MATEO 22
22
Seña-kꞌop te kꞌin yuꞌun nujpunel
1Te Jesuse lijk xan yaltalanbe ta seña-kꞌop. Jich a yal:
2—Te tutꞌil ya xkꞌot ta ajwalinel te Diose, jich kꞌoem te tutꞌil jtul rey te la spas kꞌin yuꞌun te ya xnujpun te xnichꞌane. 3La stikon bael yaj-mantal te ya xba yikꞌtalan tal te machꞌatik ikꞌtalanbil ta nujpunele. Pero ma skꞌan a laj tal. 4La stikon xan bael yan yaj-mantal. La yaltalanbe bael: “Albeyaik te machꞌatik majanlanbile: ‘Chapalix kuꞌun te weꞌelile. La kakꞌix ta milel te toroetik kuꞌune sok te jujpꞌen wakaxetike. Spisil chapalix. Jaꞌ yuꞌun laꞌik me ta ora ta yilel te jnujpunele,’ uta me tal”, xchi te reye.
5“Te machꞌatik majanlanbile maꞌ chꞌuunik te ikꞌele. Te jtule bajt ta slum. Te yane bajt ta chonbajel. 6Te yane la stsakik te jmantaletik yuꞌun te reye, la yilbajinik y la smilik.
7“Te reye ma tebuk a ilin yuꞌun. Jich a stikon bael soltaroetik yuꞌun ba smilik te jmilawetike sok la xchikꞌbeyik te slumalike.
8“Te reye la yalbe tsꞌiin te yaj-mantale: “Chapalix spisil te kꞌine, pero te machꞌatik majanlanbile chikan te ma skꞌan a talike. 9Jaꞌ yuꞌun, baanik ta mukꞌul kayailtik, ikꞌaik tal ta yilel nujpunel spisil te machꞌa ya ata abaik sok teꞌae”, xyut bael. 10Te jꞌmantaletike lokꞌik bael ta kayailtik, la yikꞌik tal spisil te la sta sbaik soke. Kapal a talik sok te machꞌatik ma lekuke sok te machꞌatik lekike. Jich a noj ta yulaꞌ te snae.
11“Kꞌalal och yil yulaꞌ te reye, la yil jtul winik teꞌa te ma jaꞌuk slapoj te kꞌuꞌul-pakꞌal yuꞌun jnupunele. 12La yalbe: “Kamigo, ¿Tutꞌil a ochat tal liye te maꞌ jeltayejuk tal te akꞌuꞌ-apakꞌe?” xyut. Te winike maꞌ kꞌopoj yuꞌun.
13“Te reye la yalbe te machꞌatik ya xchapik te mexae: “Chukbeyaik yok skꞌab, chꞌojaik lokꞌel ta ijkꞌal kꞌinal te ba jwerae. Teꞌ ya xkꞌo yokꞌetay sba a sok teꞌ ya xkꞌo skꞌuxilan ye a”, xyut.
14“Porke bayal te machꞌatik ya xꞌikꞌtalanot tale, pero ma bayaluk te machꞌa tꞌujtalanbile —xchi te Jesuse.
Tutꞌil ay sluwar te tojemaletike
15Ta patil te fariseoetike ba snop skꞌopik te tut ya yut ya xkꞌax skꞌop te Jesuse yuꞌun jich me ya stabeyik smul a. 16Jich a stikonik chaꞌoxtul te jnopojeletik yuꞌun te fariseoetik sok chaꞌoxtul te machꞌa jun yoꞌtan sba sok te Herodese. Jicha tal yalbeyik te Jesuse:
—Maestro, ya jnaꞌtik te puru batsꞌi jich te tut ya awale, sok te sluwaril ya snojpeswanat te tut ya skꞌan te Diose. Maꞌyuk machꞌa ya xiꞌat ta kꞌop yuꞌun te genteetike. Porke ma tsabiluk nax awuꞌun te machꞌa ya awakꞌ ta jkuentae. 17Albotik kaꞌitik te tut kꞌoem ta awoꞌtan yuꞌun te mantaliletike. ¿Me ya xjuꞌ ya jtojtik tojemal yuꞌun te Cesare o ma xjuꞌ? —xchiik.
18Te Jesuse la snaꞌ te tutꞌil ma tsaꞌamuk te yoꞌtanike. Jich a yaltalanbe:
—Ma lekuk te awoꞌtanike. ¿Tut yuꞌun te ya awilbikon koꞌtane? 19Akꞌbikon tal kil sejpuk te takꞌin te ya atojik a te atojemalike —xchi. Jich a yaꞌbeyik yil jun denario-takꞌin. 20Te Jesuse la sjojkꞌolanbey:
—¿Machꞌa slokꞌol ya awilik te liꞌ aye sok machꞌa sbiil te liꞌ tsꞌibabile? —xchi.
21La yalik:
—Jaꞌ te mukꞌul rey Cesare —xchiik.
Te Jesuse la yaltalanbe:
—Teme jaꞌ yuꞌun te Cesare, aꞌbeyaik me abi. Sok teme jaꞌ yuꞌun te Diose, aꞌbeyaik me euk —xchi te Jesuse.
22Te kꞌalal la yaꞌiyike, lom cham a yaꞌiyik yuꞌun. La sjilesik y laj bajtik.
Te Jesus jojkꞌobot te tutꞌil ay te chaꞌkuxele
23Mismo kꞌaal a ay chaꞌoxtul saduseoetik tal skꞌoponik te Jesuse. Te saduseoetike kꞌoem ta yoꞌtanik te makꞌ chaꞌkux tal te animaetike. Jich a sojkꞌobeyik sluwaril tsꞌin kꞌop to:
24—Maestro, la yal jilel te Moisese: “Teme cham jtuluk winik te maꞌyuk jil xnichꞌane, teme maꞌyuk jilel yuntikil soke, aꞌ me yikꞌ yinamin te yijtsꞌine, yuꞌun jich me ay stsꞌumbal ya xkꞌot a te anima-sbankile”, xchi me. 25Ay jicha kꞌot ta pasel ta koliltik: Ay juktul winketik te jun nax smeꞌ-statike. Te bankilale nujpun, cham, y maꞌyuk jil tuluk xnichꞌan. La yaꞌbe jilel yinamin yitsꞌin te yiname. 26Jicha kꞌot ta skuenta euk te xchebal ijtsꞌinale, sok te yoxebale. Jicha spastalanik ta sjuktululik te la yinaminik te antse. 27Ta patil cham euk te antse. 28Jaꞌ ya jojkꞌotik: ¿Machꞌa yinam ya xkꞌot te antse ta sjuktululik te kꞌalal ya xchaꞌkuxik tale? Komo spisilik a yinaminik te antse —xchiik.
29Te Jesuse la sjakꞌtalanbe:
—Te jaꞌexe jowiyemex ta kꞌop yuꞌun maꞌ ba kꞌoem ta awoꞌtanik te tut tsꞌibabil jilel ta Sjun te Diose sok maꞌyuk ta awoꞌtanik te tutꞌil ay spoder te Diose. 30Te kꞌalal ya xchaꞌkuxik tal spisil te animaetike, te winketike sok te antstike makꞌ xnujpunikix a. Yuꞌun jich ya xkꞌot tutꞌil te chꞌul angeletik te ayik ta chꞌulchane.
31Te tutꞌil ya ajojkꞌoyik te ya xchaꞌkux te animaetike, ¿Meꞌn ma awilojikuk ta Sjun Dios te tut yaloj jilele?: 32“Joꞌon Dioson yuꞌun te jꞌAbrahame te jꞌIsaake sok te Jacobe”, xchi me. Te Diose ma jaꞌuk Dios yuꞌun te machꞌatik chamenike, si jaꞌ Dios yuꞌun te machꞌatik kuxajtike —xchi te Jesuse.
33Te kꞌalal la yaꞌiybeyik sluwar te genteetike, lom cham a yaꞌiyik yuꞌun te tutiꞌ yakꞌ ta nopel te Jesuse.
Te mantal te ben tulan skꞌoplale
34La yaꞌibeyik sluwar te fariseoetik te tutꞌil tsalotix ta kꞌop te saduseoetike yuꞌun te Jesuse. Jich a stsob sbaik tal. 35Ay teꞌa jtul fariseo te maestro yuꞌun te mantaliletike la yilbe yoꞌtan te Jesuse y la sjojkꞌobe:
36—Maestro, ¿Tut mantalil te ben tulan skꞌoplal ta spisil yuꞌun te mantaliletike? —xchi.
37La yal te Jesuse:
—Jaꞌ i to: “Kꞌux me xꞌawaꞌiy ta awoꞌtan te Kajwaltik Diose sok spꞌejel awoꞌtan sok spisil akuxlejal sok spisil apꞌijil”, xchi me. 38Jaꞌ to ben tulan skꞌoplal, jaꞌ nail yuꞌun te mantaliletik. 39Sok ay te xchebal te pajal soke te ya yal: “Kꞌux me xꞌawaꞌi ta awoꞌtan te ajoy ta genteile, jich tutꞌil te kꞌux ya awaꞌi aba te jaꞌate”, xchi me. 40Te cheb mantaliletik to jaꞌ smukꞌul spisil te mantaliletik yuꞌun te jMoisese sok te tut yaloj te alwanejetik yuꞌun te Diose —xchi te Jesuse.
¿Machꞌa stsꞌumbal te Cristoe?
41Tsobolik to a te fariseoetike. Te Jesuse la sjojkꞌolanbe:
42—¿Tut xchaex yuꞌun te Cristoe? ¿Machꞌa stsꞌumbal ya akuyik a? —xchi.
La sjakꞌtalanik:
—Jaꞌ stsꞌumbal te rey Davide —xchiik.
43Te Jesuse la yaltalanbe:
—¿Tutꞌil ay te la yal te Davide: “Kajwal” xchi me, te jicha albot yuꞌun te Chꞌul Espiritue? Yuꞌun jich a yal te jDavide:
44“Te Kajwaltik Dios la yalbe te Kajwale: ‘Naklan ta jbatsꞌil jkꞌab jaꞌ to teme la kaꞌbeyat apuchꞌ ta tekꞌel te akontratake,’ xchi te Diose”, xchi me.
45Albikon cheꞌe: ¿Tutꞌil ay te jaꞌ stsꞌumbal jDavid te Cristoe? Te mismo jDavide la yalbe “Kajwal”, xchi —xyut te Jesuse.
46Pero ni jtul a juꞌ yuꞌun sjakꞌel jpꞌaluk te skꞌope. Te nax kꞌal a maꞌyukix tuti sjojkꞌobeyik a.
Currently Selected:
MATEO 22: AMANNT
Highlight
Share
Copy
Want to have your highlights saved across all your devices? Sign up or sign in
Nuevo Testamento Tzeltal de Amatenango © Sociedad Bíblica de México, 2006.
