Maka 16
16
Yesu paa tiaeyekeeki
(Ma꞉tiu 28꞉1-8, Luku 24꞉1-12, Dioni 20꞉1-10)
1Kutupa Diu wanda꞉halina꞉ Hoto Pila꞉ Nate welealo nane paeyeketa꞉ Ma꞉kadala wanda꞉ Metima꞉ make Dia꞉mesina꞉ inkiki Metima꞉ Salomema꞉ make Yesuna꞉ tonka꞉na꞉ yankaalo poluekema꞉ senisi alemanu hambemekeme. 2Sande da ka꞉la꞉paaso siki nate opa꞉la꞉ haena꞉ Yesuna꞉ toko wieke ale pa꞉ta꞉ pemekeme. 3Pulu hata꞉ ika꞉ ika꞉ kone alota꞉ Mo hande toopi ka꞉ka꞉na꞉ a꞉mba ula꞉ toopita꞉ epima꞉ mea a꞉meiyao petepete yawalia꞉pe lemekeme. 4Koto lemekepate pa handa꞉liaaso hata꞉ mo hande toopi petepete yawao lumbupa wieke ekita꞉ handemekeme. Kutupa make mo toopita꞉ ota꞉ tieke yeekeme. 5Mo toopi lumba wieke alena꞉ honda꞉ pambaata꞉ weki hali homeke handemekeme. Mo wekihalita꞉ hakepiki dau hokulu pikieki pambaota꞉ ika꞉ popeke nane kiki nane pitiekeme. Kutupa mo wanda꞉ manuma꞉ta꞉ penkili pimikime.
6Mo hande wekihalima꞉ iki pa꞉ta꞉ alota꞉ Na penkili pea꞉pa꞉peke. Ikana꞉ma꞉ Na꞉sa꞉tete hali Yesu mo a꞉ka꞉tei wapepiki tina꞉ tamendiaemeke hali weitelememe. Ipikita꞉ do pa꞉ta꞉ na ula꞉me. Amba꞉ tia꞉me. Ipika꞉ toko wimiki alena꞉ koto handa꞉pe leekeme. 7Kotoeki handaa Pupe laa Pida make Yesu ipika꞉ mandane disaipolo haliweki make Yesuta꞉ mo Ka꞉lili nane titina꞉ amba꞉la pea꞉me lolo pupe. Ipikana꞉ma꞉ iki pa꞉ta꞉ amba꞉ hande lea꞉ tupa꞉ koto pa꞉ta꞉ handilimikie lolo pupe leekeme.
8Mo wanda꞉manu hama nane opolu bao mo toko wieke alena꞉ mina꞉pa꞉laota꞉ pututu litolo hata꞉ make penkili pitolo hata꞉ pindi pa puaata꞉ paala꞉ma꞉ homemeke handaa ma꞉nda꞉ pa꞉ta꞉ pi na lemekeme.
Yesuma꞉ Ma꞉kadala wanda꞉ Meti pa꞉ta꞉ ipiki waleekeeki
(Ma꞉tiu 28꞉9-10, Dioni 20꞉11-18)
9[Yesuma꞉ta꞉ Sande da panake ka꞉la꞉polo haena꞉ tiaota꞉ titina꞉ amba꞉la mo Ma꞉kadala wanda꞉ Metima꞉ handena꞉yeke peneme yaeyekeme. Mo wanda꞉ta꞉ Yesuma꞉ amba꞉ kone ipika꞉ hoke temoko watake hata꞉ tolu lieke wanda꞉e. 10Mo wanda꞉ma꞉ Yesu ame̱le̱ amba꞉ pomu haemeke wanda꞉halima꞉ e̱ alo haena꞉ Yesuma꞉ leeke pi lolo peekeme. 11Kutu piekepate mo wanda꞉halima꞉ Yesu paa tiao hala꞉me leekeeki opuata꞉ I̱ma꞉ handoa꞉me leekeeki opua kone ota꞉ na opimikime.
Yesuma꞉ disaipolo hali yaapo pa꞉ta꞉ ipiki waleekeeki
(Luku 24꞉13-35)
12Wetepena꞉ hali yaapo pota꞉na꞉ pepekepate Yesuma꞉ mo hali yaapoma꞉ handena꞉yeke ta꞉ta꞉ piki hali leke peekeme. 13Kutupa mo hali yaapoma꞉ paa la꞉ka꞉la puaata꞉ mandane hoki nane tolu haemeke wanda꞉hali lolo pepekepate ipilika꞉ pi make na opimikime.
Yesuma꞉ mo 11 disaipolo haliweki pa꞉ta꞉ ipiki waleekeeki
(Ma꞉tiu 28꞉16-20, Luku 24꞉36-49, Dioni 20꞉19-23, Aposolo 1꞉6-8)
14Kutupa wetepena꞉ mo hande kiki yaapona꞉ ankena꞉ homeke pu haliweki kone ne nalo pitina꞉ iki pa꞉ta꞉ ipika꞉ kone waleekeme. Yesuma꞉ mo haliwekima꞉ ipika꞉ tiao hayekeeki handemeke wanda꞉halina꞉ pi na opimiki handaata꞉ Yesuma꞉ mo haliwekina꞉ pi na opimiki ekina꞉ make ika꞉ puki taka꞉laeyeke ekina꞉ make pi leekeme. 15Yesuma꞉ iki pa꞉ta꞉ alota꞉ Kenke paeyao pa꞉ta꞉ puaata꞉ wanda꞉hali paeyao pa꞉ta꞉ do pi seliapo wala꞉pa꞉peke laa 16Hali epima꞉ pi mea bapitaisi peawaya꞉ka꞉na꞉ta꞉ koto halita꞉ da꞉ta halieke. Kutu piliepate hali epima꞉ pi na mia꞉ka꞉na꞉ta꞉ ipika꞉ yenki milieke. Koda꞉ma꞉ pi yokaalu pia꞉ka꞉na꞉ta꞉ kota꞉ alu pilieke. 17Kutupa pi mulu peleme wanda꞉halima꞉ do wele pita꞉la꞉ ekimanu handilimikie leekeme. Ya bikina꞉ hoke temokomanu tolu limikie. Panake pimanu lelimikie. 18Hoke ketomanu kikima꞉ minilimikie. Hali homaasa꞉ ikali nemeka꞉na꞉ta꞉ na homilimikie. Yeni haaseme wanda꞉halina꞉ ika꞉ kiki wimika꞉na꞉ta꞉ koto wanda꞉hali tiaalimikie leekeme.
Yesu oli ya nane hatuku miekeeki
(Luku 24꞉50-53, Aposolo 1꞉9-11)
19Koto ekina꞉ Tekehali Yesuma꞉ mo wanda꞉hali pi la halo paeyaota꞉ Koda꞉ma꞉ Yesu mea oli ya nane hatuku miekeme. Kutupa Yesuta꞉ Koda꞉na꞉ popeke nane kiki nane pitiniaeyekeme. 20Yesuta꞉ oli hepeni nane pua hata꞉ disaipolo wanda꞉halima꞉ kenke paeyaona꞉ do pi seliapo wala꞉tiki pu hayekeme. Kutupa Tekehalima꞉ mandakena꞉ e pokolo hata꞉ wanda꞉halima꞉ ika꞉ pi ota꞉ pie lena꞉yeke wele pieke ekimanu pimikime. Kutu pimikime.]
Currently Selected:
Maka 16: SEMB
Highlight
Share
Copy
Want to have your highlights saved across all your devices? Sign up or sign in
