчну, Иса Тир юрднан жилариина гъягъюру. Душваъ Думу садар хулариъ дергру. Дугъаз мидкан гьич саризра аьгъю дубхьну ккундайи, аммаки гьитӀибкӀну гъибтуз гъабхьундайи. 25Исайикан чиркин рюгь убчӀвнайи сар шуран дадайиз аьгъю шулу. Думу дишла Дугъахьна гъюру ва ликарикк, икрам апӀури, ккархьру. 26Хъа думу дишагьли жугьуд дайи, думу Сирофиникияйин миллетдикан вуйи. Дугъу Исайикан чан шурʼан жин утӀубккуб тӀалаб апӀурайи.
27Исайи гъапи:
– Сифте баяр-шубар ацӀри. Дурарихьан тадабгъну, уьл хуйириз ккипуз хай даршул.
28Хъа дишагьлийи кӀуру:
– Йиз Агъа, хуйирира баяр-шубари тадахьу уьлин урклар итӀуру, аьхир.
29– Яв гьамциб жавабназ лигну увхьан мясляаьтниинди хулаз гъягъюз шулвухьан. Яв шурʼан жин удубчӀвну, – кӀуру Исайи.
30Фу лигурва, хулаз хътаку дишагьлийиз чан риш, сагъ духьну, ахниъ дахънади рякъюру ва жинра дугъʼан удубчӀвна.
Исайи кар сагъ апӀуб
31Тир юрднан жиларилан кьяляхъ хътаку Иса Сидон ва ЙицӀубшагьрин жилариланмина Галилей гьюлихъинди гъюру. 32Дугъахьна кар ва цӀибтӀан улхуз даршлу сар кас хъади гъюру, дугъʼин хилар иливуб ккун апӀуру.
33Исайи думу халкьдихьан гьадауру, дугъан ибариъ Чан тӀубар урччвру, хъасин Чан тӀубарик шуруш кабтӀну, дугъан мелзнак кучру. 34Хъа завузди дилигну, дериндиз ил хъадабгъну, кӀуру:
– Эффата! (яна «Арцц!») 35Гьадму сяаьт дугъаз ебхьуз хъюгъру ва дибиснайи мелз либхуз хъюбгъну, дугъан чӀал ачухъ шулу. 36Исайи дурариз мидкан гьич саризра дарпуб ккун апӀуру. Хъа Дугъу дарпуз гъадагъа апӀбахъ, дурари артухъ рабгъуйи. 37Адмийири, гизаф аьламат духьну, кӀуйи:
– Мугъу вари ужу апӀуру. Мугъу гьеле кардариз ебхьузра гъитру, улхуз даршлудариз чӀалра улупуру!
Currently Selected:
Марк 7: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
