San Mateo 24

Nʌmu Jesús que maŋba jyu'mbʌ'yaju te' templo

(Mr. 13.1-2; Lc. 21.5-6)

1Tzu'cumu Jesús te' templo'ojmo, y nʌwa' inʌc myaŋu. Y tʌs, te' quiʌ'aŋmaye's, ŋgʌnu'cʌyutʌs wa'ytyʌs nyajquenu jutz sa'sa chʌquiaju te' templo. 2Pijche'ca Jesujsis aŋdzoŋutʌj: ¿Nʌja nʌmaya'tamu yʌ' templo? Wiyuŋše'ʌsmij ndzamjaytyamba que ja'n maŋu chʌ'yu yʌy necsco'mupʌ tza' cha'tʌwʌcʌsi. Mumu yʌ' maŋba jyu'mbʌ'yaju.

Quiotzambapʌ tiyʌ's yajpa'ca najsacopac

(Mr. 13.3-23; Lc. 21.7-24; 17.22-24)

3Y teymʌ pocscu'c Jesús Olivo-tʌc pu'mnacʌsi ŋgʌnu'cʌyutʌs, tʌs te' quiʌ'aŋmaye's, wa'ytyʌs nʌnu'mdzamu, y ŋgʌ'aŋwa'cutʌs: Tzamjaytyʌ'ʌtʌj, ¿jujche'casʌ'ŋde' maŋba tyujcu yʌ'šejta'mbʌ tiyʌ? y ¿tiyʌ'sasʌ'ŋ maŋba quiotzamu maŋba'camij minu, y maŋba'ca yaju yʌ' najsacopac?

4Y aŋdzoŋu te' Jesús y nʌjayutʌj: Coquendamʌ cuenta umij 'yaŋgoma'cʌytyamu ya'iwʌ's. 5Porque maŋba miñaju wʌwʌ pʌn ʌs nʌquiʌsi sujchajpawʌ, y maŋba ñʌmyaju: Ʌjte' te' Cristo. Y wʌwʌ pʌn maŋba 'yaŋgoma'cʌyaju. 6Maŋbamis mustamu que nʌ quipʌnʌmu, y que nʌ chamyaju quipcuy emʌ. Pero uy na'tztame porque te'šejte' pyʌcpa wa'y tyujcu, pero ja'nmajte' maŋu yaju najsacopac. 7Porque maŋba ñʌquijpu nacio'ŋis te' eyapʌ ñacion-dʌwʌ, y gobierno's te' eyapʌ gobierno-tʌwʌ. Y maŋba ijtu yatzi-ca'cuytya'm, yu' y mi'cscʌ' yʌmʌc teymʌc. 8Yʌ'šejta'mbʌ tiyʌ tzo'tzcumyajte'. Maŋbamaj quieñaju maya'aŋda'mbʌ toya pʌ'nista'm.

9Te'ta'mbʌ jamo'oyj maŋbamij ŋgui'nisʌtʌjtamu mumu pʌ'nis, y maŋbamij nyacsnutzʌcʌtʌjtamu y nyajca'ʌtʌjtamu porque ŋgo'ŋdambamisʌj. 10Pijche'ctijque' soneta'mbʌ'sʌj maŋba wʌ'aŋja'maŋjejyaju. Y maŋba ñachi'oquia'ʌtʌjyaju y ñaqui'nisʌtʌjyaju. 11Y jene maŋba ijtu chʌquichʌquita'mbʌ tza'maŋwa'oye, y wʌwʌ pʌn maŋba 'yaŋgoma'cʌyaju. 12Y como jene maŋba ñʌcʌpo'yaju te' yacha'cuy, uša'ŋbʌndya'a maŋba ñašunʌtʌjyaju. 13Pero iwʌ'sʌj co'ŋjojcʌtʌcpa hasta que ca'pa, yʌ'wʌte' cotzocpa. 14Y naswindumʌ maŋba chamgopuŋyaju te' evangelio chambapʌ's jutz aŋgui'mba Dios, wa'y myujšaju mumu najsacopajcʌsita'mbʌ pʌ'nis. Pijche'cte' maŋba yaju najsacopac.

15Te' tza'maŋwa'opyapʌ Danie'lis jya'yʌyu que maŋba myaŋgocʌtʌquiaju te' masanbʌ lugar, y chʌctocoyaju. Iwʌ's tyu'nba yʌ'šej chambamʌy, yajnʌctʌ'yʌ. Nguendamba'camis yʌ'še'a nʌ tyujcu, 16pijche'c te' Judea-najsojmo ijtyajuwʌ yajpoya wa'y myaŋyaju tza'mo'mo. 17Y iwʌ tʌjcʌcopajcʌsi ijtu, wanajcu'ca, u'ya maŋu ñʌpujtu yajtiyʌ tyʌjcojmoc. 18Y te' ca'mo'mo nʌ yojsupʌ u'ya wyitu'u tyʌjcaŋʌ wa'y maŋu pyʌjcu te' ñu'soquiuy. 19Pero te'ta'mbʌ jamo'oyj jene maŋba tyoyapʌquiaju checji'ŋda'mbʌ yomo, y te' ijtyajupʌ's tzu'chajpapʌ 'yune. 20Wa'ctamʌ jeque Dioscʌsi umij pacac aŋsʌ'ŋoyj o sabado-jamo'oyj maŋu mbyoytyamu. 21Porque te'ta'mbʌ jamo'oyj maŋba ijtu maya'aŋbʌ toyapʌjcuy yajujche'cmaj ja'itʌpʌ desde que tzo'tzu yʌ' najsacopac hasta pijche'c, ni ja'na maŋu itque'tumaj te'šejpʌ toyapʌjcuy. 22Y juca Diojsis ja'n yajco'nʌy te' toyapʌjcuy-'yaŋsʌŋ, ya'iwʌ inʌc ja'n quiotzoque. Pero ñe'cʌ's maŋba yajco'nʌyu te' toyapʌjcuy-'yaŋsʌŋ wa'y quiotzoquiaju ñe'cʌ's quiopiŋyajupʌ pʌn.

23Pijche'ca juca iwʌjutiwʌ'smij ñʌjaytyamba: Quena, yʌy ijtu te' Cristo, o juca ñʌjaytyambamij: Teymʌ ijtu. Uy wʌ'aŋjamdame. 24Porque maŋba chu'cumyaju chʌquichʌquita'mbʌ Cristo y tza'maŋwa'oyeta'm. Y maŋba chʌquiaju maya'aŋda'mbʌ tiyʌ y isaŋwʌ'ajcuy wa'y 'yaŋgoma'cʌyaju hasta te' Diojsis quiopiwita'm, juca inʌc pya'tyajpa jutz. 25Yʌtij nʌytya'mʌsmij ndzamjaytyamu maŋbamaj tyuquiajupʌ tiyʌ. 26Te'šej jeque juca ñʌjatʌjtambamij: Ʌmʌ ijtu te' Cristo ja'itʌnʌmʌmʌy, ʌsmij nʌjaytyamba: Uy maŋdame. Y juca nʌmyajpa: Tey ijtu tʌjcojmo, ʌsmij nʌjaytyamba: Uy wʌ'aŋjamdame. 27Porque maŋba'camʌj mingue'tu, ʌj te' Pʌ'nis 'Yune, ja'nʌj maŋu minu nu'mdij. Mumu pʌ'nisʌj maŋba queñaju jujcha' quieñajpa ne'mgʌ' sʌ'ŋjojpacpapʌ chojtaŋgʌsmʌc y hasta tyʌ'paŋgʌsmʌc.

28Jutʌ ijtu ca'uwʌ tiyʌ tey maŋba tyu'mʌyaju te' ju'qui.

Jutz maŋba minu te' Pʌ'nis 'Yune

(Mr. 13.24-37; Lc. 21.25-33; 17.26-30,34-36)

29Y cʌtʌjcu'ca pijche'cta'mbʌ toyapʌjcuy, maŋba pyi'tza'u te' jama, y te' poyaj ja'na maŋu šʌ'ŋu. Te' matzata'm maŋba quiuñaju tzajpojmoc, y te' tzajpojmo ijtyajupʌ tiyʌ maŋba myi'cspʌ'yaju. 30Pijche'ca mumu najsacopajcʌsita'mbʌ pʌn maŋba jyʌyaju y tyoyapʌquiaju nʌ'ca quieju tiyʌ'iwʌ tzajpojmo quiotzambapʌ's que nʌwa'mʌj minu, ʌj te' Pʌ'nis 'Yune. Maŋba'ʌj queñaju ʌj, nʌ'camʌj minu tzajpojmopʌ o'na'ojmo ʌs mʌja'ŋajcu'yojmo, y ʌs wʌwʌpʌ ndzi'muŋgʌ'ojmo. 31Y paqui maŋba myu'sonoñaju. Pijche'cʌs maŋba ŋgʌ'weju ʌs angelesta'm wa'y yajtu'mʌyjayaju te' ʌs ŋgopiwi-pʌnda'm mumu naswindumʌ desde chojtaŋgʌsmʌc hasta tyʌ'paŋgʌsmʌc.

32Nʌctʌ'ytyamʌ yʌ' comparación te' higo-cu'yisñe': Yawaye'ŋu'cande' te' 'yaŋmaŋ, y nʌwa' wyo'mbujtu te' 'yay, mustambamis que nʌ tyo'mʌyu te' tu'aŋsʌŋ. 33Te'šejtijque' ŋguendamba'camis mumu yʌ'šejta'mbʌ tiyʌ, nʌctʌ'ytyamʌ que nʌwa'nde' ñu'cu te' hora wa'yʌj mingue'tu. 34Wiyuŋše'ʌsmij ndzamjaytyamba que ja'n maŋu quia'yaju yʌ' yʌtijta'mbʌ pʌn hasta que tucpa mumu yʌ'šejta'mbʌ tiyʌ. 35Maŋba yaju te' tzap y te' najsacopac, pero ʌs ndzame ja'n maŋu yaju.

36Pero jujche'c y tiyʌ jama'ʌj maŋba minu ya'iwʌ's ja'n myusi, ni te' angelejsis tzajpojmo ijtyajupʌ's, sino que ʌs Ndata'stij myuspa.

37Nʌ inʌc chʌquiajušej pʌ'nista'm Noe'is 'yaŋsʌ'ŋoyj, te'še'ʌs maŋba mba'tyaju minba'camʌj, ʌj te' Pʌ'nis 'Yune. 38Maŋba'cmaj quiejcu te' mʌja tuj nʌ inʌc quiu'tyaju, y 'yuquiaju. Nʌ inʌc quio'tʌjcajyaju y šajyaju 'yune wa'y quio'tʌjcajyaju. Te'šej inʌc nʌ chʌquiaju hasta que tʌjcʌyu Noé te' arca'ojmo. 39Jawyʌ'aŋjamya tiyʌte' maŋba tyujcu hasta que quejcu te' mʌja tuj, y sucsca'pʌ'yaju. Te'šejtij maŋba tyujque'tu minba'camʌj, ʌj te' Pʌ'nis 'Yune. 40Pijche'c maŋba ijtyaju metza'ŋbʌn nʌ yojšajupʌ ca'mo'mo. Tumʌ maŋba ñʌmaŋyaju, y te' eyapʌ tey maŋba chaquiaju. 41Y maŋba ijtyajque'tu metza yomo nʌ wyayajupʌ tumʌpʌ waquiuycha'cʌsi. Tumʌ maŋba ñʌmaŋyaju, y te' eyapʌ tey maŋba chaquiaju.

42Nimejcʌyu'c jeque jo'ctamʌ, porque ja'nmis mustame tiyʌ hora'ʌj maŋba minu, ʌj mista'm Ngomi. 43Cottamʌ ŋguipsoquiu'yojmo que juca inʌc myuspa te' tʌjcomi's tiyʌ hora minba te' nu'mbawʌ, quioquenba inʌc tyʌc y ja'n inʌc chaque wa'y ñinu'myaju. 44Te'cotoya nimejcʌyu'c coquendamʌ nwin, porque ja'nmis tiyʌ nʌ ŋguipstamu'c maŋba'ʌj minu, ʌj te' Pʌ'nis 'Yune.

Te' ñijamyajpapʌ y te' ja'n ñijamyapyʌ coyosa

(Lc. 12.41-48)

45¿Iwa'sʌ'ŋde' te' ñijamyajpapʌ y nʌctʌ'yopyapʌ coyosa, te' quiomi's quiojtupʌ te' ñe' quioyosacʌsita'm wa'y pyʌ'nʌyaju nu'cpa'ca hora? 46Dichosopʌte' te' coyosa juca te'šej nʌ chʌjcu'c minba'ca te' quiomi, y te'šej pya'tpa. 47Wiyuŋše'ʌsmij ndzamjaytyamba que te' quiomi's maŋba quiojtu te'wʌ mumupʌ ñe' itʌpa'tcuquiʌsi jujcha' co'aŋgui'moye. 48Pero juca yatzipʌte' te' coyosa, y nʌmba choco'yojmo: Ʌs ŋgomi maŋbamaj ya'yu wa'y minu. 49Pijche'ca tzo'tzcʌ'pya wa'y tyochʌquiaju quioyosa-tʌwʌ, y maŋba quiu'tu y 'yujcu ño'tpawʌji'ŋda'm. 50Maŋba minu te'wʌ's quiomi ja'n nʌ ñijamupʌ jamo'oyj ni ja'n myusipʌ hora'oyj. 51Y maya'aŋ maŋba yajnʌco'aŋgʌyu te'wʌ te' quiomi's. Y maŋba tyumʌcojtu wʌ'aŋjamba chʌcpaji'ŋda'm. Tey maŋba jyʌyaju y toyapit maŋba quiʌ'tyaju tyʌtz.

Currently Selected:

San Mateo 24: ZCNT

Highlight

Copy