Чапарзабазул ишал 18

18 бетӏер

Павелие Коринфалда битӏ ккола

1Цинги Павел Афиниялдаса Коринфалде ана. 2Гьенив гьасда ватана Понталдаса Аквила абун цо жугьутӏав. Рималдаса киналго жугьутӏал нахъе гъейилан бахъараб Клавдий къайсарасул буюрухъги тӏубазабун, жиндирго чӏужу Прискиллагун цадахъ Италиялдаса гочун вачӏун вугоан гьев. Гьезухъе ваккизе ана Павел. 3Жанир гӏадамал чӏолел чадрал гьарун бетӏербахъарал чагӏи ратана гьел рос-лъади. Гьебго махщелалъул чи Павелги вукӏиндал, гьезда цадахъ хӏалтӏизе лъугьана гьавги. 4Щибаб шамат къоялъ синагогаялъуве ун, жугьутӏалги грекалги мукӏур гьаризе кӏвелародайилан, гьелгун гара-чӏварулаан Павел. 5Силаги Тимофейги Македониялдаса гьенире рачӏараб мехалъ, вагӏза-насихӏаталда тӏадчӏана Павел, гьев Гӏиса хӏакъикъаталдаги Масихӏ вугилан жугьутӏазда бичӏчӏизабизе. 6Амма, дандечӏун, Павел какулев вукӏана жугьутӏаз. Гьединлъидал, жиндирго ратӏлидаса хӏурги кӏутӏун, гьес абуна:

– Нуж хвалде иналъул гӏайибиял нужго руго. Дида гӏайиб гьечӏо. Гьанже дун цогидал халкъазухъе ана.

7Цинги синагогаги рехун тун, гьев вахъана Аллагьасе гӏибадат гьабулев Титий Юст абулев цо чиясул гьениб аскӏобго букӏараб минаялъуве. 8Синагогаялъул бетӏер Криспицаги гьесул рукъалъул агьлуялъги Тӏадегӏанав Гӏисаде иман лъуна. Гьенир Павелихъ гӏенеккарал Коринфалдаса гӏезегӏанго чагӏаз иман лъуна ва лъадалъ ччун рахъизаруна. 9Цо сордоялъ илгьам лъугьун Тӏадегӏанас Павелида абуна:

– Мун хӏинкъуге! Вуцӏцӏун чӏечӏого, вагӏза-насихӏат гьабе. 10Дун дуда цадахъ вукӏин лъай. Гьаб шагьаралда гӏемер руго дица тӏаса рищарал гӏадамал. Гьединлъидал дуда аскӏове къан, дуе зарал-зиян гьабулев чи вукӏине гьечӏо.

11Гьедин лъагӏелгун бащдалъ гьенив чӏана Павел ва Аллагьасул рагӏи тӏибитӏизабуна.

12Ахая вилаяталъул наиблъун Галлион вугеб заманаялда, киналго рекъон жугьутӏал Павелида тӏаде кӏанцӏана ва гьев судалде вачана. 13Гьез абуна:

– Къануналда данде кколареб къагӏидаялъ Аллагьасе дин гьабеян малъулеб буго гьав чияс халкъалда.

14Павелица кӏалъазе кӏал ричӏилалдего, Галлионица жугьутӏазда абуна:

– Ле, жугьутӏал, гьас цо квешлъи гьабун букӏарабани яги гьасда цоги такъсир ккун букӏарабани, ритӏухъаб суд гьабилаан дица гьасие. 15Кинабалиго рагӏийила, лъилалиго цӏарила, нужер къанунила, – нужер иш буго гьеб. Гьеб ишалда хурхараб суд гьабиларо дица.

16Цинги гьес суд гьабулеб рокъоса къватӏире гъуна жугьутӏал. 17Гьебмехалъ киналго синагогаялъул хӏаким Сосфенида тӏаде рортана ва суд гьабулеб рукъалда цеве гьев вухизе лъугьана. Амма Галлионица я гӏин, я бер рехичӏо гьезул гьеб гъалмагъиралде.

Павел Антиохиялде тӏадвуссуна

18Гьелдаса хадубги Павелица гӏезегӏанго къоял рана гьенир. Цинги, вацазе къолъикӏги гьабун, гамидаги рекӏун, Сириялде ана. Гьесда цадахъ ана Прискиллаги Аквилаги. Кенхреялде щведал, гьес ботӏрол рас къунцӏана. Гьеб букӏана Аллагьасе назруялъул#18:18 Аллагьасе назру – гьеб ккола лъеберго къоялъ бетӏер къунцӏиларилан жугьутӏаз Аллагьасе рагӏи кьеялъул гӏадат. болжал лъугӏараб заман. 19Цинги гьел Эфесалде щвана. Синагогаялъуве ана Павел, гьенир рукӏарал жугьутӏалгун гара-чӏваризе. 20Гьез Павелида гьарана дагьаб мехалъги гьенив жидеда аскӏов чӏайилан, амма гьев разилъичӏо. 21Гьезулгун къолъикӏ гьабулаго, Павелица абуна, Аллагьас хъван батани, жив нахъеги нужехъе вачӏинилан. Цинги гьев, Прискиллаги Аквилаги гьенир тун, гамидаги рекӏун, Эфесалдаса нахъе ана.

22Къайсарияталда гамидасаги рещтӏун, Иерусалималде ана. Гьениб иман лъуразул агьлуялъе саламги кьун, Антиохиялде ана. 23Дагьаб мехалъ гьенивги чӏун, нахъе ана. Иргадал Галатиялъул ва Фригиялъул шагьаразде щун, гьенир рукӏарал муридазул иман щула гьабизе квербакъи гьабуна.

Аполлос вачӏуна Эфесалде, цинги Коринфалде

24Эфесалде вачӏана Искандарияталдаса Аполлос абун цӏакъ кӏал-мацӏ пасихӏав цо жугьутӏав. Илагьиял Тӏухьдузда хъваралъул магӏна лъалев пагьмуяв чиги вукӏана гьев. 25Гьелдасаги цебе Тӏадегӏанав Гӏисал Нух жинда бичӏчӏизабурав чи вукӏана Аполлос. Лъадалъ ччун рахъиялъул хӏакъалъулъ Яхӏя аварагас малъулеб букӏараб гурони лъаларев Аполлосица, кӏалдиб цӏа ккун, цӏакъ дурусго бицунеб ва бичӏчӏизабулеб букӏана Гӏисал хӏакъалъулъ кинабго жо. 26Синагогаялъуве лъугьун, гьес хӏинкъичӏого хабар бицунеб рагӏидал, Прискиллацаги Аквилацаги гьев рокъове ахӏана ва дагьабги якъинго бичӏчӏизабуна гьесда Аллагьасул Нух. 27Цинги Аполлосие Ахаялде ине бокьидал, вацазул рекӏее гӏуна гьесул къасд ва дора ругел муридазухъе кагъатги хъвана гьев къабул гьавеян. Дове щведал, Ахаялда гьесдасан кӏудияб квербакъи лъугьана Аллагьас цӏоб лъуразул иман щулалъиялъе. 28Халкъалда цебе гьес цӏакъаб ракӏчӏейгун гьереси гьарулел рукӏана жугьутӏал. Илагьиял Тӏухьдуздасан мисалал рачун бихьизабулеб букӏана Гӏиса хӏакъикъаталдаги Масихӏ вугилан.

Currently Selected:

Чапарзабазул ишал 18: AvrNT

Highlight

Copy