Лукаца бицараб Рохалил хабар 3

3 бетӏер

Яхӏя авараг халкъалда цеве вахъуна

1Тиберий къайсарлъун ккун анцӏила щуабилеб сон букӏана; Ягьудиялда сардарлъун вукӏана Понтий Пилат; Галилеялда ханлъун вукӏана Гьерод; гьесул вац Филипп вукӏана Итуреялда ва Трахонит вилаяталда ханлъун, Лисаний вукӏана Абиленаялда ханлъун; 2бищунго кӏудиял кашишзабилъун рукӏана Гьанна ва Кайафа. Гьеб заманаялда Закариял вас Яхӏяе гӏицӏаб авлахъалда Аллагьасул илгьам лъугьана. 3Иордан гӏоралда сверухъ ругел бакӏазде щун, нужерго мунагьал чуризе гӏоло, кантӏун Аллагьасде руссаян ва лъадалъ ччун рахъаян лъазабулеб букӏана гьес. 4Гьелдалъун ритӏухълъана Ишая аварагасул Тӏехьалда ругел гьадинал рагӏаби:

«Цо ахӏи буго авлахъалда рагӏулеб:

– Бетӏергьанасе нух къачӏай,

битӏизабе гьесда цебе шагьра!

5Щибаб кӏкӏал-хъитӏ бацизабе,

щибаб гохӏ-щоб тӏуцлъизабе,

свераби лъугӏизаре,

эхедераялги лабаллъабиги гьечӏеб, цӏвакараб нух букӏа абе,

6щибаб рижиялда бихьа абе Аллагьасдасан хвасарлъи!»

7Гьале лъадалъ ччун рахъизе рачӏунел рукӏана халкъалъул руккелал. Гьезда Яхӏяца абулаан:

– Гӏай, нуж чӏегӏераб борхьил наслу! Нужеде гӏагарлъун бугеб Аллагьасул тамихӏалдаса лъутизе лъица малъараб? 8Нужерго мунагьаздаса руссун, кантӏиялъул гъотӏода пихъ барщизабе, ниж Ибрагьимил наслуялъул лъимал ругиланги гаргадуге. Гьале дица нужеда абулеб буго: жиндие бокьани, гьал ганчӏаздасанги Ибрагьимил наслуялъул лъимал лъугьинаризе кӏола Аллагьасда. 9Гъутӏбузда гъоркь гӏащтӏи лъун тун бугеблъи лъай нужеда. Лъикӏаб пихъ тӏад бижичӏеб гъветӏ къотӏун цӏадаб лъезе бугебха!

10– Нижеца щибха гьанже гьабизе кколеб? – ан гьикъулаан гьесда гӏадамаз.

11Гьес жаваб кьолаан:

– Кӏиго гурде бугес цояб гьечӏесе кье, квен бугесги гьединго гьабе.

12Лъадалъ ччун рахъизе рачӏарал магъало бакӏарулел чагӏазги гьикъана гьесда:

– Я, Мугӏалим, нижеца щибха гьабизе кколеб?

13Гьезие жаваб кьуна Яхӏяца:

– Нужеда бихьизабуралдаса цӏикӏкӏун бахъуге лъихъаниги магъало.

14Гьединго рачӏун рагъухъабаз гьикъана:

– Нижеца щибха гьабизе кколеб?

Гьезда абуна:

– Хӏал-зулмуялдалъун ва гьечӏеб гӏайиб гӏунтӏизабун лъихъаго гӏарац бахъуге, нужеего щолеб харжалда разилъун чӏа.

15Масихӏ вачӏиналъухъ урхъун балагьун чӏун букӏараб халкъалда ракӏалде кколеб букӏана Яхӏяцин гуродай гьевилан. 16Яхӏяца киназдаго абуна:

– Лъадалъ ччун рахъун, рацӏцӏад гьарулел руго дица нуж, амма вачӏунев вуго дидасаги гӏемерго къудрат цӏикӏкӏарав. Гьесул хьитил рухьен бичизецин мустахӏикъав гьечӏо дун. Гьес нуж рацӏцӏад гьарила Илагьияб Рухӏалдалъун ва цӏаялдалъун. 17Гьес бугьун хъатикь ккун буго, жиндирго гьоцӏиб ролъ бацӏцӏад гьабун, гьеб цагърахъе буссинабизе, накку гьес ссвинго гьечӏеб цӏадабе бан бухӏила.

18Гӏадамазе Рохалил хабар бицун, гьединал ва цогидалги рагӏабаздалъун гӏемерал насихӏатал гьарулел рукӏана Яхӏяца.

19-20Гьерод ханас жиндирго вацасул чӏужу ячинги ва гьеб гурелги гьесул квешлъаби Яхӏяца какулел рукӏиндал, цогидал жиндирго цересезде тӏаде жубана гьев ханас Яхӏя гвандинив тӏамиялъул квешлъиги.

Гӏиса Аллагьасул вас вукӏин загьирлъула

21Гьале Яхӏяца киналго лъадалъ ччун рахъулел рукӏараб заманаялда гьениве вачӏарав Гӏисаги лъадалъе лъугьун дугӏа гьабулев вукӏана. Гьебмехалъ зобалги кӏирикьизарун, 22миккидул сураталда Илагьияб Рухӏ рещтӏана гьесухъе ва зобалаздасан гьаракьги рагӏана:

– Мун вуго дие вокьулев дир Вас! Дудаса вохун вуго дун!

Гӏиса Масихӏил цӏаразул рахас

23Аллагьасе хъулухъ гьабизе байбихьулеб мехалъ, Гӏисал букӏана лъебергогӏанасеб сон, ва гьесул умумузул силсила гьадинаб бугилан рикӏкӏунаан: гьесул эмен Юсуп, гьесулги эмен Гӏели, цинги 24Маттат, Леви, Малки, Яннай, Юсуп, 25Маттитья, Гӏамос, Нахӏум, Гьесли, Наггай, 26Махӏат, Маттитья, Шимгӏи, Йосех, Йода, 27Йохӏанан, Реса, Зеруббабел, Шеалтиэл, Нер, 28Малки, Адди, Къасам, Элмадам, Гӏер, 29Йешуагӏ, Элигӏезер, Йорим, Маттат, Леви, 30Шимгӏон, Ягьуда, Юсуп, Йонан, Элякъим, 31Мелеа, Менна, Маттата, Натан, Давуд, 32Йишай, Йобед, Богӏаз, Шелахӏ, Нахӏшон, 33Гӏаминадаб, Админ, Арам, Хӏецрон, Перец, Ягьуда, 34Якъуб, Исхӏакъ, Ибрагьим, Терахӏ, Нахӏор, 35Серуг, Регӏу, Пелег, Эбер, Шелахӏ, 36Къейнан, Арпакшад, Шем, Нухӏ, Ламек, 37Метушелахӏ, Хӏенок, Йаред, Магьалалеэл, Къейнан, 38Энос, Шит, Адам, Аллагь.

Currently Selected:

Лукаца бицараб Рохалил хабар 3: AvrNT

Highlight

Copy