San Lucas 11

Yename na-ora̱twa'n

1Mit Jesús ora̱t en tu'c lugar, mit icʉs̈ ora̱tpay, tu'c ipʉctampay iguinʉjmau:

—Señor, ajque's̈cajac nat tʉ-ora̱tcawa'n as̈am Juan igui-ajque's̈cʉs̈a ipʉctampajyat.

2Mit Jesús inʉmgʉs̈au:

—In-ora̱tcawa'n nʉmga yename:

Nate̱jat, mitsʉ̱nap yucm,

ʉjtsat yam tʉ-oyninʉ́mga mi̱.

Mi̱ yam manda̱t.

Tʉwátca lo que mi̱ inwampay,

as̈am yucm iguiwátca, wename-ey ʉjtsat yam tʉwátca na̱s̈ni'c.

3Moygac mi̱ tʉncaygámpay pa cada s̈ʉjw.

4Mit perdona̱tcajac nu'pʉjʉn mal tʉnwatcapay ni'c ʉjtsat tʉmperdona̱tcapey nu'pʉjʉn jeme tʉs̈watcajapay mal.

Mit cammoygac laj tʉs̈tenta̱tcáj, po libra̱tcac de nu'pʉjʉn mal.

5Mit Jesús inʉmgʉs̈awey:

—Te tu'c jayau ijtʉp tu'c i-amigu, mit te coyp pu̱jtsu'm itʉcm, inʉjmáj: “Amigu, presta̱jtac tu̱gup ma̱s̈anʉ̱n, 6ni'c min tu'c tʉn-amigu to̱uni'c mit coy tʉntʉcm mit tʉnga-aguep ti tʉnmo'áj.” 7Mit ayé jayau jeme tsʉ̱napay tujugum iguipo'náj: “Camjomiyac ni'c tʉntʉc-ajw atuguiganu, mit tʉnwaywájat ma̱gap mit ʉ̱ che's̈ni'c. Ca-oyap tʉca's̈ʉ'c pa tʉmo'wa'n.” 8Tʉnʉmgʉs̈ap ni'c te caca's̈ʉ'cp pa iguimo'wa'n ni'c je' i-amigu, po te iguijomip, ca's̈ʉ'gáj mit imo'áj nu'pʉjʉn inesita̱tpay. 9Mit tʉnʉmgʉs̈ap: Yo'tcaja Dios mit is̈moygáj. Che'nga cosa oyway mit Dios is̈actupa̱tcáj. Mucótsca Dios mit je' is̈po'ngáj. 10Ni'c nu'pʉjʉn jeme iyo'tpay, ipʉctsowáj. Mit jeme iche'mpay cosa oyway, ipa'táj. Mit jeme imucotspay Dios, iguipo'náj.

11’Te tu'c jayau iguiyo'jtap iway ma̱s̈anʉ̱n, igamo'áj tu'c tsa'. O te iguiyo'jtap acs̈, igamo'áj tu'c tsanay. 12O te iguiyo'jtap tu'c piyuco̱y, igamo'áj tu'c capin. 13Mit te mijchat maja mima̱lo'jcataj, injatcap is̈móyga regalu ojyatway inwaywájat. Mit como Dios Nate̱jat tsajpni'cway más oyo'c, je' imoygʉs̈áj Espíritu Santu nu'pʉjʉn jeme iguiyo'tcajámpay.

Te tsuguinwatí̱jcap en tu'c tʉjc

14Mit Jesús i-acpichin tu'c demo̱nyu i-ajcu-ú̱miway tu'c jayau, mit cuandu iguipichijnau ijo̱jtugum, cotsta̱c jaran ayé u̱m, mit nigu-épigʉjʉu jayajwat. 15Po una̱c inʉmgau:

—Ayʉ̱́j jayau i-acpichingʉs̈p demo̱nyujat ni'c iguimoyp poder Beelzebú jeme imanda̱tpay nu'pʉjʉn demo̱nyujat.

16Mit una̱c iwangau iguiproba̱tcawa'n Jesús mit iyo'tcajau ma wat tu'c milagru pa iguijawigawa'n te Dios igui-ajyu't. 17Po Jesús ijawiu ni'c we'n ipensá̱tca, mit inʉmgʉs̈au:

—Te jayajwat en tu'c na̱s̈ tsuguinwatcap, je'jatu nicʉs̈cʉjʉ̱́j. Mit te en tu'c tʉjc tsuguinwatcap je'jatu, we'ney nicʉs̈cʉjʉ̱́j. 18Mit we'ney te Awayagatsna' ni-acpichijnʉp je'yu, ¿natpaj imanda̱twa'n jec? Tʉnyʉmp we'n ni'c inyʉmgap ni'c tʉnacpichingʉs̈p demo̱nyujat ni'c tʉs̈moyp poder Beelzebú. 19Mit te ʉ̱ tʉnacpichingʉs̈p demo̱nyujat por Beelzebú, ¿injayajwat te? ¿pʉn inʉ'jyni'c igui-acpichingawa'n demo̱nyujat? Jemni'c je'jat tangap testigu contra mijchat. 20Po ʉ̱ tʉnacpichingʉs̈p demo̱nyujat ni'c Dios tʉs̈moyp poder, ayʉ̱́j pa pi jawiga ni'c manda̱tnup Dios mam mijchat.

21’Cuandu tu'c majaguepay bien arma̱tic itsʉ̱na, iguarda̱tp itʉjc, mit we'n seguru itsʉ̱nawa'n nu'ʉjpʉn ijtʉpay. 22Po imi'nwa'n tu'c jeme más ijtʉpay maj, mit te iguivencia̱tp, ichi'jtáj nu'pʉjʉn i-armajat ituconfia̱tpay mit i-acpas̈amp mit i-amigujat lo que inu'mway.

23’Jeme tʉs̈camutʉgʉypay ʉ̱, ayé ni'c tʉs̈cawamp. Mit jeme iga-apʉcmucpay jayajwat ma tʉs̈cupʉjcac, ayé tʉs̈-amp ni'c i-acs̈is̈cada̱cp jayajwat.

Tu'c demo̱nyu pitucpatu

24’Cuandu tu'c jayau iguipichijnap ijo̱jtugum tu'c demo̱nyu, ayé demo̱nyu yo'yp pa mam igatsʉ̱na nepʉn, mit iche'mp lugar mam ipo'cs̈wa'n, mit te igapa̱tp, inʉmp: “Tʉpitugájatu tʉntʉcm mam tʉpichijn.” 25Mit icojy jem, ipa̱t ayé jayau as̈am tu'c tʉjc ca-ijtʉpay nepʉn, pe'tic mit bien oyaguic. 26Mit cʉs̈ ayé demo̱nyu nʉcs̈ mit imumin jasiete demo̱nyujat jeme más ma̱jlatway que je', mit aye'jat itutʉgʉygau ayé jayau mit tangau jem. Mit ayé jayau jat más pior que as̈am i-ijt. Wename-ey iguijatcáj jinapay jayajwat ma̱lo'jcatway.

Jeme más oyninʉmijcatway

27Mit cuandu Jesús cotspnajate, cotsta̱c mʉgʉc tu'c to's̈ay tsʉ̱naway jayau-awa'tsam, mit iguinʉjmau:

—Oyninʉmic ayé to's̈ay jeme is̈tsʉmway itinchayni'c mit jeme is̈actsu'tsway.

28Mit Jesús inʉjmau:

—Po más oyninʉmijcat ayé jeme imaraugapay lo que inʉmpay Dios, mit ijayaumaygap.

Maljayajwat i-e'po'jcʉjʉp milagru

29Cuandu imujc más jayajwat, Jesús chu̱chiu iguinʉm:

—Ma̱lo'c ayʉ̱́j jinapay jayajwat ni'c i-e'po'jcʉjʉp tu'c seña mʉjway. Po nepʉn igajawatáj seña, ni'c itway tu'c seña mʉjway en ayé tiempu itsʉ̱naj profeta Jonás. 30Dios iwat tu'c milagru mit Jonás pa ma e'pca Nínivejatway, mit wename-ey Dios iguiwatwa'n tu'c milagru mit ʉ̱ jeme tʉjatway jayau pa ma e'pca jinapay jayajwat. 31Ijuzga̱twa'n Dios, ayé reina jeme minway sur nitenda̱jcʉ̱́j pa igui-acusa̱tcʉs̈wa'n jinapay jayajwat pa ma tanga condena̱tic, ni'c je' min yagats pa iguimarawa'n lo que ijawiway rey Salomón, mit jinap yam tʉtsʉ̱na mit mijchat, mit ʉ̱ más tʉmʉjninʉmic que rey Salomón, po mijchat ingawangap is̈maraugáj. 32Ijuzga̱twa'n Dios, ayé jayajwat jeme tsʉ̱ngaway nʉ'jcopac Nínive nitenda̱jcʉjʉ̱́j pa igui-acusa̱tcawa'n jinapay jayajwat pa ma tanga condena̱tic. Ni'c Nínivejatway icuyaguigau ima̱lway to̱jwat cuandu icotstacyo'jy Jonás. Mit jinap yam tʉtsʉ̱na mit mijchat, mit ʉ̱ más tʉmʉjninʉmic que Jonás, po mijchat ingacuyaguigap inma̱lway to̱jwat.

Tu'c luz pa natsʉ̱́nga oy

33’Nepʉn igacuyu'tsp tu'c luz no'ctsowicway, ne igayacp ca'cpa'tm, po iyacp ta'cs̈anyagani'c pa jeme tʉgʉygapay ma e'pca ayé luz. 34Dios nas̈yajcajau nawijn. Je' iwamp na-e'pca puru cosa oyway pa natsʉ̱nga oy, mit we'n natsʉ̱ngáj oy as̈am jeme yo'ygapay mam i-it luz. Po te nawijnat natu-e'pcap puru cosa ma̱lway, natsʉ̱ngáj mal as̈am jeme yo'ygapay chitimicni'c. 35Nicuidá-tcʉjʉ, te we'n nayo'yga, Dios iluz nas̈caservia̱tcajap ni'c nawangap puru mal. 36Mit te nawangap puru cosa oyway mit te nagayo'ygap nes̈ʉ̱n chitimicni'c, natsʉ̱ngáj oy, mit Dios iluz nas̈ta'cs̈cáj oymanac.

Jesús i-acusa̱tcʉs̈p fariseujat

37Icʉs̈ cotspay Jesús, iguinajau tu'c fariseu ni'c ma cay mit je'. Itʉgʉjy Jesús tujugum, nitsʉ̱nda̱jcʉu me̱s̈ani'c. 38Mit ayé fariseu i-is̈ ni'c Jesús igacumplia̱tu ayé costumbre ni'c igacupuju icʉ'jat antes icaywa'n, mit ayé fariseu nigu-épijyʉu. 39Po el Señor inʉjmau:

—Mijchat fariseujat incupo'tcap tu'c vasu mit tu'c puna̱tu iyucuinmu. We'ney mijchat mi-oyque's̈cap inyucuinmat po injo̱jtugujmat ma̱lo'c itsʉ̱na ni'c inwano'jcap jayje' mit inwato'jcap mal. 40Mitontojat. Dios iwamp natsʉ̱nga limpiu najo̱jtugum mit we'ney nayucuinm. 41Po yajca limosna mit nu'pʉjʉn injo̱jtat, mit we'n ijawigáj ni'c limpiu intsʉ̱na injo̱jtat.

42’Po ¡pro̱wij de mijchat fariseujat! ni'c inyajcap pa ofrenda nu'pʉjʉn clase de ma'jts mit ingawatcap cuenta pa is̈watcawa'n iyacs̈ta'cway mit is̈wangawa'n Dios. Pi watca ayʉ̱́j cosajat as̈am is̈wátca cuenta japu̱t cosajat.

43’¡Pro̱wij de mijchat fariseujat! ni'c inwangap pangujat más ojyatway mam inadora̱tca, mit inwangap jayajwat pi is̈saluda̱tcac plazani'c mit may respetu.

44’¡Pro̱wij de mijchat inajque's̈capay ley mit fariseujat! ¡Mijchatu miniwe̱tcʉjʉp! ni'c mijchat as̈am á̱nimacʉt naga-e'pay mit jayajwat yo'ygapay iyucuinm igajawigap ti ijtʉpay pa'tm.

45Mit iguipo'n tu'c jayau i-ajque's̈pay ley: Amayipay, cuandu is̈nʉm we'n, ¿is̈tucotscapey ʉjtsat?

46Mit Jesús inʉmgʉs̈awey:

—¡Pro̱wij de mijchat inajque's̈capay ley! ni'c inactsʉmgap jayajwat jeme igamajmoygámpay, ni'c ayé ley as̈am tu'c tsʉm u'tspay, po ingatsʉmajyigap ne mit incʉ'jʉjpat.

47’¡Pro̱wij de mijchat! Inwatcajap profetajat ibóbidajat, mit inte̱jtat ámbanuway je'jat i-ago'jcau ayé profetajat. 48Injawigap lo que iwatcaway inte̱jtat ámbanuway mit inyʉmgap ni'c oy lo que iwatcaway. Ni'c iyacs̈ta'cway je'jat i-ago'jcau profetajat, mit mijchat mismu inwatcajap ibóbidajat.

49’Como Dios ijawip nu'pʉjʉn, inʉm yename: “Tʉnajyu'táj profetajat mit apóstojlat, mit una̱c i-ago'jcáj mit ja-una̱c ipo'ctangáj.” 50Ayʉ̱́j jinapay jayajwat Dios i-actupo'ngʉs̈áj ividajat nu'pʉjʉn profetajat jeme i-ago'jcaway desde ichu̱chij ayʉ̱́j mundu, 51desde i-o'jc Abel hasta i-o'jc Zacarías, mit je' o'c templuni'c mam nas̈yac ofrenda pa Dios. Ʉ̱ tʉnʉmgʉs̈ap ni'c ayʉ̱́j jinapay jayajwat ipo'ngajáj nu'pʉjʉn jeme iguijatcaway.

52’¡Pro̱wij de mijchat inajque's̈capay ley! ni'c inatujcau lo que Dios iwampay pi jawiga. Mijchat ingajawigawu mit inatujcau jeme ijawigámpayate.

53Iguinʉjm we'n Jesús, jeme i-ajque's̈capay ley mit fariseujat awa'nigau jaran, mit ijomigau Jesús ma iguipo'ngajac may preguntajat. 54Mit i-atsʉ̱ngau Jesús te ipo'náj mal pa igui-acusa̱tcawa'n.

Currently Selected:

San Lucas 11: PSNT

Highlight

Copy