Эклц 19
19
Содом болн Гомора балһсд нурв
1Асхлад Бурхна хойр элч Содом тал ирнә, Лот балһснур ордг үүднд сууҗ. Тедниг үзн, Лот босад тосна, һазрт күртлән гекәд мендлнә.
2– Мини нойд, буйн болтха, зарциннь герт ортн. Тадн көлән уһаһад хонҗ чадҗанат, өрүн өрлә эврәннь хаалһдан һарад цаарандан йовхит, – гиҗ тер келнә.
– Уга. Бидн талвң деер хоннавидн, – гиҗ тедн хәрү өгв.
3Болв Лот дегд сурад бәәтл, тедн терүг дахад гертнь орна. Теднә төлә Лот хот белднә, экн уга өдмг болһна. Өгсн хотыг тедн иднә. 4Зуг тедниг кевтхәс урд, Содомин көгшн-баһ уга залус цугтан гериг эргәд бүслнә.
5– Асхар ирсн улс яһла? Тедниг нааран һарһ, бидн тедниг күчәр эзлнәвидн, – гиҗ тедн хәәкрнә.
6Лот ардан үүдән хааһад, хәәкрҗәх улс тал һарч ирнә.
7– Уга, мини үүрмүд, тиим му йовдл бичә һарһтн. 8Соңстн, нанд хойр күүкн бәәнә. Тедн залусла бәәһәд уга. Би тедниг тадн тал һарһад авч ирсүв. Тедниг яһнат-кегнәт – тана дурн. Зуг мини герт орҗ ирсн улсиг бичә көндәтн, – гиҗ Лот келнә.
9– Хаалһасмдн хооран һар! Чи нааран һазадын орна күн болҗ ирчкәд, ода мана зарһч болхар седҗәнәч. Бидн теднәс дорар чамас өшәһән авхвидн, – гиҗ Лотд тедн хәрү өгнә.
Тедн Лотыг түлкәд, үүдинь хамхлхар өөрднә. 10Болв гер дотр бәәсн гиичнр Лотыг гертнь татҗ орулад, үүдинь оньслна. 11Герин үүднд бәәсн көгшн-баһ уга әмтиг үүд олҗ чаддгоһар Бурхна элчнр сохрулна.
12Гиичнр Лотд иигҗ келнә:
– Чамла энд бас кен бәәнә? Күргд, көвүд, күүкд, балһснд кенчнь бәәнә? Теднән эндәс авад һар, 13яһад гихлә бидн эн ормиг уга кехәр бәәнәвидн. Балһснд бәәх улс йир һалзу гиҗ Деед Эзн эн әмтнә тускар соңсла. Тер төләд тедниг уга кетхә гиҗ мадниг Деед Эзн илгәв.
14Лот һарад, күүкдән авхар бәәсн күргдт иигҗ келнә:
– Шулуһар эндәс һартн: Деед Эзн балһсиг уга кехәр бәәнә!
Болв теднь Лотыг наадлҗана гиҗ санв.
15Өр шарлад һарчах кемлә, Бурхна элчнр Лотыг адһаһад келнә:
– Бос. Гергән, хойр күүкән авад һар эндәс, эс гиҗ чи эн килнцтә балһсна әмтнлә хамдан алгдхич.
16Лот маһдлна. Болв хойр гиич терүг, терүнә гергиг болн хойр күүкинь һараснь авад, балһсна ца һарһна. Яһад гихлә Деед Эзн тедниг хәәрлв. 17Балһснас һархла, теднә негнь иигҗ келнә:
– Гүүтн эндәс! Бичә ардан хәләтн, зууран тегш һазрт бичә зогстн! Уул тал гүүтн, эс гиҗ алгдхит!
18Болв Лот теднд келнә:
– Уга, мини нойд! 19Тадн нанд, эврәннь зарцдан, цаһан седклән һарһвт. Тадн мини әмиг аврхларн, нанд ик хәәрлт күртәввт. Зуг би гүүҗ уулд күрч чадшгов: намаг аюл күцәд, би үкҗ одхв. 20Хол биш тер балһсн бәәнә. Терүнд би гүүҗ күрч чадхв. Балһсн ик биш. Нанд тиигән гүүх зөв өгтн – тертн бичкн! Тенд би әмд үлдхв.
21– Сән. Би чини эн сурвричнь күцәнәв. Чини келҗәх балһсиг би нурахшив. 22Шулуһар тиигән гү. Яһад гихлә, чамаг терүнд эс күртл, би тас юм кеҗ чадшгов, – гиҗ Бурхна элч Лотд хәрү өгнә.
(Эн учр деерәс тер балһсн Цоар#19:22 Цоар – эн нерн әәһәрн «бичкн» гидг еврей келнә үгин бәәдлтә. гидг нертә болсмн.)
23Лотыг Цоарт күрхд нарн һарч одсн цаг билә. 24Тегәд Деед Эзн Содом Гомора хойр деер теңгрәс һал халун мок, хур мет, асхв. 25Балһсдыг болн цуг тегш һазриг, балһсдт бәәсн цуг әмтиг, һазр деер урһҗасн тоотыг Тер уга кев. 26Лотын гергн ардан хәләхләрн – давсн бахнд хүврҗ одв.
27Маңһдуртнь Абрахам эрт серәд, Деед Эзнә өмн зогссн һазр тал хәрү ирнә. 28Содомиг болн Гомораг, цуг тегш һазриг хәләһәд, бешәс һарчах нигт утан мет һазрас утан өөдлҗәсиг үзнә. 29Тиигҗ Бурхн Лотын бәәсн балһсдыг уга кехләрн, Абрахамин тускар тодлад, Лотыг үкләс авч һарв.
Лот болн терүнә күүкд
30Лот хойр күүктәһән Цоар балһсиг үлдәһәд, уулд бүүрлнә. Яһад гихлә, тедн Цоарт үлдхәсн әәҗәлә. Лот хойр күүктәһән уулын көндә нүкнд бәәв.
31– Мана эцк көгшн, болв цуг һазра авъясар, маниг буулһҗ авх залу күн энд уга. 32Эцкәрн дамҗад эврәннь тохман хадһлхин төлә, чаһр өгәд согтачкад, терүнлә кевтхм, – гиҗ эгчнь дүүдән келнә.
33Тер сө тедн эцкдән чаһр өгәд согтачкад, ик күүкнь өвртнь орад, терүнлә кевтнә. Ик күүкнь кезә кевтсинь, кезә боссинь, юн болсинь эцкнь медсн уга.
34– Давсн сө би эцктәһән кевтләв. Эн асхн бас чаһр өгәд терүг согтай. Эцкәрн дамҗулад эврәннь тохман хадһлхин төлә чи бас өвртнь орад терүнлә кевт, – гиҗ маңһдуртнь ик күүкнь дүүдән келнә.
35Тер сө тедн чаһр өгәд, эцкән согтана. Бичкн күүкнь өвртнь орад эцктәһән кевтнә. Эцкнь бичкн күүкән кезә кевтәд, кезә боссинь – юн болсинь медхш. 36Тегәд хойр күүкн эцкәсн саата болна.
37Ик күүкн көвү һарһна. Терүндән Моав#19:37 Моав – эн нерн әәһәрн «эцкәсн» гидг еврей келнә үгин бәәдлтә. гидг нер өгнә. Тер эндрк моавмудын эцк. 38Бичкн күүкнь бас көвү һарһна. Терүндән Бен-Ами#19:38 Бен-Ами – эн нерн еврей келәр «мини келн-улсин үрн» гидг чинртә, әәһәрн «амонмудын» гидг үгин бәәдлтә. гидг нер өгнә. Тер эндрк амонмудын эцк.
Currently Selected:
Эклц 19: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
