Эклц 41
41
Египетин хаана зүүдд
1Хойр җил давсна хөөн хаанд зүүдн орна: Тер Нил һолын эрг деер зогсчасн болҗ медгднә. 2Нилас 7 үкр һарч ирнә. Үкрмүд сәәхн, тарһн, һолын эрг көөһәд, нигтәр урһсн урһмл дунд тедн идшлнә. 3Теднә ардас оңдан 7 үкр һолас һарч ирнә. Тедн эццн, чинән уга, түрүңк үкрмүдлә зергләд зогсцхана. 4Тер эццн, чинән уга үкрмүд сәәхн, тарһн үкрмүдиг идцхәнә. Хан сернә.
5Дәкәд шинәс унтхларн, оңдан зүүд үзнә: нег иш деер буудян 7 толһа урһна. Тедн сән, дүүрң бәәдлтә. 6Тедниг дахад, халунас шатҗ одсн буудян хоосн 7 толһа һарч ирнә. 7Эн хоосн, халунас шатҗ одсн буудян 7 толһас сән, дүүрң бәәдлтә толһасиг зальгна! Хан сернә. Терүнд зүүдн орсиг медв.
8Өрүнднь тер әәмцәд, Египетин цецн болн бө улсиг цуглулҗ авад, үзсн зүүддән келҗ өгнә. Болв нег чигн күн терүг тәәлҗ чадсн уга. 9Тиигхләнь чаһр белддг толһалгч күн хаанд иигҗ келнә:
– Урднь мини һарһсн эндү санандм орҗана! 10Нег дәкҗ хан эврәннь зарцнртан уурлад, намаг өдмг болһдг толһалгч күүтә маначнрин ахлачин медәнд бәәсн бәрәнд орулла. 11Нег сөөһәр мадн хойрт зүүдн орна, күн болһнд эврә чинртә онц зүүдн орна. 12Манад ахлачин мухла болҗасн нег баахн еврей бәәлә. Бидн терүнд эврәннь зүүдд келҗ өгвидн. Тер күн мана зүүддиг тәәләд, күн болһна зүүдн ямаран чинртәһинь келҗ өгв. 13Минь терүнә келсәр һарв: намаг урдк көдлмштм хәрү орулв, наадк күүг цааҗлв.
Йосип хаана зүүдд тәәлнә
14Хан Йосипиг дуудулна. Түүрмәс терүг адһмтаһар һарһад, сахлынь хусад, хувцинь соляд, хаанд күргнә.
15– Би зүүд үзүв, болв нег чигн күн терүг тәәлҗ чадҗахш. Чи, соңсад бәәхлә, зүүд тәәлҗ чаддг чигн гиҗ әмтн келнә, – гиһәд хан Йосипт келнә.
16– Учр нанд биш, – гиҗ Йосип хәрү өгнә. – Хаана сәәһинь олҗ, Бурхн тәәлвр өгх.
17Хан Йосипт зүүддән келҗ өгнә:
– Би Нил һолын эрг деер зогсчасн болнав. 18Һолас 7 үкр һарч ирнә. Тедн сәәхн, тарһн бәәдлтә, һолын эргин нигт урһмлд идшлҗәнә. 19Теднә ардас 7 эццн, чинән уга, арсн ясн хойр болсн үкрмүд һолас һарч ирцхәнә. Египетд би тиим зута үкрмүд үзәд угав. 20Эн эццн, зута үкрмүд түрүн һарч ирсн 7 тарһн үкрмүдиг идчкв! 21Тедниг идснә хөөн геснь цурдаҗахмн уга: идсн үкрмүд тер кевтән эццәрн үлднә. Би серүв.
22Дәкәд би оңдан зүүд үзүв: буудян 7 толһа нег иш деер урһҗ. Тедн сән, дүүрң бәәдлтә. 23Теднә ардас хоосн, халунд шатҗ одсн буудян 7 толһа һарч ирнә. 24Эн буудян хоосн толһас сән, дүүрң буудян 7 толһасиг зальгчкна. Эврәннь зүүддин тускар би бө улст келҗ өгләв. Болв тедн цәәлһҗ өгсн уга, – гив.
25Йосип хаанд келнә:
– Тана үзсн хойр зүүдн нег чинртә. Бурхн хаанд эврәннь зураһан медүлҗәнә. 26Долан сән үкр – 7 җил болҗана. Буудян 7 сән толһа – бас 7 җил болҗана. Тегәд энтн мел нег зүүдн. 27Сән үкрмүдин ардас һарч ирсн 7 эццн, зута үкрмүд, халунд шатсн буудян 7 хоосн толһа – эннь харһнх дарук 7 җилмүд болҗана. 28Бурхн хаанд Эврәннь зураһан медүлҗәнә гиҗ келхләрн би тиигҗ санлав. 29Египетин цуг һазрар элвг 7 җил ирх, 30терүнә ардас харһнулх 7 җил эклх. Тер цагт элвг-делвг болҗасн юмн мел мартгдх. Харһнх җилмүдт орн-нутг кевтән хоосрх, 31элвг-делвг бәәдләс юмн үлдшго. Тер харһнлһн тедү дүңгә күчр болх. 32Зүүдн хойр дәкҗ ордгарн – Бурхн энүг лавтаһар зуралҗана, удл уга күцх. 33Тегәд хан цецн болн хурц ухата кү йилһҗ авад, терүг Египетин залачд тәвтхә. 34Цуг орн-нутгар хан һардачнриг тәвтхә. Тедн элвг-делвг 7 җилин эргцд әмтнә хураҗ авсн тәрәнәс тавн хүвин нег әңгинь цуглулҗ авад, 35тер буудяг хаана йосар балһснд цуглулҗ бәртхә. 36Тиигхлә Египетин харһнлһна 7 җилд орн-нутг хот-хоолын көрңтә болх. Орн-нутг тегәд тер харһнлһ даах!
Йосип Египетд һардач болҗ залгдна
37Йосипин зураг хан болн терүнә өөрхн улс таасна.
38– Терүнлә әдл оңдан кү олҗ болшго, – гиҗ хан өөрхн улстан келнә. – Терүнд Бурхна Сәкүсн бәәнә!
39Дәкәд Йосипт тер иигҗ келнә:
– Кемр энүг чамд Бурхн медүлсн болхла, чамас цецн, хурц ухата күн уга болҗана. 40Эндрәс авн чи мини нутгиг залхич, мини улс чамаг соңсдг болх. Зуг би хан болҗах ямарн чамас ахлхув. 41Ода би чамар Египетин һардач кеҗәнәв!
42Хан тамһта билцгән тәәләд, терүгән Йосипин хурһнд зүүнә. Дәкәд нимгн эдәр кесн хувц өмскәд, Йосипин күзүнд алтн цев тер зүүнә. 43Йосипт хан орн-нутгиннь хойрдгч күүнә мөр татдг гиигн терг өгнә. Терүг йовхла, өмннь «Сөгдтн!» гиҗ хәәкрдмн.
Тиигҗ хан Йосипиг цуг Египетин һардач кенә.
44– Би хан, – гиҗ тер Йосипт келнә, – эндрәс авн Египетин цуг һазрар нег чигн күн чини зөв угаһар нег чигн ишкдл кешго, хурһарн көндәшго юмн.
45Хан Йосипт Цафнат-Панеах гидг шин нер өгнә. Терүнд Он#41:45 Он – Гелиополь балһсна талдан нернь. гидг балһснд бәәсн гелң күүнә Аснат күүкинь авч өгнә. Гелңгин нернь Поти-Пера. Тиигҗ Йосип цуг Египетин һазрин һардач болв. 46Египетин хаанад экләд көдлхдән Йосип һучта бәәҗ. Хаанаһас һарад, Йосип Египетин һазр хәләхәр эргәд йовна.
47Долан җилдән тер һазрас элвг урһц әмтн авчав. 48Тер җилмүдт тенд цуглулҗ авчасн буудяг Йосип балһсдар түгәнә. Балһсн болһнд эргндк тәрәнәснь хураҗ авсн буудя цуглулгдв. 49Йосип теңгсин элсн мет олар буудя хураҗ авв. Терүгән тоола бәәҗ, тооһан геев: тедү дүңгә тоолҗ болшго ик болв.
50Эн цагт, харһнлһн ирхәс урд, Поти-Пера гидг гелңгин күүкн Аснат Йосипт хойр көвү һарһҗ өгв. 51Түрүңк көвүндән тер Манаше#41:51 Манаше – еврей келәр «мартулдгар кех». гидг нер өгәд келнә: «Яһад гихлә Бурхн нанд зовлңгим, төрскн герим мартулв». 52Хойрдгч көвүндән Эприм#41:52 Эприм – еврей келәр «өслттә болх». гидг нер өгәд келнә: «Бурхн зовлң үзсн һазртм намаг үртә-садта кев».
53Египетин элвг бәәдлтә 7 җил давна. 54Йосипин келсәр, харһнлһна 7 җил экләд ирнә. Эн харһнлһн цуг делкәг бүсләд бәрнә, зуг Египетд хурасн буудян көрң бәәлә. 55Харһнлһн эклхлә, әмтн хаанас өдмг сурцхана. Хан келнә:
– Йосип тал одтн, терүнә келсәр кетн.
56Харһнлһн икдәд, цуг орн-нутгт ирхлә, Йосип буудя хадһлдг амбармудан секәд, Египетин улст буудя хулдна. 57Цуг орн-нутгудас Египет тал, Йосипур буудя авхар әмтн ирцхәнә. Яһад гихлә цуг һазрар әмтн икәр харһнцхав.
Currently Selected:
Эклц 41: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
