Эклц 50
50
1Йосип эцк деерән өкәһәд, теврәд, уульн бәәҗ терүнә чирә үмснә. 2Эврәннь зарц эмчнртән Израилин цогциг оршалһнд белдх заквр тер өгнә. 3Болзгарнь 40 хонгтан эмчнр терүнә цогцд бальзам ивтрәв, 70 хонгтан Египетин улс терүнд харм төрҗ уульцхав. 4Һундлын өдрмүд давхла, хаана бәәшңд бәәдг хаана зарцнрт Йосип иигҗ келнә:
– Буйн болтха, 5мини эцк нанас андһар авла гиһәд хаанд келит. Эцкән өңгрхлә, би терүг урдаснь Кананд бийиннь белдсн үкәрт оршах боллав. Би йовад эцкән оршах зөв терүнәс сурҗанав, дәкәд хәрү ирхүв.
6– Йов, чи андһар өгсн болхла, эцкиннь зааврар терүг орша, – гиҗ хан келнә.
7Йосип эцкән оршахар йовна. Терүнлә хамдан хаана зарцнр, бәәшңгин ямта улс, Египетин һазра һардачнр, 8Йосипин цуг өрк-бүлин улс, терүнә цуг ахнр-дүүнр, эцкиннь наадк цуг өрк-бүлин улс йовцхана. Гошенд зуг теднә бичкдүд, малнь үлднә. 9Тедниг мөрн тергтә, мөр унсн улс, йир олн улс дахцхав.
10Йордан һолын зүн үзг тал Атадт бәәсн тәрәнә тогт күрхләрн, тедн тенд йир икәр, йир һашудҗ уульцхав. Тенд Йосип оршалһна керг күцәнә – 7 хонгтан эцкдән һундрхҗ уульцхана. 11Тер һазрт бәәсн Канана улс Атадын тогт оршалһнд орлцҗах улсиг үзәд иигҗ келцхәнә:
– Египетин улс йир һашудҗ уульҗацхана!
(Тер учр деерәс тер орм Авел-Мицраим#50:11 Авел-Мицраим – еврей келәр «Египетин әмтнә уульлһн». гидг нер зүүв.)
12Тиигҗ Яковин көвүд эцкиннь заавр күцәнә. 13Терүг тедн Кананд авч одад, Махпела теегт бәәсн хадын көндәд оршана. Абрахам терүг Эпрон гидг хетәс Мамреһәс хол биш оршадг бәәр кехәр хулдҗ авла. 14Эцкән оршачкад, Йосип ахнр-дүүнртәһән болн хамдан йовсн цуг улстаһан Египет тал хәрҗ ирнә.
Йосип эврәннь ахнр-дүүнрән тогтнулна
15Йосипин ахнр-дүүнр эцкән өңгрснә дару иигҗ санцхана:
– Кемр Йосип маднд дурго болад, терүнд мана үзүлсн зовлңгас көлтә өшәһән авхар седхлә яахмб?
16Тедн Йосип тал кү илгәһәд иигҗ келүлнә:
– Үкхиннь өмн мана эцк иим сурһмҗ үлдәҗ: 17«Йосипт келтн: Ахнр-дүүнриннь һарһсн килнцинь, чамд зовлң үзүлснә геминь тәвҗ өг». Мана гемиг тәвҗ өгхичн бидн эрҗәнәвидн. Мана эцкин шүтҗәсн Бурхнд бидн бас шүтҗәнәвидн.
Тиим үг соңсчах Йосип уульна.
18Терүнә ахнр-дүүнрнь эвцхәр ирәд, өмннь сөгдәд иигҗ келцхәнә:
– Эндрәс авн бидн чини зарцнрвидн!
19– Бичә әәтн, – гиҗ Йосип келнә. – Би тадна зарһ кех, тадниг засглх Бурхн бишлм. 20Тадн болхла нанд хар санаһан күртәхәр седҗәләт, Бурхна седвәрәр тертн зуг цаһан сананд хүврв. Энүнәс көлтә кедү әмтнә әмн ода күртл авргдҗана. 21Бичә әәтн. Би таднд чигн, тадна үрдт чигн килмҗән өгнәв.
Йосип теднлә җөөлнәр күүндәд тогтнулна.
Йосипин үкл
22Тегәд Йосип эцкиннь өрк-бүлтә Египетд бүүрләд бәәв. Тер 110 җилдән әмд йовв. 23Тер Эпримин үрдин һурвдгч үй үзв. Манашен көвүн Махирин үрдиг Йосип өрк-бүлдән орулҗ авла.
24– Би удлго өңгрхүв, – гиҗ Йосип ахнр-дүүнртән келнә. – Болв Бурхн, маһд уга, таднд дөңгән күргхәр ирх, тадниг эн һазрас дахулҗ һарһад, Абрахамд, Ицхакд болн Яковд өгх болад андһар тәвсн һазрт күргх.
25Йосип Израилин өрк-бүлин улсас андһар авна: «Бурхн таднд оньган өгхлә, мини цогциг бийләһән авад йовтн».
26Йосип 110 җилдән бәәһәд, Египетд өңгрв. Терүнә цогциг бальзамар ивтрәһәд, оршалһна яршгт тәвнә.
Currently Selected:
Эклц 50: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
