Génesis 16
16
Agar mëët ja y'u'unk Ismael
1Yë Sarai ka'ap ënäty tjëkyepy tmo'ojëty yë u'unk maay yë Abram. Jam tu'uk ja tyuunpë, Agar xyëëwajtyp, Egiptë kyukajpnëty. 2Ënät t'ënëmaay ja Abram:
Ëk'ix, mijts mnija'ap ko yë Tios yë'ëjës xykyamoopy yë u'unk maay. E paaty yam nmënu'kxtä'äky ets xymyëët'atëty yë ntuunpës Agar. Wä'änxyëp yë Tios u'unk maay myo'ojëtëty etsës ëjts n'u'unk'atëty.
Ënät ja Abram ojts tkupëky ijxtëm ja Sarai y'ënë'ëmxëtyën. 3Ojts ja Abram tmëët'aty ja Agar, kom majk jëmëjt ma ënäty jam Canaán të jyä'tyën. 4Ko ja Abram tmëët'ajty ja Agar, ja Agar ojts wyi'imy u'unk mëët. E ko nyäjya'awëyë u'unk mëët, ka'ap ojts t'ëkmëj'ijxnë ja wyintaj. 5Ënät ja Sarai t'ënëmaay ja nyiye'etyëjk Abram:
Mijts poky mëët'ajtyp koos yë Agar ka'ap xy'ëkmëj'ijxnë. Ëjts mijts kë'ëm të nmo'oy ets xymyëët'atëty ijxtëm jeexyë xytyo'oxytyëjkëtyën. E ko ënät nyäjyawëty u'unk nyëkëjxm'ajtyp, mëj këjxm nyäjya'awënë. Tios ënät ëna'anëp, pën yë poky myëët'ajtyp, pën ëjts ëkë mijts.
6Tä ja Abram y'ëtsooy ja tyo'oxytyëjk:
Yë mtuunpë mijts mkë'ë'am'ajtyp, mijts mnija'ap wi'ix xytyuna'any.
Ënät ja Sarai tukjoot'anpëjky ja Agar ets koonëm tyajkeky. 7Tëë ënäty yë Agar yë të'ëts'it tpëjknë ko ojts tu'uk yë Tios tsyajpjotmëtë kukäjpxy myëkäjpxyë, jam winkon ma tu'uk nëëwookyën, jä'ä xyëëwajtyp Shur, 8ets yajtëëwë:
Agar, mëti'ipë tuunpë'ajtëpën yë Sarai. ¿Maa jëtu'un mtsoony? ets ¿maa jëtu'un mnëjkxy?
Ënät ja Agar y'ëtsooy:
Yë'ëjës nkukekpy yë nwintajës Sarai.
9Tä ojts ja Tios kyukajpxpë y'ënë'ëmxëty:
Wimpit jatëkok ma të mtsoonyën, ma mwintajën Sarai tyëjkën ets mëmëtow, pën tii mtuk'ënä'ämëp.
10Tyaa ja Tios kyukajpxpë ojts näjyëtu'un jyaakënë'ëmxëty:
Ëjts nyajmayëjäämpyës yë m'u'unk m'ëna'k,
ets m'ok'u'unk m'ok'ëna'k,
jëtu'un ijxtëm ka'ap pën tmëtyoowta'ajëtyën.
11Mijts u'unk maay mnëkëjxm'ajtyp,
ko myinëty jya'tëty naaxwiiny jä'ä xyëëwmo'ojëty Ismael,
jä'ä ko Tios tëë tmëtoow'ity yë mjë'ëyën myaxën.
12Jëtu'un nëjkx y'in'aty tä jëyujkën, mëti'ipë mëk inën.
Tsip tunëp oy tyimpënëty mëët,
ets tu'kë'ëyë tsiptuna'antëp mëët yë'ë.
Ja jyëën tyëjk ta'tspëky tyaj'itëty,
oy ja jyiiky myëku'uk kya'oyjyawëtëty.
13Yë Agar, yë'ë ënäty Tios mëët të myëtyä'äky, paaty ojts txëëwmo'oy: Tios mëti'ipë winë y'ijxypyën tyuunpyën, jëtu'un nyämyä'äy nyätyajxëty: Tiosës kë'ëm të xytyim'ixy, e tyamës je'eyëm njaakjuuky'äty. 14E paaty näjyëtu'un jampë ja nëëjut txëëwaty: Ja nëëjut mëti'ipë juukyën ets xy'ixës. Ya'atë nëëjut jam yajpaaty itkujky ma Cadés mëët yë Béred nyäpyäätyë.
15Ënät yë Agar tu'uk yë u'unk tyajmëxu'unk'ajty, Abram mëët t'u'unk'aty. Jä'ä ojts txëëwmo'oy Ismael. 16Majkta'px tëtujk ënäty yë Abram yë jyëmëjt ko myëxu'unk'ajty yë Ismael.
Currently Selected:
Génesis 16: QUETZMIXE
Highlight
Share
Copy
Want to have your highlights saved across all your devices? Sign up or sign in
Biblia en Mixe de Quetzaltepec, Oaxaca, México © Sociedad Bíblica de México, A.C., 2013. Active Translation in Process
