San Juan 20

Jesús jutucta̱c

1Mit primer s̈ʉjw ayé s̈ama̱na, María Magdalajway nʉcs̈ jopoytsu'mnaj pa mam i-it ayé á̱nimacʉt. Mit i-is̈ ni'c chi'tiganu ayé tsa' itu-atujcaway ayé á̱nimacʉt. 2Cʉs̈ nʉcs̈ pujʉ'c mam Simón Pedro mit mam jatu'cway pʉctampay jeme Jesús iwano'cpay, mit inʉmgʉs̈au:

—Ichi'tcaway el Señor á̱nimacʉtni'c, mit tʉngajawigap jʉm iguiyájcaj. 3Mit pichingau Pedro mit jatu'cway pʉctampay mit nʉs̈cau mam i-it ayé á̱nimacʉt. 4Pujʉ'jcau inimechcatij, po jatu'cway pʉctampay pujʉ'c más mʉgʉc que Pedro, mit je' cojyʉ'c mam i-it ayé á̱nimacʉt. 5Mit nico'uda̱jcʉu pa i-e'ptʉgʉywa'n, mit i-is̈ ni'c jem i-it ayé sábanajat, po je' catʉgʉyu. 6Cʉs̈ coy Simón Pedro ni'c más mugus̈á̱m imijn, mit tʉgʉy á̱nimacʉtni'c, mit i-is̈ ayé sábanajat mam i-it, 7mit i-is̈wey ayé jamuc itugutucmo'ngaway Jesús icopac catumuyaguic ayé sábanajat, po aparte itsʉ̱na a-ʉ'pmuguic. 8Cʉs̈ tʉgʉyey jatu'c pʉctampay jeme cojyʉ'cway mam i-it ayé á̱nimacʉt, i-is̈ mit icupʉc. 9Ni'c igani-entendia̱tcap ayé tsʉ̱napay ja'yic Dios ilibruni'c, ni'c Jesús it ti ijutucta'cwa'n mam itsʉ̱nga á̱nimajat. 10Mit ayé pʉctampajyat pitujcanuw itʉcmat.

Jesús ique's̈ta̱jcau María Magdalajway

11Po María pe'ta̱m itsʉ̱naj mit jʉy á̱nimacʉt-á̱m. Po merute ijʉ', nico'uda̱jcʉu pa i-e'ptʉgʉywa'n á̱nimacʉtni'c, 12mit i-is̈ mechc ángejlat cutígatsijcat mit po'pjamuc, mit jem itsʉ̱na tu'c ángel mam i-íjtʉj icopac Jesús, mit jatu'c ángel mam i-íjtʉj ita'jnat, mam iguiyájcajaj Jesús icuerpu. 13Mit inʉmgajau ayé to's̈ay:

—¿Tini'c injʉ'?

Inʉmgʉs̈au:

—Tʉjʉyp ni'c ichi'tcau el Señor Jesús, mit tʉngajawip jʉm iguiyájcaj.

14Iguinʉjm we'n, e'jpituc mit i-is̈ Jesús ni'c jem itsʉ̱na, po igajawiwu te Jesús. 15Mit Jesús inʉjmawey ayé to's̈ay:

—¿Tini'c injʉ'? ¿Pʉn inche'mp?

Po María inʉmpayta ni'c je' ayé icuida̱tpay olivucujyat, mit inʉjmau:

—Señor, te mi̱ inmunʉcs̈, nʉjmac jʉm is̈yajc, mit ʉ̱ tʉnmunʉcs̈áj.

16Jesús iguinʉjmau:

—¡María!

I-e'jpitujc je', inʉjmau:

—¡Raboni! (Ayʉ̱́j inʉmo'jcʉp, Amayipay.)

17Jesús iguinʉjmau:

—Camtsʉgac, ni'c tʉganicu'tp mam tʉnte̱t Dios. Po nʉs̈ mam tʉmpʉctampajyat jeme tʉnwangʉs̈pay, mit nʉmgʉs̈a ni'c tʉcu'táj mam itsʉ̱na tʉnte̱t Dios, mit mijchat in-e'pcapey as̈am inte̱jtat, mit je' ayé tʉnDios mit in-e'pcapey as̈am inDiosat.

18Cʉs̈ nʉcs̈ María Magdalajway pa iguinʉmgʉs̈awa'n oyway noticia ayé pʉctampajyat ni'c i-is̈way el Señor, mit je' inʉmgʉs̈au lo que je' iguinʉjmaway.

Jesús ique's̈ta̱jcʉs̈au ipʉctampajyat

19Icutsu'ij nije'yu primer s̈ʉjw s̈ama̱na, mit wejpu'n atuguic tʉc-ajwat en ayé lugar mam ini-apʉcmujcʉjʉ ayé pʉctampajyat ni'c ipʉ̱tcau judíujat. Cʉs̈ min Jesús mit ique's̈ta̱jcʉs̈au i-es̈pu̱tujmat, mit inʉmgʉs̈au:

—Pi aguepca paz injo̱tni'jcat.

20Mit iguinʉmgʉ́s̈aj we'n, i-actu-is̈cʉs̈ icʉ'jat mit icabap. Mit ipʉctampajyat ji'cta̱jcau ijo̱jtat igui-ís̈caj el Señor. 21Cʉs̈ Jesús inʉmgʉs̈awatu:

—Pi aguepca paz injo̱tni'jcat. As̈am tʉs̈ajyu't tʉnte̱t Dios, we'ney tʉ-ajyu'tcʉs̈wa'n mijchat.

22Iguinʉjm we'n, s̈uj, mit inʉmgʉs̈au:

—Pʉctsóuga Espíritu Santu. 23Pʉn inactunʉmgámpay ima̱jlat, Dios iguiperdona̱táj. Mit pʉn inga-actunʉmgámpay ima̱jlat, ayé imutanáj nu'pʉjʉn mal iwatway.

Tomás cacupʉcp

24Po Tomás tu'c de ayé doce pʉctampajyat, inʉ'jywayey Gemelo, catsʉ̱nawu jem mit je'jat i-ojyʉ'jc Jesús. 25Cʉs̈ iguinʉmgajau japu̱t pʉctampajyat:

—Tʉn-is̈caway el Señor.

Po je' inʉmgʉs̈au:

—Te tʉnga-e'jpap icʉ'jat mam iguipás̈cajaj clavusat, mit te tʉngacojmap tʉncʉ'jʉjp mam itʉgʉygaj clavusat, mit te tʉngacojmap tʉncʉ' icabapni'c, tʉngacupʉgáj.

26Inas̈ ocho s̈ʉjwat, tsʉ̱ngawatu tujugum ipʉctampajyat, mit jemey itsʉ̱naj Tomás. Mit atuguic tʉc-ajwat itsʉ̱ngaj mit Jesús coyatu mit nitenda̱jcʉu es̈pu̱tum, mit inʉmgʉs̈au:

—Pi aguepca paz injo̱tni'jcat.

27Cʉs̈ inʉjmau Tomás:

—Yac yam incʉ'jʉjp mit e'p tʉncʉ'jat, mit ajcutomi-ey incʉ' tʉncabapni'c mit com. Mit camjaduda̱twit, más oy pi cupʉc.

28Cʉs̈ Tomás ipo'n:

—¡Mi̱j ayé tʉ̱Dios, mit mi̱ is̈manda̱tp! 29Jesús iguinʉjmau: Tomás, ni'c ʉ̱ is̈-is̈, is̈cupʉc. Tsʉ̱ngáj oy jeme iga-e'pcapay Dios mit cupʉjcap.

Pa ti iguija'y ayʉ̱́j libru

30Mit Jesús iwat japu̱t milagrujat mam igui-ís̈caj ipʉctampajyat, po aye'jat catsʉ̱nap ja'yic en ayʉ̱́j libru. 31Po ayʉ̱́j cosajat tsʉ̱nap ja'yic pa pi cupʉjca ni'c Jesús ayé Cristu, Dios iway, ni'c we'n te incupʉjcap je', inaguepcáj vida cacʉs̈ámpay.

Currently Selected:

San Juan 20: PSNT

Highlight

Copy