San Mateo 14

Nat i-o'jc Juan nʉ'gutempay

1En ayé tiempu Herodes manda̱t Galileajway na̱s̈, mit imarau lo que iwatpay Jesús, 2mit Herodes inʉmgʉs̈au imozojat:

—Ayʉ̱́j dejuru Juan nʉ'gutempay. Je' jutucta̱gatu mam itsʉ̱nga á̱nimajat, mit jemni'c ijtʉp may poder pa iguiwatwa'n milagrujat.

3Ni'c cuandu Juan iyo'jy, Herodes manda̱t ma actanga mit icutsumda̱jcau cuytujugum. Iwat we'n ni'c Herodes ipʉjcau Felipe ito's̈ay, ayé to's̈ay inʉ'jy Herodías, mit Felipe ayé Herodes ije̱way. 4Herodes icom cuytujugum Juan ni'c iguinʉjmau:

—Ca-oy is̈pʉjcawa'n inje̱way ito's̈ay.

5Mit Herodes iwan igui-ago'cwa'n, po ipʉ̱t nʉ'jcopac jayau ni'c inʉmgau ni'c Juan tu'c profeta i-ajyu'tway Dios. 6Po cuandu Herodes iguitsojw is̈ʉjw, Herodías iwaymá̱m ech mam itsʉ̱nga imvitá̱tijcatway, mit Herodes inijat. 7Mit je' ijura̱jtau iguimo'wa'n tiyu iguiyo'jtámpay.

8Po ayé quis̈ay igui-acochiu ima̱m ti iyo'támpay, mit inʉjmau Herodes:

—Mojyac puna̱tuni'c Juan nʉ'gutempayna' icopac.

9Mit cʉs̈ rey Herodes tu'no'c ijo̱jt, po ni'c ijura̱jtau mit imaraugawey jeme tsʉ̱ngaway mit je' me̱s̈ani'c, je' manda̱t ma entrega̱tcaja Juan icopac. 10Mit i-ajyu'tcʉs̈ imozojat ma pus̈tújcaja Juan icopac mam itsʉ̱na cuytujugum. 11Mit cʉs̈ imumingajau Juan icopac en tu'c puna̱tu, mit i-entrega̱tcajau ayé quis̈ay, mit je' imunʉs̈au ima̱m.

12Mit cʉs̈ mingau Juan ipʉctampajyat mit imunʉs̈cajau icuerpu mit ini̱pcajau. Mit nʉs̈ igui-ajque's̈caja Jesús.

I-ajcaygʉs̈p cinco mil jayajwat

13Mit iguimarajw we'n Jesús, pichin jem en tu'c aj pa tu'c lugar mam igatsʉ̱na nepʉn. Mit iguijáwigaj ayé jayaujuc, inatspoguigau ta'nam desde ayé nʉ'jcopajcat. 14Mit icojy Jesús laguna-auni'c, je' pichin ajni'c mit i-is̈ ayé jayaujuc mit i-ayo̱wis̈cʉs̈. Mit i-ac-oytangʉs̈ tu'nijatway jeme imuyo'ygaway ayé jayajwat.

15Mit icutsu'ij, iguicutomigau ipʉctampajyat, iguinʉmgajau:

—Yam ca-itp tʉjcat mit tsu'jito'ganu. Acnʉs̈cʉs̈ ayʉ̱́j jayaujuc pa nʉ'jcopacni'jcat pa iguijuygawa'n ti icaygámpay.

16Po Jesús ipo'ngʉs̈:

—Canesita̱tp inʉs̈cawa'n. Moyga mijchat ti icaygámpay.

17Mit je'jat iguinʉmgajau:

—Tʉnaguepcap yam cinco ma̱s̈anʉ̱nwájatu, mit mechc acs̈wájat.

18Mit Jesús inʉmgʉs̈au:

—Mumingajac yam.

19Mit inʉmgʉs̈au ayé jayajwat ma nitsʉ̱ndá̱jcʉjʉ mʉyni'c. Iguipʉjcʉs̈ ayé cinco ma̱s̈anʉ̱nwájat mit ayé mechc acs̈wájat, yuc-e'p tsajpni'c mit ibendiciona̱t ayé cayan. Mit cʉs̈ i-emgada̱c mit imoygʉs̈ ipʉctampajyat ayé ma̱s̈anʉ̱n, mit ayé pʉctampajyat i-acpas̈angau pa ayé jayaujuc. 20Mit caybʉ'ngau mit cu̱s̈cʉjʉu. Mit cʉs̈ i-apiumujcanuw doce ca'c patsijcat mit ayé ma̱s̈anʉ̱ncutucwájat jeme icaytangaway. 21Mit it cinco mil jayajwat jeme caygaway, aparte to's̈ajyat mit ya̱wájat.

Jesús yo'yp lagunayucuinm

22Mit cʉs̈ Jesús inʉmgʉs̈au ipʉctampajyat ma tʉgʉyga ajni'c mit ma nʉs̈ca tuganʉ-ájw mientras je' i-acnʉs̈cʉs̈p ayé jayaujuc. 23Mit inʉ́s̈canuj ayé jayaujuc, je' cu't itu'gumu en tu'c copac pa i-ora̱twa'n. Mit jem itsʉ̱na itu'gumu hasta tsu'm. 24Po wejpu'n ayé aj tsʉ̱nau hasta es̈pu̱t laguna, mit ayé nʉ-ola iguitsactsougau ni'c mʉgʉgo'c s̈e'm i-it. 25Mit jopoytsu'mnaj iguicutomigau Jesús, mit je' yo'y lagunayucuinm. 26Mit igui-ís̈caj ayé pʉctampajyat ni'c yo'yp lagunayucuinm, je'jat ni-apʉ̱tigʉjʉu, inʉmgau: ¡Mimp tu'c á̱nima! Mit ya̱s̈cau ni'c pʉ̱to'jcau.

27Po Jesús imucotscʉs̈ jaran, inʉm:

—Camdesmaya̱tca, ni'c ʉ̱ tʉmimp. Campʉ̱tcawit.

28Mit cʉs̈ Pedro po'n jaran:

—Señor, te mi̱j ayé, nʉm tʉnʉ́s̈ey ʉ̱ nʉ'yucuinm mam intsʉ̱na.

29Jesús inʉjmau:

—Yam mi'n.

Mit cʉs̈ Pedro imanajc ajni'c, yo'y nʉ'yucuinm pa inʉs̈wa'n mam Jesús. 30Po igui-is̈ ni'c s̈ujo'c mʉgʉc ayé s̈e'm, pʉ̱jtʉgʉy mit chu̱chiu cutogoypay. Mit ya̱s̈ mʉgʉc, inʉm:

—Señor, salva̱tac.

31Mit cʉs̈ Jesús i-actan jaran, mit inajau:

—¡Mi̱ migacupʉcp may! ¿Tini'c induda̱t?

32Mit itʉ́gʉygaj ajni'c, tentan ayé s̈e'm. 33Mit jeme tsʉ̱ngaway ajni'c, iguicutomigau mit i-adora̱tcau, inʉmgau:

—Iyacs̈ta'cway mi̱j ayé Dios is̈wáy.

Jesús i-ac-oytangʉs̈p tu'nijatway

34Mit inas̈tújcaj en ayé laguna, coygau Genesaretway na̱s̈. 35Iguijawigaj ni'c coy Jesús, i-ajque's̈cajau nu'pʉjʉn tsʉ̱ngaway en ayé na̱s̈, mit je'jat imumingajau nu'pʉjʉn tu'nijatway. 36Mit ayé tu'nijatway iyo'tcajau favor Jesús ma iguimoygac laj iguitsʉjcajawa'nu ijamuc-au-á̱m. Mit nu'pʉjʉn itsʉjcajaway oytangau jaran.

Currently Selected:

San Mateo 14: PSNT

Highlight

Copy