Марк 6
6
Иса Чан гъахи шагьриз гъягъюб
1Душвʼан удучӀву Иса Чан гъахи шагьриз гъягъюру. Дугъахъди Чан ученикарра хъайи. 2Султ йигъан Исайи мистаъ аьгъювалар улупуз хъюгъру. Дугъахъ хъпехъурайи гизафдари, мюгьтал духьну, кӀуйи:
– Гьамгъан гьаму аьгъювалар наънан ву? Мугъаз мициб фагьум шли тувна? Гьамцдар аьламатнан ляхнар Гьамгъан хилариинди фици шула?! 3Му харатчи уста, Марʼямдин Бай, Якьубдин, Юсуфдин, Ягьудайин ва Симондин чве дарин? Мугъан чйир гьамшваъ, ихь арайиъ, адаринхъа?
Гьаци вуйиган, дурариз Исайихъ хъугъуз ккунди адайи.
4– Гьюрмат адру пайгъамбар хьуб мумкин дар, – кӀуру Исайи, – хъа чан багъри шагьриъ ва хулаъ, жвуван багахьлуйиригъ ва хизандиъ пайгъамбриз гьюрмат ади шулдар.
5Гьаддиз Дугъхьан душваъ, сакьюдар иццурайидариин хилар иливну сагъ гъапӀдар ктарди, сану сабкьан аьламат улупуз гъабхьундайи. 6Думу дурарин хътругърайивалиин мюгьтал духьнайи.
Хъасин Думу гъулʼан-гъулаз гъягъюри, адмийириз аьгъювалар туври шулу.
7Исайи Чахьна йицӀикьюрид вакилариз дих дапӀну, дурариз чиркин рюгьяр утӀурккуз шлу гьюкум тувну, кью-кьюрди аьгъювалар улупуз гьаъру. 8Дугъу дурариз, чумакъ ктарди, фукӀара гъададабгъуз амур апӀуру: я уьл, я тавра, я пул – 9анжагъ чпин ликариин али шаламартӀан.
– Я гьич саб жара палатра магъадабгъанай, – кӀуру Исайи дурариз. – 10Учву фунуб гъулаъ кьабул гъапӀиш, гьадму йишвариан гъягъяйизкьан, гьадушваъ гъузай. 11Хъа учву фунуб йишваъ-вушра кьабул дарапӀиш ва учвухъ хъпебехъиш, душвʼан удучӀвну гъягърудари, ичв ликарик кайи бишируг кадабхьай. Гъит му дурариз чпиин улубкьрубдин улихьмиди дебккрайи лишан ибшри.
12Дурар гъягъюру ва, адмийир чпин гунгьариин швумал хьпан бадали, дурариз аьгъювалар улупуру. 13Дурари гизаф жинар утӀурккуру ва, хифарин ччим ктатури, хайлин иццурайидар сагъ апӀуру.
Гьирод паччагьди, Иса штуан апӀру Ягьʼя ву кӀури, гьисаб апӀуб
14Чан нубатнаъ Исайикан Гьирод паччагьдиз ебхьуру, гьаз гъапиш Дугъан аваза варишвариъ атӀабгуру. ГьацӀари: «ДукӀнайи штуан апӀру Ягьʼя чӀиви гъахьну ва гьаддиз аьламатар улупура» – кӀуйи. 15Жарадари: «Думу Илʼяс ву» – кӀуйи, хъа шубурпидари: «Думу кюгьне пайгъамбрарикан сарсир ву» – кӀури тасдикь апӀуйи. 16Гьамци гъеебхьу Гьиродди: «Узу кӀул алдабтӀу Ягьʼя чӀиви гъахьну» – гъапнийи.
Штуан апӀру Ягьʼя йикӀуваликан
17Гьиродди чав буйругъ тувну, Ягьʼя дидисну, чан чве Филипдин хпир Иродиадайин кӀуллан дустагъдиъ итру. Хъасин Гьиродди Иродиада чаз шивди дитнийи. 18Фицики Ягьʼяйи Гьироддиз: «Яв чвуччвун хпир увуз хай шулдар» – гъапнийи. 19Гьамци гъапну кӀури, Иродиадайи Ягьʼяйиин хъял иливнийи ва дугъаз думу йикӀуз ккун гъабхьнийи, амма шуладайи, 20гьаз гъапиш Ягьʼяйихьан Гьироддиз гучӀуйи, фицики дугъаз думу гьякьлу ва гирами кас вуйивал аьгъяйи ва, гьаддиз, думу уьрхюрайи. Гьирод Ягьʼяйин аьгъювалар улупбахъ, саспиган дурарикан учв инжик шулушра, иштагьниинди хъпехъуйи.
21Ужуб дюшюш ккабхъру: Гьироддин бабкан гъахи йигъ улубкьну ва гьаддиз гюре гешт хъапӀуз ханар-беглар, юзбашйир ва Галилей уьлкейин аьхюдар уч апӀуру. 22Думу шадлугъназ ялхъвнар апӀуз Иродиадайин ришра гъюру. Дугъан ялхъван Гьироддиз ва хялариз гизаф бегелмиш шулу ва паччагьди шураз кӀуру:
– Узкан увуз фу ккундуш вари туварзавуз! – 23Хъа паччагьди ху апӀуру. – Фу ккун гъапӀиш, вари тувурзавуз, гьеле йиз айи паччагьлугъдин гьацӀ пай вушра.
24Думу шуру душну дадайихьан гьерхру:
– Фу ккун апӀуза?
– Штуан апӀру Ягьʼяйин кӀул, – жаваб тувру Иродиадайи. 25Шуру, паччагьдихьна душну:
– Узуз штуан апӀру Ягьʼяйин кӀул ленгерийиъди ккундузуз, думу узуз гьаму сяаьт ча! – кӀуру.
26Паччагь яманди пашман шулу, хъа чав хяларин улихь ху апӀбаз лигну, дугъхьан, ккун гъапӀуб тамам дарапӀди гъибтуз гъабхьундайи. 27Дугъу дишла эскер гьаъну, чахьна Ягьʼяйин кӀул хуз буйругъ тувру. Эскри дустагъдиъ Ягьʼяйин кӀул алдабтӀуру, 28ва ленгерийиъди кӀул дубхну, шурахьна тувру, хъа дугъу – дадайихьна. 29Мидкан аьгъю гъабхьи Ягьʼяйин ученикари дугъан жандак гъадабгъуру ва кивру.
Исайи хьуд агъзур кас тухъ апӀуб
30Вакилар Исайихьна хътакуру ва Дугъаз чпи гъапӀдарикан ва туву аьгъюваларикан варибдикан ктибтуру. 31Дугъу дурариз кӀуру:
– Хъа гьамус, адмийир адру фунуб-вушра йишваз гъягъидихьа, гьадушваъ ялгъузди гъузай ва сацӀиб рягьятвал гъадабгъай.
Гьаз гъапиш, дурар айишваъ гизаф халкь айи, дурариз гьеле уьл ипӀузкьан мажал шуладайи. 32Гьаддиз дурар люткейиъди халват йишваз гъушу. 33Гьаци вушра гизафдариз дурар люткейиъди гъягъюри рякъюру, фужар вуш, аьгъю шулу, ва гьюлин гъирагъ вуйибси вари шагьриан адмийир хъергру ва вакилартӀан ухди гъюру. 34Люткейиан удучӀву Исайиз аьхючӀвеъ халкь рякъюру. Дугъаз дурарин язухъ шулу, гьаз гъапиш дурар марччлихъан хътру марччарси айи. Дугъу дурариз гизаф ляхнарикан ктибтуру.
35Йигъар хябяхъ шулайи, ва Дугъан ученикари, багахьна дуфну, кӀуру:
36– Мушвайишв ичӀи йишв ву, ва сарун йигъарра хябяхъ ву, мурар деет, гъит багахь гъулар-хулариз гъарахри, чпиз ипӀруб гъадабгъри.
37– Учву дурариз ипӀруб тувай, – кӀуру Исайи.
– Гьамус учу, душну, дурариз уьл гъадабгъурайин? Ухьу вари саб вазли гъилихишра, гьациб пулихъ дурариз уьл гъадабгъну удудукьур! – кӀуру вакилари.
38– Учвухь фукьан уьл хьачвухь? – пну, гьерхру Исайи. – Гъарахай, лигай гьеле.
Дурар лигуру ва кӀуру:
– Хьуб уьлна кьюб балугъ.
39Гьадмуган Дугъу дурариз, халкь десте-дестеди чру укӀʼин дитай, кӀуру.
40Халкь хьу-хьуцӀур ва варж-варж кас ади, жергйириъди деъру.
41Исайи, хьуб уьлна кьюб балугъ гъадагъну, завузди дилигну, Аллагьдин ужувлакк ккахьри, дупну, уьлер гьудутӀну, халкьдиз пай апӀуз ученикарихьна тувру. Дугъу варидаригъна кьюб балугъра пай апӀуру. 42Вари халкьди ипӀуру, тухъ шулу 43ва балугъаринна уьлин хъригъу кьацӀари йицӀикьюб тавра ацӀру. 44Хъа вари гъипӀдар хьуд агъзур кас вуйи.
Иса штуинди гъягъюб
45Мидин кьяляхъ Исайи, Чав сабан халкь гьаъри имиди, Чан ученикариз люткейиъ эъну, гьатмуну гъирагъдихъ хъайи Вифсайда гъулаз сирнав апӀуб амур апӀуру. 46Халкь деетну, Думу ккарагуз дагъдиз удучӀвуру.
47Хябяхъдин вахт дубхьнайиган, ученикар айи лютке гьюлин гьацӀ кьялариъ айи, хъа Иса сарна-сарди гъирагъдихъ гъузнийи. 48МикӀлаз къаршуди сирнав апӀбу кьувватнахъан душнайи ученикар дяркъну, Иса, акв алабхьуради, гьюлилантина дурарихьна гъягъюру. Думу дурарин люткейиз багахь шулайи. 49Иса гьюлленмина гъюри гъяркъдариан, думу чпиз гьугъубжвурайи гъаранту вушул, пну, варидариан сабпну гьарай утӀубччвуру, 50гьаз гъапиш дурариз, Думу гъяркъюбси, гучӀ гъабхьнийи. Хъа Иса дишла дурарихъди улхуз хъюгъру:
– ЮкӀв ижми апӀинай, Узу вуза. ГучӀ мапӀанай! – 51пну, дурарин люткейиъ учӀвган, микӀ яваш гъабхьи. Мици хьували дурар хъана артухъ гъах апӀуру. 52Уьлерихъди гъабхьи аьламатнан дурар гъавриъ ахъундайи, ва дурарин юкӀвар курди гъузнийи.
53Сирнав апӀурайидар Геннисарет юрдназ гъюру. 54Дурар люткейиан эдеубси, гъирагъдихъ хъайидариз Иса аьгъю шулу, 55ва жаргъну душну, варишвариъ мидкан хабар ипру. Думу наан аш деебхьну, дурари гьадина ахнарииндира кмиди иццрудар хуйи. 56Иса наанди гъушишра: гъулариз, шагьрариз, ятгъариина – варишвариъ иццурайидар духну дитуйи ва Дугъкан Чан ккурттарин канчӀарик куркӀузкьан гъитуб тӀалабар апӀуйи. Вари Дугъак куркӀрудар сагъ шуйи.
Currently Selected:
Марк 6: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
