San Lucas 17
17
Jeme nas̈actuwampay mal
1Jesús inʉmgʉs̈au ipʉctampajyat:
—Itp ti i-itwa'n ayé mal iyo'tpay najo̱jt, po ¡pro̱wij de ayé jayau jeme nas̈actuwampay mal! 2Más oy nacutsúmijya tu'c mʉjway pa̱wan iyo'cni'c mit naca'tstʉgʉy lama̱tjugum, ni'c más mal igui-actuwatwa'n mal tu'c ayʉ̱́j jayawájat jeme tʉs̈cupʉjcapay. 3Nicuidá̱tcʉjʉ mijchatu. Te inhermanu is̈wajtap mal, che'cta'c. Po te is̈yo'jtap perdón, perdona̱t. 4Mit te is̈wajtap mal siete veces en tu'c s̈ʉjw, mit te siete veces pitucpatu pa is̈yo'jtap perdón, oy pi perdona̱t.
Oy nacupʉjca más
5Mit ayé pʉctampajyat inʉmgajau el Señor:
—Majyigac pa tʉcupʉ́jca más.
6Mit el Señor inʉmgʉs̈au:
—Te micupʉjcap s̈ʉ̱ntiticna, ayé as̈am tu'c titic mostaza-semilla ijat mʉj, mit oyáj is̈nʉ́mgaja ayʉ̱́j sicómoro-cujy: “Niwís̈ʉ mit niní̱jpʉ lama̱tni'c”, mit is̈jayaumaygáj.
Lo que iwatámpay tu'c mozo
7’Te tu'c jayau mam mijchat ijtʉp tu'c imozo mit i-acyos̈watp araduni'c o i-acborregucuida̱tp, cuandu ipitucnuwa'n yos̈ni'c ¿is̈jawiga ayé jayau inʉjmáj: “Nas̈ jaran me̱s̈ani'c”? 8Mejor inʉjmáj: “Wajtac pa tʉ-u̱cma'wa'n. Niprepará̱jtʉ mit je'jpac pa tʉ-u̱cma'wa'n mit tʉcʉs̈wa'n, mi-u̱cmá̱pama mi̱.” 9¿Is̈jawiga inʉjmáj imozo ni'ctiyu̱s̈ ni'c iwat as̈am iguimanda̱tp? Tʉs̈jawi ni'c ca̱j. 10We'ney mijchat. Cuandu is̈watcawa'n nu'pʉjʉn is̈manda̱tcaway Dios, nʉmga: “Tʉgacumplia̱tcap oy pa mozo ni'c tʉnwatcap jeme nʉmicwayu tʉwátca.”
Oytangau diez jayajwat
11Inʉjcs̈ Jesús to̱uni'c pa Jerusalén, nas̈ mam initsójwʉ Samaria mit Galilea. 12Mit icojy en tu'c nʉ'jcopacwáy, imunipa̱jtʉu diez jayajwat jeme itcʉjʉway may lla̱gas, mit je'jat tenagau yagatsu ni'c ca-oy iguicutomigawa'n nepʉn. 13Mit je'jat cotscau mʉgʉc, inʉmgau:
—¡Jesús, Amayipay, ayo̱wis̈cac!
14Mit Jesús igui-is̈cʉs̈, inʉmgʉs̈au:
—Nʉs̈ actu-e'pca judíujat ipa̱nijat ni'c mi-oytangau.
Mit nʉs̈capnajate, oytangau jaran. 15Mit tu'c jayau igui-is̈ ni'c oytanway, pituc mam itsʉ̱na Jesús, mit i-oyninʉm mʉgʉc Dios, 16mit nicos̈atenda̱jcʉu ita'ná̱m Jesús, mit inʉjmau ni'ctiyu̱s̈. Mit ayé jayau Samariajway. 17Mit Jesús inʉm:
—¿Caje' diez jayajwat jeme oytangaway? ¿Jʉm itsʉ̱nga janueve? 18¿Is̈jawiga solo ayʉ̱́j pe'ta̱mayna' pituc pa igui-oyninʉmwa'n Dios?
19Mit inʉjmau:
—Ca's̈ʉ'c mit nʉs̈, mi-oytanway ni'c ʉ̱ is̈cupʉc.
Nat imanda̱twa'n Dios
20Mit fariseujat i-ucyo'tcau Jesús jutim imanda̱twa'n Dios yam. Mit Jesús ipo'ngʉs̈:
—Nepʉn ca-oyáj iguijawi cuandu imanda̱twa'n Dios. 21Ne ca-oyáj iguinʉ́mga: “E'pca yam” o “e'pca yajyʉ'n”, ni'c jinap Dios manda̱tnup mam mijchat intsʉ̱nga, po ca-oyap is̈-e'pca.
22Mit Jesús inʉmgʉs̈au ipʉctampajyat:
—Itáj s̈ʉjwat cuandu inwangáj tʉmi'n ʉ̱ jeme tʉjatway jayau, mit ca-oyáj is̈-e'pcap. 23Mit jayajwat is̈nʉmgajáj: “E'pca, yam itsʉ̱na Cristu”, o “e'pca yajyʉ'n itsʉ̱na.” Mijchat camnʉs̈ca ne camnatspoguiga je'jat. 24Ni'c as̈am ániway iquijan desde mam ipichin s̈ʉjw hasta mam itʉgʉynu, wename-ey ijatwa'n en ayé s̈ʉjw tʉmi'nwa'n ʉ̱ jeme tʉjatway jayau, ni'c nu'pʉjʉn jayajwat i-e'pcáj tʉmi'nwa'n. 25Po itp ti tʉs̈tunas̈ʉ'cwa'n yam ni'c jinapay jayajwat tʉs̈capʉctsougáj ne tʉs̈ca-e'po'jcʉjʉp.
26’Ni'c as̈am ayé tiempu itsʉ̱naj Noé, wename-ey ijatwa'n en ayé s̈ʉjw tʉmi'nwa'n ʉ̱ jeme tʉjatway jayau. 27Je'jat caygau, u̱jcau, nicʉ'pa̱tcʉjʉu mit i-acnicʉ'pa̱tcʉjʉu iquis̈ajyat hasta ayé s̈ʉjw itʉgʉjy Noé barcuni'c, mit patscunas̈ ayʉ̱́j mundu mit nʉ', mit o'cpʉ'ngau nu'pʉjʉn ayé maljayajwat. 28Mit we'ney ijajt cuandu itsʉ̱naj Lot. Ayé maljayajwat caygau mit u̱jcau, juygau mit to'jcau, ni̱pcau mit tʉcwatcau. 29Po ayé s̈ʉjw ipichijn Lot nʉ'jcopac Sodoma, min tsajpni'c jʉjn mit azufre, mit nu'pʉjʉn tangaway togoybʉ'ngau. 30Wename-ey ijatwa'n en ayé s̈ʉjw tʉque's̈ta'cwa'n ʉ̱ jeme tʉjatway jayau.
31’En ayé s̈ʉjw tu'c jayau jeme tsʉ̱napay tʉcyucuinm ma po'c jaran, maga-acpichin neti ijtʉpay tujugum, mit jeme tsʉ̱napay camni'c magapituc itʉcm. 32Nijáwiga ti iguijatway Lot ito's̈ay. 33Nu'pʉjʉn jeme iwampay iguisalva̱twa'n ivida i-actogoyáj, mit pʉmba'tu jeme i-actsʉ̱námpay ivida por togoyic, je' iguarda̱táj pa tu'c vida cacʉs̈ámpay.
34’Tʉnʉmgʉs̈ap ni'c en ayé tsu' mechc tsʉ̱ngáj en tu'c che's̈. Tu'c imunʉs̈cáj mit tu'c iyajcáj. 35Mechc to's̈ajyat jʉtscáj pa̱wani'c. Tu'c imunʉs̈cáj mit tu'c iyajcáj. 36Mechc jayajwat tsʉ̱ngáj camni'c. Tu'c imunʉs̈cáj mit tu'c iyajcáj.
37Mit igui-ucyo'tcau:
—¿Jʉm ijatwa'n we'n, Señor?
Mit Jesús inʉmgʉs̈au:
—Mam itsʉ̱nawa'n tu'c á̱nima, jemey ica'ugawa'n nu'pna'jat. Mit we'ney mam itsʉ̱nga maljayajwat, jem ayé icastiga̱twa'n Dios.
Currently Selected:
San Lucas 17: PSNT
Highlight
Share
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
