Nikamowina 19
19
kisē-manitow okistēyihtākosiwin
onikamon David
1tāpwē miyonākwan ōma kīsik;
ēkota ohci wāpahcikātēyiw kisē-manitow okistēyihtākosiwin;
tāpwē wāpahcikātēw ē‑kī-māhtāwi-osīhtāt kahkiyaw kīkway.
2tahto kīsikāw kīsik pīkiskwātam kā‑wāpaniyik,
mīna kīhtwām ati-pīkiskwātam ē‑ati-tipiskāyik.
3namōya kīkway pīkiskwēwin ahpō itwēwin;
namōya pēhtākwaniyiw opīkiskwēwin;
4māka āhci piko opīkiskwēwiniwāw misiwē askīhk pēhtākwaniyiw,
mīna otitwēwiniwāwa misiwē askīhk pēhtākwaniyiwa.
kisē-manitow ēkota kī‑mānokawēw pīsimwa kīsikohk;
5ē‑pē-takohtēyit tāpiskōc ē‑wī-wīkihtoyit oskinīkiwa ē‑takahkēyihtamiyit,
tāpiskōc omīhkawikīwi-iyiniwa ē‑cīhkēyihtamiyit ē‑wī-pimipahtāyit.
6pē‑sākēwēyiwa napatē kīsikohk ohci
mīna ē‑pimohtēyit misakāmē akāmihk isi.
ēkwa kahkiyaw kīkway kīsōwinamiyiwa.
kā‑tipēyihcikēt owiyasiwēwin
7owiyasiwēwin kā‑tipēyihcikēt mitoni miywāsiniyiw;
ēkota ohci miyikowisināniwiw oski-maskawisīwin;
otitasiwēwina kā‑tipēyihcikēt mamisītocikātēyiw,
ē‑miyikowisicik iyinīsiwin aniki ēkāya kā‑iyinīsicik.
8owiyasiwēwina kā‑tipēyihcikēt kwayaskwaniyiwa,
mīna aniki kā‑tāpwēhtahkik miywēyihtamowin ayāwak.
otitasiwēwina kā‑tipēyihcikēt kwayaskwātaniyiwa
mīna miyikwak nisitohtamowin.
9miywāsin kita-kistēyimiht kā‑tipēyihcikēt,
kākikē ka‑ihtakwan;
tāpwēmakaniyiwa owiyasiwātamowin kā‑tipēyihcikēt;
kākikē kwayask miyo-tōtākēyiwa.
10nawac ta‑miywēyihtamoht ispīhci ē‑māmawo-miyosiyit osāwi-sōniyāwa;
nawac ē‑sīwāk ispīhci kā‑māwaci-miywāsik āmow osīhcikēwin.
11ēkota ohci niya, kitatoskēyākan, nitāsowi-miyikawin kiskēyihtamowin;
tipahikēpayiw ē‑nanahihtamān.
12māka namōya awiyak kita-kī-wāpahtam opatinikēwina;
kā‑tipēyihcikēyan, pimācihin nipatinikēwina ohci ēkāya kā‑kiskēyihtamān!
13mīna kanawēyimin nimāyi-tōtamowina ohci ohcitaw kā‑tōtamān;
ēkāya ka‑tipēyimikoyān.
ēkosi ēkwa mitoni nika-miywātisin,
ēkwa namōya nika-tipēyimikon māyi-tōtamowin.
14kiyām nipīkiskwēwina mīna nimāmitonēyihcikana kita-tēpēyihtākwanwa kiya ohci,
kā‑tipēyihcikēyan, kā‑nātāmototawak mīna kā‑pimācihit.
Currently Selected:
Nikamowina 19: PCSBR
Highlight
Share
Copy
Want to have your highlights saved across all your devices? Sign up or sign in
Plains Cree Ruth © 2004 Canadian Bible Society
Plains Cree Psalms (collection) © 2013 Canadian Bible Society
Plains Cree James © 2014 Canadian Bible Society
Plains Cree Gospels and Acts © 2018 Canadian Bible Society