MATEO 4

Te pukuje tal yilbe yoꞌtan te Jesuse

1Te Jesuse ikꞌot bael ta tꞌantꞌan kꞌinal yuꞌun te Espiritue, yuꞌun ya xꞌilbot yoꞌtan yuꞌun te pukuje. 2Te Jesuse maꞌ weꞌ kuarenta kꞌaal y kuarenta akꞌubal, y beno wiꞌnaj. 3Jaꞌ yuꞌun te pukuje tal yilbe yoꞌtan te Jesuse. Jich a yal:

—Teme jich awal te Xnichꞌanat te Diose, albeya i tonetik to te ya xkꞌajtaj ta waje —xchi te pukuje.

4La yal te Jesuse:

—Tsꞌibabil ta Sjun Dios te ma jaꞌuk nax waj te ya xkuxuyin a te genteetike. Jaꞌ ya xkuxuyinik yuꞌun spisil te tut ya xlokꞌ ta stiꞌ te Diose —xchi te Jesuse.

5Te pukuje la yikꞌ bael te ba chꞌul jtejklum Jerusalen te Jesuse. Kꞌo stejkꞌan ta jol mukꞌul templo, 6y la yalbe:

—Teme jich te Xnichꞌanat Diose, chꞌoja aba koel, yuꞌun jich tsꞌibabil ta Sjun Dios:

“Te Diose ya yalbe mantal te chꞌul angeletik yuꞌune ya xtal skanantayat. Ya me xchoyat ta skꞌabik, jich makꞌ xꞌejchꞌenajat yuꞌun te tone”, xchi me

—xchi te pukuje.

7La yal te Jesuse:

—Sok jich tsꞌibabil euk: “Ma me xꞌawilbe yoꞌtan te Kajwaltik Dios awuꞌune”, xchi me —xchi.

8Ta último te pukuje la yikꞌ bael te Jesuse ta jun toyol wits. Teꞌ la yaꞌbe yil a spisil sjoylejal te balmilale sok te stsaꞌamul te tutik ay yuꞌunik. 9Y la yalbe:

—Teme ya akejan aba ta jtojole ya me kaꞌbeyat spisil tsꞌin to —xchi te pukuje.

10La yal te Jesuse:

—Baan, kꞌeja aba Satanas. Jich tsꞌibabil:

“Jaꞌ nax me ya akejan aba ta stojol te Kajwaltik Dios awuꞌune sok jaꞌ nax me ya awakꞌ aba ta abatinel ta skuenta stukel”, xchi me —xchi.

11Jich te pukuje la sjiles te Jesuse. Jaꞌ a tal te chꞌul angeletike, y lijk yakꞌ sbaik ta abatinel.

Te Jesus lijk ta aꞌtel ta estado yuꞌun Galilea

12Te kꞌalal la yaꞌiybe sluwar Jesus te ochemix ta prexo te Juane, sujt bael ta estado yuꞌun Galilea. 13Pero ma jalaj te ba jtejklum Nazarete. Jicha ba kuxuyinuk ta jtejklum Capernaum te ay ta tiꞌmare. Namey jaꞌ slum te stsꞌumbal Zabulon sok te stsꞌumbal Neftalie. 14Jaꞌ kꞌot ta pasel te tut tsꞌibabil jilel yuꞌun te jꞌalwanej yuꞌun Dios te Isaias sbiile:

15“Te slum Zabulon sok te slum Neftali te ba ay sbelel te mare kꞌalal ta jejch ukꞌum Jordan, ta slum Galilea te ba kuxajtik te machꞌatik ma juriyouke, 16te jtejklum teꞌa te ayik ta ijkꞌal kꞌinale tilemix mukꞌul lus ta skuentaik. Jun mukꞌul lus te tilemix ta skuentaik te machꞌatik ay ta skuenta kastigoe”, xchi me.

17Jaꞌix yorail a te Jesuse lijk yal ta bayuk nax ta skuenta te genteetike te lek yachꞌil kꞌop yuꞌun te jkoleltike. Jich a yal:

—Sujtesa awoꞌtanik yuꞌun te amulike yuꞌun ya xlijkix ta pasaw ta mantal te Diose —xchi te Jesuse.

Te Jesuse la yikꞌ tal chantul jtsak-chayetik yuꞌun ya sjoyin

18Yipal bael ta beel a te Jesuse ta tiꞌtiꞌmar yuꞌun Galilea, la yil cheb winketik te jun smeꞌ statike. Simon sbiil te jtule y Andres sbiil te yitsꞌine. Jaꞌ yaꞌtelik te tsak-chaye, sok yipalik ta xchꞌojel ochel te stsajkil-xchayik te ba jaꞌe. 19Te Jesuse la yalbe:

—Laꞌ joyinaikon. Ta ora to jaꞌ awaꞌtelik ya xkꞌot te ya atsob tal genteetik te jkuenta —xchi.

20Jich a sjilesik ta ora te stsajkil-xchayike, y la soyinik bael.

21Been xan bael chꞌinuk te Jesuse te la yil xan cheb winketik te jun nax smeꞌ-statike, jaꞌ te Jacobo sok Juan te xnichꞌnab Zebedeoe. Teꞌ ayik ta barko asok te statike. Yipalik ta stsꞌaktalanel te stsajkil-xchayike. La yikꞌ te Jesuse. 22Ora nax a sjilesik te sbarkoike y sok te statike. La soyinik bael te Jesuse.

Te Jesuse la spꞌijutes bayal genteetik

23Been ta spꞌejel estado yuꞌun Galilea te Jesuse. La spꞌijuteslan ta sinagogaetik te ba xkꞌax kꞌael ta beel. La yaltalanbey yaꞌiy te lekil achꞌ kꞌop yuꞌun te mukꞌ Dios te ay ta chꞌulchane. Sok la slekuteslan spisil te tutikuk chamelil te ay ta stiꞌbalul te genteetike sok tutik a te kꞌux ta aꞌiyele. 24Pujk skꞌoplal te Jesuse ta spꞌejel estado yuꞌun Siria. La yikꞌtalanik tal ta skuenta te jayeb machꞌatik ayik ta chamele, chikan te tutikuk chamelil te kꞌux ya yaꞌiy ta stiꞌbalulike. Ay machꞌatik ochem pukuj ta yoꞌtanik sok ay machꞌatik staoj tupꞌtupꞌ-ikꞌal sok ay machꞌatik kꞌolbil yok-skꞌabik te la slekuteslan te Jesuse. 25Bayal genteetik la stsꞌakliyik ta beel. Ay Galileaetik, sok ay machꞌatik talemik ta jtejklum Decapolis, sok ta mukꞌul jtejklum Jerusalen, sok ta estado yuꞌun Judea, sok ta jejch ukꞌum Jordan ta stojil slokꞌib kꞌajkꞌal.

Currently Selected:

MATEO 4: AMANNT

Highlight

Copy