MATEO 27
27
Te Jesuse akꞌot entregal ta skꞌab te jPilatoe
1Sakubix kꞌinal a te statal saserdoteetik sok te moletik yuꞌun te juriyoetike ba snop skꞌopik te ya yakꞌik ta milel te Jesuse. 2Xchukojik bael sok kꞌo yakꞌik entregal ta skꞌab te Poncio Pilatoe te ay ta gobiernoil yuꞌun a te Romae.
Tuti cham te Judase
3Te Judas, te akꞌawan entregale, la yil te tutꞌil chapbotix skꞌoplal ta milel yuꞌunik te Jesuse. Jicha sujt skꞌop. Ba sujtesbey te treinta ta sejp plata-takꞌin te statal-saserdoteetike sok te moletike. 4Jich a yal:
—Mulawonix yuꞌun la kakꞌix ta entregal ta milel te winik te maꞌyuk smule —xchi.
Pero la sjakꞌtalanik:
—Ma kocheltikuk te joꞌotike. Jaꞌat ayix ta akuenta —xyutik.
5Jich te Judase la xchꞌoj jilel ta templo te takꞌine y ba sjojkꞌan sba ta teꞌ y teꞌ cham a.
6Te statal-saserdoteetike la stamik te takꞌine y jich a yalik:
—Te takꞌin to ma spas ya kakꞌtik ta yawil te ofrendae, yuꞌun jaꞌ stojol xchꞌichꞌel jtul winik te chonbil yuꞌun te ya xmilote —xchiik. 7La snopik ta komon te ya smanik xejt chꞌin lum te Pakꞌojibal Lum sbiile, yuꞌun jich me ay skampusanoil ekꞌa te machꞌatik talemik ta yan luware. 8Jaꞌ yuꞌun te chꞌin lume sbiilinej asta ora to Stenlej yuꞌun Chꞌichꞌ. 9Jich a kꞌot ta pasel te tut yaloj te jꞌalwanej yuꞌun Dios te Jeremias sbiile, te jicha yale:
“La yichꞌik te treinta ta sejp te plata-takꞌine te jicha kꞌot ta nopel yuꞌun te jꞌisraeletike. 10La smanik a te stenlej te Pakꞌojibal Lum sbiile, jich tutꞌil te la spason ta mantal te Kajwaltike”, xchi me.
Te Jesuse tejkꞌanot ta sit te jPilatoe
11Te Jesuse ikꞌot bael ta stojol te gobiernoe. Jich jojkꞌobot:
—¿Me jaꞌat te reyat yuꞌun te juriyoetike? —xchi.
La yal te Jesuse:
—Jaꞌat te jich ya awale —xyut.
12Pero te kꞌalal yipalik ta yalel te tut smulinej ta skꞌopik te statal-saserdoteetik sok te moletik, ni jpꞌaluk a sjakꞌ te Jesuse. 13Te jPilatoe jich a sjojkꞌobe:
—¿Mꞌen ma xꞌawaꞌiy te tut ya yalik ta atojole? —xchi.
14Pero te Jesuse ni jpaluk a sjakꞌ. Jich bayal a aꞌabiyan yoꞌtan yuꞌun te gobiernoe.
Nojp skꞌoplal ta milel te Jesuse
15Ta jujun kꞌin Pascuae kꞌayem te gobiernoe te ya slokꞌes bael jtul prexojele, chikan te genteetik te machꞌa ya stꞌujik lokꞌele. 16Ay jtul jprexojel te pujkem skꞌoplal ta bayuk te Barrabas sbiile. 17Te kꞌalal stsoboj sbaikix a te genteetike, te jPilatoe la sjojkꞌolanbe:
—¿Machꞌa ya akꞌanik te ya jkoles bael ta prexoe? ¿Me jaꞌ te Barrabase o jaꞌ te Jesus te Cristo skꞌoplale? —xchi.
18Jicha sjojkꞌolanbe yuꞌun snaꞌojbe sluwar te tutꞌil laꞌoꞌtantaybil yuꞌunik te Jesuse te jaꞌ sluwar te la yakꞌik entregale. 19Te tutꞌil nakal te ba smeltsaꞌanwan te jPilatoe, te yiname la stikonbe tal mantal: “Ma me achꞌik aba a te winik me to te maꞌyuk smule. Yuꞌun te ajkꞌubeye ben tulan a wayuchejon yuꞌun”, xchi te skꞌope.
20Pero te statal-saserdoteetik sok te moletik la yakꞌ kꞌotuk ta yoꞌtanik te genteetike te jaꞌ ya skꞌanik te ya xkol te Barrabase sok te jaꞌuk ta xlaj ta milel te Jesuse. 21Te gobiernoe la sjojkꞌolanbe xan te genteetike:
—¿Machꞌa a te ta xchebale te ya akꞌanik te ya jkoles baele? —xchi.
La yalik:
—Jaꞌ te Barrabase —xchiik.
22Te Pilatoe la sjojkꞌo xan:
—¿Tut ya skꞌan ya jpasbe te Jesuse te Cristo xchi skꞌoplale? —xchi.
Spisilik la sjakꞌik:
—¡Mila ta krus stukel! —xchiik.
23Te Pilato la yal:
—¿Tut a te ma lekuk spasoje? —xchi.
Pero mas tulan a lijkik ta aw:
—¡Mila ta krus! —xchiik.
24Te kꞌalal la yil te Pilato te maꞌyuk tut ya xjuꞌ yuꞌune, sok mas tulan xan alijk ta aw te genteetike, la stikon tal ta ichꞌel jaꞌ, y la spok skꞌab ta sit te genteetike. Jich a yal:
—Ya me jpok te jkꞌabe yuꞌun jich me ya awilik te makꞌ jchꞌik jba ta smalel xchꞌichꞌel te winik to te maꞌyuk smule. Jaꞌex me ya amulinik atukelik —xchi.
25Spisil te genteetike la yalik:
—Joꞌotik sok te kuntikiltike, ya jmulimbetik te ya xchame —xchiik.
26Jich te jPilatoe la skoles bael te Barrabase. Pero la yakꞌ ta majel te Jesuse y la yakꞌ ta entregal te ya xba milek ta kruse.
27Jich te soltaroetik yuꞌun te gobiernoe la yikꞌik ochel ta palasio te Jesuse, y la stsob sbaik tal spisil te soltaroetike y la sjoyik. 28La slokꞌesbeyik te skꞌuꞌ-spakꞌ te slapoje. La yaꞌbeyik slap tsajal palala kamixal. 29La yaꞌbeyik skoronain jalbil chꞌix ta sjol, sok la yaꞌbeyik sbara jalal ta sbatsꞌil skꞌab. Lijk skejan sbaik ta sit ta ikꞌtinwane. Jicha lijk yalik:
—¡Viva te Rey yuꞌun te juriyoetike!
—xchiik ta yikꞌtinel.
30La stubutayik y mismo te sbara jalale la smajbeyik ta sjol. 31Te kꞌalal laj yikꞌtinike, la slokꞌesbeyik te tsajal palala kamixal te slapojbeyike, y la yaꞌbeyik slap te skꞌuꞌ-spakꞌ a nix ae. Jich a yikꞌik bael, ba smilik ta krus.
Te Jesuse jojkꞌanot ta krus
32Ya to nax xlokꞌik bael a te ba tiꞌil jtejklume, la staik jtul winik te Simon sbiil te Cirene sbiil te slumale. Sujot yuꞌun te soltaroetike yuꞌun ya xkuchbe bael skrus te Jesuse. 33Teꞌ kꞌalal laj kꞌot te ba chꞌin stunlej luware Gólgota sbiil, te Yawil Bakeljolol kꞌoem te sbiile. 34Kꞌan yaꞌbeyik yuchꞌ bino te kapbil ta chꞌaal wamale, pero te Jesuse la spas prewa y ma skꞌan a yuchꞌ.
35Te kꞌalal jokꞌolix ta krus yuꞌunik ae, te soltaroetike lijk stsal sbaik ta tajmal yuꞌun ya yilik machꞌa ya xkꞌot ta suerte te skꞌuꞌ-spakꞌ te Jesuse. 36Y la snajkan sbaik ta skanantayel te ba yanil skruse. 37Te ba yajkꞌol sjol te ba skrusile la yakꞌik jun letrero teꞌa. Teꞌ tsꞌibabil a te tut sluwaril te akꞌot ta milel yuꞌune. Te letreroe jich ya yal: “Jaꞌ to jaꞌ te Jesus te Rey yuꞌun te juriyoetike”, xchi te tsꞌibabile.
38Sok ay chaꞌtul jꞌelekꞌetik te la yichꞌ jojkꞌanel ta krus sok. Jtul ta sbatsꞌil y jtul ta xkꞌexom. 39Te machꞌatik ya xlaj kꞌax teꞌae ya sutilan sjolik ta yikꞌtinel. 40La yalik:
—Jaꞌat ya awal te ya ajim te temploe sok te oxeb nax kꞌaal ya achaꞌ-apas xan ta akꞌope, koltaya aba atukel kiltik. Teme jich te jaꞌat Xnichꞌanat te Diose, koan tal te ba kruse —xchiik ta yikꞌtinel.
41Jich a yikꞌtinik euk te statal-saserdoteetike sok te maestroetik yuꞌun te mantaliletike sok te fariseoetike sok te moletike. Jich a yalbe sbaik:
42—La skoltay te yanetik, pero ma xjuꞌ yuꞌun ya skoltay sba stukel. Teme jich te jaꞌ rey kuꞌuntik joꞌotik te jꞌisraelotike, aꞌ kouk tal te ba kruse. Jich me ya jchꞌuuntik euk. 43Teme jaꞌ xchꞌuunej te ya xkoltayot yuꞌun te Diose, aꞌ me koltayek yuꞌun ora to teme jich ya skꞌan te Diose. Jich a yal te jaꞌ Xnichꞌan Dios ta skꞌope —xchiik.
44Sok la yikꞌtinik Jesus euk te jꞌelekꞌetik te pajal jokꞌajtik ta krus soke.
Jicha cham te Jesuse
45Ol kꞌaal a ijkꞌub spisil te balmilale, jaꞌ to kꞌalal ta las tres mal kꞌaale. 46Xnopetix las tres mal kꞌaal a tulan a kꞌopoj te Jesuse:
—Eli, Eli, ¿lama sabaktani? —xchi ta kꞌop, jaꞌ bi: —Dios kuꞌun, Dios kuꞌun, ¿tuꞌun te la ajilesone? —xchi te tuti yale.
47Te machꞌatik teꞌeyik aye la yaꞌibeyik sluwar. Jich a yalik:
—Jaꞌ ya yikꞌ tal te jꞌElias te jꞌalwanej yuꞌun te Diose —xchiik yuꞌun.
48Ay machꞌa animaltik a ba sle tal esponja yuꞌun ya smul ta chꞌaal bino. La slujtanbe moel ta jalal, la stijiltesbe moel yuꞌun ya yuchꞌ te Jesuse. 49Te yane la yalik:
—Teꞌ yil a. Ya jmalitik me ya xtal koltayek yuꞌun te jEliase —xchiik.
50Tulan a awun xan te Jesuse y cham. 51Mismo tiempo a te spakꞌal templo te makal aye chꞌiꞌ koel ta sba kꞌalal ta yeꞌtal. Nijk te balmilale, sok laj jat te chꞌentikile. 52Jam te ba mukajtik te animaetike, sok chaꞌkux tal stiꞌbalulik bayal te machꞌatik jun yoꞌtan xchꞌuunej Dios a laj chame. 53Jicha lokꞌik tal te ba mukajtike te kꞌalal chaꞌkuxix a te Jesuse. Ochik bael te ba chꞌul jtejklum Jerusalen. Te kꞌo ilek yuꞌun bayal genteetike a.
54Te kapitane sok te soltaroetike te yipalik ta skanantayel te Jesuse la yilik te nijk te balmilale sok spisil te tuti kꞌot ta pasele. Jun xiꞌel a yichꞌik. Jich a yalik:
—Jicha nix a te jaꞌ Xnichꞌan Dios te winik to —xchiik yuꞌun.
55Ay bayal antstik te jakal to ayik ta skꞌeluyele. Jaꞌ te machꞌatik a stsꞌakliyik te Jesuse kꞌalal ta Galilea te la yakꞌ sbaik ta abatinel yuꞌune. 56Teꞌ ayik sok a te xMaria Magdalena, sok te xMaria te smeꞌ Jacobo sok Jose, sok euk te smeꞌ te yuntikil Zebedeoe.
Te Jesuse ba mukek
57Xꞌijkꞌubix a te kꞌinale kꞌot jtul jkꞌulej winik te Jose sbiile te talem ta jtejklum Arimatea. Jaꞌ mismo euk te la stsꞌakliy te Jesuse. 58Te Josee ba skꞌopon te jPilatoe yuꞌun ba skꞌanbe te stiꞌbalul te Jesuse. La yakꞌ mantal te jPilatoe te ya xꞌaꞌbot yichꞌ baele. 59Te Josee la yichꞌbe bael te stiꞌbalul te Jesuse, la spotsbe ta achꞌ sakil pakꞌ, 60y ba yotses jilel ta achꞌ chꞌen te yakꞌoj ta jutel jpꞌej ton te ba slume. La smakbe jilel te stiꞌil xchꞌenale ta jpꞌej mam mukꞌul ton y bajt. 61Te xMaria Magdalenae sok te jtul xan xMariae teꞌ nakajtik jilel te ba stiꞌil te chꞌene.
Kanantaybil te ba mukul te Jesuse
62Ta yan kꞌaal te jaꞌix te skꞌaalel kuxo-oꞌtane, te statal-saserdoteetik sok te fariseoetike ba skꞌoponik te jPilatoe. 63Jich a yalbeyik:
—Ajwalil, ya to jnaꞌtik te la yal te jloꞌlawaneje: “Ya xchaꞌkuxon tal ta yoxebal kꞌaal” xchi te kꞌalal kuxul to aye. 64Jich yuꞌun ala mantal te yauk xba kanantayek ta lek oxebuk kꞌaale te ba mujkeme. Repente ya xtal ta ajkꞌubal te jnopojeletik yuꞌune y ya yelkꞌanbeyik bael te stiꞌbalule. Porke teme juꞌ yuꞌunik te ya slokꞌesbeyik te stiꞌbalule, jich me ya xlijk yalbeyik te genteetike: “Chaꞌkuxemix tal te ba animaetike”, tem xchiike. Teme jicha kꞌote, mas pewor me ya xlijk ta loꞌlayel a te genteetike ke te tutꞌil loꞌlalanot te nail toe —xchiik.
65Te jPilatoe la yal:
—Jichuk. Teꞌ ay te soltaroetike te ya xba skanantaye. Baanik sok. Baan makaik lek te ba mukule. Anaꞌojik te tut ya awutike —xyut.
66Jicha ba yakꞌik ta kanantayel. La smakik lek te ba mukule y la yaꞌbeyik seyo te smajkile, sok la yakꞌik jilel ta skanantayel te soltaroetike.
Currently Selected:
MATEO 27: AMANNT
Highlight
Share
Copy
Want to have your highlights saved across all your devices? Sign up or sign in
Nuevo Testamento Tzeltal de Amatenango © Sociedad Bíblica de México, 2006.
