Чапарзабазул ишал 19
19
19 бетӏер
Павелица Эфесалда кӏиго лъагӏел бала
1Аполлос Коринфалда вугеб заманаялда, мугӏрузда ругел вилаятаздеги щун, тӏадвуссун Эфесалде вачӏана Павел. Гьенир ратарал цо дагьалго муридазда 2гьикъана гьес:
– Иманалде руссараб мехалъ Илагьияб Рухӏ лъугьанищ нужелъе? – ян.
Гьеб Илагьияб Рухӏалъул хӏакъалъулъ жидеда рагӏизего рагӏичӏилан абуна гьез. 3Кинха нуж лъадалъ ччун рахъаралилан гьикъидал, гьез абуна жал Яхӏя аварагасул къагӏидаялъ лъадалъ ччун рахъанилан. 4Павелица гьезда абуна:
– Яхӏя аварагас гӏадамал лъадалъ ччун рахъулел рукӏана кантӏун гьел Аллагьасде руссине. Гьес халкъалдехун абулеб букӏана жиндаса хадув вачӏине вугесде, ай Гӏисаде, иман лъейилан.
5Гьеб рагӏидал гьел муридал, Тӏадегӏанав Гӏисал цӏар рехсон, лъадалъ ччун рахъана. 6Цинги Павелица тӏад квер лъедал, Илагьияб Рухӏ лъугьана гьезулъе. Батӏи-батӏияб мацӏалда кӏалъазе лъана ва гьезде Аллагьасул рагӏи рещтӏана. 7Кинавниги анцӏила кӏигогӏанасев чи вукӏана гьезул.
8Синагогаялде хьвадун, Аллагьасул Парччахӏлъиялъул хӏакъалъулъ хӏинкъичӏого бицун ва бичӏчӏизабун, лъабго моцӏалъ гьезие вагӏза гьабуна Павелица. 9Амма цо-цо гӏадамал чанкӏкӏун чӏун гӏенеккулел рукӏинчӏелъул, халкъалда цебе Гӏисал Нух гьез какулеб букӏиндал, жиндирго муридалги рачун, гьезда аскӏоса нахъе ана Павел. Цинги Тиранн абулев чиясул мадрасаялда гьабулаан гьес щибаб къоялъ вагӏза-насихӏат.
10Гьедин ана кӏиго сон. Асиялда яшав гьабун рукӏарал киналго жугьутӏаздаги греказдаги рагӏана Аллагьасул рагӏи.
Сихӏручагӏи халкъалда цере инжитлъула
11Аллагьасул хӏалкӏолъиялдалъун Павелил квердасан цӏакъго чӏахӏиял мугӏжизатал загьирлъана. 12Хӏатта гьесул квербацӏцӏ яги ретӏел-хьит унаан унтаразухъе босун, ва гьездалъун унтарал сахлъулаан, гӏадамазул чорхолъа нахъе унаан хъубал жундулги.
13Цо бакӏалдаса цоги бакӏалде хьвадун, гӏадамазул чорхолъа жундул рачахъун бетӏербахъарал чагӏиги рукӏана жугьутӏазда гьоркьор. Гьанже гьез къасд гьабуна Тӏадегӏанав Гӏисал цӏар рехсон инсанасул чорхолъа хъубаб жен бачахъизе. Гьез гьелда абулаан:
– Павелица жиндир хӏакъалъулъ бицунеб бугев Гӏисал цӏаралдалъун амру гьабулеб буго нижеца дуе гьев чиясул чорхолъа нахъе аян. 14(Гьел рукӏана Ягьудиязул цо кӏудияв кашиш Скевал анкьавго вас.)
15Гьеб хъубаб женалъ гьезда абуна:
– Дида Гӏисаги лъала, Павелги лъала щив чияли, амма нуж щал кколел?
16Цинги гьеб хъубаб жен чорхолъ бугев чияс, тӏадги речӏчӏун, гьел гӏодор тӏамуна. Лъукъ-лъукъун тату хварал гьел, тӏад ретӏелги гьечӏого, тӏуризе ккана гьеб рокъоса къватӏире. 17Эфесалда рукӏарал киналго жугьутӏаздаги греказдаги рагӏана гьеб хабар. Кутакаб хӏинкъи лъугьана гьеб халкъалъул рекӏелъе. Тӏадегӏанав Гӏисал цӏаралъе рецц гьабуна гьез. 18Гьезул гӏемерисез иман лъуна, Павелихъе рачӏун, жидерго хъубал ишал рехсон, тавбу гьабуна. 19Гӏемерал сихӏручагӏаз жидерго тӏахьал, гӏадамазда рихьулеб бакӏалде росун, рухӏана. Гьедин рухӏарал тӏахьазул багьа чӏезабураб мехалъ, кӏикъоялда анцӏазарго гъурущалде бахунеб батана гьеб. 20Гьедин Тӏадегӏанасул къудраталдалъун тӏибитӏулеб ва щулалъулеб букӏана Аллагьасул рагӏи.
Эфесалда Павелида данде питна багъаризабула
21Гьединал лъугьа-бахъиназдаса хадуб, Илагьияб Рухӏалъ малъун, Павелица хӏукму гьабуна Македониялъул ва Ахаялъул ракьалдасан Иерусалималде ине. Гьес абуна:
– Цин цо дове щвела дун, цинги дида Рим бихьизе ккола, – ян.
22Жиндирго кӏиго кумекчи – Тимофей ва Эраст гьес Македониялде цере ритӏана, живгойин абуни, дагьаб заманаялъ Асиялдаго чӏана.
23Гьеле гьеб заманаялда лъугьана Тӏадегӏанасул Нухалда дандечӏараб кӏудияб питна. 24Деметрий абун цо гӏарцул устар вукӏана гьенив. Артемида аллагьалъул хӏурматалда бараб храмалда релълъарал гӏисинал храмал гьарун ричулаан гьес. Гьесул гьеб даран-базаралъул кутакаб хайир-пайда букӏана цогидал устарзабазеги. 25Гьел устарзабиги ва гьесулалда релълъараб цогидаб махщелалъул гӏадамалги данде ракӏарун, гьес абуна:
– Гӏенеккея, нужеда лъала нилъер магӏишат гьаб даран-базаралда бараб бугеблъи. 26Гьанже нужеда бихьулеб ва рагӏулеб буго гьадав Павелица, жиндаго божизабун, къосинабулеб бугеблъи, Эфесалда гуребги, тӏолабгоялде гӏунтӏун Асиялда бугеб халкъ. Гьес абулеб буго, инсанасул квераздалъун гьарурал аллагьзаби – гьел аллагьзабилъун кколарилан. 27Гьедин нилъер махщел какун квешаб цӏар чӏвазе букӏин гуребги, гьелдалъун хӏинкъи буго нилъер кӏудияй аллагь Артемидал храм щибго гуреб бакӏлъун рикӏкӏинилан ва тӏолабго Асиялдаги ва тӏолабго дуниялалдаги халкъаз жиндие бетӏерчӏвалей гьей аллагьалъул цӏар гьанже гӏадин кӏодо гьабиларилан.
28Гьебмехалъ устарзаби ццидаца гьалаглъун ахӏдезе лъугьана:
– Нижер Эфесалъул Артемида кӏудияй аллагь йиго! – ян.
29Тӏолабго шагьаралда багъа-бачари лъугьана. Гӏадамазул цо къокъаялъ ккуна Павелида цадахъ гьеб сапаралда рукӏарал Македониялдаса Гайги Аристархги. Цинги киналго рекерулел рукӏана данделъаби тӏоритӏулеб бакӏалде. 30Гьеб халкъалда гьоркьове лъугьине бокьун букӏана Павелие, амма муридаз виччачӏо. 31Асия вилаяталъул цо-цо чӏухӏби-хӏакимзабазги, – Павелил гьудулзабиги рукӏиндалха гьел, – гьесда аскӏоре чагӏи ритӏун рачӏана театралде унгейилан абун.
32Гьеб заманаялда цояс гьадин ахӏун, цогидас додин ахӏун, кутакаб гъалмагъир лъугьана гьениб. Гьезул гӏемерисезда лъалебцин букӏинчӏо щай жал гьенире ракӏарун ругелали. 33Гьале цо-цо гӏадамаз цеве цун вачӏана жугьутӏаз кӏалъазе тӏамурав Александр абулев чи. Гӏенеккейилан, кверги борхун, Александр халкъалда цеве жидеда гӏайиб гьечӏилан кӏалъазехъин вукӏана. 34Амма гьев жугьутӏав вукӏин лъайдал, цого гьаракьалъ кӏиго сагӏатгӏанасеб мехалъ ахӏана гьез:
– Нижер Эфесалъул Артемида кӏудияй аллагь йиго! – ян.
35Цеве вахъун, шагьаралъул гӏелас, гьелги гӏодоре риччазарун, абуна:
– Ле, Эфесалъул гӏадамал! Кӏудияй Артемидал храмги зодисан рещтӏараб гьелъул суратги цӏунулел гӏадамал нуж ругеллъи лъаларев чи щив вугев? 36Гьелда дагӏба базе бакӏги гьечӏеб мехалъ, гӏодоре риччазе ккела нуж. Сундулъго хехдари рекъоларо. 37Гьанире нужеца рачун рачӏарал гьал чагӏаз храмалъуб цӏогьги гьабичӏо, нилъер аллагь какараб рагӏиги гьазул кӏалдиса къватӏибе бачӏинчӏо. 38Деметрийил ва цогидал устарзабазул лъидехунниги дагӏба бугеб батани, гьеб тӏубазе тӏадаб судги буго, наибзабиги руго. Гьезухъе гӏарзалъ ине риччай. 39Гьелдаса батӏияб суал нужер бугеб батани, къануналда рекъон, ахӏун данделъигун, гьениб тӏубазе ккела. 40Щибго гӏиллаго гьечӏого гьаб гъалмагъир нилъеца гьабидал, ургъунго питна багъаризабун бугилан, нилъеда гӏайиб чӏезабиялда хӏинкъи буго. Щай гьанире ракӏараралилан гьикъани, кьезе жаваб гьечӏогури нилъер.
41Гьединги абун, халкъ бикьа-биххизабун нахъе битӏана гьес.
Currently Selected:
Чапарзабазул ишал 19: AvrNT
Highlight
Share
Copy
Want to have your highlights saved across all your devices? Sign up or sign in
© Библия таржама гьабиялъул институт Москва 2008
