Нүүдл 8
8
Хойрдгч зовлң: мекләс
1Деед Эзн Мошед закчана:
– Хан тал одад, терүнд кел: «Нанд мөргхин төлә Мини әмтиг сулдхтха, гиҗ Деед Эзн келҗәнә. 2Эс сулдххлачн, чини орн-нутгур мекләс орулнав. 3Һол мекләсәр дүүрх: эдн уснас һарад, чини бәәшңгиг дүүргх, унтдг хорадчн чини орндгт орад, чини мухласин, цуг келн-улсин гермүдиг дүүргәд, тана бешмүдт болн тадна һуйр элддг тавгт чикгдх. 4Мекләс чамд, чини келн-улст болн чини мухласт орх!»
5Деед Эзн Мошед закчана:
– Эврәннь тайган Египетин цуг һолмуд, Нилын урсхулмуд болн нуурмуд деер өрг, гиҗ Ахаронд кел. Египетин һазрур мекләсиг орул!
6Ахарон һаран Египетин усн деегүр дайлхлань – энүнәс мекләс һарад, цуг һазриг дүүргв. 7Египетин илвтә улс бас илвән һарһад, тер һазрур мекләсиг орулв.
8Тегәд хан Мошег болн Ахарониг дуудад, эднд келҗәнә:
– Намаг болн мини улсиг эн мекләсәс авртн гиҗ Деед Эзнәс суртн! Тиигхлә би тана әмтиг Деед Эзнд тәкл тәкхин төлә сулдхнав.
9Моше хәрү өгв:
– Тана төлә, Тана мухласин болн Тана улсин төлә мөргх болзг нанд заатн. Тадн болн тадна гермүд мекләсәс сулдхгдх. Мекләс зуг һолд үлдх.
10– Маңһдур! – гиҗ хан келв.
– Деед Эзнлә, мана Бурхнла, әдлцдг күн уга болҗахинь медх зөвтәт гиһәд, Тана келсәр болтха, – гиҗ Моше хәрү өгв. 11Мекләс Таниг, Тана бәәшңгиг, Тана мухласиг болн Тана улсиг үлдәһәд һарх. Эдн зуг Нил һолд бәәх.
12Моше Ахарон хойр хаана бәәрнәс һарна. Египетин хаанур йовулсн мекләсиг уга кехинь Моше Деед Эзнәс сурв. 13Деед Эзн Мошен сурсиг күцәв. Цуг мекләс үкв: гермүдт, хашаст болн кеер. 14Үксн мекләсиг овалв, цуг орн-нутгт му үнр һарад бәәв. 15Болв хан күчр бәәдл давсиг үзәд, дәкнәс зүткв. Эн Мошег болн Ахарониг соңссн уга (тегәд Деед Эзнә келсәр болв).
Һурвдгч зовлң: иләсн
16Деед Эзн Мошед закчана:
– Ахаронд кел: эврә тайган өргәд һазриг бүркҗәх шора цоктха – цуг Египетәр шора иләснд хүврх.
17Моше Ахарон хойр тиигҗ кев. Ахарон эврә тайган өргәд, шораһар цокхла – олн-әмтиг болн малыг иләсд бүркв. Цуг Египетәр һазриг бүркҗәх шора иләснд хүврв. 18Илвтә улс эврәннь илвәрн иләсиг һарһхар седсн бийнь – юмн болсн уга! Әмтн болну, мал болну иләсдәр бүркгдв.
19– Энүг Бурхн кев! – гиҗ илвтә улс хаанд келв. Болв хан урдк кевәрн зүткәд, соңслго бәәв (тегәд Деед Эзнә келсәр болв).
Дөрвдгч зовлң: түргн
20Тегәд Деед Эзн Мошед келнә:
– Маңһдур өрүн эрт серәд хаана өмн һарч ир. Терүг һолур йовхлань, терүнд кел: Нанд мөргхин төлә Мини улсиг сулдх, гиҗ Деед Эзн келҗәнә. 21Кемр эс сулдххлачн, Би чамур, чини мухлас тал, чини цуг келн-улсур болн чини бәәшңгүр түргиг йовулнав. Египетин олн-әмтнә цуг гермүдиг болн теднә көл дорк һазр күртлинь түргн дүүргх! 22Тер өдр Би Гошен һазриг салһнав. Тенд Мини улс бәәнә – тенд түргн уга болх. Эннь Би, Деед Эзн, эн һазрт бәәхинь чи медтхә гиһәд! 23Би Эврәннь улсиг зовлңгас гетлгнәв, – чини улсиг болхла – гетлгшгов. Эн темдг маңһдур ирх!
24Тиигҗ Деед Эзн кев. То-тоомҗ уга түргн хаана бәәшңгиг, энүнә мухласин гермүдиг болн цуг Египетиг дүүргв. Түргнәс көлтә орн-нутг үкҗәв.
25Хан Мошег болн Ахарониг дуудад эднд келҗәнә:
– Энд, мана һазрт, эврә Бурхндан одад тәкл тәктн.
26Зуг Моше хәрү өгчәнә:
– Бидн энүг кеҗ чадшговидн. Деед Эзнд, мана Бурхнд, тәкл тәкхлә, Египетин улс терүг җигшүртә йовдлд тоолхмн. Кемр Египетин улсин нүднд тиим тәкл тәклһиг күцәхлә, эдн мадниг чолуһар цокх! 27Бидн һурвн өдрәр көдә һазрур йовад, Деед Эзнд, мана Бурхнд, энүнә келсәр тәкл тәкх зөвтәвидн.
28– Би тадниг тәвҗәнәв, – гиҗ хан келв. – Йовад, көдә һазрт эврәннь Бурхн Деед Эзнд тәкл тәктн, зуг холд бичә йовтн. Тиигчкәд мини төлә суртн!
29Моше хәрү өгчәнә:
– Танас һархларн, Деед Эзнәс сурнав, маңһдур тадн цугтан – хан болну, мухлас болну – Египетин цуг улс түргнәс сулдхгдх. Зуг хан мадниг дәкҗ бичә меклтхә, мана улс йовад, Деед Эзнд тәкл тәкхд саалтг бичә учратха.
30Моше хаана бәәрнәс һарад, Деед Эзиг сурхла, 31Тернь энүнә сурсинь күцәв: хааниг, энүнә мухласиг болн цуг Египетин улсиг түргнәс сулдхв. Нег чигн түргн үлдсн уга. 32Хан дәкнәс һацв: эн олн-әмтиг сулдхсн уга.
Currently Selected:
Нүүдл 8: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
