Чапарзабазул ишал 10

10 бетӏер

Пётр Корнелийихъе гьоболлъухъ уна

1Къайсарияталда вукӏана Корнелий абулев цо чи. Гьев вукӏана Италиялъулабилан абулеб полкалдаса рагъухъабазул нусилбетӏер. 2Гьевги гьесул рукъалъул агьлуги Аллагьасукьа хӏинкъарал, цӏакъ диниял гӏадамал рукӏана. Кӏуди-кӏудиял садакъабиги гьарулаан гьес гӏадамазе, кидаго Аллагьасе тӏагӏат-гӏибадаталдаги вукӏунаан.

3Гьале цо къоялъ къаденахъе сагӏат лъабго тӏубараб мехалъ, тӏасан загьираб илгьам лъугьун, Бичасул малаик вачӏана гьесухъе.

– Корнелий! – абун кӏалъана гьесда малаик.

4Хӏинкъадго гьесухъги валагьун:

– Щиб, бетӏерчӏахъад? – абун гьикъана Корнелийица.

Малаикас гьесие жаваб кьуна:

– Дур дугӏабиги садакъабиги Аллагьас къабул гьаруна, бищунго къабулаб къурбан гӏадин. 5Гьанже дуца Иоппиялде чагӏи ритӏе Пётр абун тӏокӏцӏар бугев Симонида хадур. 6Гьев вуго дабагъчи Симонихъ гьоболлъухъ. Ралъдал рагӏалда буго гьесул мина.

7Гьесда кӏалъарав малаик цевеса тӏагӏаравго, Корнелийица кӏиго рагьтӏателги жиндирго цо муъминав нукарги аскӏоре ахӏун, 8гьезда гьеб кинабго бицана ва гьел лъабалго Иоппиялде ритӏана.

9Нахъисеб къоялъул къалъул гӏужалда гьел Иоппиялде щолел рукӏана. Тӏохде вахун дугӏа гьабулев вукӏана Пётр гьебмехалъ. 10Пётр вакъана, кванде хиял ккана гьесул гьениб. Гьесие квен къачӏалеб букӏаго, цебетӏами лъугьана: 11зобал рикьун ана ва ункъабго гӏинщги ккун гӏодобе биччан бачӏунеб бихьана цо кӏудияб туруталда релълъараб жо. 12Гьелда тӏад ругоан ракьалдасан хьвадулел киналго тайпабазул хӏайваналгун шурулел жалги хӏанчӏиги.

13– Вахъун гьелги хъве, гьезул гьанги кванай, Пётр, – абун гьаракь рагӏана гьесда.

14Пётрица абуна:

– Я, Тӏадегӏанав, дица киданиги гьабиларо гьединаб иш. Хъубаб, хӏарамаб квен дица киданиги квинчӏо.

15Кӏиабизеги добго гьаракьалъ абуна гьесда:

– Аллагьас бацӏцӏад гьабураб жоялда хъубабилан абуге дуца.

16Лъабабизеги рагӏана Пётрида гьеб гьаракь ва гьебсагӏат зобалазде босун ана доб турут гӏадинаб жо. 17Гьелъул магӏна щибдайилан пикрабазда Пётр вугеб мехалъ, Корнелийица ритӏарал дол гӏадамал, Симонил мина бугеб бакӏ балагьизе гьесул кавудухъе щун рукӏана. 18Гьез ахӏунго-ахӏун гьикъулеб букӏана Пётр абун тӏокӏцӏар бугев Симон вугищин нужер гьенив гьоболлъухъилан. 19Доб жиндаго цебетӏамураб сураталъул пикрабазда вукӏарав Пётрида Илагьияб Рухӏалъ абуна:

– Гӏенекке, кӏиго чи вуго мун валагьулев. 20Вахъун гьанже тӏохдаса гъоркьеги рещтӏун, сунданиги щаклъичӏого, гьезда цадахъ а мун. Гьел руго дица ритӏарал чагӏи.

21Гьениса гъоркьеги рещтӏун, дол гӏадамазда абуна Пётрица:

– Дун ккола гьев нужеца валагьулев вугев чи. Щай нуж гьанире рачӏарал?

22Гьез абуна:

– Корнелий абун вуго цо нусилбетӏер, гьев вуго Аллагьасукьаги хӏинкъулев, киналго жугьутӏазда гьоркьоб кӏудияб къадру-къиматги бугев лъикӏав чи. Бичасул малаикас гьесие илгьам гьабуна мун рокъове ахӏеян ва дур рагӏабазухъ гӏенеккеян.

23Пётрица гьел жанире рачана ва сордо бан гьенир чӏезаруна. Нахъисеб къоялъ вахъун гьезда цадахъ ана Пётр. Иоппиялдаса цо чанго диналъул вацги къватӏиве вахъана гьезда цадахъ. 24Кӏиабилеб къоялъ Пётр Къайсарияталде щвана. Корнелий, жиндирго гӏага-божаралги гьудул-гьалмагъзабиги ахӏун, гьел рачӏиналъухъ валагьун чӏун вукӏана. 25Пётр азбаралъуве лъугьунеб мехалъ, данде ун гьесда цеве суждаялда чӏана Корнелий. 26Гьев тӏаде вахъинавулаго, Пётрица абуна:

– Тӏаде вахъа, дунги мунго гӏадинав чийин.

27Гьевгун гара-чӏварулаго рокъове жаниве лъугьарав Пётрида гӏемерал гӏадамал ракӏарун ратана гьенире.

28Гьезда Пётрица абуна:

– Нужеда лъала жугьутӏазул къануналда рекъон цогидал халкъазул гӏадамазулгун гьоркьоблъи гьабизе яги гьезухъ гьоболлъухъ рещтӏине жугьутӏчиясе бегьулареблъи. Амма Аллагьас дида бихьизабуна тӏолабго махлукъаталда гьоркьоб цониги чиясда хъубавилан, нажасавилан абизе бегьулареблъи. 29Гьединлъидал дун, нужеца ахӏаравго, тӏадкӏалъай гьечӏого вачӏана гьаниве. Гьанже бице нужеца: щай дида хадур чагӏи ритӏарал?

30Гьебмехалъ Корнелийица абуна:

– Ункъо къоялъ цеве, гьадинабго къалъудаса хадуб лъабго сагӏат араб гӏужалда дирго рокъов Аллагьасе как балев вукӏана дун. Вачӏун дида цеве чӏана гвангъараб гӏаба ретӏарав цо чи. Гьес дида абуна: 31«Корнелий, Аллагьасда рагӏана дур дугӏа, дур садакъабиги рихьана гьесда. 32Гьанже дуца Иоппиялде чагӏи ритӏе Пётр абун тӏокӏцӏар бугев Симонида хадур. Гьев Пётр вуго ралъдал рагӏалда мина бугев дабагъчи Симонил бакӏалда». 33Гьебсагӏатго ритӏана дица дуда хадур чагӏи. Мун гьаниве вачӏун лъикӏ ккана. Гьале гьанже ниж киналго Аллагьасда цере чӏун руго, Бетӏергьанас дуе амру гьабурабщиналъухъ гӏенеккизе.

«Аллагьасе лагъзал цого къагӏидаялъ рокьула»

34Пётрица гьезда абуна:

– Гьанже якъинго бичӏчӏана дида Аллагьас жиндирго лагъзадерида гьоркьоб батӏалъи гьабулареблъи. 35Кинаб къавмалъул чи вугониги, гьес къабул гьавула жинкьа хӏинкъулев ва витӏун хьвадулев чи. 36Гьес Исраилил халкъалъухъе битӏана жиндирго рагӏи. Гьеб рагӏи буго ракълил хӏакъалъулъ ругьел, ва Гӏиса Масихӏидалъун бачӏана гьеб. Гьев Масихӏ вуго киназулго Тӏадегӏанав. 37Нужеда лъала Галилеялдасан байбихьун тӏолабго Ягьудиялда ккарабщинаб. Гьеб лъугьана Яхӏя аварагас лъадалъ ччун рахъизе кколилан лъазабуралдаса хадуб. 38Нужеда лъала Аллагьас Назареталдаса Гӏисаде Илагьияб Рухӏги хӏалкӏолъиги рещтӏинабураблъи, гьес киса-кивего ун гӏемераб лъикӏлъи гьабураблъи ва илбисалъул кверщаликь рукӏарал киналго гӏадамалги сахлъизарураллъи, – Аллагь гьевгун вукӏиндалха! 39Ниж руго кинабго жугьутӏазул ракьалдаги Иерусалималдаги гьес гьабурабщиналъе нугӏзал. Гъотӏода ван гъанкъун хвезавуна гьев. 40Лъабабилеб къоялъ хваралъуса вахъинеги гьавуна Аллагьас гьев, хваралъуса вахъун вихьулевлъунги гьавуна.

41Амма киназдаго гуро гьев вихьарав. Гьев вихьана Аллагьас цереккунго тӏаса рищун рукӏарал, гьеб киналъего нугӏзаллъун лъугьарал нижеда. Хваралъуса вахъун хадувги гьесда цадахъ кванарал-гьекъарал чагӏи руго ниж. 42Гьес нижее амру гьабуна чӏагоязеги хваразеги суд гьабизе Аллагьас тарав чи вугин живилан халкъалдаго лъазабеян, гьелъие нугӏлъиги гьабеян. 43Киналго аварагзабаз цебеккунго бицун букӏана гьесде иман лъуравщинасул мунагьал гьесул цӏаралдалъун чуризе ругилан.

Цогидал халкъазухъеги Илагьияб Рухӏ рещтӏуна

44Пётрил гьеб хабар лъугӏилалдего гьесухъ гӏенеккун рукӏарал киналго гӏадамазде Илагьияб Рухӏ рещтӏана. 45Цогидал халкъазеги Аллагьас Илагьияб Рухӏ сайигъат гьабидал, гӏажаиблъун хутӏана Пётрида цадахъ гьенире рачӏарал иман лъурал цоги жугьутӏал. 46Цогидаб мацӏалда гьезул кӏалъайги гьез Аллагьасе гьабулеб реццги рагӏулеб букӏиндалха гьел жугьутӏазда. Пётрица абуна:

47– Нилъее гӏадин, Илагьияб Рухӏ насиблъарал гьал гӏадамазе лъадалъ ччун рахъи гьукъулев чи вукӏинищ?

48Цинги Пётрица гьезие амру гьабуна, Масихӏ Гӏисал цӏар рехсон, лъадалъ ччун рахъайилан. Гьебмехалъ гьез Пётрида гьарана цо дагьаб мехалъ жидеда аскӏов гьенив чӏайилан.

Currently Selected:

Чапарзабазул ишал 10: AvrNT

Highlight

Copy