Нүүдл 7
7
1Зуг Деед Эзн Мошед келҗәнә:
– Хәлә, Би чамаг хаана төлә Бурхн болдгар, чини ах Ахарон чини әәлдәч болдгар кенәв. 2Би чамд заквр өгсәр келәд бә, чини ах Ахарон болхла эврә орн-нутгас Израилин улсиг сулдххинь хаанд келх. 3Зуг Би хаана зүркнь догшн болдгар кенәв. Би Египетд өвәрц кесг тоот болн темдг учранав, 4болв хан тадниг соңсшго. Тер цагт Би Мини һариг Египет деер тәвнәв. Би Египетәс Мини цергиг, Мини улсиг – Израилин улсиг көтлҗ һарһнав. Мини цааҗ әәмшгтә! 5Мини һарин күндәс көлтә Египетд кен Деед Эзн болҗахинь медх, – Би Израилин улсиг эднә һазрас һарһҗ йовулнав.
6Моше болн Ахарон Деед Эзнә закврар күцәв. 7(Моше болн Ахарон хаанла күүндсн кемд Моше найта, Ахарон болхла найн һурвта бәәсмн.)
Ахарона тайг
8Тегәд Деед Эзн Мошед болн Ахаронд келҗәнә:
9– Өвәрц юм үзүл, гиҗ хан таднас сурхла, хаана өмн эврә тайган хайхинь Ахаронд заквр өгхлә, тайг моһад хүврх.
10Моше болн Ахарон хаанд ирәд Деед Эзнә келсәр кев: хаана болн энүнә мухласин өмн һазрт Ахарон тайган хайна. Тайгнь моһад хүврҗ одна. 11Болв хан цецн болн илвтә эврә улсан дуудна. Тедн, Египетин илвтә улс, эврәннь илв һарһхларн, әдл тиим юм кев: 12күн болһн эврә тайган һазрт хайхла, тер тайгуднь моһаст хүврв. Зуг Ахарона тайгнь эднә цуг тайгудынь зальгчкна. 13Болв хан зүткнә: Мошег болн Ахарониг (Деед Эзнә келсәр) соңссн уга.
Түрүн зовлң: цусн
14– Хан зүткҗәнә: Мини улсиг тәвхәр седҗәхш, – гиҗ Деед Эзн Мошед келнә. – 15Маңһдур өрүн хан Нил һолур йовхла, өмнәснь чи һар. Терүнә өмн һолын көвәд зогсчкад, моһад хүврсн тайгиг һартан бәрәд, 16хаанд иигҗ кел: «Деед Эзн, евреймүдин Бурхн, намаг Танд келтхә гиҗ йовулв: Нанд мөргхин төләд Мини улсиг көдә һазрур тәв. Зуг Та соңсҗахшит. 17Деед Эзн Танд келҗәнә: Деед Эзн кен болҗахинь ода чи медхич! Би эн һартан бәрҗәсн тайгарн һолын усар цокхла, усн цусн болх. 18Һолд цуг заһсн үкх, һолас му үнр һарад, Египетин әмтнд энүнәс ус уухд җигшүртә болх!» – гиҗ Деед Эзн Мошед келв.
19– Ахаронд кел: «Эврә тайган авад, Египетин усн деер – һолмуд деер, Нил һолын урсхулмуд деер, нуурмуд болн усна тогталмуд деер дайлад орк – тиигхлә эднә уснь цусн болҗ одх. Цуг Египетәр цусн тарх – цусн нам модн болн чолун савд орх!» – гиҗ Деед Эзн Мошед заквр өгнә.
20Моше болн Ахарон Деед Эзнә келсәр кев. Ахарон тайган өргәд, хаана болн энүнә мухласин нүднд һолын усар цокад оркхла – һолын усн цусн болв. 21Һолд бәәдг цуг заһсн үкв, һолас му үнр һарад, Египетин улс энүнәс ус ууҗ чадсн уга. Цуг Египетәр цусн тарв. 22Болв эврәннь илв һарһлһарн Египетин илвтә улс бас тиим юм кев. Хан цаарандан зүткәд бәәв (тегәд Деед Эзнә келсәр), Мошег болн Ахарониг соңслго бәәв. 23Хан буру хандад, учрҗах тоотд оньган өглго эврәннь бәәшң тал йовв. 24Египетин улс болхла һолын хаҗуд худгуд малтна, юңгад гихлә тер һолын усиг ууҗ болшго болв.
25Деед Эзн Нилд хорлтан күргснә хөөн долан хонг давв.
Currently Selected:
Нүүдл 7: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
