Чапарзабазул ишал 9
9
9 бетӏер
Шаулица иман лъола
1Шаулил рекӏелъа унеб букӏинчӏо Тӏадегӏанав Гӏисал муридал хӏинкъизариялъулги гьел гъурун тӏагӏинариялъулги гъаргъар. Бищунго кӏудияв кашишасухъе вачӏун 2гьес абуна жив Дамаскалде, гьелъул синагогабазде инехъин вугин. Гьенир Гӏисал Нух цӏунун хьвадулел бихьинал ратаниги, руччаби ратаниги, кквезеги ккун, рухьинеги рухьун, жинца Иерусалималде рачинин, гьелъие изну букӏин бицунеб кагъат кьейиланги гьарана.
3Гьедин унаго Дамаскалде гӏагарлъидал тохлъукьего зобалаздасан нуралъ къалъ-къалъизавуна гьев. 4Гьебсагӏат гӏодов ккана Шаул.
– Шаул! Шаул! Щай дуца дие гьаб гӏазаб-гӏакъуба кьолеб бугеб? – абун гьаракьги рагӏана гьесда.
5– Мун щив, бетӏерчӏахъад? – абун гьикъана Шаулица.
– Дун вуго дуца гӏазаб-гӏакъуба кьолев Гӏиса, – ян рагӏана гьесда жаваб. – 6Гьанже тӏаде вахъун шагьаралде а мун, доба бицина дуда щиб гьабизе кколебали.
7Гьесда цадахъ рукӏарал гӏадамал кӏал-мацӏ къотӏун хутӏана. Гьаракь рагӏулеб букӏин гурони, щивниги чи вихьулев вукӏинчӏо гьезда.
8Шаул тӏаде вахъана. Амма берал ричӏун валагьидал, щибниги бихьичӏо гьесда. Бераздаса канлъи босарав гьев, квер ккун вачун, Дамаскалде щвезавуна. 9Лъабго къо бана гьес бадиса канлъиги босун. Я кваначӏо, я гьекъечӏо.
10Дамаскалда вукӏана Анания абулев цо мурид. Илгьам лъугьун: «Ва, Анания!» – абун ахӏана гьесде Тӏадегӏанав Гӏисаца. «Дун гӏенеккун вуго», – ян абуна гьес. 11Цинги Тӏадегӏанав Гӏисаца гьесда абуна:
– Гьанже вахъун а мун Битӏараб абун цӏар лъураб къотӏнове. Гьениб Ягьудал минаялъув цӏехе Тарсалдаса Шаул абун цо чи вугищилан. Гьале гьаб параялда дугӏа гьабулев вукӏаго, 12гьесие илгьам лъугьана Анания абун цо чи вачӏине вугин духъе, гьес тӏад квер лъурабго беразда канлъиги бихьизе бугилан.
13Ананияца абуна:
– Я, Тӏадегӏанав Гӏиса! Чанги чияс бицунеб рагӏана дида гьев чиясул хӏакъалъулъги, дуде иман лъуразе Иерусалималда кигӏан гӏемераб квешлъи гьес гьабурабалиги. 14Гьанивеги гьев вачӏун вуго дур цӏар рехсанщинав чи ккун вачун жанив тӏамизе чӏахӏиял кашишзабаз ихтиярги кьун.
15Тӏадегӏанав Гӏисаца гьесда абуна:
– Мун а гьанже. Гьев вуго киналго къавмазда, парччахӏзабазда ва Исраилил халкъалда гьоркьоб дир цӏар тӏибитӏизабизе тӏаса вищун витӏарав дир илчи. 16Дицаго бихьизабила гьесда дир цӏар сабаблъун гьес кигӏан гӏемераб гӏазаб-гӏакъуба хӏехьезе ккелебали.
17Вахъун ун доб минаялъуве щвана Анания. Шаулида тӏад кверги лъун, гьес абуна:
– Я, дир вац Шаул, Тӏадегӏанас – гьаниве вачӏунаго нухда дуда кӏалъарав гьев Гӏисаца – дун витӏана дидалъун дур беразда канлъи бихьизеги Илагьияб Рухӏ дуде рещтӏинеги.
18Ччугӏил хъал кинигин, тӏаса ана бецлъи, ва гьебсагӏат канлъи бихьана. Тӏаде вахъун ун гьев лъадалъ ччун вахъана. 19Цинги кванана-гьекъана, къуват-жан чорхолъе лъугьана.
Шаулица Дамаскалда Рохалил хабар бицуна
Цо чанго къо бана Шаулица Дамаскалда муридазда аскӏоб. 20Гьебмехалъго синагогабазде ун гьес Гӏисал хӏакъалъулъ бицунеб букӏана гьев Гӏиса Аллагьасул Вас вугилан. 21Гьесул вагӏза рагӏанщинас хӏикмалъун абулеб букӏана:
– Гьеб цӏар рехсанщинав чи тӏагӏинавизейилан Иерусалималда хӏаракат бахъулев вукӏарав чи гурищ гьав? Рухьинеги рухьун, гьел чӏахӏиял кашишзабазул кверде кьезе гурищ гьав гьанивеги вачӏун вукӏарав?
22Амма Шаулил рагӏул къуват цӏикӏкӏунеб букӏиналъ ва Гӏиса хӏакълъунго Масихӏ вугилан чӏезабулеб букӏиналъ тату хвезабуна Дамаскалда ругел жугьутӏазул. 23Гьелдаса гӏезегӏанго заман индал, гьев чӏвазе къотӏи ккана гьезул. 24Шаулидаги лъана гьелъул хӏакъалъулъ. Къасиги къадги шагьаралъул кавабазухъ гъоркьчӏел гьабун букӏана гьев чӏвазе. 25Сардилъ гьесул муридаз гьев, гьагьинивги лъун, шагьаралъул рагӏалда бугеб къадахъа гъоркье виччана.
Шаул Иерусалималде тӏадвуссуна
26Иерусалималде щвараб мехалъ Шаулица къасд гьабуна муридалгун цолъизе. Амма гьев муридлъун лъугьун вукӏиналда божичӏого, гьесукьа хӏинкъун рукӏана киналго.
27Барнаба ана Шаулги вачун чапарзабазухъе. Дамаскалде унаго нухда Шаулида Тӏадегӏанав Гӏиса вихьиялъулги, Тӏадегӏанав Гӏиса гьесда кӏалъаялъулги ва Дамаскалда хӏинкъи-къай гьечӏого гьев Гӏисал цӏар рехсон гьес гьарурал насихӏатазулги хӏакъалъулъ бицана гьезда Барнабаца. 28Гьелдаса хадув Шаул чапарзабазда цадахъ чӏана. Гьезда цадахъ Иерусалималда киса-кивего унаан ва Тӏадегӏанасул цӏар рехсон хӏинкъичӏого бицунаан Рохалил хабар. 29Гьев дагӏбадулаан, къацандулаан грек мацӏалда кӏалъалел жугьутӏалгун. Гьез къасд гьабуна Шаул чӏвазе. 30Гьеб лъайдал, Къайсарияталдеги вачун, вацаз Шаул Тарсалде витӏана.
31Гьедин тӏолабго Ягьудиялда, Галилеялда ва Самариялда иман лъуразул агьлуялъул хӏал лъикӏлъана, Бетӏергьанасдаса хӏинкъарал ва Илагьияб Рухӏалъ кантӏизарурал гӏемерал гӏадамаз иман лъуна.
Пётрица хварай гӏадан чӏаголъизаюла
32Киназухъего щвезе къватӏиве вахъун вукӏарав Пётр гьале Лидда абулеб шагьаралда ругел иман лъуразухъе щвана. 33Гьенив ватана палижалъ ккун микьго соналъ бусада лъурав цо Эней абулев чи. 34Пётрица гьесда абуна:
– Эней, мун Масихӏ Гӏисаца сахлъизавуна. Тӏаде вахъун дурго бусен бакӏаре!
Эней гьебсагӏат тӏаде вахъана.
35Гьев сахлъун вихьана Лиддаялъулги Сароналъулги киналго гӏадамазда ва гьез Тӏадегӏанасде иман лъуна.
Иоппиялда йикӏана Тӏабита абун цӏар бугей цо мурид. 36(«Чанил цӏцӏе» абураб магӏна буго гьеб цӏаралъул.) Гӏадамазе лъикӏлъи гӏемерай, мискиназе-пакъиразе садакъа гьарзаяй гӏадан йикӏана гьей. 37Гьеб заманаялда цо хехаб унтуца хвана гьей. Тӏасарокъоб лъун букӏана чурун къачӏараб гьелъул жаназа.
38Лидда Иоппиялдаса рикӏкӏад букӏинчӏелъул, Пётр Лиддаялда вугин рагӏарал муридаз кӏиго чи витӏана хехго жидеда тӏаде щвайилан гьаризе. 39Вахъун гьезда цадахъ ана Пётр. Иоппиялде щведал, гьев тӏасарокъове вачана. Гӏемерал къоролруччаби ратана гьенир. Гӏодилаго гьез Пётрида рихьизарулел рукӏана чӏаго йигеб мехалъ гьелъ жидеего гьарурал гурдал ва цогидабги ретӏел.
40Гьелги къватӏире ритӏун, Пётр суждаялда чӏана ва дугӏа гьабизе лъугьана. Цинги жаназаялдехун вуссун:
– Тӏаде яхъа, Тӏабита! – ян абуна гьес.
Гьелъ берал ричӏана, Пётрихъги ялагьун, тӏаде йорхун гӏодой чӏана. 41Кверги ккун, тӏаде яхъинаюна Пётрица гьей. Цинги иман лъуралги къоролруччабиги ахӏун, Тӏабита чӏаголъун йикӏин бихьизабуна гьезда Пётрица.
42Гьелъул хабар тӏибитӏана тӏолабго Иоппиялда. Тӏадегӏанав Гӏисаде иман лъун гӏемерав чи муъминлъана.
43Симон абулев цо дабагъчиясухъ гьоболлъухъ рещтӏун Иоппиялда лъикӏаланго къоял рана Пётрица.
Currently Selected:
Чапарзабазул ишал 9: AvrNT
Highlight
Share
Copy
Want to have your highlights saved across all your devices? Sign up or sign in
© Библия таржама гьабиялъул институт Москва 2008
