Лукаца бицараб Рохалил хабар 21

21 бетӏер

Къоролалъул садакъаялъул хӏакъалъулъ

1Мукъадасаб Рокъоб садакъаде гӏарац лъолеб бакӏалде бечедал чагӏаз гӏемераб гӏарац рехулеб бихьана Гӏисада. 2Бащдаб капекалъул багьаяб кӏиго пахьул гӏарац гьенибе рехулей цо мискинай къоролайги йихьана гьесда. 3Гӏисаца абуна:

– Хӏакълъун абулеб буго дица нужеда: гьай мискинай къоролалъ киназдасаго цӏикӏкӏун гӏарац кьуна садакъаде. 4Цогидаз садакъа гьабуна жидерго боцӏи-рикъзи тӏокӏлъун, долъин абуни, жиндиего хӏажат букӏаниги, садакъаде кьуна жиндирго бетӏербахъиялъе хутӏун букӏарабщинаб.

Гӏисаца бицуна дуниялалда ккезе бугелъул

5Мукъадасаб Рукъалъул хӏакъалъулъ цо-цояз абулеб букӏана, унго, гьалъул къадазулъ лъун ругел ганчӏазул берцинлъи бихьуларищилан, бечедал сайигъатаз гьаб чӏухӏизабун бугеб куцилан. Гӏисаца абуна:

6– Гьаб кинабго нужеда бихьулебщинаб, ганчӏида лъураб гамачӏ хутӏичӏого, кӏалагъоркье чӏварал къоял рачӏине руго.

7– Я, Мугӏалим! Кида гьеб букӏине бугеб? – ан гьикъана гьез гьесда. – Гьеб къо тӏаде щвеялъул гӏаламат бице нижеда.

8Гӏисаца абуна:

– Воре, къосинаризе гурин нуж! Чанги вукӏине вугелъулха, жив дун вугилан ва ахирзаман щванилан абун вачӏунев чи. Гьезда хадур унге нуж. 9Рагъ-кьалги тунка-гӏусиги гӏемерлъун бугилан рагӏани, гьелдасаги хӏинкъуге нуж. Гьеб цебеккунго лъугьине ккола, амма ахирзаман гьедигӏан хехго тӏаде щоларо.

10Цинги гьес абуна:

– Цо халкъ цоги халкъалде, цо ханлъи цоги ханлъиялде тӏаде кӏанцӏила. 11Кутакалда ракь багъарила, бакӏ-бакӏалда унта-щокълъи баккила, ракъи тӏаде щвела, балагьал рещтӏина ва зобалаздасан чӏахӏиял гӏаламатал загьирлъила.

12Гьеб кинабго ккелалде, дун сабаблъун нужеда хадур лъугьина, кквезеги ккун, синагогабазде рачина, суд гьабила, гвандинире рехила, парччахӏзабазда ва наибзабазда цере чӏезарила. 13Гьебмехалъ рес ккела нужее, дир муридал ругилан нугӏлъи гьабизе. 14Кин гьезие жаваб кьелебали цебеккунго ургъел чӏвазе кколареблъиялда ракӏчӏезабе нужеца. 15Щаян абуни, нужеда дандечӏезе ва данде кӏалъазе нужер киналго дагӏбадулазухъа бажарулареб пасихӏлъиги гӏакъиллъиги кьела дица нужее. 16Нужее хилиплъила хӏатта нужер эбел-эмен ва вацал, нужер гӏагарал чагӏи ва гьудулзаби. Цо-цоял чӏвазеги чӏвала нужер. 17Дун сабаблъун киналго гӏадамазда рихина нуж. 18Амма нужер бутӏруздаса цо расги бортизе гьечӏебха. 19Нужерго сабруялдалъун нужерго рухӏал хвасар гьаре.

20Боял рачӏун, Иерусалим сверун ккун бихьараб мехалъ, лъала нужеда гьеб шагьар чӏунтулеб заман гӏагарлъулеб букӏин. 21Гьеле гьебмехалъ мугӏрузде лъута абе Ягьудиялда ругел гӏадамал. Шагьаралда жанир ругелал гьениса къватӏире тӏурун аян абе, шагьаралдаса къватӏирехун ругелал жанирего лъугьунгеян абе. 22Щаян абуни, гьел ругелъул къисас босулел къоял, гьелдалъун ритӏухълъизе бугелъул Илагьиял Тӏухьдузда хъварабщинаб. 23Вай, къинал руччабазе ва каранда хахулел лъимал ругел улбузе букӏинаха дол къояз кӏудияб къварилъи-гӏазаб! Цӏакъ кӏудияб балагь бачӏина гьеб ракьалде, Аллагьасул ццин рещтӏина гьеб халкъалде! 24Хвалчабаз бутӏрул къотӏаралги рукӏина, киналго улкабазде асирлъун рачун аралги рукӏина. Аллагь лъалареб халкъалъул къуват лъугӏараб заман тӏаде щвезегӏан, гьелъ хӏатӏикь мерхьина Иерусалим.

25Бакъ-моцӏалъул ва цӏвабзазул гӏаламатал загьирлъила, ракьалдайин абуни, ралъдал хъудиялъ ва карачалабазул кутакаб хъуялъ хӏинкъизарурал халкъал цӏакъго рихха-хочун лъугьина. 26Дуниялалде рещтӏине ругел балагьазухъ ралагьун чӏеялъги хӏинкъиялъги гӏадамал гӏакълуялдаса ина. Щаян абуни, къвакӏарал зобал гьаргьадизе ругелъул. 27Гьебмехалда вихьила накӏкӏул парчаялда тӏад гучалда ва кӏудияб къудраталда Гӏадамил Лъимер вачӏунев. 28Гьел гӏаламатал загьирлъаралго, нуж тӏаде рахъа ва бетӏер эхеде борхун ралагье – нужее тархъанлъилъидал бачӏунеб бугеб.

«Нужеца мисалалъе босе инжиралъул гъветӏ!»

29Гӏисаца гьезие гьадинаб мисал бачана:

– Инжиралъул гъотӏохъ яги цогидал гъутӏбузухъ ралагье нуж. 30Гьел гъутӏби гӏурччинлъун рихьараб мехалъ, нужеда лъалагури рии тӏаде щолеб букӏин. 31Гьелдаго релълъун, гьал дица рицарал гӏаламатал загьирлъараб мехалъ, нужеда лъала Аллагьасул Парччахӏлъи гӏагарлъулеб букӏин.

«Воре, нуж рорчӏуда чӏа!»

32Хӏакълъун абулеб буго дица нужеда: дуниялалда гьаб наслу букӏаго лъугьине буго гьеб кинабго. 33Зобалги ракьалги тӏагӏаниги, дир рагӏаби нахъе хутӏизе руго. 34Воре, гьекъолдун, пасалъун ва магӏишаталъул тӏалаб-агъаз гьабун, ракӏ бицалъизе биччаге, тохлъукьего гьеб къоялъ нужее къор гъезе гурин. 35Гьеб къо тӏаде бачӏине бугелъул тӏолабго гьаб ракьалда тӏад бугеб кинабго махлукъаталде! 36Гьединлъидал рорчӏуда чӏа! Кинабго гьеб ккезе бугелдаса хвасарлъизеги ва къиямасеб къоялъ Гӏадамил Лъимада цере чӏезе кӏвезеги кидаго гьари-дугӏаялда рукӏа.

37Гьел къоязда Мукъадасаб Рокъове вагӏза-насихӏат гьабизе вачӏунаан Гӏиса. Сордо базе гьев Зайтуналъул магӏарде тӏадвуссунаан. 38Щибаб къоялъ радалго бачӏунаан Мукъадасаб Рокъобе гьесухъ гӏенеккизе халкъ.

Currently Selected:

Лукаца бицараб Рохалил хабар 21: AvrNT

Highlight

Copy