Чапарзабазул ишал 17

17 бетӏер

Павелги Силаги Фессалоникаялда

1Амфиполалдасан ва Аполлониялдасан ун гьел щвана жугьутӏазул синагогаги жаниб бугеб Фессалоникаялде. 2Цогидал бакӏаздаго гӏадин, синагогаялъуве ун, Павелица лъабго шамат къоялъ тӏатӏала жугьутӏазулгун гара-чӏвари гьабуна Илагьиял Тӏухьдузда хъван бугелъул хӏакъалъулъ. 3Гьес гьезда бичӏчӏизабуна ва бихьизабуна Масихӏ хвезе кколев вукӏаравлъиги хваралъуса вахъине кколев вукӏаравлъиги. Гьес абуна:

– Масихӏ ккола дица нужее жиндир хӏакъалъулъ бицунеб бугев Гӏиса.

4Жугьутӏазул гӏемерисел, гьезда божун иманалде рачӏун, Павелидеги Силадеги цолъана. Иман лъуразда гъорлъ цӏикӏкӏунисел рукӏана гьединго Аллагьасе гӏибадат гьабулел грекалги, дагьал рукӏинчӏо къадру-къимат бугел руччабиги. 5Гьезда жахӏда ккарал жугьутӏаз, базаркъотӏноре ун квешалщинал гӏадамал ракӏарун, шагьаралда багъа-бачари лъугьинабуна. Ясонил бакӏалде рачӏун гьез тӏалаб гьабулеб букӏана Павелги Силаги жидехъе кьеян. 6Гьенир гьел ратичӏеб мехалъ, Ясонги гьенир рукӏарал цо-цо вацалги шагьаралъул бутӏрузухъе рехъерхъана. Гӏадамаз ахӏулеб букӏана:

– Гьел руго тӏолабго дуниял бегуниса бахъарал чагӏи! Гьале гьанже нилъер гьаниреги рачӏун руго. 7Гьав Ясоница гьел жиндихъего гьоболлъухъ рачун рукӏана. Гьел киналго къайсарасул къануналда дандечӏун руго. Гӏисайилан цоги парччахӏ вугилан абулеб буго гьез!

8Гьеб хабаралъ халкъалъулги шагьаралъул бутӏрузулги рахӏат хвезабуна. 9Гъоркьлъалие гӏарацги лъезабун, нахъе риччана гьез Ясонги цогидал муридалги.

Бероялъул гӏадамал чапарзабазухъ гӏенеккула

10Павелги Силаги гьеб сордоялъго Бероялде ритӏана вацаз. Гьенире щведал гьал ана жугьутӏазул синагогаялъуре. 11Фессалоникаялда ругездаса лъикӏал ратана гьенир жугьутӏал. Мухӏканго гӏенеккана гьел гьазул рагӏухъ. Гьазул хабар ритӏухъаб бугищали лъазе щибаб къоялъ Илагьиял Тӏухьдул цӏализе лъугьана гьел. 12Гьазда божана гӏемерисел жугьутӏал, иман лъуразда гъорлъ дагьал рукӏинчӏо къадру-къимат бугел греказул руччаби, гӏезегӏан рукӏана бихьиналги. 13Павелица Аллагьасул рагӏи Бероялдаги тӏибитӏизабулеб бугилан рагӏидал, Фессалоникаялдаса жугьутӏаз, гьениреги рачӏун, шагьаралъул халкъ гьезда данде гьусун тӏамулеб букӏана. 14Гьеб параялъго вацаз гамида рекӏине ралъдал рагӏалде витӏана Павел. Силаги Тимофейги гьенирго чӏана. 15Павел тӏовитӏизе ун рукӏарал гӏадамал, Афиниялде гьевги щвезавун, хехго жинда тӏаде щвайилан Силахъеги Тимофейихъеги гьесул ругьелги босун, тӏадруссун рачӏана.

Павелица Афиниялъул халкъалда Рохалил хабар бицуна

16Силаги Тимофейги рачӏинегӏан Афиниялда чӏун вукӏарав Павелил цӏакъ ракӏ бакъвана гьеб шагьаралда гьересиаллагьзабазул гӏемерал суратал рихьун. 17Синагогаялъуве лъугьун гьес гара-чӏвари гьабулаан жугьутӏазулгун ва Аллагьасе гӏибадат гьабулел греказулгун. Щибаб къоялъ базаркъотӏнове ун, гьенир ратаразеги бицунаан Павелица хабар. 18Гьенир Павелида ратана цо-цо философал – Эпикурил рахъ ккуралги стоикалги. Гьезул цояз абулеб букӏана гьав чӏандачиясе бицине бокьараб жогӏаги щибдайилан. Цогидаз абулеб букӏана чияр аллагьзабазул дин тӏибитӏизабулеб бугин гьесилан. Гьедин абиялъе гӏиллалъунги ккана Павелица Гӏисалги гьев хваралъуса вахъиналъулги бицунеб букӏин.

19Ареопаг абулеб мажлисалде вачун, Павелида гьез абуна:

– Нижее лъазе бокьун буго кинаб гӏелмуялъул дуца бицунеб бугебали. 20Цӏакъ хӏикматаб хабар рагӏулеб буго нижер гӏундузда, гьединлъидал гьелъул магӏна лъазе бокьун буго. 21(Афиниялъул халкъги къватӏиса рачӏарал апарагзабиги рукӏунаан цӏия-лъияб хабаралъул бицун накъиталда заман инабулел.) 22Мажлисалда цевеги чӏун, Павелица абуна:

– Я, Афиниялъул гӏадамал, дида бихьулеб буго нуж сундулъго цӏакъ диниял чагӏи ругеблъи. 23Шагьаралъул къватӏахъ тирулаго гӏемерал хириял бакӏал ратана дида гьенир. Хӏатта, «Щивали лъаларев аллагьасе» абун хъвай-хъвагӏай гьабураб къурбан хъолеб бакӏцин бугоан. Гьеле гьев, щивалицин лъалев гьечӏониги, нужеца тӏагӏат гьабулев Аллагьасул динин дица тӏибитӏизабулеб бугеб. 24Гьев вуго гьаб дуниялги дуниялалда бугебщинабги бижарав Аллагь. Зоб-ракьалъул Бетӏергьан вугелъул, инсанасул квераз рахъун чӏезарурал кӏалгӏабазда жанив чӏоларо гьев. 25Яги инсанасул квераздалъун жиндие хъулухъ гьабизе ккаравги гуро Аллагь. Киданиги щибниги хӏажалъуларо гьесие. Гьесин киналъего гӏумруги, хӏухьелги, цогидабщинабги кьолеб. 26Аллагьас тӏоцеве цохӏо чиясдасан лъугьинаруна дуниялалда ругел киналго халкъал. Щибаб халкъалъе болжалги ва чӏезе бакӏалъе гӏорхъалабиги рихьизаруна. 27Аллагьас гӏадамазе рес кьуна гьев валагьизе, гьев вукӏин гьезул ракӏалъ бицине ва гьезда гьев Аллагь ватизеги. Нилъер щивав чиясдаса рикӏкӏад гьечӏелъулха гьев Аллагь. 28Гьесдалъун чӏаго руго нилъ, гьесдалъун рахъун чӏун руго нилъ, гьесдалъун гӏумру гьабулеб буго нилъеца. Гьелъул хӏакъалъулъин нужер цо шагӏирас гьадин хъван букӏараб:

«Нилъ киналго Гьесул

Лъимал ругелъул...»

29Гьедин Аллагьасул лъималлъун нилъ кколеб мехалъ, нилъеца бегьилищ меседалдасан, гӏарцудасан, яги ганчӏидасан лъугьинабураб жо илагьияб бугилан абизе, гьеб кинабго бугелъул устарасул квералъ гьабураб ва гьесул бетӏералъ ургъараб жо. 30Нилъ жагьиллъуда ругеб заманаялда ккара-тараб Аллагьас нилъер гӏайиблъун рикӏкӏунеб гьечӏо. Амма гьанже гьес амру гьабулеб буго киса-кирего киналго гӏадамал кантӏун жинде руссаян. 31Жинца тӏаса вищарав Чиясдалъун тӏолго гӏаламалъе ритӏухъаб суд гьабулеб къо чӏезабун бугила. Гьелда нилъер ракӏчӏезе гӏолойила жинца гьев хваралъуса вахъинавурав.

32Хваралъуса вахъинавиялъул Павелица рехсей гьабидал, цо-цояз гьев гӏад-хочӏ гьавуна, цогидаз абуна гьелъул бицине цоги нухалъ вачӏайилан.

33Павел гьезул мажлисалдаса нахъе ана. 34Амма гьесул рахъ ккун иман лъурал гӏадамалги ккана. Гьезда гъорлъ рукӏана мажлисалдаги гӏахьаллъулев Дионисий абулев чи, Дамар абун цӏар бугей чӏужугӏадан ва цогидалги.

Currently Selected:

Чапарзабазул ишал 17: AvrNT

Highlight

Copy