Нүүдл 5

Израильтянмудын бәәдл хаана даҗрлһнас муурчана

1Моше Ахарон хойр Египетин хан тал ирәд келнә:

– Деед Эзн, Израилин Бурхн, келҗәнә: «Мини келн-улсиг көдә һазрур Мини байр темдглхин төлә тәв!»

2– Деед Эзн – эннь кемби? Яһад би Энүг соңсад, Израилин улсиг тәвх зөвтәв? Би эн Деед Эзиг медҗәхшүв, Израилин улсиг тәвхшүв, – гиҗ хан хәрү өгв.

3– Маднд еврей улсин Бурхн ирв, – гиҗ Моше Ахарон хойр келв. – Маднд һурвн өдрәр көдә һазрур йовад, мана Деед Эзнд тәкл тәкхд зөвшәл өгтн, эс гихлә Тер мадниг маальг гемәр эс гиҗ селмәр алх.

4– Моше Ахарон хойр! Юңгад тадн эврә улсан көдлмш кедгинь уурулҗахмбт? Одад цугтан көдлтн! – гиҗ хан эднд хәрү өгв.

5– Тедн тооһарн олн, – гиҗ хан Моше Ахарон хойрт келҗәнә. – Тадн тедниг көдлмшән хайхинь некчәнт?

6Тер өдртән хан хармҗлгчнртан болн ахлачнртан заквр өгнә:

7– Энүнәс хооран эн улст тоосхин төлә салм урднь өгчәсәр бичә өгтн. Эврән йовад, салм цуглултха. 8Зуг тоосхин кемҗәг урдклаһан әдл нектн, бичә баһрултн. Эдн залхурад: «Мана Бурхнд тәкл тәкхәр йовнавидн», – гиҗ хәәкрдг болв. 9Көдлмш күндрхлә – көдлх, хоосн үгмүд соңсдган уурх.

10Хаана бәәрнәс һарад, хармҗлгчнр болн ахлачнр евреймүдт келҗәнә:

– Энүнәс хооран салм таднд өгшгов. 11Дурта һазрт салм эврән цуглултн, тадна көдлмш мел баһршго, – гиҗ хан келв.

12Тиигхлә евреймүд цуг Египетәр йовад, кеер салмин ормд тәрә хадсн һазрт үлдлинь таслв. 13Хармҗлгчнр болхла:

– Салм бәәсн цагт урднь кедг зураһан өдр болһн күцәтн! – гиҗ арднь орад бәәв.

14Хаана хармҗлгчнр Израилин улсиг бүрткхин төлә ахлачнриг тәвнә. Дәкәд эн ахлачнриг тедн цокдг болв.

– Даалһсн көдлмшиг яһад эс күцәҗәнт? Урдклаһан әдл тоосхин тооһинь дигтәһәр кеҗ һарһтн, – гиҗ эднәс некдг болв.

15Израилин улсин ахлачнр хаанд ирәд һундлан өргв:

– Юуни төлә Та мадниг, эврә мухла улсан, дорацулҗахмбт? 16Маднд, Тана мухла улст, салм өгчәхш, зуг тоосх кехинь некчәнә. Мадниг, Тана мухла улсиг, гүвдҗәнә! Тана улст килнц болх!

17– Залхут тадн, залхут! – гиҗ хан эднд хәрү өгнә. – Тегәд келдг болвт: «Одад, Деед Эзнд тәкл тәкхмн!» 18Йовад көдлтн. Салм таднд күн өгшго, зуг тоосхиг болхла кедү даалһсинь кетн!

19«Өдр болһн кедг тоосхин кемҗәг бичә баһрултн» – гиҗ келсиг соңссн Израилин улсин ахлачнр зовлңла харһҗахан медв. 20Хаана бәәрнәс һарад, эдниг күләҗәсн Моше Ахарон хойрла харһад теднд 21келҗәнә:

– Тадн ю кесинь Деед Эзн үзҗ, тадна зарһч Тер болтха! Таднас көлтә хан болн энүнә мухлас маднд дурго болв. Мадниг алх үлд Та теднә һарт бәрүлҗит!

22– Деед Эзн! – гиҗ Моше Деед Эзнд дуудвр кев. – Яһад Та эн улсиг зоваҗахмбт? Яһад Та намаг иигәрән йовулвт? 23Би хан тал ирсн цагас авн Тана нерн деерәс келдг болув, зуг әмтнд улм му болв! Та Эврәннь әмтиг аврсн угат!

Currently Selected:

Нүүдл 5: ХКО_ӘБ

Highlight

Copy