Génesis 39
39
José ets ja Potifar tyo'oxytyëjk
1Ko ojts yë José yajmënëjkxnë Egiptë, tu'uk yë ja'ay mëti'ipë ënäty jam tsënääpyën Egiptë, Potifar xyëëwajtyp, mëti'ipë ojts yë José jyuyën ets näjyëtu'un wiinkëtypë ja ja'ayëty. Yë Potifar wintsën ënäty y'ity ma yajkutujkpën ets yë'ë ënäty nyikopk'ajtyp näjyëtu'un ma ja yajkutujkpë ja kyëwent'ajtpëtëjkën. 2Yë Tios yë'ë ënäty mëët yajpaaty yë José ets José janty'oy ënäty tyuny ma jam y'ityën ma ja wyintsën ja tyëjkën. 3Yë wyintsën, ko ojts t'ixy, ko ja José Tios mëët yajpaaty, paaty winë aak'oy wyimpëtsë'ëmxëty. 4Ojts ja José tuk'oy'äty ets oy tsuj jyawëtëty ja wyintsën, tä ojts pyëjktä'äkyë ets tkëwent'atëty ja wyintsën. Yë'ë ojts yajtuknipëky tu'kë'ëyë winë mëti'ipë ja wyintsën myëët'ajtypyën ma jyëën tyëjkën ets kyuwits kyukëyëty. 5Jä'ä xëëw ma potifar ojts tukmë'ijxmajtsëtyä'äyën yë José winë ma tyëjkën, ënät yë Tios ojts mëk kyënu'kxyë jëtu'un ijxtëm ma tyëjkën ets ma kyam tyu'ujën. 6Yë José yë'ë ënäty kyëwent'ajtääpy tu'kë'ëyë winë, paaty yë Potifar ka'ap nitii tmëmay tmëtajy, jotkujk je'eyë kyäy y'uuky.
Yë José janty'oy ënäty kyëxë'ëky ets aak tsojkëyëp ja'ay. 7Jëtu'un tu'kxëëw tu'kjëmëjt ja wyintsën yë tyo'oxytyëjk ojts ja José janty'oy t'ixy, ënät y'ënëmaayë:
Mëët'ijtkës.
8José ka'ap tkupëjky ets t'ëtsooy:
Ëk'ix yë nwintsënës yë'ëjës të xytyukmëwë'ëmta'ay winë mëti'ipëjaty myëët'ajtypyën ets koos yaa n'ity, ka'ap mëpaat tii xymyëmay xymyëtajy. 9Ma ya'atë tëjkën ni pën yaa kyajëtu'unëty ijxtëm ëjtsën, yë nwintsënës ka'apës tii xytyukmëwintuk'ooky; e mijtsyë tëy jëtu'un ka'ap mëpaat nmëmay nmëtajy, jä'ä ko mijts mto'oxytyëjk'atyë e jëtu'un ¿wi'ixës ko ëxëëkpë mtunëty ets nmëpokytyunëtyës yë Tios?
10Oy ënäty ja wyintsën ja tyo'oxytyëjk tyäty myäy tyäty tyäjy ko myëëtko'knëtëty ets yë'ë timmëët'atëtëp, ja José ka'ap ja tunyë këwentë. 11-12Tu'uk xëëw ojts yë José tyëkë tëkoty ets ja tyuunk tyaj'apaatëja'any, e kom ka'ap ënäty jap pën, ënät ojts ja to'oxytyëjk myätsyë ma ja nyijänën ets y'ënëmaayë:
Mëët'ijtkës.
Yë José ojts pyëtsimy pëyi'ikyë ets t'ëxmajtsy ja nyijän ma ja to'oxytyëjkën. 13Ko t'ijxy ko tëë ja José ja wyit tyukmë''ëxmatsëty kyë'ëkëjxm, 14ënät tmëkajpxmujky ja tyuunpë, mëti'ipë ënäty jamëtyën ets t'ënëmaay:
Ëk'ixtë, ja hebreo mëti'ipë wyoowmiinën ja nniye'etyëjkës, je'eyë xynyëxik xytyukxiknës. Tëë xynyitëkës ntëkoty ets atsip të xyjyamëët'ita'anyës, e ëjts ënetyës të nyujkyä'äxy. 15Ko jëtu'un të tmëtoy nyujkyä'äxyës amëjaaw, tääts të pyëtsimy pëyi'ikyë, ix tyaa ja wyit jëtu'unyë të tnipëyë'ktu'uty.
16Ënät ojts ja José ja wyit tpëjkë'kë, koonëm jyä'äjty ja wyintsën ma ja tyëjkën. 17Tä näjyëtu'un tukmëmëtyäky ets t'ënëmaay:
Yë tuunpë hebreo, mëti'ipë ojts xyajja'tyën, yë'ë jap të tyëkë ntëkotyës etsës të xyjyamëët'ita'any atsip. 18E ko të nyujkyä'äxyës janty mëk, tääts të pyëtsimy pëyi'ikyë ets yaa ja wyit të tnike'eky. 19Jëtu'unës yë mtuunpë të xytyuny.
Ënät ja José ja wyintsën jyänty joot'anpëjky, ko jëtu'un tmëtooy ja tyo'oxytyëjk myëmëtä'äkyë. 20Jëtu'un ojts tmatsy ja José, tä ni'ënä'ämëy ko tyajtëkëtëty pujxn tëkoty, ma ënäty jap ja yajkutujkpë ja tyuunpëtëjk tsumy y'itën. Oy ënäty të y'ëkyajtsumy 21yë José je'eyë ja Tios mëët y'ity ets xëmë pyutëk pyupetyë jap pujxn tëkoty, e jëtu'un'äämpy yë José ojts tmëmëtä'äky ets ja pujxntëjkëwent'ajtpë oy tsuj jyawëtëty, 22tä ojts yë'ë tyuknipëkyë ets ja pujxntëjkja'ay tkëwent'atëty. José yë'ë ënäty nyi'ënä'ämëp winë mëti'ipë tyuntëpën ja pujxntëjkja'ayëty, 23ja pujxntëjk ja nyiwintsën ka'ap ënäty jyäty tyimkopkpëkyëty t'ixëty pën tëë ja José winë oy tuny. Jä'ä ko ja Wyintsën Tios yë'ë ënäty mëët'ajtëp ets José aak'oy winë wyimpëtsë'ëm jyëjpëtsë'ëmxëtëty.
Currently Selected:
Génesis 39: QUETZMIXE
Highlight
Share
Copy
Want to have your highlights saved across all your devices? Sign up or sign in
Biblia en Mixe de Quetzaltepec, Oaxaca, México © Sociedad Bíblica de México, A.C., 2013. Active Translation in Process
