MATEO 25
25
Seña-kꞌop te lajuntul aꞌchetike
1Sok la yal xan te Jesuse:
—Te tutꞌil ay ta ajwalinel te Diose, jaꞌ pajal sok te ay lajuntul aꞌchetik te la yichꞌik bael skantilik ta smaliyel ta be te jnujpunele. 2Ay joꞌtul te maꞌyuk spꞌijil yoꞌtanike sok ay joꞌtul te ay spꞌijil yoꞌtanike. 3Te machꞌatik maꞌyuk spꞌijil yoꞌtanike la yichꞌik bael skantilik, pero maꞌ yichꞌik bael spetrolioik yuꞌun ya snojesik a tem laje. 4Yan te machꞌatik ay spꞌijil yoꞌtanike la yichꞌik xan bael spetrolioik ta limeta sok la yichꞌik bael te skantilike.
5“Pero jalaj te jnujpunele. Lijkik ta nikubajel ta spisilik y och swayelik. 6Nopolix ol-ajkꞌubal a la yaꞌiyik tulan kꞌop: “Talix te jnujpunele. Laꞌ me taꞌaik bael”, xchi te kꞌope.
7“Spisil te aꞌchetik laj jajch. Lijk xchapik te skantilike. 8Te joꞌtul te maꞌyuk spꞌijil yoꞌtanike la yalbeyik te joꞌtul te ay spꞌijil yoꞌtanike: “Aꞌbotik chꞌinuk te apetrolioike yuꞌun ya skꞌan xtupꞌix te jkantiltike”, xchiik. 9Te aꞌchetik te ay spꞌijil yoꞌtanike la yalik ta spisilik: “Ma xjuꞌ, porke ma xjuꞌotik ekꞌa te joꞌotike ni te jaꞌexe. Jaꞌ lek baan manaik tal awuꞌunik te ba ya xchonote”, xyutik.
10“Pero baemik tal ta smanel spetrolioik a te joꞌtul aꞌchetik te maꞌyuk spꞌijil yoꞌtanike, jul te jnujpunele. Te joꞌtul aꞌchetik te chapalik sok skantilike la sjoyinik ochel te jnujpunel te ba ya spas kꞌine, y stsꞌusot te puertae.
11“Ta patil kꞌotik euk te tijk xan aꞌchetike. Jich a yalik: “Kajwal, Kajwal, jeꞌbotik te tiꞌpuertae”, xchiik. 12Pero la yal te jnujpunele: “Jamal ya kalbeyex ma jnaꞌbeyex abaik”, xchi.
13“Jaꞌ yuꞌun te jaꞌexe, kuxuluk me awoꞌtanik, yuꞌun ma xꞌanaꞌik tut ora ni te tut kꞌaalil ya xtal te Nichꞌanile —xchi te Jesuse.
Seña-kꞌop te talento-takꞌine
14Sok la yal xan te Jesuse:
—Te tutꞌil ay ta ajwalinel te Diose, jaꞌ pajal sok jtul winik te nopol xbajtix ta yan nasione. La yikꞌtalan tal te aꞌteletike, la yaꞌbe jilel skanantay te stakꞌine. 15Te jtule la yaꞌbey jilel joꞌeb talento-takꞌin, te yane la yaꞌbe cheb talento-takꞌin, sok te yane la yaꞌbe jun talento-takꞌin. Jaꞌ chikan te tut yilel ya xjuꞌ yuꞌun skanantayel te jujutule. Bajt tsꞌiin.
16“Jich te jꞌaꞌtel te la yichꞌ joꞌeb talento-takꞌine la spas xchonbajel a, y jolin xan joꞌeb talento yuꞌun stukel. 17Jich euk te machꞌa la yichꞌ cheb talento-takꞌine, jolin xan cheb talento yuꞌun euk. 18Yan te machꞌa la yichꞌ jun talento-takꞌine, ba sjokꞌbe xchꞌenal, la smuk ta lum te stakꞌin te yajwale.
19“Bayalix yuil a ta patil sujt tal te yajwalike. Lijk jojkꞌolanbek te jayeb a jolin yuꞌun te takꞌine. 20Jaꞌ nail a kꞌot te machꞌa stsakoj joꞌeb talento-takꞌine, y la yaꞌbe te yajwale joꞌeb talento-takꞌin te jolin yuꞌune. Jich a yal: “Kajwal, jaꞌat la awaꞌbon joꞌeb talento-takꞌin. Liꞌ me ay te joꞌeb xan talento te jolin kuꞌune”, xchi.
21“Te yajwale la yal: “Lek ay. Te jaꞌate lekil jꞌaꞌtelat sok ben jun awoꞌtan ta jtojol. Te tutꞌil ben jun awoꞌtan la akanantaybon te tuti kaꞌbeyat chꞌinuke, ya me kaꞌbeyat xan akanantaybon mas bayal. Laꞌ me, ochan, joyinaon ta lekilal”, xchi.
22“Ta patil kꞌot euk te machꞌa stsakoj cheb talento takꞌine. Jich a yal: “Kajwal, jaꞌat la awaꞌbon te cheb talento takꞌine. Liꞌ me ay te cheb xan talento-takꞌin te jolin kuꞌune”, xchi.
23“Te yajwale la yal: “Lek ay. Jaꞌat lekil jꞌatelat, sok ben jun awoꞌtan ta jtojol. Te tutꞌil ben jun awoꞌtan la akanantaybon te tuti kaꞌbeyat chꞌinuke ya me kaꞌbeyat akanantaybon mas bayal. Laꞌ me, ochan joyinaon ta lekilal”, xchi.
24“Kꞌalal kꞌot euk te jꞌatel te aꞌbot jun talento-takꞌine, jich a yal: “Kajwal, jnaꞌoj te tulan winikate. Yuꞌun jaꞌat ya akꞌaj te ba ma jaꞌukat atsꞌunoje. Sok ya atsob te ba ma jaꞌukat la awawe. 25Jaꞌa xiꞌon yuꞌun. Jich ba jmuk ta lum te takꞌine. Awil, liꞌ me ay to te tut kichꞌojbeyate”, xchi.
26“La sjakꞌ te yajwale: “Ma lekil jꞌaꞌtelukat, lom chꞌajat. Te jichuk ya anaꞌ te joꞌon ya jkꞌaj te ba ma joꞌukon jtsꞌunoje sok te jaꞌ ya jtsob te ba ma joꞌukon kawoje, 27jaꞌ yuꞌun jaꞌ lek te lauk awakꞌ ta majanel ta banko te takꞌine, yuꞌun teme sujton tale ya kichꞌbe sjol te jtakꞌin te jichuke”, xyut.
28“La yalbe te machꞌatik teꞌeyik aye: “Pojbeyaik te jun talento-takꞌin te yichꞌoje. Aꞌbeyaik te machꞌa yichꞌoj te lajuneb talentoe. 29Jich te machꞌa ay tut yichꞌoje, ya me xꞌaꞌbot xan sjoy. Jich me lom bayal ya xkꞌot te tut yichꞌoje. Yan te machꞌa maꞌyuk tut ay yuꞌune, ya me xpojbot te tut ay yichꞌoj chꞌinuke. 30Te jꞌatꞌel to te maꞌ tuune chꞌojaik lokꞌel ta ijkꞌal kꞌinal. Teꞌ me ya xkꞌo yokꞌetay sba a sok teꞌ me ya xkꞌo xkꞌuxilan ye a”, xchi te yajwalike.
Ya me yichꞌik tejkꞌanel ta stojol Cristo spisil ta jkaj te genteetike
31“Sok te kꞌalal ya xtal te Nichꞌanile, joyinbil ya xtal yuꞌun te chꞌul angeletike sok xojobil sok stsaꞌamul. Sok ya xjul snajkan sba ta ajwalil te ba ay te smukꞌul naktajibe. 32Spisil ta jkaj te genteetike ya me stsobtalanot tal ta stojol. Y ya me xatꞌalan bael jich tutꞌil te jkanan-karnerae. Jtijk ya yakꞌ te karnerae y jtijk ya yakꞌ te chiboetike. 33Ya me kakꞌ ta sbatsꞌil skꞌab te karneraetik kꞌoeme, yan te machꞌa chiboetik kꞌoeme ta xkꞌexom skꞌab ya yakꞌ stukelik.
34“Te ajwalile ya me yalbe te machꞌatik ay ta sbatsꞌil skꞌabe: “Laꞌik te jaꞌexe te ben tsaꞌam alekilik ta stojol te Jtate. Ochanik, ichꞌaik awaꞌtelik ta ajwalil te chapbil ta akuentaik kꞌalal ta slijkibal to tal te balmilal te la spas te Diose. 35Yuꞌun te kꞌalal ay a wiꞌnajone, la awaꞌbikon jweꞌel. Sok te kꞌalal takin koꞌtan ayone, la awaꞌbikon kuchꞌ jaꞌ. Sok te xoyeton la awile, la awikꞌon ochel ta ana. 36Sok te maꞌyuk lek jkꞌuꞌ-jpakꞌ la awilike, la awaꞌbikon jkꞌuꞌ-jpakꞌ. Sok te tutꞌil ayon ta chamele, tal awilikon. Sok te tutꞌil ayon ta prexoe, tal awilikon teꞌa”, ya me yut.
37“Jich te machꞌatik ben lek yoꞌtanike ya sjojkꞌoyik: “¿Kajwal, tut ora te la kiltikat te ayat ta wiꞌnale te la kakꞌtik aweꞌele? ¿Sok tut ora te takin awoꞌtan la kiltik te la kakꞌtik awuchꞌ jaꞌe? 38Sok ¿tut ora a kiltikat te xoyetat te la kikꞌtikat ochel ta jnatike? Sok ¿tut ora te maꞌyuk akꞌuꞌ-apakꞌ la kiltik te la kaꞌbetikate? 39¿Sok tut ora a kiltikat te ayat ta chamel sok te ayat ta prexo te ba kiltikate?” ya me yutikon.
40“Ya me yalbe te ajwalile: “Jamal ya kalbeyex te tutꞌil jich la apasbeyik jtuluk te kermanotake te ben chꞌin yakꞌoj sbaike, joꞌon la apasbikon abi”, ya me yut.
41“Te ajwalile te nax a ya yalbe te machꞌatik ayik ta xkexom skꞌabe: “Kꞌeja abaik ta jtojol, jaꞌex te ma tsaꞌamukexe. Baanik te ba kꞌakꞌ te ma xtupꞌ sbajtel kꞌinal te chapbil te ba ya xkꞌot te pukuje sok spisil te angeletik yuꞌune. 42Yuꞌun te tutꞌil ya xwiꞌnajon la awile ma la awaꞌbikon jweꞌel, sok te tutꞌil ben takin koꞌtan aye ma la awaꞌbikon kuchꞌ jaꞌ. 43Sok te xoyeton la awile ma la awikꞌikon ochel taꞌ na. Sok te tutꞌil maꞌyuk jkꞌuꞌ-jpakꞌ la awile ma la awaꞌbikon. Sok te tutꞌil ayon ta chamele, sok te tutꞌil ayon ta prexoe, maꞌyuk a tal awilikon teꞌa”, ya me yut.
44“Jich me ya xlijk sjojkꞌoyik: “¿Ba kiltikat te ayat ta wiꞌnal, sok te ayat ta takin-tiꞌile, sok te xoyetate, sok te maꞌyuk akꞌuꞌ-apakꞌe, sok te ayat ta chamele, sok te ayat ta prexoe te maꞌ jkoltaytikate?” ya me yutik.
45“Te ajwalile ya me yalbe: “Jamal ya kalbeyex te tutꞌil ma jichuk la apasbeyik jtuluk te machꞌatik chꞌin yakꞌoj sbaike, joꞌonix ma jichuk la apasbikon abi”, ya me yut.
46“Jich me ya xbajtik ta wokol sbajtel kꞌinal. Yan te machꞌatik lek yaꞌtelike ya me xba kuxuyinikuk sbajtel kꞌinal —xchi te Jesuse.
Currently Selected:
MATEO 25: AMANNT
Highlight
Share
Copy
Want to have your highlights saved across all your devices? Sign up or sign in
Nuevo Testamento Tzeltal de Amatenango © Sociedad Bíblica de México, 2006.
