MATEO 16
16
Te fariseoetik sok te saduseoetik ya skꞌan yilik seña smilagro te Jesuse
1Ay fariseoetik sok saduseoetik ba yilik te Jesuse yuꞌun ya skꞌan yilbeyik yoꞌtan. La skꞌanbeyik te yauk spas junuk seña smilagro te ya yakꞌ ta ilel te talem ta stojol Diose. 2Pero la sjakꞌbe te Jesuse:
—Te jaꞌexe te kꞌalal malix kꞌaal ya awalik: “Kꞌepel kꞌinal pajel”, xchaex, yuꞌun ya awilik tsaj te chꞌulchane. 3Sok te kꞌalal sakubix a te kꞌinale ya awalik: “Ora to ya yakꞌ jaꞌal yuꞌun tsaj te chꞌulchane sok ay tokal”, xchaex yuꞌun. Te jaꞌexe cheb awoꞌtanik. Ya anaꞌik te tut yilel te tiempo yuꞌun te chꞌulchane, pero ¿tuꞌun te ma xꞌanaꞌik yilel te señaetik te yipal ta kꞌoel ta pasel te ora to? 4Te genteetik to te ma tsaꞌamuk yoꞌtanik sok te ma junuk yoꞌtanik ta stojol te Diose, ya skꞌan yilik seña. Pero ma xꞌaꞌbot yilik. Jaꞌ seña ta stojolik kꞌoem te Jonas te antibo jꞌalwanej yuꞌun te Diose —xchi.
Te Jesus la sjileslan y bajt.
Te tut a te levadura yuꞌun te fariseoetike
5Te kꞌalal kꞌaxik bael ta jejch mar te jnopojeletike, ma snaꞌ a yichꞌ bael yotik. 6Te Jesuse la yaltalanbe:
—Ila me abaik yuꞌun te levadura yuꞌun te fariseoetike sok te saduseoetike —xchi.
7Te jnopojeletike jicha lijk yalbe sbaik yuꞌun:
—Jaꞌ yuꞌun te maꞌ jnaꞌtik tal kotike —xchiik.
8Te Jesuse la snaꞌbe sluwaril te tuti lijk yalbe sbaike, y la yaltalanbe:
—¿Tuꞌun ya awalbe abaik te maꞌyuk awichꞌoj awotike? Maꞌyuk lek xchꞌuunel awoꞌtanik te jaꞌexe. 9Yuꞌun ma to kꞌoemuk ta awoꞌtanik. ¿Meꞌn makꞌ anaꞌikix te joꞌpejch waj aꞌ weꞌik a te joꞌmil ta jtul winketike? ¿Sok meꞌn chꞌayix ta awoꞌtanik te jayeb xan moch te la spas sobraile? 10¿Sok meꞌn chꞌayix ta awoꞌtanik te jukpejch waj te la yichꞌ makꞌlinel a te chanmil ta jtule, y jayeb xan moch anoj te sobraile? 11¿Tuꞌun te ma xkꞌot ta awoꞌtanike te ma jaꞌuk waj te la kalbeyex skꞌoplale? Ila me abaik yuꞌun te slevadura te fariseoetike sok te saduseoetike —xchi te Jesuse.
12Jich a snaꞌik te jnopojeletik te ma jaꞌuk a yal te ya yil sbaik yuꞌun te levadura yuꞌun te pane. Jaꞌ a yal te ya skꞌan ya skanantay sbaik yuꞌun te tut ya yakꞌ ta nopel te fariseoetik sok te saduseoetike.
Te jPedroe la yal ta jamal te jaꞌ Cristo te Jesuse
13Te kꞌalal kꞌot ta estado yuꞌun Cesarea Filipo sbiile, te Jesuse la sjojkꞌobey te jnopojeletik yuꞌune:
—¿Tut ya yalik ya awaꞌiyik te genteetike? ¿Machꞌa ya skuyik a te Nichꞌanile? —xchi. 14La yalik:
—Ay ya yalik te jaꞌat Juanat te Akꞌichꞌjaꞌe; te yane ya yalik te jaꞌat te jꞌEliasate. Sok te yane ya yalik te jaꞌat te Jeremiasate o yan antibo jꞌalwanej yuꞌun te Diose —xchiik.
15Te Jesuse la sjojkꞌobe:
—Jal tsꞌin jaꞌexte, ¿machꞌa ya akuyikon a? —xchi.
16La sjakꞌ te Simon Pedroe:
—Jaꞌat Cristoat te Xnichꞌanat te kuxul Diose —xchi.
17La yal te Jesuse:
—Ben me tsaꞌam alekil jaꞌat Simon te xnichꞌanat te Jonase. Porke ni jtuluk winik te la yaꞌbeyat anaꞌbe sluwar. Jaꞌ a yaꞌbeyat anaꞌ sluwar te jTat te ay ta chꞌulchane. 18Joꞌon ya kal te jaꞌat jPedroat, te pꞌej ton kꞌoemat te ya kakꞌ ipajuk a te jchꞌuuneletik kuꞌune. Te jchꞌuuneletik kuꞌune ma xjuꞌ te ya stsalot yuꞌun yip te lajele. 19Joꞌon ya kaꞌbeyat te syaweul te ba ay ta mantal te jTatik Dios te ay ta chꞌulchane. Te tut ya akom ta pasel ta balmilale, jich albilix skꞌoplal ta chꞌulchan abi. Sok te tut ya awakꞌ ta pasel ta balmilale, jich albilix skꞌoplal te chꞌulchan abi —xchi te Jesuse. 20Sok la spas ta mantal te jnopojeletik yuꞌune te ma me machꞌa ya yalbe te jaꞌ te Cristoe.
Te Jesuse la yal te tut ya xchame
21Jaꞌ yorail a te Jesuse lijk yalbe te jnopojeletik yuꞌune te ya xbajt ta Jerusalene, y te moletik sok te statal-saserdoteetik sok te maestroetik yuꞌun te mantaliletike ya me yaꞌbeyik xkꞌax bayal swokol. Sok la yal te tutꞌil ya xba mileke, pero ta yoxebal kꞌaal ya xchaꞌkusesot tal.
22Jich te jPedroe la spit bael chꞌinuk te Jesuse, jicha ba yalbe:
—Kajwal, manchuk jichuk ya skꞌan te Diose. Manchuk ya xkꞌot ta pasel ta akuenta —xyut.
23Te Jesuse la sujtes sba, la yalbe te Pedroe:
—Kꞌeja aba ta jtojol, Satanas. Ma me xꞌamakon. Maꞌyuk ta awoꞌtan te tut ya skꞌan yoꞌtan te Diose. Jaꞌ nax ay ta awoꞌtan te tut ya skꞌan yoꞌtan te genteetike —xyut.
24Te Jesuse jich a yalbe te jnopojeletik yuꞌune:
—Te machꞌa ya skꞌan yakꞌ sba ta jnopojel kuꞌune, aꞌ me skoltay sba ta yoꞌtan. Aꞌ me xkuch skrus kꞌoem. Aꞌ me stsꞌakliyon. 25Jich te machꞌa ya xkꞌuxutay sba sok te xkuxlejale ya me xchꞌay sok te xkuxlejale. Yan te machꞌa ya xchꞌay xkuxlejal teme joꞌon ta jkaje, ya me sta xkuxlejal stukel. 26¿Tut ya xlokꞌ awuꞌun teme ya awuꞌunin spisil te balmilale teme ya xchꞌay te akuxlejale? ¿Jayeb ya xjuꞌ ya atoj a yuꞌun te akuxlejale? 27Jich te Nichꞌanile ya me xtal sok slekilal te jTate sok te xchꞌul angeletik yuꞌune. Ya me xtal kaꞌbe stojol juju-tul chikan te tut spasojike. 28Jamal ya kalbeyex ay machꞌatik te liꞌ ayik to te ma to xchamik ae jaꞌ to teme ya yilik ya xtal te Nichꞌanile jich tutꞌil rey —xchi te Jesuse.
Currently Selected:
MATEO 16: AMANNT
Highlight
Share
Copy
Want to have your highlights saved across all your devices? Sign up or sign in
Nuevo Testamento Tzeltal de Amatenango © Sociedad Bíblica de México, 2006.
