Чапарзабазул ишал 15

15 бетӏер

Чапарзабиги иман лъуразул бутӏрулги Иерусалималда данделъула

1Ягьудиялдаса цо киналалиго гӏадамал рачӏун гьез вацазда абуна, Мусал къануналда рекъон сунат гьабичӏони, нуж хвасарлъуларилан. 2Павелги Барнабаги гьезда тӏадрекъолел рукӏинчӏо. Кӏудияб дагӏба-къец ккана гьезда гьоркьоб. Гьединлъидал Павелги, Барнабаги ва цо чанго чиги ритӏана Иерусалималда ругел чапарзабазухъеги диниял бутӏрузухъеги гьеб суал тӏубазабизе. 3Гьедин иман лъуразул агьлуялъ ритӏун, Финикиялдасан ва Самариялдасан унаго, гьенир ругел вацазда гьез мухӏканго бицана цогидал халкъазул гӏадамазги иман лъунилан. Кутакалда рохана гьел гьеб хабаралдаса.

4Иерусалималде щвараб мехалъ иман лъуразул агьлуялъги, гьенир рукӏарал чапарзабазги ва диниял бутӏрузги рохун къабул гьаруна Павелги Барнабаги. Аллагьасул хӏалкӏолъиялдалъун жидер гьениб ккарабщиналъулги бицана гьазда. 5Фарисеязул мазгьабалда ругел цо-цо иман лъураз, тӏаде рахъун, абуна:

– Цогидал халкъаздаги нилъеца лъазабизе ккола Мусал къанунги цӏунейин, сунатги гьабейилан.

6Чапарзабиги диниял бутӏрулги данделъана гьеб суал гьоркьоб лъезе. 7Лъикӏаланго заманаялъ дагӏба-къецалда рукӏана гьел. Цинги, тӏаде вахъун, Пётрица абуна:

– Гӏенекке, вацал! Нужеда гьоркьоса тӏаса вищун, дол тӏоцересел къояздаго дун витӏана Аллагьас цогидал халкъазухъе гьезда Рохалил хабар бицине ва гьел иманалде ахӏизе. Гьеб нужеда лъала. 8Щивав чиясул рекӏелъ бугебги лъалев Аллагьас, нилъее гӏадин, цогидал халкъазеги Илагьияб Рухӏ сайигъат гьабуна, жинца гьел къабул гьарунилан. 9Гьезулги ракӏал рацӏцӏалъизарун, цогидал халкъаздаги нилъедаги гьоркьоб щибго батӏалъи гьабичӏо Аллагьас. 10Я нилъер умумузда, я нилъеда хӏехьезе кӏвечӏеб рукь муридазул гарбидеги ккезабун, щай нужеца Аллагьасул сабруялъул хӏалбихьулеб бугеб? 11Амма нилъ божула Тӏадегӏанав Гӏисал цӏобалдалъун нилъ хвасарлъизе рукӏиналда, гьединго гьелги хвасарлъизе рукӏиналда.

12Гьебмехалъ киналго руцӏцӏун чӏана. Цинги гьел гӏенеккана Аллагьасул хӏалкӏолъиялдалъун жидеца цогидал халкъазда рихьизарурал хӏикматал ишазулги мугӏжизатазулги хӏакъалъулъ Павелицаги Барнабацаги бицараб хабаралъухъ. 13Гьезул хабар лъугӏараб мехалъ, Якъубица байбихьана кӏалъазе. Гьес абуна:

– Нуж дихъ гӏенекке, вацал! 14Симоница гьабсагӏат нилъеда бицана, гьезда гьоркьоса тӏаса рищарал гӏадамалги жиндирго халкълъун лъугьине бокьун, Аллагьас тӏоцебесеб нухалъ цогидал халкъазул тӏалаб-агъаз гьабунилан. 15Гьеб данде кколеб буго аварагзабазул гьадинаб калимаялда: 16«Гьелдаса хадув Дун тӏадвуссина ва биххун букӏараб Давудил рукъ къачӏала, гьелъул чӏваднал лъугӏизарила, гьеб цӏидасан бала. 17Цинги цогидал киналго гӏадамал, хӏатта Дица дирго халкълъун рикӏкӏине ругел цогидал халкъазул гӏадамалги, Диде руссина». 18Гьедин абулеб буго Бетӏергьанас, гьесдасан гӏадамазда цебеккунго лъалеб букӏарабщинаб гьабула гьес. 19Гьединлъидал дида ракӏалде ккола Аллагьасде руссунел ругел цогидал халкъазул гӏадамазе нилъеца квалквал гьабизе бегьиларилан. 20Гьанже нилъеца гьезухъе хъван кагъат битӏизе ккола гьересиаллагьзабазе къурбан гьабураб квенги кунгеян, хъахӏбалъиги гьабугеян, гъанкъун хвезабураб хӏайваналъул гьанги, гьединго биги хӏарамаб бугилан. 21Мусал къанунин абуни, цебе заманаялдаса нахъего халкъалда бичӏчӏизабула щибаб шагьаралда щибаб шамат къоялъ синагогабазда цӏалун.

Цогидал халкъазда гьоркьоса иман лъуразде кагъат

22Цинги чапарзабазги диниял бутӏрузги, тӏолабго иман лъуразул агьлуги разилъун, хӏукму гьабуна Павелидаги Барнабадаги цадахъ Антиохиялде, жидедаго гьоркьоса вищун, кӏиго чи витӏизе. Гьез тӏаса рищана жидедаго гьоркьор хӏакимзабилъун рукӏарал Барсаббайин абулев Ягьудаги Силаги. 23Гьезухъе кьун, гьадинаб кагъатги битӏана: «Нужер вацазул – чапарзабазул ва диниял бутӏрузул – рахъалдасан салам буго Антиохиялда, Сириялда ва Киликиялда ругел диналъул вацазде – цогидал халкъаздасан лъугьарал вацазде. 24Нижеда рагӏана нижер тӏадкъай гьечӏониги цо-цо гӏадамаз нужер рахӏат хвезабулеб бугилан, нуж къосинарулел ругилан. 25Гьединлъидал нижеца, киналго разилъун, хӏукму гьабуна нижее хириял Барнабадаги Павелидаги цадахъ тӏаса рищун нужехъе вакилзаби ритӏизе. 26Барнабаги Павелги руго Тӏадегӏанав Масихӏ Гӏисал цӏаралъе гӏоло гӏумру кьурал гӏадамал. 27Гьединго ритӏулел руго Ягьудаги Силаги. Гьезги кӏалалъ бицина нужеда гьаб нижер кагътил мурад. 28Илагьияб Рухӏалдаги нижедаги лъикӏаблъун бихьун буго – паризаяб тун нахъияб жо нужеда баччизабиларилан. 29Нужеца кунге гьересиаллагьзабазе къурбан гьабураб квен, биги гьекъоге, гъанкъун хвезабураб хӏайваналъул гьанги кунге, хъахӏбалъиги гьабуге. Гьелдаса цӏунун чӏани, – гьеб буго лъикӏаб иш. Вассалам».

30Гьеб данделъи биххун хадур гьел ункъалго Антиохиялде ана. Доре щведал, киналго данде ракӏарун, кагъат гьезухъе кьуна. 31Гьеб кагъат цӏалидал, муридал рохана гьединаб насихӏаталдаса. 32Ягьудацаги Силацаги (гьел кӏиялгоги рукӏана кашпу-карамалъи бугел гӏадамал) гӏемераб жо малъана гьезда. Гьелдалъун вацазул рекӏелъ иман щулалъиялъе квербакъиги лъугьана. 33Цо заманаялдасан кӏудияб хӏурмат-адабгун Ягьудаги Силаги тӏоритӏизе рахъана вацал, ва жалго гьенире ритӏарал вацазухъе тӏадруссана гьел кӏиялго. 34-35Павелги Барнабаги Антиохиялда чӏана, гӏемерал цогидал муридазда цадахъ Тӏадегӏанав Гӏисал рагӏи тӏибитӏизабулеб букӏана гьез.

Павелги Барнабаги цоцаздаса ратӏалъула

36Цо чанго къоялдасан Павелица Барнабада абуна:

– Рачӏа нилъ тӏадруссун рилълъинин ва, Тӏадегӏанав Гӏисал рагӏи нилъеца тӏибитӏизабураб щибаб шагьаралде щун, вацал кин ругелали хал гьабилин.

37Барнабае бокьана Маркилан тӏокӏцӏар бугев Иоаннги цадахъ вачине. 38Амма Павелида ракӏалде ккана доба, Памфилиялда, гьелги рехун тун нахъе арав, гьезул ишалъе гьелдаса хадуб кумекги гьабичӏев чи цадахъ вачун лъикӏ гурилан. 39Гьеб сабаблъун кӏиясдаго гьоркьоб кьал ккана. Гьедин Павелги Барнабаги цоцаздаса ратӏалъана. Маркги вачун, гамидаги рекӏун, Барнаба Кипралде ана. 40Бетӏергьанасул цӏобалъ рехун тогегиян дугӏаги гьабун, Павелги тӏовитӏана вацаз. Силаги вачун, 41гьев Сириялдасан ва Киликиялдасан ана, иман лъуразул агьлуги щулалъизабулаго.

Currently Selected:

Чапарзабазул ишал 15: AvrNT

Highlight

Copy