sēnt cān 20

1nistam māka ē kisikāk ēwako ē ati ispayik pē itohtēw mēri māktalin wipac kēkisēpā, kēyāpic ē wanitipiskāk, ēkota nahinitowikamikohk, ēkosi wāpamēw asiniya ē ki otinimiht nahinitowikamikohk ohci. 2ki sipwēpatāw māka, mina ki otihtēw sāiman pitara, mina anihi kotaka kiskinohamawākana, anihi cisas kā sākihāt, ēkosi itēw, ki otinēwak kā tipēyihcikēyit nahinitowikamikohk ohci, namawiya māka ni kiskēyitēnān tānita kā pimisimācik. 3pitar māka ki sipwētēw, asici ana kotak kiskinohamawākan, ē ki ati itohtēcik nahinitowikamikohk. 4tāpiskoc māka ki ati pimipatāwak: ēkosi ana kotak kiskinohamawākan ki ati nakacipaēw pitara, mina nikān ki otitam nahinitowikamik; 5ēkosi ē nawakit pitokamik ē itāpit, wāpahtam wāpiskēkinwa ē astēyiki; māka namawiya pihtokēw. 6sāiman pitar māka wista ki takosin, nāwāy, ēkosi ki pihtokēw nahinitowikamikohk; wāpahtam māka wāpiskēkinwa ē astēyiki, 7mina anima wāpiskēkinos kā ki wēwēkistikwānēpisoyit, namawiya ē asitastēyik anihi wāpiskēkinwa, māka piskis ē titipēkinikātēk. 8ēkwa ki pihtokēw ana kotak kiskinohamawākan mina, ana nistam kā ki takosihk nahinitowikamikohk, ēkosi ki wāpahtam mina ki tāpwētam. 9cikēmā namēskwa kiskēyitamwak kihci masinahikēwin ocita piko kita waniskāyit mina nipowinihk ohci. 10ēkosi kiskinohamawākanak ki sipwētēwak mina wiyawāw wikiwāhk isi.

11mēri māka ki nipawiw wayawitimihk nahinitowikamikohk ē mātot: ēkosi, oma ē mātot, ki nawakiw pihci ē itāpit nahinitowikamikohk; 12ēkosi wāpamēw niso okisikowa ē wāpiskioyit ē apiyit, pēyak ostikwāniyihk, mina pēyak ositiyihk, ita cisas wiyaw ē ki astēyik. 13ki itik māka, iskwēw, tānēki kā mātoyan? omisi itēw, cikēmā ē ki otinācik no tipēyihcikēma, ēkosi namawiya ni kiskēyitēn tānita kā pimisimācik. 14ispi omisi kā itwēt, ki kwēskikāpawiw, ē wāpamēw cisasa ē nipawiyit, namawiya māka kiskēyitam ēwakwani cisasa. 15cisas itēw, iskwēw, tānēki kā mātoyan? awēna nēnātonawat? wiya, ēwako ētokē kistikēwiyiniw ē itēyitahk, itēw, okimāw, kispin kā sipwētaāwatē wihtamawin tānita kā pakitinat, ēkosi ni ka otināw. 16cisas itēw, mēri. ki kwēskikāpawiw omisi ē itāt, hiparoihk, rāponāy; ēwakwānima ē itwēhk, kēskinohamākēyan. 17cisas itēw, ēkāwiya sāminin; cikēmā namēskwa ispimihk ni nātāw wēyotāwihk: māka natawāpamik niciwāmak mina isik, ispimihk ni nātāw notāwi mina kotāwiwāw, ni kisēmanitom mina ki kisēmanitomiwāw. 18mēri māktalin ki pē wihtamawēw kiskinohamawākana, ni ki wāpamāw kā tipēyihcikēt, mina anihi kā ki ayitikot.

19ispi māka wētākosik, ēwako ē kisikāk, nistam ē kisikāk ēwako ē ispayik sāsay māka ē ki kipahikātēki iskwātēma ita kiskinohamawākanak ē ayācik, wiya ē kostācik cowa, cisas ki pē natawi nipawiw tāwāyihk, ēkosi itēw, pēyatakēyimowin ki ka wi ayānāwāw. 20ispi māka oma kā itwēt, ki wāpahtaēw ocihciya mina wiyaw. ki mamahtākosiwak māka kiskinohamawākanak, ispi wiyāpamācik kā tipēyihcikēyit. 21cisas māka ki itēw mina, pēyatakēyimowin ki ka wi ayānāwā: kā ki isi sipwētisaot wēyotāwihk ēkosi nista kit isi sipwētisaotināwā. 22ispi māka oma kā itwēt ki pakitatāmototawēw mina itēw, otinihk kā kanātisit ahcāhk: 23#mātyo 16:19; 18:18piko awiyak o maciitiwina kē ponēyitamawāyēk ponēyitamawāwak, mina piko awiyak kē miciminamawāyēk, miciminamawāwak.

24māka tāmas, pēyak aniki mitātat nisosāp, titimas kā isiyihkāsot, namawiya wicēwēw ispi cisasa kā takosiniyit. 25kotakak māka kiskinohamawākanak ki itēwak, ni ki wāpamānān kā tipēyihcikēt. māka ki itēw, kispin ēkā wāpahtamwaki ocihcihk ē ēsitiniyiki sakaikana, mina ēkā nicihci ohci miskonamwakē ē ētiskākot sakaikana, mina ēkā miskonamwaki opimēyaw, namawiya ni ka tāpwētēn.

26kā poni ayinānēo kisikāyik māka o kiskinohamawākana mina pitokamik ki ayāyiwa, tāmas māka ē wicēwāt. cisas ki takosin, iskwātēma ē ki kipahikātēki, ēkosi ki itēw, pēyatakēyimowin ki ka wi ayānāwā. 27ēkwa ki itēw tāmasa, pē isicihcēyi wāpahta mina nicihciya; mina pē isicihcēyi miskonin opimēyaw: ēkāwiya ot ānwētamowini māka tāpwēta. 28tāmas māka ki naskwēwasimēw omisi ē ki itāt, no tipēyihcikēm mina ni kisēmanitom. 29cisas itēw, cikēmā ē ki wāpamiyan, ki ki tāpwētēn: sawēyitākosiwāk aniki ēkā kā ohci wāpamicik, ēyiwēhk māka kā ki tāpwētahkik.

30mihcēt māka kotaka kiskinawāci isihcikēwina ki itotam cisas ē wapamikot o kiskinohamawākana, ēkā kā masinaikātēki ota masinahikanihk, 31ohi māka masinaikātēwa kita tāpwētamēk cisas ēwakwāna Christ, okosisa kisēmanito; ē tāpwētamēk māka, kita ohci ayāyēk pimātisiwin o wiyowinihk.

Currently Selected:

sēnt cān 20: KKMR

Highlight

Copy