Чапарзабазул ишал 14

14 бетӏер

Павелицаги Барнабацаги Икониялда Рохалил хабар бицуна

1Икониялдаги гьез, жугьутӏазул синагогаялъуре лъугьун, вагӏза гьабуна, ва гӏемерисел жугьутӏалги цогидал халкъазул гӏадамалги божана гьезда. 2Амма гьезда божичӏел жугьутӏаз, иман лъуразда данде гьусун тӏамун, цогидал халкъазул гӏадамазул рекӏелъ гьездехун ццин багъаризабулеб букӏана. 3Павелицаги Барнабацаги гӏезегӏан заман бана гьениб. Гьез хӏинкъичӏого бицунеб букӏана Тӏадегӏанав Гӏисал хӏакъалъулъ. Гьесул баркатаб рагӏуда божизе гьезул квердалъун лъугьунел рукӏана хӏикматал ишалги мугӏжизаталги. 4Шагьаралъул халкъ кӏийиде бикьана гьебмехалъ: цоял жугьутӏазул рахъалда рукӏана, цогидал чапарзабазул рахъалда рукӏана.

5Жидерго церехъаби-бутӏрулгун цадахъ лъугьун, цогидал халкъазул гӏадамазги жугьутӏазги хӏаракат бахъулеб букӏана Павелги Барнабаги инжит-хӏакъир гьаризе, цинги ганчӏал речӏчӏун чӏвазе. 6Гьеб хабар лъарабго, гьел гьениса Ликаониялде лъутун ана. Гьел рукӏана Листра ва Дербия шагьараздаги гьезда сверухъ ругел бакӏаздаги. 7Гьенибги бицунеб букӏана гьез Рохалил хабар.

Листраялда Павелги Барнабаги аллагьзабилъун рикӏкӏуна

8Листраялда вукӏана эбелалъ гьавуралдаса нахъего палижалъ ккурав, гӏумруялъ жиндирго бохдузда вахъун чӏун вилълъанхъичӏев цо чи. 9Павелихъ гӏенеккун вукӏана гьев. Лъикӏго гьесухъ валагьидал, Павелида бичӏчӏана живго сахлъизе вукӏиналда ракӏ-ракӏалъго божарав чи гьев вугевлъи.

10– Витӏун дурго бохдузда вахъун чӏа! – ян ахӏана гьесде Павелица.

Гьебсагӏат кӏанцӏун тӏаде вахъун, вилълъанхъизе лъугьана гьев.

11Павелица гьабураб иш бихьидал, гьенир рукӏарал гӏадамал ликаоназул мацӏалда ахӏдезе лъугьана инсанасул сураталда аллагьзаби рещтӏун ругин жидехъеян. 12Барнабада гьез Зевсилан цӏар лъуна. Вагӏза-насихӏат гьабун цӏикӏкӏун кӏалъалев вукӏиндал, Павелида цӏар Гермесилан лъуна. 13Шагьаралъул каву бахун къватӏибехун букӏараб Зевсил сураталъе хъулухъалъе тарав цо динияв чи, оцалги цере къотӏун, тӏугьдузул горалги росун, гӏемераб халкъги цадахъ бачун, гьав кӏиясулго хӏурматалда къурбан хъвезе кавудухъе вачӏана.

14Гьелъул хабар рагӏидал кӏиявго чапар – Барнабаги Павелги, – тӏад бугеб ретӏелги тӏутӏун бан, гьеб халкъалда аскӏоре рекерун, ахӏдезе лъугьана:

15– Ле, гӏадамал! Нужеца гьабулеб щиб? Нужго гӏадинал гӏадамал руго нижги. Ниж нужехъе рачӏун руго Рохалил хабарги босун. Гьеб нужер расги пайда гьечӏеб динги рехун тун, зобал-ракьал рижарав, ралъадал рижарав ва гьенир ругелщиналги рижарав хӏакъав Аллагьасде руссайилан абизе рачӏун руго. 16Цересел наслабазул халкъал Аллагьас тун рукӏана жидеего бокьараб нухдасан ине. 17Амма жиндирго лъикӏлъабаздалъун Гьес живго вугевлъи бихьизабичӏого течӏо. Гьес зобалаздасан цӏад базабулаан, ах-хуралъул нигӏматал рижизарулаан. Нужее квен-тӏех кьолаан, нужер ракӏал рохизарулаан.

18Гьединаб хабар бицун хӏалицаго кӏвана Павелидаги Барнабадаги жидер хӏурматалда къурбан хъвеялдаса гьел руссинаризе.

19Амма гьениреги рачӏун Антиохиялдаса ва Икониялдаса жугьутӏаз Листраялъул гӏадамал жидерго рахъалде руссинаруна. Павелида гьез ганчӏал речӏчӏана, хун вугиланги тун, вехъерхъун шагьаралдаса къватӏиве рехана. 20Амма муридал рачӏун аскӏор чӏедал, тӏаде вахъун, шагьаралде ана Павел.

Павелги Барнабаги Сириялде тӏадруссуна

Нахъисеб къоялъ Барнабаги вачун гьев Дербиялде ана. 21Гьеб шагьаралдаги Рохалил хабар бицана гьез ва гӏемерав чияс гьезде иман лъуна. Цинги гьел тӏадруссун Листраялде, Икониялде ва Антиохиялде ана, 22муридазул ракӏал къвакӏизарулаго, гьезул иман щулалъизабулаго. Чапарзабаз абулеб букӏана:

– Гӏемераб гӏазаб-гӏакъуба хӏехьон гурони нилъ Аллагьасул Парччахӏлъиялде лъугьинаро, – ян.

23Иман лъуразул щибаб агьлуялъе диниял бутӏрулги тӏамун тун, какал ран, кӏалал ккун, нахъе унеб мехалъ гьез муридал толаан жидеца иман лъурав Тӏадегӏанасул цӏобалда божун.

24Писидиялдасан ун гьел Памфилиялде щвана. 25-26Пергаялъул халкъалда Рохалил хабарги бицун, цинги гьел Атталиялде ана. Гьенисаги, гамидаги рекӏун, Антиохиялде тӏадруссана. Гьеб букӏана гьанже гьез тӏубазабураб ишалда тӏоцебе Аллагьасул цӏоб лъураб бакӏ. 27Гьенире щвараб мехалъ, иман лъуразул агьлуги бакӏарун, гьаз бицана Аллагьас жидеда бихьизабунщиналъул хӏакъалъулъ, бицана цогидал халкъазеги Аллагьас диналъул нуцӏби рагьанилан. 28Цинги гӏемераб мехалъ Павелги Барнабаги гьел муридазда аскӏор гьенир чӏана.

Currently Selected:

Чапарзабазул ишал 14: AvrNT

Highlight

Copy