Нүүдл 1

Египетд Израилин келн-улсиг даҗрлһн

1Яковла Египетд ирсн Израилин көвүдин нерд эн (күн болһн эврә өрк-бүлтәһән орҗ ирсн болдг): 2Рубен, Шимон, Леви, Йуда, 3Исахар, Завулун, Бенямин, 4Дан, Наптали, Гәд болн Ашер. 5Яковин үрд тер цагт Египетд бәәсн Йосипла ут тоодан далн күн бәәсмн.

6Йосип чигн өңгрв, энүнә ахнр-дүүнр цугтан, эднә үй бас цугтан өңгрв. 7Израилин улс болхла олн үртә бәәсмн, эдн тооһарн олн болад, күчнь икдәд, цуг эн орн-нутгиг дүүргв. 8Цаг давад Египетин хаана ширәд Йосипиг меддго шин хан ирв. 9Эн эврә әмтндән келнә:

– Хәләтн, Израилин улс олн болв. Эдн күчн-чидләрн маднас даву. 10Эдн тооһарн өсшгон төләд нег юм ухалх кергтә, эс гихлә дән учрхла эдн мана хортнла негдәд, буцад мадна нутгас йовҗ одх.

11Израилин улсиг күнд көдлмшәр муурхднь күргхәр седәд, египетихн эднә өөр хармҗлгчнриг зогсана. Тегәд хаана төлә буудя хадһлдг хораста Питом болн Раамсес хойр балһсиг күчәр тосхулв.

12Болв Израилин улсиг икәр даҗрсн бийнь эднә тонь өсәд болн өргҗәд йовв. Египетихн эднәс икәр әәһәд, 13Израилин улсар хәәрлт угаһар күнд көдлмш келгүләд бәәв. 14Эднә нилчәр Израилин улсин җирһлнь күнд-күчр көдлмшт хүврв: эдн шавр элдәд тоосх кеҗ һарһв, тәрәнд көдлв – хәәрлт угаһар эн көдлмшт эдн заргдв.

15Египетин хан дораһур еврей гергчүдин нилхдт эк болдг эмгдт (негнь Шифра, наадкнь Пуа нертә бәәсмн) заквр өгв:

16– Еврей гергчүд цаһан төр болсн цагт кен төрсинь хәләтн. Көвүн болхла – алтн, күүкн болхла – әмд бәәтхә.

17Болв дораһур нилхдт эк болдг күүкд улс Бурхнас әәһәд, хаана заквриг соңслго, көвүдиг әмд үлдәһәд бәәв. 18Хан эдниг бийүрн дуудҗ авад сурдг болна:

– Юңгад тадн тиигҗ кенәт? Яһад көвүдиг әмдәр үлдәһәд бәәнәт?

19– Еврей гергчүд Египетин күүкд улсла әдл биш, – гиҗ хаанд дораһур нилхдт эк болдг күүкд улс хәрү өгнә, – эдн чаңһ-чиирг. Дораһур нилхдт эк болдг күүкд күн ирәд уга бәәтл, еврей гергчүд цаһан төр болчкна.

20Энүнә төлә Бурхн дораһур нилхдт эк болдг күүкд улсиг хәәрлв. Израилин әмтн тооһарн өсәд, күчәрн чаңһрад бәәв. 21(Дораһур нилхдт эк болдг күүкд улс Бурхнас әәҗәхәс иштә Бурхн эднә өрк-бүлмүдиг хәәрлсн болдг.) 22Тиигхлә Египетин хан эврә улстан иим заквр өгдг болна:

– Нилх көвүдиг цугтаһинь Нил һолд хайтн. Күүкдиг әмд үлдәтн.

Currently Selected:

Нүүдл 1: ХКО_ӘБ

Highlight

Copy