Чапарзабазул ишал 11

11 бетӏер

Цогидал халкъазул гӏадамаз иман лъеялъул хӏакъалъулъ

1Чапарзабазухъеги ва тӏолабго Ягьудиялда рукӏарал диналъул вацазухъеги хабар щвана цогидал халкъазги Аллагьасул рагӏи къабул гьабун бугилан. 2Пётр Иерусалималде тӏадвуссараб мехалъ, иман лъурал жугьутӏаздасан цо-цо чагӏаз гьесие бадибчӏвай гьабуна, 3сунат гьабичӏел гӏадамазухъе гьоболлъухъ ун, гьезда аскӏов гӏодов чӏун кваназе бегьилаанищилан. 4Гьебмехалъ Пётрица мухӏканго бицана гьезда жиндирго ккарал лъугьа-бахъиназул хӏакъалъулъ:

5– Иоппия шагьаралда цо къоялъ Аллагьасе дугӏа гьабулев вукӏана дун. Гьебмехалъ цебетӏами лъугьана дие. Ункъабго гӏинщги ккун цо кӏудияб турут гӏадинаб жо зодиса гӏодобе биччалеб бихьана. Битӏахъе дида аскӏобе бачӏана гьеб. 6Гьелда тӏад рихьана ракьалдасан хьвадулел ункъхӏатӏилал хӏайванал, гьединго гӏалхул хӏайванал, шурулел жал ва хӏанчӏи. 7Цинги цо гьаракьалъ абулеб рагӏана дида: «Вахъун гьелги хъве, Пётр, гьезул гьанги кванай», – ян. 8Дица абуна: «Я, Бетӏергьан! Дица киданиги гьабиларо гьединаб иш. Хъубаб, хӏарамаб квен дица киданиги кӏалдибе босичӏо», – ян. 9Кӏиабизеги зобалаздасан добго гьаракьалъ абуна: «Аллагьас бацӏцӏад гьабураб жоялда хъубабилан абуге дуца», – ян. 10Лъабабизеги рагӏана дида гьеб гьаракь. Цинги гьеб кинабго зобалазде эхеде цӏан ана. 11Дун рещтӏун вукӏараб рукъалда цеве лъабго чи чӏана гьеб параялъ. Гьел ратана Къайсарияталдаса дида хадур ритӏун рачӏарал чагӏи. 12Илагьияб Рухӏалъ дида абуна сунданиги щаклъичӏого гьезда цадахъ айилан. Дида цадахъ къватӏиве вахъана гьав анлъавго диналъул вацги. Цинги ниж щвана дов чиясул бакӏалде. 13Гьес нижеда бицана жиндир рокъове вачӏун малаикас гьадин абунилан: «Дуца Иоппиялде чагӏи ритӏе Пётр абун тӏокӏцӏар бугев Симонида хадур. 14Гьес бицина мунги дур хъизан-агьлуги хвасарлъулеб хабар».

15Дица гьезие хабар бицине байбихьидал, добмехалъ нилъедего гӏадин, гьездеги рещтӏана Илагьияб Рухӏ. 16Гьениб дида ракӏалде щвана: «Яхӏя аварагас лъадаца чурарал гӏадин, Илагьияб Рухӏалдалъун чурила нуж», – ан Тӏадегӏанав Гӏисаца добмехалъ абун рукӏарал рагӏаби. 17Тӏадегӏанав Масихӏ Гӏисаде иман лъурал нилъее гӏадинаб сайигъат Аллагьас цогидал халкъазеги кьолеб бугеб мехалъ Аллагьасда дандечӏаравани, дун щив чи ккелев вукӏарав?

18Гьеб хабар рагӏидал гьел гӏодоре риччана. Аллагьасе рецц гьабун гьез абуна гьанже Аллагьас цогидал халкъазеги рес кьун бугин абадияб гӏумру насиблъулеб тавбу гьабизе.

Антиохиялдаги гӏемерал гӏадамаз иман лъола

19Стефание зулму гьабураб заманаялда рикьа-риххун рахъ-рахъалде лъутун ун рукӏарал муридал Финикиялде, Кипралде ва Антиохиялдецин щвана. Жугьутӏазда гурони гьез Рохалил хабар бицунеб букӏинчӏониги, 20гьезда гьоркьор рукӏана Кипралдаса ва Киренеялдаса цо-цо гӏадамал, Антиохиялде рачӏун, гьениб греказдаги Тӏадегӏанав Гӏисал хӏакъалъулъ жидеца Рохалил хабар бицине лъугьарал. 21Бетӏергьанас квербакъи гьабуна гьезие, ва цӏакъ гӏемерал гӏадамаз Тӏадегӏанав Гӏисаде иман лъуна.

22Гьезул хӏакъалъулъ хабар рагӏана Иерусалималда бугеб иман лъуразул агьлуялда ва гьез Барнаба Антиохиялде витӏана. 23Гьениве щвараб мехалъ Барнабада бихьана гьеб агьлуялда Аллагьасул баркат лъун букӏин ва гьелдаса вохана. Гьес киназдаго гьарана ракӏ-ракӏалъго Тӏадегӏанав Гӏисаде иман лъун къвакӏун чӏайилан. 24Живго гьев Барнабаги вукӏана Илагьияб Рухӏалъулги иманалъулги вугӏун цӏурав цӏакъ лъикӏав чи. Гьебмехалъги цӏакъго гӏемерал гӏадамаз Тӏадегӏанав Гӏисаде иман лъуна.

25Цинги Барнаба ана Шаул валагьизе Тарсалде. 26Гьенив ватун, Шаулги вачун, Антиохиялде тӏадвуссана Барнаба. Тӏубараб лъагӏел рехана кӏиясго гьениб. Гьеб лъагӏелалъго иман лъуразул агьлу данделъарал бакӏазде ун Барнабацаги Шаулицаги гӏемераб халкъалъе вагӏза-насихӏат гьабуна. Гьениб Антиохиялда тӏоцебе байбихьана муридазда христианалилан абизе.

27Доб заманаялда Иерусалималдаса Антиохиялде рачӏана кашпу-карамалъи бугел гӏадамал. 28Агаб абун цӏар бугев цо гьединав чияс, цеве вахъун, Илагьияб Рухӏалдалъун лъазабуна тӏолабго ракьалда кутакаб ракъи букӏине бугилан. (Хӏакъикъаталдаги гьеб ракъи букӏана Клавдий къайсарлъун вугеб заманаялда.) 29Гьебмехалъ муридаз хӏукму гьабуна бугес бугелда рекъараб садакъа-напакъа Ягьудиялда ругел жидерго диналъул вацазе битӏизе. 30Гьедин бакӏарараб садакъа-напакъаги босун, гьез Барнабаги Шаулги ритӏана Ягьудиялъул иман лъуразул бутӏрузухъе гьеб щвезабизе.

Currently Selected:

Чапарзабазул ишал 11: AvrNT

Highlight

Copy