Эклц 42
42
Йосипин ахнр Египет тал йовна
1Египетд буудя бәәхиг медәд, Яков көвүдтән келнә:
– Тадн яһад юм келго бәәнәт? 2Египетд буудя бәәнә гиҗ келцхәнә. Тиигәрән йовтн, харһнад үкшгон төлә буудя хулдҗ автн.
3Йосипин 10 ах буудя авхар Египет орцхана. 4Зуг Йосипин һарлцсн дү көвүн Бенямин зеткрлә харһҗ одх гиһәд, Яков терүг бийәсн салһҗ йовулсн уга.
5Израилин көвүд буудя сурхар Египетд ирсн улс дунд йовна. Яһад гихлә, тер цагт Канана цуг улс харһнҗала. 6Теднә ирсн нутгин һардачнь Йосип бәәҗ. Тер буудя хулддг бәәҗ. Яковин көвүд терүн тал өөрдәд, өмнәснь һазрт күрч гекцхәнә. 7Йосип тедниг үзн таньна, болв талын күн болсн болад, шүрүтәһәр теднәс сурна:
– Альдас ирвт?
– Кананас, буудя авхар, – гиҗ тедн хәрү өгнә.
8Йосип эврәннь ахнран таньна, болв тедн терүг таньсн уга.
9Теднә тускар үзсн зүүдән тодлҗ, Йосип иигҗ келнә:
– Тадн туршулчнр болвзат. Мана һазрин мууһар батлгдсн орминь медхәр ирсн кевтәт.
10– Уга, нойн! Бидн, тана мухлас, буудя авхар ирвидн. 11Бидн нег эцкин үрдвидн, цугтан үннч улсвидн! Бидн тана мухласвидн, төрүц туршулчнр бишвидн, – гиҗ тедн хәрү өгнә.
12– Уга, тадн мана һазрин мууһар батлгдсн орм медхәр ирвт, – гиҗ Йосип келнә.
13– Бидн, тана мухлас, ах-дүүһәрн 12 күнвидн. Бидн цугтан нег эцкин үрдвидн, Кананас. Хамгин бичкнь ода эцктәһән бәәнә. Негмдн дәкҗ уга, – гиҗ тедн хәрү өгнә.
14– Нә, энлм. Тадниг туршулчнр гиҗ би келлүсүв. 15Бидн тадниг шинҗләд хәләнәвидн. Хаана әмәр андһар өгчәнәв: тана бичкн дү нааран эс иртл, тадниг эндәс һарһшго. 16Негән илгәһәд, терүг авхултн, наадкснь ода деерән бәрәнд бәәх. Тегәд тадна келсн үнн худлынь медхвидн. Кемр худл болхла, тадн туршулчнр болҗанат. Хаана әмәр андһар өгчәнәв! – гиҗ Йосип келнә.
17Йосип тедниг һурвн хонгар бәрәнд суулһна. 18Һурвдгч өдртнь теднд тер иигҗ келнә:
– Мини келсәр кетн, тегәд әмд үлдхит, юңгад гихлә би Бурхиг икәр күндлдв. 19Кемр тадн үнндән чик седклтә улс болхла, негнтн бәрәнд үлдтхә. Наадкснь харһнҗах өрк-бүлдән буудя авч одад, 20бичкн дүүтәһән нан тал хәрү иртхә. Кемр тадна келсәр һархла, тадн үкшгот.
Тедн Йосипин келснлә зөвшәрнә.
21– Мана дүүһәс көлтә засглҗана гисн эн! Бидн терүг зовҗасинь үзүвидн. Тер мадниг яһҗ сурад бәәсн бийнь терүнд бидн сана зовсн угалм. Ода зовлң маднд ирв! – гиҗ тедн хоорндан күүндцхәнә.
22– Көвүнд бичә хар сана үзүлтн гиҗ би таднд эс келлү? Тадн намаг соңссн угат. Ода бидн терүнә цуснас көлтә ялан өгчәнәвидн, – гиҗ Рубен келв.
23Теднә күүндвриг Йосип медҗәнә гиҗ ахнрнь санҗасмн уга, яһад гихлә Йосип теднлә орчулачар дамҗад күүнддг бәәҗ. 24Йосип хооран һарад уульна. Дәкәд бийән тогтнулад, хәрү ирәд, Шимониг йилһҗ авад, күлтхә гисн заквр ахнриннь нүүрт өгнә.
Йосипин ахнр Кананур хәрү ирнә
25Дарунь Йосип теднә ацанд буудя ачад, күн болһна савд өгсн мөңгинь хәрү тәвәд, хаалһднь эдлх хот өгтхә гиҗ даалһвр өгнә. Келсинь күцәнә. 26Йосипин өгсн буудяг ахнрнь элҗгнстән ачҗ авад йовцхана.
27Сөөднь, амрсн цагтан, теднә негнь элҗгндән хот өгхәр саван секхләрн, эврәннь мөңгән үзнә.
28– Мини мөңгн хәрү нанд ирв! Минь эн, деер бәәнә! – гиҗ тер ахнр-дүүнртән келнә.
Теднә зүркнь менрҗ одв, чичрлдәд, нег-негнәсн сурцхана:
– Ода маднла Бурхн ю кеҗәхмб?
29Кананд эцк талан ирчкәд, тедн бийләһән болсн йовдлыг цугинь терүнд келҗ өгнә:
30– Тер нутг һардҗах күн маднла шүрүтәһәр күүндв, мадниг туршулчнр гиҗ санв. 31Бидн терүнд үнн седклтә улсвидн, туршулчнр бишвидн гиҗ келцхәввидн. 32Ах-дүүһәрн 12 күнвидн, цугтан нег эцкин үрд. Негмдн уга, хамгин бичкн дү көвүн ода эцктәһән Кананд үлдв гиләвидн. 33Болв тер маднд иигҗ келв: «Тадниг үнәр келсн угаһитн би шинҗләд хәләнәв: таднас негитн үлдәнәв, наадкснь харһнҗах өрк-бүлмүдтән буудя күргәд, 34тендәс бичкн дүүһән дахулад, нан тал хәрү ирцхәтхә. Тиигәд тадниг туршулчнр биш, үнн седклтә улс болҗахитн иткхүв. Суулһсн күүһитн сулдхнав. Тегәд тадн мана цуг һазрар эргәд сулдан йовҗ чадҗанат».
35Гертән ирәд савасн юман һарһхларн, тедн күн болһна савд мөңгтә харлдш үзнә. Терүг үзн, көвүд болн теднә эцк йир әәцхәнә.
36– Тадн мини көвүдиг неҗәдәр булаҗ авчанат. Йосип уга. Шимон уга. Беняминиг ода авхар бәнт. Нан деер зовлң ирҗ бууҗана! – гиҗ теднд Яков келнә.
37– Беняминиг дахулҗ хәрү эс авч ирхлә, мини хойр көвүг алҗ чадҗанач. Чи нанд итк. Би терүг хәрү авч ирхүв, – гиҗ Рубен эцкдән келнә.
38– Уга. Мини көвүн таднла йовшго. Бенямин экәсн һанцарн үлдлә, ахнь үкҗ одла. Кемр хаалһднь терүнлә шалтан харһхла яахмб? Би, көгшн өвгн, таднас көлтә зовад бәәҗ үклин һазрт орх болҗанав, – гиҗ Яков келнә.
Currently Selected:
Эклц 42: ХКО_ӘБ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
