San Mateo 22
22
Cʉ'pa't icuentu
1Mit Jesús i-ampiugʉs̈awatu cuentujat, inʉmgʉs̈au:
2—Natumuquips̈p nat imanda̱twa'n Dios. Ayé as̈am tu'c rey jeme iwatway tu'c ma̱s̈ʉjw ni'c nicʉ'pa̱jtʉp iway. 3Mit i-ajyu'tcʉs̈ imozojat ma aya̱s̈mujca jeme tsʉ̱ngaway imvita̱tic pa ayé ma̱s̈ʉjw, po aye'jat igawangawu imingawa'n. 4Mit i-ajyu'tcʉs̈atu japu̱t mozojat, inʉm: “Nʉmgʉs̈a jeme tsʉ̱ngapay imvita̱tic ni'c oyáguiganu cayan, i-ago'jcaway turujat mit aníma̱jtat jeme tʉnacye'cpʉjcʉs̈way, mit oyáguiganu itsʉ̱na nu'pʉjʉn. Nʉ́s̈ca cʉ'pa'tnic.” 5Po je'jat igawatcawu cuenta. Tu'c nʉcs̈ icamni'c, mit jatu'c nʉcs̈ to'cche'mpay. 6Mit japu̱jtat i-actangau ayé mozojat, mit iwatcajau mal, mit i-ago'jcau. 7Iguimarajw ayé rey, awa'niu jaran. Mit i-ajyu't isoldajat, mit icʉs̈pʉ'ngau ayé ago'cpayna'jat, mit ino'jcʉs̈au inʉ'jcopajcat. 8Mit cʉs̈ inʉmgʉs̈au imozojat: “Oyáguiganu ayé cʉ'pa't po jeme tsʉ̱ngaway imvitátic tʉs̈carespeta̱tcawu. 9Jinap nʉ́s̈ca calleni'jcat, mit imvitá̱tca pʉnu impa̱tcámpay ma minga cʉ'pa'tni'c.” 10Mit pichingau ayé mozojat calleni'jcat, mit i-apʉcmujcau nu'pʉjʉn ipa̱tcaway, oyjayajwat mit maljayajwat. Mit may jayajwat coygau en ayé cʉ'pa't.
11’Mit ayé rey min igui-e'pcʉs̈ jeme tsʉ̱ngaway imvita̱tic. Mit i-is̈ jem tu'c jayau jeme cacutígatsicway mit cʉ'pa'tjamuc. 12Mit ayé rey inajau: “Amigu, ¿nat intʉgʉjy yam ni'c ingamuyo'yp incʉ'pa'tjamuc?” Mit ayé jayau capo'nu. 13Mit cʉs̈ ayé rey inʉmgʉs̈au jeme majyigapay: “Tsúmgaja ayé jayau icʉ' mit ita'n, mit ca'tspíchinga pe'ta̱m chitimicni'c. Ni'c jem jayajwat ijʉygawa'n mit jem iguitunas̈cawa'n mʉgʉc.”
14Ni'c Dios mayo'c iguiya's̈ jayajwat, po icupiugʉs̈áj jeme jayaumaygapay.
I-ucyo'tcap te itso̱jcáj tumi̱n impuestu
15Cʉs̈ nʉs̈cau fariseujat, mit ni-acochigʉjʉu nat igui-ajca'ugawa'n Jesús mit lo que inʉmpay. 16Mit fariseujat i-ajyu'tcau ipʉctampajyat mit Herodes ijayajwat pa mam je' itsʉ̱na, mit iguinʉmgajau:
—Amayipay, tʉnjawigap ni'c inyʉmp lo que iyacs̈ta'cway, mit yacs̈ic is̈ajque's̈a Dios ito̱u. Ingawatp cuenta nepʉn ni'c niwe'nu is̈-e'pcʉs̈ jayajwat. 17Nʉmgajac nat mi̱ impensa̱t: ¿Oy nas̈mo'wa'n rey César tumi̱n impuestu, o ca-oy?
18Po Jesús ijawiu ni'c pensa̱tcap mal, mit inʉmgʉs̈au:
—Mijchatu miniwe̱tcʉjʉp, ¿tini'c is̈proba̱tcap? 19Actu-e'pcac ayé tumi̱n intutso̱jcapay impuestu.
Mit iguimumingajau tu'c tumi̱n. 20Mit Jesús i-ucyo'tcʉs̈:
—¿Pʉn ayé iretratu mit inʉ'jy tsʉ̱napay ja'yic tumi̱ni'c?
21Iguipo'ngau:
—César ayé.
Cʉs̈ Jesús inʉmgʉs̈au:
—Moyga César lo que César ije'way, mit moyga Dios lo que Dios ije'way.
22Iguimáraugaj we'n, nigu-épigʉjʉu. Mit cʉs̈ iyajcau Jesús mit nʉs̈cau.
Nat ijutucta̱jcawa'n á̱nimajat
23En ayé s̈ʉjw mingau saduceujat mam Jesús itsʉ̱na, mit je'jat inʉmgap ni'c cajutucta̱jcáj á̱nimajat. Mit i-ucyo'tcau je'. 24Inʉmgau:
—Amayipay, inʉm Moisés ni'c te tu'c jayau o'cp mit te igayacp iway, imajtsʉc nicʉ'pa̱jtʉ̱́j mit i-ajch ito's̈ay pa ma ijtʉ iway por i-ajch, magacʉs̈ ayé familia. 25Mit it siete muta̱cje̱wajyat mam tʉtsʉ̱́nga. Mit jeme más ajchcopacway nicʉ'pa̱jtʉu, mit cʉs̈ o'c, mit igayagu iway. Mit je' iyac ito's̈ay, mit ipʉgatu imajtsʉc jeme iguinatspoguipay. 26Mit ni-as̈amu iguijat segunduway, tercerway mit we'ney imusieteway ipʉjcau is̈ta'c ayé to's̈ay, o'cpʉ'ngau mit igawatcajawu iway ayé to's̈ay. 27Mit cʉs̈ o'guey ayé to's̈ay. 28Ijutucta̱jcawa'n nu'pʉjʉn á̱nimajat, ¿pʉn de ayé sieteway ipʉgáj ayé to's̈ay? ni'c inisietejatij ito's̈ayjátcau.
29Jesús ipo'ngʉs̈:
—Ca-oyap is̈pensa̱tca ne ingajawigap jeme tsʉ̱napay ja'yic Dios ilibruni'c, ne ingajawigap ni'c Dios ijtʉp maj. 30Ni'c ijutucta̱jcawa'n nu'pʉjʉn á̱nimajat canicʉ'pa̱tcʉjʉ̱́j, ne igawatcáj cʉ'pa't. Je'jat tsʉ̱ngáj as̈am Dios i-ángejlat tsajpni'cway. 31Ingajawigap ni'c jutucta̱jcáj nu'pʉjʉn á̱nimajat ni'c ingani-entendia̱tcap lo que is̈nʉmgajaway Dios. 32Inʉm: “Ʉ̱ tʉs̈Dios Abraham, tʉs̈Dios Isaac mit tʉs̈Dios Jacob.” Dios iga-e'pcʉs̈p ayé jayajwat as̈am o'guijcatway. Je' Dios pa jeme tsʉ̱ngapnajway. 33Mit iguimáraugaj we'n ayé jayajwat, nigu-épigʉjʉu mit lo que i-ajque's̈way.
Tu'c mandamientu mʉjway
34Cʉs̈ iguimáraugaj fariseujat ni'c Jesús i-atujcʉs̈au i-ajwat ayé saduceujat, ni-apʉcmujcʉjʉu ayé fariseujat. 35Mit tu'c fariseu jeme i-is̈capay ley i-ucyo't Jesús pa iguiproba̱twa'n, inʉm:
36—Amayipay, ¿jʉmay ayé mandamientu más mʉjway jeme tsʉ̱napay leyni'c?
37Mit Jesús inajau:
—“Inwa'náj el Señor inDios mit nu'pʉjʉn injo̱jt, mit nu'pʉjʉn imvida, mit nu'pʉjʉn intupensa̱tpay.” 38Ayʉ̱́j ayé mandamientu más mʉjway mit más primeruway. 39Mit segunduway inʉmp casi ni-as̈amu: “Inwa'náj inmupro̱wije̱way as̈am mi̱ inyiwajnʉ.” 40Te nacumplia̱tcap ayʉ̱́j mechc mandamientujat, nacumplia̱tcap nu'pʉjʉn inʉmpay ayé ley, mit we'ney nu'pʉjʉn inʉmgaway ayé profetajat.
Cristu más mʉjninʉmic que David
41Mit cuandu itsʉ̱ngaj apʉcmúguijcat fariseujat, Jesús i-ucyo'tcʉs̈, 42inʉm:
—¿Ti impensa̱tcap de Cristu? ¿Pʉn je' ite̱t?
Iguinʉmgajau:
—Ayé David iway ni'c pichin David ifamiliani'c.
43Mit cʉs̈ Jesús inʉmgʉs̈au:
—¿Tini'cpaj Espíritu Santu igui-actunʉjm David ni'c Cristu ayé iSeñor? As̈am iguinʉjm salmuni'c:
44El Señor inʉjmau tʉnSeñor:
“Tsʉ̱́na tʉn-oyimaycʉ'ni'c,
hasta tʉs̈vencia̱twa'n nu'pʉjʉn inmutsuguijnat.”
45Te David inʉjmau ni'c Cristu ayé iSeñor jeme iguimanda̱tpay, ¿natpaj iguiwayjatwa'n?
46Mit nepʉn ca-oyawu iguipo'n neti. Mit desde ayé s̈ʉjw pʉ̱tcau igui-ucyo'tcawa'n más.
Currently Selected:
San Mateo 22: PSNT
Highlight
Share
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
