Génesis 35
35
Tios tkënu'kxy yë Jacob jam Betel
1Ënät yë Tios t'ënëmaay yë Jacob: Pëtë'ëk ets nëjkx jam mtsëënë Betel, jam xy'oytyunëty tu'uk yë wintsë'këntyakn, mëti'ipë Tios jyä'ä'atëpën, ma ojts nyänyikëxë'ëkyën ma mijtsën ko ënäty ja m'ajty Esaú xykyuke'eky. 2Ënät ja Jacob ja y'u'unk y'ëna'k t'ënëmaay ets tu'kë'ëyë jënu'un ënäty mëët tsyëënën jyuuky'ätyën:
Yajpëtsëmtë tu'kë'ëyë jënu'un xytyijtën Tios ets ka'apë tiosëtyën, tsi'iwtë xëtstë ets jääntëkatstë yë mwitëty mtujkxyëty. 3Jam tyam nja'amëty Betel, maas tu'uk yë wintsë'këntyakn n'oytyuna'anyën etsës yë Tios nwintsë'ëkëja'any mëti'ipës ojts xypyutëkën ma ënäty mon tuk nyajpaatyësën ets mëti'ipës xëmë të xyjyämyëët'atyën oyës maa nnaxy ntëkë.
4Tä tukkë'ëtëjkëtyääytyë ja Jacob, tu'kë'ëyë mëti'ipë ënäty ka'ap tiosëtyën ets tyajjënajktaaytyë ja tyatsktëyëty, jam ojts ja Jacob tnitajta'ay ma tu'uk yë xoj'ëjxën, jam winkon Siquem. 5Ko yë Jacob tsyo'ontë jam ma kajpnën mëët tu'kë'ëyë y'u'unk y'ëna'k y'u'unk tyo'oxytyëjk ets tu'kë'ëyë jënu'un ënäty winë tmëët'atyën, ënät ja ja'ayëty tsyë'këtyaktë, mëti'ipë jam kukajpnajtëpën, paaty ojts ka'ap twinmaytyë tpaatsoontëty ja Jacob ets mëët tu'kë'ëyë ja jyä'äy.
6Yë Jacob ets mëët tu'kë'ëyë ja'ayëty mëti'ipë ënäty mëët y'ityën, xëëny jam jya'ajtë kajpnjotm ma txëëwatyën Luz, mëti'ipë näjyëtu'un yajtijpën Betel jam Canaán naaxjotm. 7Tä ojts tu'uk tyaj'oyë yë wintsë'këntyakn ets jä'ä txëëwmooy El-betel, paaty jëtu'un txëëwmooy jä'ä ko jam ojts yë Tios t'ixy, ko ënäty ja y'äjty tkuke'eky. 8Jam ojts y'ooky ja Débora, mëti'ipë ënäty ja Rebeca të kyëwent'atyën, tääts tyajnaaxtëjkëy ma tu'uk yë xoj'ëjxën jam Betel. Jä'ä ojts yë Jacob txëëwmo'oy ja jampë ja it naaxwiinyëtë Ja xoj ma ja'ay ya'axtën.
9-10Ko ojts yë Jacob wyimpijnë Padán-aram, ënät yë Tios mëët jatëkok nyäpyäätyë ets ojts tkënu'kxy mëët ya'atë aaw ayuk:
Mijts jä'ä mxëëwajtyp Jacob,
ka'ap tyam jëtu'un xy'ëkxëëwatanë.
Tyam jä'ä mxëëw'atäämpy Israel.
Ko ja Tios ojts ja xyëëw yajtëkajtsxëty, 11ënät ojts y'ënë'ëmxëty:
Ëjts jëtu'un Tios, mëti'ipë mëk'ajtën mëëtën.
Mëët'atäämpy yë m'ok'u'unk m'ok'ëna'k nimay.
Ma mijtsën may yë ja'ay pyëtsëma'any
ets maynyaax maykyajpn;
ma mijts yë m'ok'u'unk m'ok'ëna'kën
pëtsëmëp näjyëtu'un mëti'ipë itëpën yajkutujkpë,
mëti'ipë ënä'ämëpën ma nyaax ma kyajpnën.
12Yë it naaxwiinyëtë mëti'ipë të nmo'oyënës yë Abraham
ets Isaac, näjyëtu'un mijts tyam nmo'oy,
e nmo'ojäämpyës näjyëtu'un yë m'ok'u'unk m'ok'ëna'k.
13Ko ja Tios ojts tsyo'onë ma mëët ja Jacob të kyäjpxy të myëtyä'äkyën, 14ënät ojts tu'uk yë tsaa tyajtënaakyukë ma ja it naaxwiinyëtën, ma ënäty ja Tios të myëkäjpxyën, tä tmooy yë oyajtën ets tuknija'axy yë on mëët yë tsatym nyëë tëëpë nyimaanaxyën, jam ma ja tsaajën mëti'ipë ënäty të tyajtënaaykyukën. 15Ënät ojts txëëwmo'oy ja it naaxwiinyëtë Betel.
Raquel ookanëp
16Ënät ojts nyëjkxtë ma it naaxwiinyëtë txëëwatyën Betel, jëkäm wäänjaty wyi'imy yë Betel mëët yë Efrata, ko ojts yë Raquel yë u'unk maay tyajminy naaxwiiny, tsip ojts tyajmëxu'unk'aty. 17Ma ënäty jëtu'un oy mëk tsyipëtyën, ënät ojts y'ënë'ëmxëty ja ja'ay mëti'ipë ja'axpën: Këtii mtsë'ëkëty, tëë u'unk maay xyajminy xyajja'ty naaxwiiny ye'etyëjkpë. 18Yë Raquel tim o'këtaknëp ënäty jamnë, ko ojts jyaak mëkxejy, ënät tjaakxëëwmooy ja u'unk Ben-oni, e yë tyeety jä'ä xyëëwmooyë Benjamín.
19Jëtu'un ojts yë Raquel y'ooky tyëkoy ets jam nyaaxtëjkëy tu'u'am, ma ja Efrata y'itjotmën, mëti'ipë tyam txëëwajtnëpën Belén. 20Jam ojts tu'uk yë potsy tyajpëtë'ëky yë Jacob, ma ënäty ja tyo'oxytyëjk Raquel të nyaaxtëkën, tyampaat ja potsy je'eyëm jam y'ity mëti'ipë tyukja'amyäjtstëp yë Raquel ma ojts nyaaxtëkën.
21Yë Israel ojts tyu'uye'ey'ëti'itsy ets ojts jam jyä'ty ma ja mëjpotsy txëëwatyën Edar, jam ojts wäänë tu'ktsojkyë y'ity. 22Jam ënäty yë Israel të tsyënaaytyaknpëjknëtë ko yë Rubén ojts tmëëtko'knë yë Bilhá, mëti'ipë ënäty ja tyeety të tmëmäjtsk to'oxytyëjk'atyën. Ko yë Jacob tnija'awëy ko ënäty jëtu'un yë Rubén të y'ëti'itsy, ënät ojts yajxon jyantyjyoot'anpëky.
Yë Jacob yë y'u'unk y'ëna'këty
Yë Jacob yë y'u'unk y'ëna'këty nimajkmäjtsk ojts y'itë. 23Mëti'ipë y'u'unk'ajtën mëët yë Lea, jä'ä xyëëwajtë Rubén, ja kä'äxkopk, ok myëxu'unk'ajtë Simeón, Leví, Judá, Isacar ets Zabulón. 24Mëti'ipë y'u'unk'ajtën mëët ja tyo'oxytyëjk Raquel, jä'ä xyëëwajtë José ets Benjamín. 25Mëti'ipë y'u'unk'ajtën mëët ja Bilhá, ja Raquel ja tyuunpë, jä'ä xyëëwajtë Dan ets Neftalí. 26E mëti'ipë y'u'unk'ajtën mëët ja Zilpá ja Lea ja tyuunpë, jä'ä xyëëwajtë Gad ets Aser. Ya'atë jëtu'un y'u'unk'ajt yë Jacob mëti'ipë ojts jam Padán-aram myintë jya'tën.
Ko yë Isaac y'o'ky
27Ënät yë Jacob ojts yë tyeety Isaac tninëjkxy jam Mamré, ma ënäty tu'uk ja kajpn txëëwatyën Arbá ëkë Hebrón. Jam ma ënäty të tsyëënën yë Abraham ets Isaac. 28Jä'ä ënäty yë Isaac yë jyëmëjt mëko'px ja majkta'px ko ojts y'o'knë. 29Mëjja'ay yë Isaac ojts y'o'knë tyëkooynyë, ja nimäjtskpë ja y'u'unk ojts yajnaaxtëkëty, Esaú ets Jacob.
Currently Selected:
Génesis 35: QUETZMIXE
Highlight
Share
Copy
Want to have your highlights saved across all your devices? Sign up or sign in
Biblia en Mixe de Quetzaltepec, Oaxaca, México © Sociedad Bíblica de México, A.C., 2013. Active Translation in Process
