Марк 5

Жинар кайир сагъ апӀуб

1Дурари гьюлин тмуну гъирагъдихъна Герасин юрдназ сирнав апӀуру. 2Иса люткейиан удучӀвубси, Дугъан гъаншаризди накьваригъ яшамиш шулайи жинар кайи адми утӀурччвуру. 3Думу сарихьанра дирккуз шуладайи – гьеле зунжрарииндикьан. 4Дугъан хилар-ликар зунжрарихьди швнуб-сабан гъийитӀнийи, аммаки дугъу зунжрар ва гьялкьйир кьатӀар апӀуйи – гьич сарихьанра думу дерккуз шулдайи. 5Зат сикин дарди йигъ-йишв накьварин хьарар-дюрхъяригъ ва гъярар-тепйиригъ дугъу чӀигъар апӀуйи ва учв гъванарикан йивуйи.

6Ярхлаан Иса гъяркъюбси, думу Дугъахьна жаргъну дуфну, икрам апӀури, кьамкьариинди дахъру 7ва аьхю дихниинди кӀуру:

– Яв узухъди фу вуяв, ВаритӀанзаанур, Аллагьдин Бай Иса? Аллагьисан, Увуз миннат вуйиз: йиз зегьле мабхан! 8Исайи: «УдубчӀв гьаму адмийиан, чиркин рюгь!» – гъапиган, диди гьаци гъапнийи. 9Хъа Исайи дугъхьан гьерхру:

– Ччвур фуж вуяв?

– Йиз ччвур кьушум вуйиз, гьаз гъапиш учу гизаф жинар вуча, – жаваб туву дугъу. 10Жинар, му юрдариан чпи муутӀурккан кӀури, Исайиз миннат апӀуз хъюгъру.

11Хъа душвахь таблик силарин аьхю лиж дарабгънайи.

12– Учхьан силариъ учӀвуз шлуси, учу гьадраризди гъягъюз гъит, – кӀури, жинари Исайикан тӀалаб апӀуру.

13Дугъу ихтияр тувру. Ва адмийиан удучӀву чиркин рюгьяр силариъ учӀвру. Хъа силарин лиж гъарзарилансина гьюлизди убсру ва ккабхьру. Дурарин кьадар кьюд агъзурихьна вуйи.

14Силарин габнари, жаргъну душну, шагьриъ ва гъирагъариъ айи гъулариъ, гъабхьибдикан ктибтуру. Агьлар, фу гъабхьнуш, лигуз гъюру. 15Дурар Исайихьна гъюру ва, фу лигурва: кьушумкьан жинар кади гъашир, палтар алди, чан фикрихъ хъади деъна. Дурарик гучӀ кабхъру. 16Му аьламат гъябкъдари дурариз, жинар кайирикан ва силарикан фу гъабхьнуш, ктибтнийи. 17Гьадмуган Исайикан дурари, чпин юрдариан удучӀвну гъягъюб, ккун апӀуру.

18Иса люткейиъ эърайиган, чакан жинар ктӀурккури учвра гъадагъуб ккун апӀуру.

19Хъа Дугъу ихтияр тувундайи.

– Хулаз гъарах явдарихьна. Аллагьди фици яв язухъ гъизигнуш ва Дугъу увуз гъапӀубдикан дурариз кидибт, – кӀуру Исайи. 20Думу гъягъюру ва ЙицӀубшагьрин юрднан агьлариз Исайи чакан гьапӀнуш, ктибтуру – вари аьламат гъахьнийи.

Ягьирин риш чӀиви ва иццрур сагъ апӀуб

21Исайи хъана гьамуну гъирагъдихъна сирнав гъапӀиган, Дугълан аьхючӀвеъ адмийир илтӀишнийи. Иса гъирагъдихъ гъузнайи.

22Дугъахьна жугьдарин мистан аьхюр, Ягьир кӀурур, гъюру. Иса гъяркъюбси, думу Дугъан ликарикк икрамназ дахъру 23ва, Дугъкан миннат апӀури, кӀуру:

– Йиз риш йикӀура. Миннат вуйиз, дуфну дугъʼин хилар илив, думу сагъ хьиди, чӀивиди гъузди.

24Иса дугъахъди гъягъюру. Дугъахъди гизаф халкьра гъябгъюрайи ва юкьуб тереф Думу кьялаъ тӀаънайи.

25Дураригъди сар дишагьлира гъяйи. ЙицӀикьюд йисандин арайиъ дугъан ифи хътабтӀурадайи. 26Фукьан хъюгънийишра, гьич сар духтрихьанра думу сагъ апӀуз гъабхьундайи. Дугъу чаз айи-адруб вари харж гъапӀнушра, дугъаз кюмек гъабхьундайи, хъа гьял айибтӀан пис гъабхьнийи. 27Дугъаз Исайикан гъеебхьиган, думу гужназ адмийиригъ гъючӀву ва, Исайин кьялхъянди дуфну, Дугъан ккурттарик куркӀу, 28фицики дугъу фикир дапӀнайи: «Эгер узу Мугъан ккурттарик саб тикисикьан куркӀиш, сагъ хьидизу». 29Гьадму сяаьт дугъан ифи хътабтӀуру, ва дугъаз чан вари жан сагъ хьувал гьисс шулу. 30Исайиз дишла Чаан кьувват удубчӀвуб аьгъю шулу ва, халкьдихьинди илтӀикӀну, гьерхру:

– Узук фуж куркӀну?

31– Рябкъюрадарнуз, учӀукьну, халкьди Уву фици хъуржраш, хъа Увук фуж куркӀну кӀури, гьерхрира ава! – кӀуру Дугъаз ученикари. 32Хъа Дугъу ул алдатбиинди Чак куркӀур агурайи. 33ГучӀ дубхьнайи ва гукӀнишин кабхънайи дишагьлийи, чав гъапӀубдин гъавриъ ахъну, халкьдигъян гъюдучӀвну, икрам апӀури, Исайин ликарикк ккархьну, вари вуйибси ктибтуру. 34Дугъу дишагьлийиз кӀуру:

– Йиз риш, уву яв хъугъвали сагъ гъапӀунву. Архаин духьну гъарах, ва сагъвалиъ хьидива.

35Исайи му гафар кӀурамиди, мистан аьхюр вуйи Ягьирин хулʼан адмийир дуфну кӀуру:

– Яв риш гъакӀну. Мялим инжик мапӀан!

36Хъа Исайи дурарин гафариз фикир тутрувди, мистан аьхюриз кӀуру:

– ГучӀ мапӀан, анжагъ хъугъну гъуз!

37Дугъу Петризна, Якьубдизна, Якьубдин чве ЮгьандизтӀан ктарди, сарун саризра Чахъди гъюз ихтияр тувундайи. 38Дурар мистан аьхюрин хулаъ учӀвру. Исайиз, душваъ гъалабулугъ ади, яманди ишурайидар ва ишлар апӀурайидар рякъюру.

39– Учву гьаз дерд зигурачва, – кӀуру учӀву Исайи. – Риш дукӀнадар, хъа даахна.

40Дурар Дугъʼин аьлхъюз хъюгъру. Хъа Дугъу дурар вари адауру. Чахъди Чан ученикарна шуран адашна дада гъадагъну, риш дитнайи хулаъ учӀвру. 41Шуран хил дибисну, Дугъу дугъаз кӀуру:

– Талифа, куми! (яна «Риш, увуз кӀураза, гъудужв!»)

42Риш дишла гъудужвуру ва гъягъюз хъюгъру. Дугъан йицӀикьюд йискьан вуйи. Вари гъах гъахьнийи. 43Исайи мидкан саризра дарпуб ижмишнаан ккун апӀуру ва, шураз ипӀруб тувай, кӀуру.

Currently Selected:

Марк 5: ТабГК

Highlight

Copy