Нүүдл 4

Мошен төлә болҗах өвәрц йовдл

1– Кемр нанд итклго, намаг соңслго Деед Эзн чамд үзгдсн уга гиҗ келхләнь, би яахмб? – гиҗ Моше келҗәнә.

2– Һартчн юн бәәнә? – гиҗ Мошеһәс Деед Эзн сурна.

– Тайг, – гиҗ тернь хәрү өгв.

3– Терүгән һазрт хай, – гиҗ Деед Эзн закв.

Моше хайчкв. Тайгнь моһад хүврв, Моше зулад гүүв.

4– Һаран сарваһад, энүг сүүләснь бәр, – гиҗ Деед Эзн энүнд закна.

Моше һаран сарваһад моһаг бәрҗ авхлань – энүнә һарт тернь тайг болҗ хүврнә.

5– Эннь чамд йосндан Деед Эзн, теднә эк-эцкнрин Бурхн – Абрахамин, Ицхакин болн Яковин Бурхн үзгдәд ирсинь чамд итктхә гисн темдг, – гиҗ Бурхн келнә.

6– Өвртән һаран дүр, – гиҗ Мошед Деед Эзн закна.

Моше һаран өвртән дүрнә. Һаран һарһхлань, тернь цасн мет цаһан болҗ одҗ – арсна гем бүтәҗ.

7– Дәкәд һаран өвртән дүр, – гиҗ энүнд Деед Эзн закна.

Моше дәкнәс һаран өвртән дүрәд һарһхлань, һарнь урдк кевәрн эрүл-дорул цогц мет болв.

8– Кемр тедн чамд эс иткхлә, кемр түрүн өвәрц йовдл эдниг эс иткүлхлә – эдниг хойрдгч өвәрц йовдл иткүлх. 9Зуг кемр эдн эн өвәрц йовдлмудт итклго, чамаг эс соңсхла, тиигхлә Нил һолын усиг утхҗ авад, һазрт цацхла, эн усн цуснд хүврх, – гиҗ Деед Эзн келнә.

10– О-о, мини Деед Эзн! – гиҗ Моше Деед Эзнәс эрәд сурна. – Би хурц келтә бишүв. Өцклдүр чигн, урҗ өдр чигн, Тана мухлала Тана күүндсн өдрәс авн чигн тиим би болҗанав. Би сәәнәр келдгов. Кезәчн хурц келн угав.

11Тиигхлә Деед Эзн келҗәнә:

– Күүнд кен ам өгсмб? Кен келн уга эс гиҗ таңх болхиг кеҗәхмб? Кен нүдәрн үздг эс гиҗ сохр болхиг кеҗәхмб? Би, Деед Эзн, эс кеҗәнү? 12Тиигәд йовхнчн! Чамаг келхлә, Би чамла бәәхүв. Би эврән ю келхичн чамд дасхнав.

13– О-о, Деед Эзн мини! – гиҗ Моше эрҗ сурна. – Талдан күүг – эврән дурлсан йовултн!

14Тиигхлә Деед Эзн Мошед уурлад, энүнд келнә:

– Левихнә отгас Ахарон гидг ах чамд угай? Тер келҗ чаддгинь би меднәв! Тер чамаг тосхар аашна, терчн чамаг үзәд байрлх. 15Чи болхла энүнд келәд, терүнә амнд үгинь орулад медүлхич. Тадн күүндсн цагт Би Эврән таднла бәәхүв. Ю кехинь Би Эврән таднд дасхнав. 16Ахарон чини амн болад, чини ормд әмтнлә күүндх, чи терүнд Бурхнла әдл болхич. 17Эн тайгиг бийләһән ав. Энүнә нилчәр чи онц темдг һарһхич.

Моше Египет тал хәрү ирҗәнә

18Моше эврәннь хадм эцк Итро тал хәрү ирәд келнә:

– Йовнав би, Египетд мини ахнр тал хәрү одҗ, әмд бәәх угаһинь хәләнәв.

– Амулң менд йов, – гиҗ энүнд Итро келнә.

19Тенд, Мидьянд, Деед Эзн Мошед келҗәнә:

– Египет тал хәр. Чамаг алхар седҗәснь өңгрҗ одв.

20Моше гергән болн күүкдән элҗгн деер суулһад, Бурхна өгсн тайган бийләһән авад Египет тал йовна.

21Деед Эзн Мошед келнә:

– Би чамд өвәрц йовдлмуд учрах чидл өгв. Египетд ирхләрн хаанд эн өвәрц йовдлмудыг үзүл. Би хаанас зөрхинь некнәв; эн тадниг тәвшго. 22Тиигхлә чи терүнд келхич: «Деед Эзн келнә: Израиль – Нанд көвүнләм әдл, Мини ууһн үрн мет. 23Би чамд келҗәнәв: терүг Нанд мөргхин төлә тәвчк. Кемр эс сулдххла, тиигхлә Би чини көвүг – ууһн үричн – алнав!»

24Хаалһднь, хондг һазрт, Деед Эзн Моше тал ирәд, энүг алхар седнә. 25Тиигхлә Ципора хурц цәкүрәр кесн утх авад, эврәннь көвүнә бий махмудын үзүринь керчәд, энүнә көлднь әрә һаран күргчкәд келнә:

– Чи нанд цусарн төрл болҗанач!

26Тиигхлә Деед Эзн энүнәс хооран цухрна. («Цусарн төрл» гиҗ эн әмн бийин үзүрин керчлһнә тускар келнә.)

27– Мошен өмнәс көдә һазрур йов, – гиҗ Деед Эзн Ахаронд закна.

Ахарон хаалһд һарад, Бурхна уулын өөр Мошелә харһад энүг үмсәд мендлнә. 28Деед Эзн Мошеһәр Эврә элч кеһәд, ю келсинь, ямр онц темдг үүдәхд Тер заквр өгсинь Моше Ахаронд келҗ өгнә. 29Эдн йовад, Израилин цуг медәтнриг цуглулна. 30Деед Эзн Мошед ю келсинь Ахарон эднд медүләд, цуг әмтнә нүүрт онц темдг һарһв. 31Әмтн энүнд иткв. Деед Эзн Израилин улсин тускар тодлад, эднә зовлң үзсинь соңсчкад, әмтн мөргәд һазр элкдәд унв.

Currently Selected:

Нүүдл 4: ХКО_ӘБ

Highlight

Copy