Матай 26

Исусиг уга кехин туск үгцлһн

1Исус цуг келсн үгән төгсәһәд, эврәннь сурһульчнртан:

2– Песахин нәр күртл хойр өдр үлдсинь тадн меднт? Күмни Көвүнәс урвҗ Терүг ик кирсд хадҗ әмнәснь хаһцулх, – гиҗ келв.

3Тер цагт ах гелңгүд болн Израилин толһачнр Кәәп гидг ах гелңгин бәәшңд ирәд, 4Исусиг нууцар бәрҗ авад, әмнәснь яһҗ хаһцулхинь үгцв. 5Зуг әмтн медҗ, буцлт бичә өргтхә гиһәд байрин өдрмүдт биш талдан өдрт кех юман кехмн гиҗ тедн келцхәв.

Исусиг Бетәньяд каңкнсн үнртә тосар түрклһн

6Исусиг Бетәнья хотна арсна гемәр урднь гемтсн Шимона герт бәәсн цагт 7хот ууҗахла, нег күүкд күн каңкнсн сәәхн үнртә тос бичкн җуңһшу савд авч ирәд, Исусин толһа деер кев. 8Энүг үзсн сурһульчнр уурлад:

– Эн ик үнтә тосиг иигҗ үрәхин ормд 9хулдад, яду әмтнд мөңгинь түгәҗ өгхм билә, – гицхәв.

10Исус тедниг дурго болҗахинь үзәд:

– Эн күүкд күүг юңгад көндәһәд бәәнәт? Энтн Нанд сә кев! 11Угатя яду әмтн тадн дунд оньдиндән бәәх, Би болхла таднла оньдин бәәшгов. 12Эн күүкд күн Мини толһад тос кеһәд, Мини цогц оршахар белдҗәнә. 13Үнәр келҗәнәв, Сән Зәңг цәәлһгдсн һазрт эн күүкд күүнә кесн йовдлын тускар тодлҗ келгдх, – гив.

Йуда Исусиг урвхар зөвшәрв

14Тиигхлә арвн хойрин негнь, Йуда Искериот ах гелңгүд тал йовад:

15– Таднд Исусиг бәрүлхлә, нанд ямаран шаңнлт өгхвт? – гиҗ сурв.

16Тедн Йудад һучн цаһан мөңг тоолад өгчкв, тер цагас авн Йуда Исусиг бәрүлх цагинь күләв.

Байрин хот

17Эс искәсн һуйрин байр эклсн түрүңк өдр бәәҗ. Сурһульчнр Исус тал өөрдәд:

– Песахин хот альд белдхмб? – гиҗ сурцхав.

18– Өөрк балһснд одад, Мини заасн күүнд: Мана Багш келүлв гиһәд «Мини цагм өөрдҗәнә, чини герт Би сурһульчнртаһан Песахин хот эдлнәв», – гиҗ Исус келсмн.

19Сурһульчнр Исусин келсн үгинь күцәв. Тедн Песахин хот белдв. 20Асхн болад ирхлә, Исус арвн хойр сурһульчнртаһан ширә эргҗ сууцхав. 21Тедниг байрин хот эдлҗәсн цагт Исус:

– Соңстн, тадн дундас негнь Намаг өшәтнә һарт бәрүлҗ өгх, – гив.

22– Деед Эзн минь, тер күн би биший? – гиҗ сурһульчнр икәр гейүрҗ хоорндан урлдад сурцхав.

23– Нанла хамдан нег ааһд һаран тәвсн күн Намаг бәрүлҗ өгх. 24Күмни Көвүн Бурхна Бичгт заясн хаалһарн күцц йовх зөвтә. Зуг Терүг бәрүлҗ өгсн күн басл муулян эдлх. Тер эс төрсн болхла, деер болх билә, – гиҗ Исус теднд келв.

25– Багш, чи намаг тиигҗ кех гиҗ санҗанч? – гиҗ Йуда сурв.

– Чи эврән энүг келвч, – гиҗ Исус хәрү өгв.

Деед Эзнә асхни хот

26Тедниг хотан эдлҗәсн цагт Исус өдмг авад, Бурхнд ханлт өргәд, хуһлҗ хуваһад сурһульчнрт өгәд:

– Энүг авч эдлтн. Эн Мини Бий цогцм, – гиҗ келв.

27Ааһан авад, Бурхнд ханлт өргәд, сурһульчнртан өгәд:

– Энүг авч уутн, 28энтн Мини цусн – Шин Бооцаг батлҗах темдг. Эн цусн әмтнә төлә, теднә килнц тәвүлхин төлә асхрх. 29Мини Аавин орнд таднла хамдан шин чаһр эс уутл, Би эн чаһр дәкҗ төрүц ууҗ чадшгов, – гиҗ Исус келв.

30Исусин үгин хөөн тедн Бурхнд магталын дуд дуулад, Олив уул тал йовцхав.

Исус Пётрин гөрдхин тускар келҗәнә

31– Эн сөөһәр тадн цуһар Намаг үлдәхт. Энүнә тускар Бурхна Бичгт: «Би Хөөчинь уга кехв, хөөднь тарҗ одх», – гиҗ бичәтә. 32Зуг үкәд босҗ әмдрснә хөөн Би тадниг Һалилья гидг һазрт күләхв.

33– Цугтан үлдәвв чигн, би Таниг төрүц хайшгов, – гиҗ Пётр Исуст келв.

34– Соңс! Эн сөөһәр эр така хәәкртл, чи һурв дәкҗ Намаг медхшв гиҗ келхич, – гиҗ Исус Пётрт келв.

35– Танла хамдан үквчн би Таниг үлдәшгов! – гиҗ Пётр хәрү өгв.

Наадк сурһульчнр бас тиигҗ келцхәв.

Исус һанцарн зальврҗана

36Исус эврәннь сурһульчнртаһан, Гетсемән гидг модта һазрт ирәд:

– Намаг йовад зальврҗ иртл, энд күләҗәтн, – гив.

37Исус Пётриг болн Зебедана көвүдиг, ах-дү хойриг, авад, цааран йовв. Исусин зүркнь бүтәд, Бийнь үүмәд бәәв.

38– Седклм уудьврта бәәнә. Би үктлән зовҗанав. Тадн унтл уга Нанла хамдан бәәтн, – гиҗ Исус келәд, 39цааран йовҗ, һазр элкдҗ унад зальврв. – Эцк минь! Та эн зовлңгас Намаг гетлгх болвзат? Зуг Мини таалар биш, Тана таалар болтха!

40Исус сурһульчнрур өөрдхләнь, тедн нөөртән диилгдәд унтҗ одсн бәәҗ.

– Тадн унтлго Нанла нег част серглң бәәҗ чадсн угат. Сөрлһнлә харһшгон төлә зальвртн. 41Серглң бәәтн! Күүнә сүмснь чидлтә, зуг цогцнь чинән чидл уга, – гиҗ Исус Пётрт келв.

42Цааран йовад, дәкн зальврв:

– Эцк минь! Кемр Та эн зовлңгас Намаг эс гетлгхлә, кемр Би эн зовлңгиг даах зөвтә болхла, Тана таалар болтха! 43Исус һурвдад сурһульчнрур өөрдхлә, тедн үргләд, саак кевәрн унтад кевтсн бәәҗ. 44Тедниг үлдәчкәд, Исус һурвдад урдк келсн үгәрн зальврв. 45Цааранднь Исус сурһульчнр тал өөрдәд:

– Тадн одачн амрад кевтнт? Цагнь ирв, Күмни Көвүг килнцтә әмтнә һарт бәрүлҗәнә. 46Босад йовхм! Хәләтн, Намаг бәрҗ өгх күн аашна, – гиҗ келв.

Исусиг ах гелңгүдин һарт бәрүлҗәнә

47Исусиг үгән келҗәсн цагт генткн арвн хойр сурһульчнрин негнь Йуда үзгдв. Терүнлә хамдан ах гелңгүдин болн толһачнрин илгәсн кесг улс һартан мод, үлд авчксн ирәд зогсцхав. 48«Мини үмссн күн Исус болх, Терүг бәрҗ авхит», – гиһәд Йуда теднлә урдаснь үгцсн бәәҗ. 49Йуда тер дарунь Исус тал өөрдәд:

– Багш, менд! – гиһәд Исусиг халхаснь үмсв.

50– Ухалсн кергән ке, – гиҗ Исус терүнд келв.

Тиигхлә харулчнр Исусиг бәрҗ авад йовн гихлә, 51тер кемд Исусин нег сурһульч генткн үлдән һарһад, ах гелңгин зарцин чикинь тәәрәд хайчкв.

52– Үлдән ормднь орулчк! Үлд өргсн күн үлдәс үкдмн! 53Чи Намаг Эцкәсн сурҗ чадшго гиҗ санҗанчи? Эцкм тер дарунь далн хойр миңһн элчнрән эс гиҗ Терүнәс үлү ик элчнриг илгәх билә. 54Зуг тиигхлә Бурхна Бичгт бичәтә үгмүд яһҗ күцхмб? Цуг эн учрх зөвтәлм! – гиҗ Исус тер сурһульчд келв.

55Дәкәд Исус ирсн әмтн тал хәләһәд:

– Мууха кевәр тадн үлдән, модан атхчкад, Намаг авхар ирсмт? Би тиигтлән деермч биш! Өдр болһн Би һол сүмд әмтнд ном цәәлһдг биләв, тадн Намаг бәрҗ авдго биләт. 56Зуг әәлдәчнрин үгмүд бүттхә гиһәд, цуг эн учрҗана, – гиҗ келв.

Тиигхлә сурһульчнр Исусиг үлдәһәд, зулҗ гүүһәд йовҗ одцхав.

Исус Деед хургин өмн

57Исусиг бәрҗ авсн улс Терүг Кәәп гидг ах гелң тал авч ирцхәв. Тенд ном цәәлһәчнр болн толһачнр цуглрад белн сууҗ. 58Пётр нууцар теднә ардас ах гелңгин гер күртл йовҗ. Герин һаза үлдәд, цааранднь юн болхинь гетәд сууҗ. 59Ах гелңгүд болн Деед хург Исусиг алхин төләд, Терүнә өмнәс герчлх худл герчнриг олҗ авхар шунцхаҗ. 60Кесг улс худлар герчлв чигн, тедн ик күцәмҗтә юм кеҗ чадсн уга. 61Аштнь хойр герч күн үг келцхәв:

– Эн күн: «Би Бурхна сүмиг хамхлад, һурвн өдрин болзгт шинәр тосхҗ чадхв гилә», – гиҗ тедн келцхәв.

62– Эднә гемшәлин өмнәс ю келхмч? – гиҗ ах гелң босад, Исуст келв.

63Зуг Исус ә һарсн уга. Тиигхлә ах гелң келҗәнә:

– Әмд Бурхна нернә төлә кел! Чи Христос Бурхна Көвүнвчи?

64– Энүг чи келҗәнәч! Энүнәс үлү Би келҗәнәв таднд: эндр өдрәс авн Күмни Көвүг хамгин күчтә Бурхна барун һарт суусинь, теңгрин үүлн деегүр йовҗ йовхинь үзхит! – гиҗ Исус келв.

65Тиигхлә ах гелң өмссн хувцан шуулад келв:

– Энтн Бурхна тускар му келв! Дәкәд герчнриг юңгад хәәҗәхмт? Бурхна нериг эн яһҗ бузрдулҗахинь тадн ода соңсвт! 66Шиидврән келтн!

– Эн бурута! Үкх зөвтә! – гиҗ тедн хәрүднь хәәкрцхәв.

67Энүнә хөөн әмтн Исусин чирәднь нульмад, халхарнь ташад, басл икәр цокцхав.

68– Кен чамаг ода цокв, Христос, тааҗ кел маднд, – гиҗ тедн наад бәрцхәв.

Пётр Исусас урвснь

69Пётр герин һаза суусн бәәҗ. Терүн тал нег зарц күүкд күн өөрдәд:

– Чи бас Исусла хамдан биләч, – гиҗ тер келв.

70– Юуна тускар чамаг келҗәхинь би медҗәхшв, – гиҗ Пётр гөрдҗ келв.

71Пётриг хашан үүднд йовад зогсхла, талдан зарц күүкд күн үзәд:

– Эн күн Назаретин Исусла бас билә, – гиҗ өөрнь зогссн әмтнд келв.

72Пётр саак кевәрн гөрдҗ андһарлв:

– Би эн күүг медхшв, таньхшв!

73Удл уга герин һаза зогссн әмтн Пётрүр өөрдәд келцхәв:

– Чи теднлә хамдан бас биләч, келсн келәрчн медгдҗәнәвидн.

74Пётр Бурхиг зааҗ дәкн андһарлад:

– Би эн күүг таньхшв! – гиҗ келв.

Тер кемд эр така хәәкрв. 75«Эр така хәәкртл чи һурв дәкҗ Намаг медхшв гиҗ келхич» – гисн Исусин үгмүдиг Пётр тодлв, тер кеерәгшән һарад һашудад уульв.

Currently Selected:

Матай 26: ХКО_ӘБ

Highlight

Copy