Иоанница бицараб Рохалил хабар 12

12 бетӏер

«Дун кидаго гуро нужгун вукӏунев»

1Пасха тӏаде щвезе анлъго къо хутӏараб мехалъ, Гӏиса вачӏана гьес хваралъуса вахъинавурав Лазарил росулъе Бетаниялде. 2Гьениб гьесие къасиялде квен къачӏан букӏун, Марта гьезда цебе квен-тӏех лъолей йикӏана, Лазарги вукӏана Гӏисадаги гьалбадеридаги цадахъ кваназе гӏодов чӏун. 3Берцинаб махӏалъул цӏакъго хирияб нахул гелавкаги босун ячӏун, Марямица Гӏисал хӏатӏазда бахана гьеб ва жиндирго ботӏрол расуца рацӏцӏана гьел. Гьеб нахул цӏакъаб гьуинаб махӏалъул цӏуна рукъ. 4Гьесул муридлъун вукӏарав ва хилиплъизе вугев Ягьуда Искариотица абуна:

5– Гьеб нах бичун букӏарабани, лъабнусго динар щвелаангури ва мискинзабазе садакъаде кьезе бегьилаан гьеб.

6(Мискинзабазул ургъел ккун гуро Ягьудаца гьедин абураб. Цӏогьор вукӏана гьев. Киназулго гӏахьалаб гӏарац жаниб лъураб таргьа Ягьудахъ букӏана, гьеб гӏарацгицин ккезабулаан гьес жиндирго чвантинибе.)

7– Гьей жийго те, – ян абуна Гӏисаца. – Дун хабалъ вукъулеб къоялде нахъе лъун тун букӏун буго гьелъ гьеб нах. 8Мискинзаби кидаго ратила нужеда аскӏор. Дунин абуни, кидаго гуро нужгун вукӏунев.

Лазарги чӏвазе хӏукму гьабула

9Гӏемерал ягьудиязда лъана Гӏиса Бетаниялда вугевлъи. Гьел гьенире рачӏунел рукӏана Гӏиса вихьизе гуребги, хваралъуса гьес вахъинавурав Лазар вихьизеги. 10Гьев Лазар чӏвазеги хӏукму гьабун букӏана чӏахӏиял кашишзабаз, 11гьев сабаблъун гӏемерисел ягьудияз, жалги рехун тун, Гӏисаде иман лъолеб букӏиндал.

Гӏиса Иерусалим шагьаралде лъугьунев вуго

12Нахъисеб къоялъ Гӏиса Иерусалималде вачӏунев вугилан рагӏана байрамалде ракӏарун рукӏарал гӏадамазда. 13Чамасдакил гъутӏбузул гӏурччинал гӏаркьалабиги кодор ккун ана гьел Гӏисада данде. Гьадинаб туркиги ахӏулеб букӏана:

– Гьошанна!

Бетӏергьанас витӏун вачӏунев вугесда баркат лъеги!

Исраилил халкъалъул Парччахӏасда баркат лъеги!

14Цо кӏудияб кӏерт батун, гьелда рекӏана Гӏиса, Тӏухьдузда хъван бугеб гьадинаб калима ритӏухълъизе:

15– Сионил яс, мун хӏинкъуге,

Хӏамил кӏартида тӏадги рекӏун,

Вачӏунев вугевин дур Парччахӏ!

16(Гьебмехалъни муридазда бичӏчӏун букӏинчӏо гьелъул магӏна. Амма Гӏисае Аллагьасдасан машгьурлъи щвараб мехалда ракӏалде щвана гьезда Тӏухьдузда гьесул хӏакъалъулъ гьедин хъван букӏараблъиги, гьеб ритӏухълъизе гӏадамаз гьебщинаб жо гьабураблъиги.)

17Гьес Лазар, хабалъа къватӏиве ахӏун, хваралъуса вахъинавулев вихьарал гӏадамаз гьелъул хӏакъалъулъ бицунеб букӏана. 18Гьеб мугӏжизаталъул хабар рагӏун букӏиндалин гьедигӏан гӏемераб халкъ Гӏисада данде бачӏунеб букӏараб. 19Гьединлъидал фарисеяз цоцазда абулеб букӏана:

– Балагье, нилъее пайда бахинчӏо! Тӏолабго халкъ досда хадуб унеб буго!

Греказ Гӏиса валагьула

20Байрамалъул къояз Иерусалималде зияраталъ грекалги рачӏун рукӏана. 21Галилеялъул Бетсаида шагьаралдаса Филиппихъе ун, гьел греказ гьарана:

– Я, бетӏерчӏахъад! Гӏиса вихьизе бокьун буго нижее.

22Андрейихъе ун Филиппица гьесда бицана гьеб. Цинги Андрейицаги Филиппицаги Гӏисада бицана. 23Гӏисаца гьезда абуна:

– Гӏадамил Лъимер машгьурлъизе заман щун буго. 24Хӏакълъун абулеб буго дица нужеда: хуриб хьараб ролъул мугь ракьулъе ккун хвечӏони, гьеб жибго цохӏо хутӏула гьениб. Амма гьеб ракьулъе ккун хвани, гьелдасан лъугьараб ролъул тӏорода гӏемерал мугьал рижула. 25Жиндирго гӏумру хирияв чи гьелдаса махӏрумлъила. Амма гьаб дуниялалъул рокъоб жиндирго гӏумру рихарасе абадияб гӏумру насиблъила. 26Дие хъулухъ гьабизе бокьарав чи дида цадахъ вилълъа. Дун вугеб бакӏалда вукӏине ккола дие хъулухъ гьабурав чиги. Дие хъулухъ гьабурав чиясул хӏурмат гьабила дир Инсуцаги.

Гӏисаца жиндирго хвалил бицуна

27Гьанже дир ракӏ къварид буго. Амма дица щибилан абилеб? Я, дир Эмен, рухӏ бахъулеб сагӏаталдаса хвасар гьавейиланищ? Гьелъие гӏололъидал дун гьаниве щун вугев. Я, дир Эмен, дурго цӏар машгьурлъизе гьабе!

28Гьебмехалъ зобалаздасан гьаракь рагӏана:

– Дир цӏар машгьураб буго, жеги цӏикӏкӏун машгьурлъизеги гьабила.

29Гьениб букӏараб халкъалдаги рагӏана гьеб гьаракь. Цояз абуна зоб гъугъалеб гьаракь бугилан. Цогидаз абуна малаик вукӏанин Гӏисада кӏалъалев. 30Гӏисаца гьезда абуна:

– Гьадаб гьаракь дида рагӏизе гуро зобалаздасан бахъараб, нужеда рагӏизейин. 31Гьаб дуниялалъе суд гьабулеб къо буго жакъа. Дуниялалъулго кверщелчи къватӏиве вачахъулеб къо буго жакъа. 32Цинги дун, ракьалдаса ворхизавун, борхатаб бакӏалде вахинавидал, дица дидаго хадур цӏазе руго киналго.

33(Гьедин Гӏисаца абуна кинаб хвалдалъун живго холевали бичӏчӏизе.)

34Гьебмехалъ гӏадамаз гьесда абуна:

– «Гӏадамил Лъимер, ракьалдаса ворхизавун, борхатаб бакӏалде вахинавизе вугилан» щайха дуца абулеб бугеб? Щив кколев гьев Гӏадамил Лъимер? Къануналдаса цӏалулеб рагӏана нижеда Масихӏ нижгун абадиялъго хутӏулилан.

35Гӏисаца гьезда абуна:

– Жеги дагьаб заманаялъ Нуралъул канлъи нужгун хутӏизе буго. Гьеб канлъи букӏаго, хьваде нуж ракьалда, бецӏлъи тӏаде гӏунтӏилалде. Бецӏлъуда хьвадулесда лъаларо киве унев вугевали. 36Гьеб Нур нужгун бугебгӏан заманаялъ, гьелда божа, нужго Нуралъул гӏадамаллъун лъугьине.

Халкъ Гӏисада божуларо

Гьединги абун, Гӏиса нахъе ана ва гьезда аскӏоса тӏагӏана. 37Чан мугӏжизатха Гӏисаца гьезда бихьизабураб, амма гьел Гӏисада божичӏо. 38Гьеб кинабго ккана Ишая аварагасул калима ритӏухълъизе:

«Я, Бетӏергьан, нижеца бицаралде иман лъурав чи вугевищ?

Лъие загьирлъараб Бичасул къудрат?»

39Гьединлъидалин гьел божичӏел. Ишая аварагас цоги бакӏалда гьадин абулебги буго:

40«Бичас гьел гӏадамал бецлъизаруна,

Ганчӏил ракӏал лъуна гьезул чурхдузулъ:

Бецлъарал беразда бихьунгутӏизе,

Ганчӏилал ракӏазда бичӏчӏунгутӏизе.

Гуребани, диде руссинаан гьел,

Сахлъизарилаан цинги дица гьел».

41Гӏиса машгьурлъулевлъи цебеккунго бихьун букӏиндал абуна Ишаяца гьедин.

42Бугониги, – цо-цо чӏухӏби-хӏакимзабазгицин иман лъун букӏана Гӏисаде. Амма балъго гьабулеб букӏана гьез гьеб, фарисеяз синагогаялдаса махӏрум гьарилилан хӏинкъун. 43Аллагьасул хӏурмат-цӏаралдаса гьезие гӏадамазул хӏурмат-цӏар хиралъана.

«Дир Рагӏуца суд гьабизе буго»

44Гӏисаца халкъалде ахӏулеб букӏана:

– Дида божулев чи ккола, цохӏо дида гуреб, хӏакълъунго дун витӏарав Аллагьасда божулев чи. 45Дун вихьулев чиясда дун витӏарав Аллагьги вихьулев вуго. 46Дун вуго – Нур. Дун ракьалде вачӏун вуго дида божарав цониги чи бецӏлъуда хутӏунгутӏизе. 47Дихъ гӏенекканиги, дир рагӏи рекӏелъ цӏуничӏесеги суд дица гуро гьабизе бугеб. Гӏадамазе суд гьабизе гуро дун вачӏун вугев, гьел хвасар гьаризе вачӏун вуго. 48Дунги дир рагӏиги нахъчӏварав чиясе суд дир рагӏуца гьабизе буго къиямасеб къоялъ. 49Дунго лъикӏав лъугьун абураб рагӏи гьечӏелъул дир, дун витӏарав дир Инсуца бихьизабуна дида щиб абилебалиги, щиб бицинебалиги. 50Дида лъала гьес бихьизабуралъ абадияб гӏумруялде рачунеблъи. Инсуца дида абураб гурони, абулеб гьечӏо дица нужедаги.

Currently Selected:

Иоанница бицараб Рохалил хабар 12: AvrNT

Highlight

Copy