Иоанница бицараб Рохалил хабар 3
3
3 бетӏер
Гӏисалги Никодемилги гара-чӏвари
1Ягьудиязул чӏухӏби-хӏакимзабазда гьоркьов вукӏана цо Никодем абулев фарисеяв. 2Сардилъ Гӏисахъе вачӏун, гьес абуна:
– Я, Рабби! Нижеда лъала мун Аллагьас нижехъе витӏарав Мугӏалим вукӏин. Дуца нижеда рихьизарурал гӏадинал мугӏжизатал лъиданиги рихьизаризе кӏоларо, Аллагьасул квербакъи гьечӏони.
3Гӏисаца гьесда абуна:
– Хӏакълъун абулеб буго дица дуда: цӏидасан гьавурасда гурони Аллагьасул Парччахӏлъи бихьизе гьечӏо.
4Никодемица гьесда гьикъана:
– Кӏудияв гӏурав чи цӏидасан кин гьавулев? Тӏадвуссун эбелалъул ургьиве лъугьун, цӏидасан чи гьавизе рес бугебищ?
5Гӏисаца жаваб кьуна:
– Хӏакълъун абулеб буго дица дуда: лъададасан ва Илагьияб Рухӏалдасан лъугьарав чиясе гурони Аллагьасул Парччахӏлъиялде нух гьечӏо. 6Инсанасул черхалдасан черх лъугьуна, рухӏалдасан рухӏ лъугьуна. 7Нуж цӏидасан гьаризе кколилан дица абиялда хӏикмалъуге. 8Гьури жиндиего бокьараб рахъалде уна. Дуда гьелъул гьаракь-хъуй рагӏула, амма кисан бачӏунеб ва кибе гьеб унеб бугебали дуда лъаларо. Гьелда релълъуна Рухӏалдасан гьавуравщинав чиги.
9– Гьеб кин лъугьунеб? – ан гьикъана Никодемица.
10Гӏисаца жаваб кьуна:
– Мун вуго Исраилил халкъалъул мугӏалим. Дуда лъазе ккеларищ гьеб? 11Хӏакълъун абулеб буго дица дуда: нижеца бицунеб буго нижедаго лъалебщинаб ва нижеда бихьарабщиналъе нугӏлъи гьабулебги буго. Амма нижер нугӏлъиялда нуж божулел гьечӏо. 12Дуниялалъул ишазул хӏакъалъулъ бицаралда божулареб мехалъ, зобалазул ишазул бицунилан божилищ нуж? 13Зобалазде цониги инсан щвечӏо, гьениса рещтӏарав Гӏадамил Лъимер тун батӏияв чи. 14Гӏицӏаб авлахъалда Мусаца пахьул борохь гӏорол тӏогьибе бахинабураб гӏадин, Гӏадамил Лъимерги борхатаб бакӏалде вахинавизе вуго, 15гьесда божаравщинасе абадияб гӏумру насиблъиялъе гӏоло. 16Гьаб дуниял Аллагьасе гьедигӏанги цӏакъ бокьулеб буго: гьес цохӏо вугев Вас гьаниве витӏана, гьесда божанщинав чи хунгутӏизе, гьезие абадияб гӏумру насиблъизе. 17Гӏаламалъе судги тамихӏги гьабизе витӏун гьечӏо Аллагьас жиндирго Вас дуниялалде, гьесдалъун гӏалам хвасар гьабизе витӏун вуго. 18Гьесда божарасе тамихӏ букӏине гьечӏо, амма божичӏезе тамихӏ гьанибго гьабун буго, Аллагьасул цохӏо вугев Васасда гьел божичӏелъул. 19Дуниялалде Нур бачӏиналдалъун гьабуна гьеб суд. Амма гӏадамазе Нур бокьичӏо, бецӏлъи бокьана, гьез гьарулел ишал квешал рукӏиндал. 20Квешлъи гьабулевщинав чиясе Нуралъул канлъи бокьуларо ва канлъуде унаро, гьеб квешлъи къватӏибе загьирлъилилан хӏинкъун. 21Лъикӏлъи гьабулев чи канлъуде уна, жинца гьеб лъикӏлъи Аллагьасе гӏоло гьабураб букӏин загьирлъизе.
Яхӏяца Гӏисал хӏакъалъулъ бицунеб буго
22Цинги Гӏиса жиндирго муридалгун цадахъ Ягьудиялъул ракьалде ана, гьенив чӏун гӏадамал лъадалъ ччун рахъулел рукӏана гьес. 23Гьеб заманаялда Яхӏяги вукӏана Салималда аскӏоб бугеб Эноналда. Лъим гӏемераб бакӏ букӏиндал, гьенир лъадалъ ччун рахъулаан Яхӏяца жиндихъего рачӏарал гӏадамал. 24Яхӏя жеги гвандинив тӏамилалде заман букӏана гьеб.
25Яхӏял муридазулги цо ягьудиясулги дагӏба ккана рацӏцӏалъизариялъул гӏадаталда тӏасан. 26Яхӏяхъе рачӏун муридаз абуна:
– Я, Рабби! Иорданалъул добцояб рагӏалда дуда аскӏов вукӏарав ва дуца жиндир хӏакъалъулъ бицунеб букӏарав чиясги лъадалъ ччун рахъулел руго гӏадамал. Киналго гьесухъе рачӏунел руго.
27Гьезие жавабалъе Яхӏяца абуна:
– Зобалаздасан кьун гьечӏони, инсанасе щибниги щоларо. 28Нужеда рагӏанагури добмехалъго дица дун Масихӏ гурин, гьесдаса цеве витӏарав чи вугилан абулеб. 29Бахӏарав вуго бахӏаралъул бетӏергьан, бахӏарасул гьудулин абуни бахӏарай ячине гьев вачӏинегӏан чӏезе ккола, ва, гьев вачӏунев рагӏарабго, вохуца холев вукӏине ккола. Гьедин гьанже дунги кутакалда вохун вуго гьев вачӏиналдаса. 30Гьев кӏодолъизе ккола, дун гьитӏинлъизе ккола. 31Зобалаздасан вачӏарав киназдасаго тӏадегӏанав вукӏуна. Ракьалда вижарав ракьалдаго хутӏула, дуниялалъул ишазул хӏакъалъулъ букӏуна гьесул бицунеб рагӏиги. Зобалаздаса вачӏарав киназдасаго тӏадегӏанав вукӏуна. 32Гьес бицунеб буго жиндаго бихьаралъулги рагӏаралъулги. Амма гьес бицаралда щивниги божулев гьечӏо. 33Гьесда божарав чияс Аллагь хӏакъав вукӏин чӏезабула. 34Аллагьас витӏарасул кӏалдиб буго Аллагьасул калам, Бетӏергьанас Илагьияб Рухӏ гьарзаго лъугьинабун бугелъулха гьесулъе. 35Инсуе вас вокьула ва тӏолабго кверщел гьесухъе кьола. 36Васасда божарав чиясе абадияб гӏумру насиблъила. Васасухъ гӏенеккичӏесда абадияб гӏумру бихьиларо, Аллагьасул ццин бахъин тӏаса инаро гьесдаса.
Currently Selected:
Иоанница бицараб Рохалил хабар 3: AvrNT
Highlight
Share
Copy
![None](/_next/image?url=https%3A%2F%2Fimageproxy.youversionapistaging.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© Библия таржама гьабиялъул институт Москва 2008